Ir al contenido

Ir al índice

 KJOAʼMIYA 48

Nʼio tsabe jokisʼin je chjota gabaonita

Nʼio tsabe jokisʼin je chjota gabaonita

NʼIO nkjín naxinandá xi ya tjío ʼnde Canaán xi tsakationda nga skaan kao naxinandá Israel. Kuinjejinle kitsojin. Tonga je chjota xi tjío ya Gabaón likui kʼoasʼin kisikjaʼaitsjen. Kʼoasʼin koankjainle nga Niná tsakasenkao je chjota israelita, kʼoa likui koanmele nga kao Niná skaan. Kuinga, a ʼyaní jmeni xi kisʼin je chjota gabaonita.

Joxi nʼio kjin ʼndele kisʼin. Kʼoa najño kixijnda tsakʼakjá kʼoa kui tsakjáya je jténʼó xi je jchá. Kʼoa naxá kixijnda kisikʼa búrróle kʼoa nioxtila taja tsakʼa. Kʼoa xijekoan, kinrʼoe Josué kʼoa kitsole: “Jngo naxinandá xi nʼio kjin kanroanijin, nga kinoʼyanijin xi tʼatsʼe Nináno Jeobá nga nʼio jeya tíjna. Kinoʼyanijin ngayeje jmeni xi kisʼin xi tʼatsaon ya Egipto. Je chjota xi tjíotítjonnajin kʼoakitsonajin nga koationdaijin tsojmi xi chinaijin yandiaa kʼoa nga i̱ kjoaʼaikʼinlaijin: «Choʼndali maijin. Kʼoatʼinnaijin nga tsín josikaonaijin». Tiʼyaño nga je tífe najñonajin nga kʼoasikji kjin kinroanijin, kʼoa je koantaja kʼoa koantsjo nioxtila xi kichʼaijin”.

Je Josué kʼoa kao chjota xi ngikʼa xi tjíotítjon koankjainle jme xi kitso je chjota gabaonita. Je chjota israelita kʼoakitsole nga tsín skaan xi kao je. Tonga xi koanjanni nichxin kʼiani tsabe nga yani chrian tsʼe je chjota gabaonita.

Je Josué kitsole je chjota gabaonita. “Ánni nga nʼio kjin naxinandá kinroanijin tsakʼinsíninaijin”.

Je chjota gabaonita kitso: “Kuinga kʼoatsakʼinnajin nga kʼoakitsono Nináno Jeobá nga tsjoáno ngayeje nangi xi tjín i̱ Canaán. Kʼoa kinokjonnijin tsa sikʼiennaijin”. Je chjota israelita kisitjoson jme én xi kitso, kʼoa likui kisikʼien je chjota gabaonita. ʼNdele nga sikʼien, tosa choʼndale kisikao.

Je rey xi tsakʼejna Jerusalén koanjtile kʼianga nyʼán tsakatio je chjota gabaonita kao naxinandá Israel. Ño rey xi i̱ kitsole: “Nroao kʼoa tisenkaonao nga kuixkán kao Gabaón”. Kʼoa nga aon rey xokjoan kinrʼoe je Gabaón. Kʼoa nga kʼoani koantʼain je chjota gabaonita, a nda kisʼin nga kjoanyʼán tsakásjai kao naxinandá Israel. Kataʼyala.