¿BʼIʼN tuʼne tiʼ kubʼ tbʼinchan Noé kyukʼe tuj tja tej kyetzku toj ark? Xi tqʼoʼn jun oyaj te qMan Dios. Kaʼyinka, lu nkubʼ tbʼinchin tuj tilbʼilal kubʼni. Txkupqeʼ oyaj kubʼ tqʼoʼn Noé te qʼobʼel chjonte te Dios tuʼnjo otaq chi klet tuʼn, tej ttzaj nimxix jbʼal.

¿Tbʼanelpetzulo ela oyaj lu tuj twitz Jehová? Tbʼanil ela toj twitz. Tuʼntzen jlu, xi ttziyen Dios te Noé qa melayxtaqtl kubʼ tnajsaʼn juntl maj twitz txʼotxʼ tukʼe nim jbʼal.

Toj chʼin ambʼil kubʼ tzqij aʼ twitz txʼotxʼ, atzuntl te Noé kyukʼe tuj tja, tzyet juntl maj kyanqʼibʼil tiʼjxe ark. E kubʼ tkʼiwlaʼn Dios ex xi tmaʼn kye: ‹Che kʼwaʼline, chmet-x kybʼaje, ex kynojsame twitz Txʼotxʼ›.

Yajxitzuntl, ajlo tok kybʼiʼntl xjal qa tzaj nimxix jbʼal, jakulo chi jaw xobʼ aj t-xi kyximin qa jaku tzaj juntl maj. Tuʼntzunjo, kyaj tqʼoʼn Dios jun techel tuʼntzen ttzaj kynaʼn xjal aju oteq kyaj ttziyen, qa mlayx kubʼ noj juntl maj tkyaqil twitz Txʼotxʼ tuʼn aʼ. ¿Bʼiʼn tuʼne tiʼ kyaj tqʼoʼn Dios te techal tuʼntzun ttzaj kynaʼn jlu? Jun arko iris.

Nim maj in qʼanchalix arko iris aj ttzaj qʼij oteqxe tzikʼ jbʼal. Nim tbʼanel tkolorel arko iris jaku ten. ¿O tilxiye jun? ¿Ntlome aju tkuʼx tuj tilbʼilal?

Tzaj tqʼamaʼn Dios jlu: ‹Kjel bʼant tiʼj nyole kyukʼile: mlay che najtl kykyaqil xjal ex txkup tuʼn nim jbʼal. Nkubʼ nqʼoʼn n-arko irise toj muj. Ajtzun tqʼanchaʼlix arko iris, ok kʼokel nkeʼyine ex tzul nnaʼn nyole otaq bʼant tiʼj kyukʼile›.

Tuʼntzunjo, aj t-xi tkiʼne jun arko iris, ¿tiʼ tzul tnaʼne? Ikjo, aju o tzaj ttziyen Dios qa melayx kubʼ tnajsaʼntl twitz txʼotxʼ tuʼn nimxix jbʼal.