Ir al contenido

Ir al índice

 KJOAʼMIYA 49

Je Tsʼuí likuiti kisikjanni

Je Tsʼuí likuiti kisikjanni

CHÓTSENLALAI Josué. I̱ kitso: “¡Tsʼuí liti nikjanjinni!” Kʼoa tsakʼejnajyo je Tsʼuí. Kʼoa jngo nichxin nga toya tsakʼejnaʼnde. ¡Jé Jeobá xokisikao! Tonga kataʼyala ánni nga tsín koanmesínile Josué nga kiskantjai je Tsʼuí.

Kʼianga kichokjan kao Gabaón nga aon je rey tsʼen xi tjío ya Canaán, je chjota gabaonita jngo chjota kisikasén nga kisíjéle nganʼio je Josué. Kitsole: “¡Nroanrʼoe kjitʼananginaijin! ¡Chʼasjentjainaijin! Ngatsʼi xi rey tjío ya naxinandá xi tjío ya jinnindo je tjíobʼetʼanajin xi choʼndali maijin.

Kjitʼanangi ki Josué kao chjota kjoajchánle. Tsakʼetsoma tsʼajnda nitjen. Kʼianga je kichó ya Gabaón, ngatsʼi je chjota kjoajchánle rey xi aon mani kitsokjon kʼoa kitoka. Xijekoan, jtsílaoyʼai kisikʼanele Jeobá, ngisa nkjín xi jtsílao kisikʼien tikʼoajinni xi kisikʼien je chjota kjoajchánle Josué.

Je Josué tsabe nga jeme skantjai je Tsʼuí. Kʼoa nga toje koa̱njnjio, kʼoa nga nʼio nkjín chjota kjoajchánle rey xi aon mani toka chjinga. Kuinga tsakʼétsʼoasínile Jeobá je Josué kʼoa xijekoan, kitso: “¡Tsʼuí liti nikjanjinni!” Kʼoa nga tojo tíjnasa je Tsʼuí, je chjota israelita koan kisikinje je kjoajchán.

Nʼiosa nkjín rey xi tsʼen tsakatio ya Canaán xi koanjtike je naxinandále Niná. Je Josué kao chjota kjoajchánle kantejngo rey kisikʼien ya naxinandá xokji kʼoa jaon nó kichomani. Nga je koanni, je Josué kʼoakitso nga koa̱nxkoa̱yale ʼnde Canaán je ntje̱ xi nangi koa̱nchjénle.

Nga je nkjín nó jaʼato tochan kʼien Josué, jngo siento kao te nóle nga kʼien. Kʼianga tíjnakonsa kʼoa nga tjíokonsa je miyole, je chjota israelita kisitjosonle Jeobá. Tonga kʼianga je kʼien, chʼaokisʼin chjota kʼoa kjoa kitsaojin. Kʼoa kʼiani koanchjénle nganʼiole Niná.