Aju uʼj Bʼinxa qMan Dios o kubʼ bʼinchaʼn tuʼn kyxi xnaqʼtzet xjal mintiʼxix in nel kynikʼ tiʼjju in jaw kyuʼjin, ateʼ qe tilbʼilal toj uʼj aju in nonin tuʼn tel kynikʼ xjal kyiʼj xnaqʼtzbʼil nim kyoklen tiʼj Tyol Dios. Tiʼj junjun xnaqʼtzbʼil at kabʼe t-xaq ex tkuʼx qe tilbʼilal toj aʼyeju ximin qe, aju tten tzeʼn bʼinchaʼn qe tilbʼilal in tzaj tyekʼun alkye juntl tilbʼilal kbʼel xnaqʼtzet.

Aju uʼj Bʼinxa qMan Dios tuʼn tanqʼina te jun majx aʼyex tilbʼilal tkuʼx toj ik tzeʼn uʼj Bʼinxa qMan Dios, noqtzun tuʼnj, at mas letra tkuʼx toj. Aʼyeju xjal in bʼant chʼin kyuʼjin jaku che xnaqʼtzan tukʼil uʼj lu. Ax ikx atzun uʼj lu mas in najbʼen kyuʼn pakbʼal, maske in najbʼen uʼj Bʼinxa qMan Dios tuʼn xjal in xnaqʼtzan. Toj junjun t-xaq tkuʼx jun recuadro tukʼil mas tqanil tuʼn tkubʼ xnaqʼtzet tukʼil xjal ik tzeʼn jaku tzʼonin tiʼj.

Jaku kyaj tqʼoʼna alkyexku kyxol qe kabʼe uʼj lu, maske nya qe uʼj in che kyaj qʼet toj xjaw. Aj tqʼoʼna xnaqʼtzbʼil tiʼj Tyol Dios, jaku che ajbʼen qe tilbʼilal tuʼna tuʼn t-xi tchikʼbʼaʼna te xjal aju in tzaj tqʼamaʼn Tyol Dios. Jaku txi tqanina xjel tuʼntzun ttzaj tqʼoʼn xjal tyol ex tuʼntzun tel tnikʼa tiʼj qa in nel tnikʼ xjal tiʼjju in xi tqʼamaʼna te. Uʼjinktza ex chikʼbʼanxa qe taqikʼ Tyol Dios tkubʼ t-xe t-xaq uʼj. Aj tkubʼ bʼaj uʼj lu tuʼna tukʼil xjal, jaku kubʼ kyxnaqʼtzaʼne uʼj ¿Tiʼ in tzaj t-xnaqʼtzaʼnxix Tyol Dios? tuʼn tonin tiʼj xjal tuʼntzun tchʼiy toj tokslabʼil ex tuʼn tjaw aʼ twiʼ.