Qa jun kʼwaʼl setz aj qpon yolil tja jun xjal, qqaninx qe ttat, iktzun tten kbʼel qyekʼun qa in nok qqʼoʼn kyoklen (Pr 6:20). Qa ma tzaj tqʼamaʼn kʼwaʼl qe tuʼn qokx toj ja, mlay qo okx. Qa mlay bʼant tuʼn qyolin kyukʼil ttat kʼwaʼl, jaku qo meltzʼaj toj juntl ambʼil.

Maske jun kuʼxun in yolin qukʼil, mas bʼaʼn qa ma txi qqanin qe tman. Qa mintiʼ ambʼil kyiʼj, qqaninx te qa in tzaj qʼoʼn ambʼil te kyuʼn tman tuʼn tjaw tjyoʼn jun tiʼ tuʼn tkubʼ tuʼjin. Qa ikju, jaku kyaj qqʼoʼn jun uʼj te ex jaku txi qyekʼun tembʼil jw.org te.

Aj qmeltzʼaj tuʼn qyolin juntl maj tukʼil jun kuʼxun aju kubʼ tyekʼun qa taj tuʼn tel mas tnikʼ tiʼj Tyol Dios, qqʼamanx te qa qajbʼil tuʼn kyok qojtzqiʼn tman. Iktzun tten jaku txi qqʼamaʼn kye tiquʼn otoq qo pon kyja ex jaku qo yolin kyukʼil tiʼj tbʼanel nabʼil in tzaj tqʼoʼn Tyol Dios kye ja xjal (Sl 119:86, 138). Qa ma tzʼok qqʼoʼn kyoklen qe tatbʼaj, kbʼel qyekʼun tbʼanel qmod ex iktzun tten jaku qo yolin tiʼj tbʼanel tqanil kyukʼil kykyaqil qe toj tja toj junjuntl maj (1Pe 2:12).