Ir al contenido

Ir al índice

 KJOAʼMIYA 34

Jngo tsojmi chjotse xi ma chine

Jngo tsojmi chjotse xi ma chine

A ʼYANÍ jméni xokjoan tjíobʼéxkó je chjota. Jo nyʼán sʼin matsen. Chxoa kjoan, xjoe kjoan, joxka̱ kjoan, kʼoa i̱ natjío. Tonga litsa nyʼánjin; jngoní tsojmi xi ma chine.

Tokʼiala jngosá jaʼato nga kitjoni ya Egipto je chjota israelita. Ya tjío ya ʼndekixí. Tochoa tsojmi sʼe ya, kʼoa je chjota israelita tsakjayojée kʼoa i̱ kitso: “Tsa tosa ya Egipto kisikʼienná Jeobá. Tosaná bichaa tojotjín mená”.

Kuinga kʼoakitsosíni Jeobá: “I̱ tjen ngʼajmi sikʼaña tsojmi xi ma chine”. Kʼoa kʼoakisʼin. Kʼianga koannyaonni, kʼianga je tsabe je chjota israelita je tsojmi xi chxoa kjoan kitsao, i̱ kitso: “Jméni xokjoan”.

Moisés kitsole: “Kui jebi tsojmi xi títsjoáno Jeobá xi kuicho”. MANÁ kitsole chjota. Je maná jo nioxtila xi ntsjén tjínle bichi.

“Kʼoatjín tʼexkó nga jngó jngó jotjín kuicho”, kitsole Moisés je chjota. Kuinga tajnjio tajnjio tsakʼéxkósíni. Kʼianga je masje ndoá, je maná xi to tjíotsʼotjen manandání.

Moisés i̱ kitsosale: “Liʼyajin xi maná batíotjao saʼnda nga koa̱nnyaonni”. Tonga tjínkʼa xi kʼoakisʼin. A ʼyaní jméni xi koan. ¡Nga je koannyaonni je maná xi kisikatíotjao chitson kʼoa koancho̱ndo kʼoa chʼao kinje!

Tonga Jeobá kʼoakitsole nga jngo nichxin nga xki̱ xomana nga jaoya kʼoakji maná kʼoexkó. Kui nichxin xi majaonni. Kʼoa kʼoakitsole Jeobá nga basen katabatíotjao xi skine nga koa̱nnyaonni, nga likui jme xi sikʼa nga koa̱nñatoni nichxin. ¡Je maná xi tsakatíotjao xi kiskine nga koanñatoni nichxin likui chitson, likui koancho̱ndo kʼoa likui chʼao kinje! ¡Ijngosa choa̱ tsakakó Niná!

Jokji nó tsakʼetsoma je chjota israelita ya ʼndekixí, maná tsakjen.