Ir al contenido

Ir al índice

 KJOAʼMIYA 18

Jacob ya fi ʼnde Harán

Jacob ya fi ʼnde Harán

AʼYANÍ ʼyáni chjota xokjoan tífakao Jacob. Nga je nkjín nichxin tsoʼba Jacob, ya kisatejin ya chrian jña tíjna jngo xjáonandá. Barréle tjíosíkuinda. Jacob kitsole: “Jñáni tsaon”.

“Ya Harán”, kitso.

“A ʼyaño Labán”, kitso Jacob.

“Jaon”, kitsole. “Koeñá, nroaya Raquel tsotile xi tjenkaosí barréle Labán”. A tiʼyaní Raquel nga nroachrian.

Kʼianga tsabe Jacob je Raquel nga tjenkao barréle Labán, je tsinile, kikjaʼáxín lajao xi kijnane ya xjáonandá nga koa̱n skʼuí nandá je barré. Xijekoan, Jacob tsakʼéndsoʼa Raquel kʼoa kʼoakitsole ʼyani je. Nʼio tsjoa koanle Raquel, kʼoa ki ndʼiale nga kikʼéyanajmíle Labán je nʼaile jmeni xi koan.

Nʼio tsjoa koanle Labán nga ya tsakʼejnani Jacob ya ndʼiale. Kʼianga kʼoakitso Jacob nga mele je kuixankao Raquel, tsjoa koanle Labán. Tonga kʼoakitsole Jacob nga ñato nó katasíxá ya jinxjoele xi tʼatsʼe Raquel. Kʼoakisʼin Jacob, nga nʼio tsjoake koan Raquel. Kʼianga je kichó nichxin nga kuixan, a ʼyaní jmeni xi koan.

Labán je kitsjoale Jacob tsotile xi majchínga, xi Lea ʼmi, ʼndele nga Raquel tsjoále. Kʼianga ijngokʼa tsakʼéndajin Jacob nga ngi ñato nó sixákao Labán, Labán kʼoati kitsjoale Raquel nga chjoónle koan. Nga kui nichxin kitsjoaʼndele Niná je chjota nga nkjín yánchjín kisʼele. Tonga ndʼaibi, tojngo chjoón xi koa̱n sʼele chjota tojosʼin bakóya Biblia.