Ir al contenido

Ir al índice

 KJOAʼMIYA 54

Jngo chjota xi nʼio taja koan

Jngo chjota xi nʼio taja koan

AʼYANÍ jóʼmi je chjota xi nʼio taja koan xi tsakʼejna i̱ sonʼnde. Jé juez xi Sansón tsakʼin. Jé Jeobá kitsjoale nganʼio xi kisʼele. Kʼianga kjesa tsinjin je Sansón, je Jeobá kitsole na̱le Sansón: “Jngo ʼndí sʼeli. Je koandia nga kʼoasjentjai naxinandá Israel xi kao chjota filisteo”.

Je chjota filisteo chjota tsʼen koan kʼoa ya Canaán tsakatio. Nʼio nkjín koanni chjota kjoajchánle, kʼoa totaon tsabe je chjota israelita. Ñandia, kʼianga ya ki Sansón jñani tsʼe je chjota filisteo, jngo xa xi nʼioje kji xi ñaki tíbaté tsakʼéchjoale. Tonga Sansón to ntsja kisikʼienni je xa. Kʼoati nkjín siento chjota tsʼen filisteo kisikʼien.

Xijekoan, je Sansón jngo chjoón koantsjoake xi Dalila tsakʼin. Je chjota xi nyatítjon ya Filistea kʼoakitsole Dalila nga jngo jmi kaoni jngo siento taonchxoa tsjoále nga jngó jngó, kʼiatsa kʼoakuitsole jméni xosikji taja síkao Sansón. Je Dalila koanmele taon. A likuini tsa ñaki miyole koan je Sansón, ni miyolejinla koan naxinandále Niná. Tosi tonda kiskonangile Sansón ánni nga kʼoasikji tajasíni.

Xijekoan, chan kʼoakitsole Sansón je Dalila jñani tínroanile nganʼio jebi. Kitsole: “Nisañandiajinla bicha je ntsjajkoa. Saʼnda nga kitsian, ñaki xá kiskoejinnina Niná nga choʼndale koa̱n, nga nazareo koa̱n. Kʼiatsa kuichálani je ntsjajkoa, sicháña je nganʼiona”.

Kʼianga je kisʼejinle Dalila, ya kisikájnafeson ya sonxkóle. Jngo chjota kinchjale xi tsakate ntsjajko̱ Sansón. Kʼianga je jaʼále Sansón, je tsínle nganʼio. Xijekoan, je chjota filisteo jaʼasʼennrʼoe kʼoa kitsoa. Tsakʼasje nga jao xko̱n, kʼoa choʼndale kisikao.

Ñandia kʼianga je chjota filisteo jngo sʼuíje tsakʼasjele ninále xi Dagón tsakʼin, kʼoa tsakʼaonsje ya ndoyá je Sansón nga tsabesin. Kʼoa je ntsjajko̱ Sansón je koandongáni. Kʼoa kitsole je tiʼndí xi títsoa ntsja: “Tʼaiʼndenai nga sikoa je xjáo xi nyangi je ndʼia”. Je Sansón tsakʼétsʼoale Jeobá nga katatsjoále nganʼio, kʼoa kitsoa je xjáo. Xijekoan, kiskiʼndáxá kʼoa kitso: “Tʼaiʼndenai nga katamʼekoa je chjota filisteo”. Jan jmi mani chjota filisteo xi ya tjío nga kisʼejna sʼuí jebi, kʼianga kitsotsjá Sansón je xjáo xi nyangi ndʼia, je ndʼia kixojen kʼoa kisikʼien ngatsʼi chjota tsʼen jebi.