Jin xi testigole Jeobá maijin kuinga tsín sʼuí chʼasjenijin nga fenajin nó nga̱ ʼyaníjin nga je Niná alikui sasénle. Ningalani tsín kʼoatsokixi je Biblia nga tsín ma chʼasje sʼuí jebi, tonga tsjoá kʼa kjoafaʼaitsjen xi basenkaoná nga majinná josʼin bekon Niná sʼuí jebi. Ñola koya kataʼyaa xi tʼatsʼe jebi kʼoa kao je kjoafaʼaitsjen xi tsjoá je Biblia.

  1. Nga sʼuí bʼasje chjota nga fele nó yaa jaʼaini tʼatsʼe relijión ndiso. Jngo diccionario xi kʼoatso nga je sʼuí jebi yaa jaʼaini nga kʼoasʼin koankjainle ngasʼa je chjota nga “je espíritu kʼoa kao nganʼio xi tsín nda nga kʼia bʼetʼale chjota xi sʼuíle bʼasje nga fele nó” kʼoa nga “kui batéchjoále nga tsín josikao nga ya tjíokao je miyole kʼoa nga kʼoatsole nga nda katafile nichxin” (Funk & Wagnalls Standard Dictionary of Folklore, Mythology, and Legend). Ijngosa libro kijna xi kʼoatso nga nichxin kjoatse sʼetʼaxoon je xtiʼndí xi tsin nga̱ kui xi koanchjén nga tsakʼaile je horóscopole, kʼoa jebi yaa yʼangini jmeni xi koankjainle je chjota xi niño kiskotʼason. Kʼoa kʼoati tso libro jebi nga nʼio nkjín xi kʼoasʼin makjainle nga je vela xi sʼetʼaʼí kʼianga fele nó chjota nga majia tjínle xi tsjoále jmeni xi síjé chjota (The Lore of Birthdays).

    Tonga je Biblia bʼéchjoa xi tʼatsʼe majia, xi tongini kʼoatso jmeni xi koa̱n, kjoabʼenda kʼoa tojñanile xi kui mangósonkao (Deuteronomio 18:14; Gálatas 5:​19-​21). Kʼoa kuinga je Niná kisikjesonni je naxinandá Babilonia nichxin kjoatse nga je chjota xi ya tsakatio niño kiskotʼason, xi kui tjenkao nga tongini kʼoatso jmeni xi koa̱n (Isaías 47:11-​15). Ningalani jin xi testigole Jeobá maijin alikui nʼio kuenta nʼiaijin josʼin jaʼaini nga jngó jngó kostumbre axo tsa jme sʼuíni, tonga alikui koa̱n kuitjátonaijin jmeni xi tso je Biblia xi tʼatsʼe kjoabʼenda.

  2. Je chjotale Cristo xi títjon tsakatio alikui sʼuí tsakʼasje kʼianga jele nó. Jngo libro kijna xi kʼoatso nga je chjotale Cristo xi títjon tsakatio “kʼoasʼin tsabekon je sʼuí xi bitjo nga fele nó chjota nga ya jaʼaini tʼatsʼe kostumbre xi kisʼele je chjota xi tsín Niná tsabexkón”, xi tsonile, tʼatsʼe je relijión ndiso (The World Book Encyclopedia). Je Biblia kʼoatso nga je pastro kʼoa kao je chjota xi kitsoyale je Jesús kʼianga tsakʼejna i̱ Sonʼnde kʼoakitso jmeni xi tjínnele koaitjenngi ngatsʼi je chjotale Cristo (2 Tesalonicenses 3:6).

  3. Je xi tjínnele sikjaʼaitsjenya je chjotale Cristo kuiní je kjoabiyale Jesús, ali tsa kuijin nichxin nga kitsin (Lucas 22:17-​20). Kʼoa kixi tíjna jebi, nga̱ je Biblia kʼoatso nga “ngisa nda je nichxin nga biyaa tikʼoajinni nga tsiaan” (Eclesiastés 7:1). Kʼoa kuinga je kjoabiyale Jesús ngisa chjí koannile tikʼoajinni nichxin kʼianga kitsin, nga̱ jokji tse tsakʼejna i̱ Sonʼnde, nda tsakʼejna ngixko̱n Niná (Hebreos 1:4).

  4. Je Biblia alijña kʼoatso tsa je choʼndale Niná sʼuí tsakʼasje kʼianga jele nó. A tokichajinle xi kiski Biblia nga tsín tsakʼétʼani. Mai. Nga̱ je Biblia jao chjota síkʼaxki̱ xi sʼuí tsakʼasje nga jele nó kʼoa je chjota jebi ali tsa Niná kisixále. Je Biblia alikui nda síkʼaxki̱ nga jao sʼuí jebi (Génesis 40:20-22; Marcos 6:21-29).

Je xtile xi testigole Jeobá ma, a kʼoasʼin síkjaʼaitsjen nga nʼio tse xi tjíosícha nga tsín bʼasje sʼuí nga fele nó.

Tojo sʼín ngatsʼi xijchá nga tsjoake je ʼndíxtile, je testigole Jeobá tsjoakee je ʼndíxtile. Kuinga tsjoásínile kjoatjao tojme nichxinni kʼoa bʼétsaojin kʼoa bʼéndajin jme nichxinni nga batíole sʼuí. Kʼoasʼin fitjenngi je choa̱ xi bʼéjna je Niná. Je Niná nʼio tse kjoanda tsjoále je choʼndale ngantsjai (Mateo 7:11). Kʼoa kuinga je xti xi testigole Jeobá ma alikui kʼoasʼin síkjaʼaitsjensíni nga nʼio tse xi tjíosícha. Itso kʼa xtiʼndí:

  • “Ngisa tsjoa mana nga jme xi bʼaikjoatjaona kʼianga tsín tjínjinna.” (Tammy, xi 12 nóle.)

  • “Je xijchána alijme xi tsjoákjoatjaona kʼianga fena nó, tonga tsjoána nga kjaʼaí nichxin. Kʼoa nga tsín ʼbe tsa jme xi kʼoaikjoatjaona kui xi ngisa tsjoake̱.” (Gregory, xi 11 nóle.)

  • “Alikui tsjoake̱ je sʼuí jñani to pastel kjen kʼoa nga tose je xti. Nga̱ ya ndʼiana ngisa nʼio naskánama.” (Eric, xi 6 nóle.)