Ir al contenido

Ir al índice

 KJOAʼMIYA 83

Je xjáo xi kjindai Jerusalén

Je xjáo xi kjindai Jerusalén

¡CHÓTSENLALAI ibi kui sikji nʼio kjimaxá! Je xjáo xi kjindai Jerusalén tjíobʼénda je chjota israelita. Nga kʼia je jngo siento kao ñachantejao nó tjínle nga kisikjeson Jerusalén je Nabucodonosor, kisikixojen je xjáo xi kjindai kʼoa tsakaká xo̱ntjoale naxinandá. Kʼianga je kitjoni Babilonia je chjota israelita kʼoa kichoni Jerusalén a likui kiskomitjen nditon je xjáo xi kjindai Jerusalén.

Jósʼin tsakatio jotjín nó nga koantsínle xjáo xi kjindai Jerusalén, jósi ngai ji. Xkónjin tsakatio. Likuijin ñʼai koanle tsa je chjota kontrale kichosíkje. Tonga chan tsakasenkao je chjota xosíkji faʼaitʼa ibi, jé Nehemías, je tíbasenkao chjota nga tísʼenda chjotse ijngokʼani je xjáo xi kjindai Jerusalén. A ʼyaní ʼyáni xi Nehemías tsakʼin.

Jngo chjota israelita xi ya Susa jaʼaini, jñani tjío Mardoqueo kao Ester. Nehemías ya kisixá ya ndʼiale rey, kʼoa mejin tsa nʼio miyo koanle je Mardoqueo kao Ester. Tonga ya Biblia likui kʼoatso tsa ya kisixákao je xʼinle Ester, je rey Asuero. Je kisixákao je xi rey tsakʼéjna nga koanskanni, je Artajerjes.

A faʼaitsjenli Artajerjes, je rey xi ndaná chjota koan xi kitsjoanále taon xi kikao Esdras ya Jerusalén nga kisʼendaya je yo̱ngo̱le Jeobá. Tonga Esdras, likui kiskomitjen je xjáo xi kjindai Jerusalén. Kataʼyala jókoannile nga chan je Nehemías kiskomitjensíni.

Nga kʼia je tejan nó jaʼato kʼianga kʼoasʼin kitsjoale taon Esdras je Artajerjes nga sʼendaya yo̱ngo̱. Nga kui nichxin je Nehemías séjnatítjon nga tsjoále chotsín vino je rey. Kʼoa nʼio kisikuinda nga tsín xki tjínjin je vino. Xá jebi nʼio ngʼa tíjna.

Jngo nichxin, kʼianga je Hananí ndsʼe Nehemías kʼoa kʼasa chjota israelita kichó síxatʼa Nehemías. Tsakʼéyanajmíle je kjoa xi tjíojin je chjota israelita, kʼoa nga kje sʼendajin je xjáo xi kjindai Jerusalén nga tojo kʼoachon. Je Nehemías nʼio ba koanle, kʼoa tsakʼétsʼoale Jeobá xi tʼatsʼe kjoa jebi.

Jngo nichxin, je rey tsabe nga ba tjínle Nehemías, kʼoa kitsole: “Ánni nga ba tjínsínili”. Nehemías kui kʼoakitsole je xi chon Jerusalén kʼoa nga tsín kjindai xjáo. Kʼoa kitsole je rey: “Jméni xi meli”.

Kitso Nehemías: “Tʼaiʼndenai nga kjuia Jerusalén, kʼianga an kʼoendaya je xjáo xi kjindai”. Nʼio nda chjota koan Artajerjes. Kʼoakitsole nga koa̱n koai, kʼoa tsakasenkao nga tsakásjai yá xi koanchjén nga kisʼenda je xjáo. Kʼianga je kichó Jerusalén je Nehemías, tsakʼéyanajmíle naxinandá jmeni xi tjínndajinle. Kisasenle naxinandá, kʼoa kitso: “Kʼoétsʼiakoa nga kʼoéndaya”.

Kʼianga tsabe je chjota kontrale nga je tímingʼa je xjáo, kitso: “Kjuinminrʼoé, sikʼien kʼoa kʼoéchjoale je xále”. Nga je kisʼejinle Nehemías xi tʼatsʼe jebi, kitsjoale kicha espada kʼoa kicha lanza je chjota xi tjíosíxá kʼoa kitsole: “Li nokjonjinlao. Titoanntjao je ndsʼao, je xtino, je yánchjínno, kʼoa kao ndʼiano”.

Nʼiojinkoan je naxinandá. Nichxin kao nitjen nga kjiotʼale je kichale kʼoa tosi tonda kisixá. Kuinga to ñachantejao nichxin koanjngosínile je xjáo. A likuiti xkón tsakationi ya naxinandá. Nehemías kao Esdras tsakakóyale chjota israelita kjoatéxomale Niná, kʼoa tsjoa kisʼele je naxinandá.

Tonga likuiti kʼoakjoansʼin tsakationi je chjota israelita josʼin tjío nga kjesa finikatíonʼiojin ya Babilonia. Nga jé reyle Persia tsakatéxoma kʼoa jé kisixále. Tonga Jeobá kʼoakitso nga jngo rey chjotse sikasén, xi kjoanyʼán kjoaʼaikaole je naxinandá. ʼYáni rey jebi. Jósʼin kjoaʼaikao kjoanyʼán i̱ Sonʼnde. Ño siento basen nó kichomani xi tʼatsʼe jebi. Kʼoa jngo ʼndílee kitsin xi likui mangoson kao chjota sonʼnde. Tonga jebi je kjaʼainile.