Qa at kabʼe okslal mya mejebʼni qe ma che kyaj ten jtal toj jun ja ex jaku kubʼ kyximen txqantl nya bʼaʼn kyiʼj, ¿in tzajpe tyekʼin jlu qa otoq kubʼ kybʼinchaʼn il ex qa il tiʼj tuʼn tok kychmon kyibʼ ansyan tuʼn t-xi bʼinchet tiʼj?

Qa mintiʼ jun tqanil jatumel in tzaj tyekʼin qa at jun tiquʼn xbʼaj jlu, il tiʼj tuʼn tok kychmon kyibʼ kʼloj ansyan tuʼn kyyolen tukʼil aj il, tuʼnju at yekʼbʼil tiʼj qa otoq che yaẍin (1 Cor. 6:18).

In nel tpaʼn kʼloj ansyan ambʼil tuʼn telxix kynikʼ tiʼjju otoq bʼaj tuʼntzun tkubʼ kyximen qa il tiʼj tuʼn tok kychmon kyibʼ tuʼn t-xi bʼinchet tiʼj nya bʼaʼn. Jun techel, ¿ope kubʼ kyyekʼin kykʼujlabʼil kyxolx? ¿Ope chex kawin tiʼj tzeʼn kymod in kubʼ kyyekʼin kyxolx? ¿Tiquʼn e kyaj ten jtal toj ax ja toj qonikʼen aju? ¿Otoqpe kubʼ kyximen jlu? ¿Tzajpe jun nya bʼaʼn aju mintiʼ ximen kyuʼn ex tuʼntzunju e kyaj ten jtal toj ax ja? (Ecl. 9:11, 12). ¿Jatumel e jtan? Tuʼnju junxitl in bʼaj aj kyikʼ tiʼchaq ik tzeʼn jlu, bʼalo il tiʼj tuʼn kyximen ansyan tiʼj junjuntl tiʼchaq.

Aj tel tnikʼ kʼloj ansyan tiʼjju otoq bʼaj, kbʼel kyximen qa kʼokel kychmon kyibʼ tuʼn t-xi bʼinchet tiʼj nya bʼaʼn moqa miʼn tzʼok kychmon kyibʼ.