Ir al contenido

Ir al índice

 KJOAʼMIYA 77

Nitsejinla xkóle tsakinyá

Nitsejinla xkóle tsakinyá

AFAʼAITSJENLI tsa saje kinoʼyai xi tʼatsʼe nga jan xti jebi. Jaon, jé miyole Daniel xi tsínná kiskine tsojmi xi kisatiobasenle xi tsín kixi tíjna nga kui skine. Sadrac, Mesac kʼoa Abednego kitsole chjota babilonio. Tonga chótsenlalai. Ánni nga tsín tjíobinyásínile xkóle je xkósonje xosíkji jotjíosʼín xi ngikʼa. Kataʼyala ánni.

A faʼaitsjenli je kjoatéxoma xi jesoaná Jeobá kiski, je xi Tená Kjoatéxoma. Xi títjon i̱ tso: “A likui koa̱n kjaʼai niná kʼoétsʼoalai, to anña”. Je xti xokjoan kui kjoatéxoma jebi tjíosítjoson, ninga ñʼai kjimale nga kʼoatjíosʼín.

Nabucodonosor je reyle Babilonia, nʼio nkjín chjota xi xángʼa tjínle kinchjale nga kʼoetsʼoale je xkóson xi kisinda. Kitsole ngatsʼi chjota: “Nga kuinóʼyalao nga kjoane je ninda, je arpa kʼoa xi ngikʼasa tsojmi xi fane, tinyao xkóno kʼoa tʼetsʼoalao xkóson jebi xi taonsiné koanndani. ʼYani xi tsín koasen xkóle kʼoa kʼoetsʼoale xkóson jebi ya kjitʼanangi chanisʼen ya ngajá xi ñaki tífaʼájnga”.

Kʼianga je kisʼejinle Nabucodonosor nga tsín tsakinyá xkóle Sadrac, Mesac kao Abednego, nʼio koanjtile. Kichʼale xti jebi. Kitsjoaʼnde ijngokʼale nga katabinyá xkóle. Tonga xti jebi je Jeobá kisinʼiotʼa, kitso: “Je Niná xi nixálaijin koa̱nle kʼoasjentjainajin. Kʼoa ningalani mai, likui kuinyalaijin xkónajin je xkósonli”.

Nga je kinrʼoé jebi je Nabucodonosor, ngisa ti nʼio koanjtingánile. Jngo ngajá tíjnachrian, kʼoa kitso: “¡Ñatoya kʼoakji sjue tikao je ngajá jokji sjue tsakai!” Kʼoa kʼoakitsole je chjota kjoajchánle xi nʼio taja nga katabánʼio Sadrac, Mesac kao Abednego kʼoa nga ya katakanisʼen ngajá. Nʼio sjue koan je ngajá saʼnda kisikʼien je chjota xi tsakanʼio xti jebi. Tonga, jméni xi koanle nga jan xti xi ya kiskanisʼen ngajá.

Kʼianga kiskotsensʼen je rey ya ngajá, nʼio kitsokjon. Kʼoa kitso: “A tsínná jan chjota kafanʼioa kʼoa kachanisʼen ya ngajá xi ñaki tífaʼájnga”.

Kitso choʼndale: “Jaon, kʼoatjín”.

Kʼoa kitso je rey: “Tonga ño mani chjota tiʼbe xi ya tjíotsomajin lʼí. A likui kjionʼio, kʼoa lijo tjíosíkao je lʼí. Kʼoa xi mañoni jo niná kji”. Je rey kisichrian jña tíjna xo̱ntjoa ngajá kʼoa kiskiʼndáxá, kitso: “¡Sadrac! ¡Mesac! ¡Abednego! ¡Titjo, choʼndale Niná xi nʼio ngʼa tíjna!”

Kʼianga je kitjo ya ngajá, tsabe ngatsʼi chjota nga tsín jme xi koanle. Kʼoa kitso je rey: “¡Katabitjongʼa je Ninále Sadrac, Mesac kao Abednego! Kasíkasén ánkjele kʼoa kabʼasjentjai nga tsín kjaʼai niná kabinyále xkóle kʼoa kabʼétsʼoale”.

A tsí jngo choa̱ xi nʼio nda jebi, xi koa̱n chjénngia nga kixi koa̱nle Jeobá.