Ir al contenido

Ir al índice

 KJOAʼMIYA 32

Kjoañʼai xi te

Kjoañʼai xi te

CHÓTSENLALAI ngayeje sén xi faʼaitʼa ibi. Kui bakóná nga jngó jngó kjoañʼai xi kisikasén Jeobá ya Egipto. Je xi títjonsí matsen kʼia nga tsakále yále Aarón ya xongá Nilo. Kʼoa je nandá jnjín tsakʼóya, kʼoa je jti̱ xi ya tjíongindá kʼien, kʼoa chʼao kinje je xongá.

Xijekoan, xke̱ kitjojin ya xongá Nilo kʼoa je Jeobá xokisʼin. Kʼoa kisʼe xke̱ tojñani, ya ngajá, ya tií jña kisindáya naʼyo, kʼoa kao ya nachanle. Kʼianga je kʼien je xke̱, nkjín jtín koanni nga tsakʼéxkó chjota Egipto, kʼoa chʼao kinje ngakjijnda naxinandá.

Xijekoan, je Aarón tsakále tʼanangi kao yále kʼoa je chao kui tsakʼóya natse xi i̱ natjío, xi fitjen kʼoa bʼéná. Kui jebi xi koanjanni kjoañʼai.

Je kjoañʼai xi ngikʼa tojé kisikiʼaon chjota egipcio, likui je kisikiʼaon chjota israelita. Je xi koanñoni kjoañʼai chíjtóyʼai tsʼatsen kʼoa chíjtóyʼai xokjoan kisʼen yandʼiale ngatsʼi chjota egipcio. Xi koan aonni kjoañʼai cho̱ kisikiʼaon. Nʼio nkjín nrajale, barréle kʼoa kao tindsole chjota egipcio kʼien.

Xijekoan, Moisés kao Aarón kisikʼatsaojinsén chaolʼí, kʼoa jtsé kisikale chjota kao cho̱. Kui xi koanjaonni kjoañʼai.

Xijekoan, tsakjénngʼa ntsja Moisés ya ngʼá, kʼoa Jeobá kisikasén chʼaon kao jtsílao. Kjesa kʼoamajin jtsílao xi bʼanele Egipto jokoan nga kʼia.

Xi koanjinni kjoañʼai nʼio nkjín cho̱ langosta kichóne Egipto. Nisa ñandiajin nga kʼoasikji cho̱ langosta faʼaine, kʼoa nikʼiajin tikʼoakoanni. Kiskine ngayeje xi tsín kisikjeson je jtsílao.

Xi koanñajanni kjoañʼai kinijnjiole. Jan nichxin nga ñaki nitjen koanchon ya Egipto, tonga jña tsakatio chjota israelita isen koanchon.

Xi to jetʼani, Niná kʼoakitsole naxinandále nga jnjínle tindsoʼndí kʼoa tsa jnjínle barréʼndí katasíkajon ndai xo̱ntjoa ndʼiale. Xijekoan, je ánkjele Niná kichó ya Egipto. Nga tsabe ndʼia xi jnjín yajon, likui ʼya xi kisikʼien. Tonga jña tsín jme jnjín yajon, kisikʼien je ʼndí xi títjon kitsin, kʼoa kao cho̱ xi títjon kitsin. Kui jebi xi koanni te kjoañʼai.

Xije kichó kjoañʼai jebi, Faraón kitsjoaʼndele nga kitjo chjota israelita, kʼoa je chjota israelita toje tjíonda nga kuitjo kʼoa tikuikjoanni nitjen kitjoni ya Egipto.