Ir al contenido

Ir al índice

 KJOAʼMIYA 16

Jngo chjoón xi ndasʼín kikijnyile Isaac

Jngo chjoón xi ndasʼín kikijnyile Isaac

A ʼYAXKONNÍ ʼyáni chjoón xi faʼaitʼasí ibi. Rebeca ʼmi. Kʼoa je chjota xi tífikonsíle Isaac ʼmi. Chjoónle koan. Jókoannile.

Je Abraham, nʼaile Isaac, koanmele nga jngo chjoón xi ndasʼín sʼele je ʼndíle. Likui koanmele nga je yánchjín xi ya tsʼe Canaán chixankao Isaac, nga je chjota xi ya tsʼe niná ndiso tsakʼétsʼoale. Kuinga je Abraham kinchjasínile choʼndale kʼoa kitsole: “Mena nga ya kʼuin jñani tjío xíngia ya Harán kʼoa jngo chjoón tjasjailai je ʼndína Isaac”.

Kjitʼanangi te camello kiskoe je choʼndale Abraham kʼoa ki. Kʼianga je kichochrian ya ʼnde jñani tjío xínkjín Abraham, ya tsakʼejna jñani tíjna jngo xjáonandá. Toje kjimajnjio, kʼoa kʼia bichókʼá nandá je yánchjín xi ya ʼndele. Kuinga je choʼndale Abraham tsakʼétsʼoasínile Jeobá, kitsole: “Je chjoón xi tsjoána nandá kʼoa tsjoále tsanda je camello jení chjoón xi ji tichjoejin xi chjoónle koa̱n Isaac”.

Tiʼa kichokʼáni nandá Rebeca. Je choʼndale Abraham kisijéle nandá kʼoa kitsjoale. Xijekoan, kitsjoale nandá ngatsʼi camello nga nʼio fatile. Nʼio kisixá Rebeca, kʼoajin nga je camello nʼio tse nandá ʼbi.

Kʼianga je jetʼale Rebeca, je choʼndale Abraham kiskonangile jóʼmi nʼaile. Kʼoati kiskonangile tsa koa̱n ya kʼoéjna jngo nitjen ya ndʼiale. Rebeca kitso: “Nʼainaní Betuel, kʼoa tiʼndé ndʼiana jña koa̱n kuijnai”. Je choʼndale Abraham tokʼoa jebe nga je Betuel ʼndíle mani Nacor je ndsʼe Abraham. Kuinga tsakasénxkónyʼinsíni kʼoa kitsjoasínile kjoanda Jeobá nga ya kichokao jña tjío xínkjín Abraham.

Nga kui nichxin nga je koanjnjio, je choʼndale Abraham kʼoakitsole Betuel kʼoa kao Labán je ndsʼe Rebeca jme xá kichoni. Kʼoa nga jao kʼoakitso nga koa̱n koaikao Rebeca kʼoa nga koa̱n kuixankao Isaac. Jókitso Rebeca nga kichjonangile. Jaon kitsoní, kʼoakitso nga mele koai. Kʼianga je koannyaonni tsakatiosonle camello kʼoa ki ya ʼnde Canaán.

Je koanjnjio kʼianga kichó Rebeca. Jngo chjota tsabe xi ya tsoʼbajin jinxjoe. Jéní Isaac. Tsjoa koanle nga tsabe Rebeca. Je jan nó tjínle nga kʼien Sara je na̱le Isaac, kʼoa je tojo ba tjínle. Je Isaac nʼio tsjoake koan Rebeca, kʼoa tsjoa kisʼe ijngokʼanile.