Ir al contenido

Ir al índice

 KJOAʼMIYA 51

Rut kao Noemí

Rut kao Noemí

YA Biblia jngo xo̱n koa̱nsjaitʼali xi Rut ʼmi. Kui bʼéyanajmí tʼatsʼe jngo niʼya chjota xi kʼia tsakatio nga kisʼe juez ya Israel. Je Rut, jngo chjoónxti xi ya tsʼe ya Moab; a litsa naxinandále Ninájin kitjenni. Tonga kʼianga tsabe Rut jotjínni xi tʼatsʼe Jeobá je Niná xi kixi, nʼio koantsjoake. Kʼoa Noemí, jngo chjoón jchínga xi tsakasenkao je Rut nga tsabe xi tʼatsʼe Jeobá.

Noemí chjoón israelita koan. Noemí kao xʼinle kʼoa kao nga jao xtile ya kikatio ya Moab kʼianga choa tsojmi xi ma chine kisʼe ya Israel. Xijekoan, kʼien je xʼinle Noemí. Kʼoa nga jao xtile Noemí jao yánchjín moabita chixankao xi Rut kʼoa Orpá tsakʼin. Xijekoanni te nó, kʼien nga jao xtile Noemí. ¡Jmé sikji tseni kjoaba! Jméni xi kisʼin Noemí.

Jngo nichxin kʼianga Noemí ki ijngokʼani ya naxinandále, kʼoa nʼio kjin. Rut kao Orpá likui koanmele nga kitsjionkon Noemí, kʼoati kikao. Tonga nga je tjenya yandia, Noemí kitsole nga jao je yánchjínʼndale. “Tikʼoasʼin tanginño naxinandáno kʼoa ya tiyokao je na̱no”.

Noemí tsakʼéndsoʼá nga jao nga tikʼoasʼin katafini. Kʼoa nga jao yánchjínʼndale kiskiʼndía, nga nʼio tsjoake koan Noemí. Kitsole: “¡Majain! Ya koannginkaolaijin jña tjío xíngi”. Tonga Noemí kitsole: “Tanginño nga jao ʼndínaa. Tongisa nda kuiyo ya jña tjío xíngio”. Xijekoan, je Orpá tikʼoasʼin kini ya naxinandále. Tonga Rut likui ki.

Noemí kitsole Rut: “Orpá je tífi. Ya tʼinkoai”. Tonga Rut kitso: “¡Likʼoajinsʼin bʼechjoanai! Tʼaiʼndenai nga kjuikaole. Jñani kʼuin, ya kjuia, jñani kuijnai, ya koatejna. Je naxinandáli, naxinandána koa̱n, kʼoa Nináli, Ninána koa̱n. Jñani kuiyái, ya kuiyá, kʼoa ya sʼeñe”. Kʼianga je kʼoakitso Rut, Noemí likuiti jokitsonile.

Xijekoan, kichó nga jao ya Israel. Ya tsakatio. Xijekoan, je Rut ya kisíxá ya jinxjoe nga kʼia tísʼexkó cebada nga kui nichxin. Jngo chjota xi Booz (Boaz) tsakʼin kitsjoaʼndele nga ya tsakʼéxkó cebada ya jinxjoele. A ʼyaní ʼyáni xi na̱le koan je Booz. Jé Rahab, xi yaná tsʼe ya Jericó.

Jngo nichxin nga Booz kitsole Rut: “Nʼio tse jmeni xi tjínjinna xi tʼatsi, kʼoa jme kjoanda xi tibakolai je Noemí. ʼBeña nga kinikʼéjnai je nʼaili kao na̱li kʼoa kao naxinandáli kʼoa i̱ jaʼaikijnai jngo naxinandá xi saʼnda tsín ʼyaxkuin. ¡Katabakóli kjoandale Jeobá!”

Rut kitso: “Nʼio tibakonai kjoanda ji nai. Ñaki nda tibʼai tokoan nga kʼoatiʼminai”. Je Booz nda kisasenkon je Rut, kʼoa xijekoanni je chixankao. ¡Nʼio tsjoa kisʼele Noemí xi tʼatsʼe jebi! Tonga ngisa ti tsjoa kisʼengánile kʼianga jngo ʼndílee kisʼele Rut kao Booz, xi Obed tsakʼin. Je Obed pajchále koanni David, kʼia jchasa xi tʼatsʼe David.