Tej tok kybʼiʼn okslal te Roma qa chʼixtoq tpon Pablo kyukʼil, ateʼ junjun e tzaj bʼet junlo 64 kilómetros tuʼntzun tkanet Pablo kyuʼn toj bʼe. ¿Tzeʼn onin tiʼj Pablo aju kykʼujlabʼil kubʼ kyyekʼin tiʼj? Tej kyok tkeʼyin qe okslal, «xi tqʼoʼn chjonte te Dios ex o qeʼxix tkʼuʼj» (Hch 28:15). Atoq Pablo in xi qʼuqbʼante kykʼuʼj kʼloj okslal, pero tuʼnju tokxtoq pres, tajtoq tuʼn t-xi qʼuqbʼet tkʼuʼj (2Co 13:10).

Toj ambʼil jaʼlo, in cheʼx ansyan in che bʼet kyojele Ja te Chmabʼil visitaril kye kʼloj okslal tuʼntzun t-xi kyqʼuqbʼaʼn kykʼuʼj erman. At maj, siktni ateʼ, in che bʼisun moqa in tzaj bʼaj kykʼuʼj ik tzeʼnx in bʼaj kyiʼj txqantl ajbʼel te Jehová. Pero, ¿tiʼ jaku bʼant quʼn tuʼntzun t-xi qqʼuqbʼaʼn tkʼuʼj ansyan in bʼet kyojele Ja te Chmabʼil ex t-xuʼjil, tuʼntzun tbʼaj «qkyuwsan qibʼ qxolx»? (Ro 1:11, 12).

  • Tuʼn qten toj chmabʼil in nok aj qex pakbʼal. In xi tqʼuqbʼaʼn tkʼuʼj ansyan in bʼet kyojele Ja te Chmabʼil aj tok tkeʼyin qa in nok tilil quʼn tuʼn qonin toj seman nim toklen lu (1Te 1:2, 3; 2:20). Qqʼonk tilil tuʼn qok te precursor auxiliar toj xjaw aj tul erman. Jaku bʼaj qnukʼuʼn ambʼil tuʼntzun qpakbʼan tukʼil erman ex qa tukʼil t-xuʼjil, moqa tuʼn t-xiʼ qukʼil qʼol jun xnaqʼtzbʼil tiʼj Tyol Dios. Miʼn kubʼ t-ximana qa nya nim ambʼil qʼiʼn tuʼna in pakbʼana moqa mintiʼxix in bʼant tuʼna, kygan erman tuʼn kypakbʼan kyukʼil kykyaqil pakbʼal ateʼ toj kʼloj okslal.

  • Qbʼincham xtalbʼil. Jaku che kyaj erman qja moqa jaku txi qqʼoʼn kywa. Atzun jun tbʼanel tten tuʼn tkubʼ qyekʼin qa at qkʼujlabʼil kyiʼj. Axpe ikx, nya kyaj tuʼn tbʼant nimku tiʼ quʼn kyiʼj (Lu 10:38-42).

  • Tuʼn t-xi qbʼiʼn qe nabʼil in tzaj tqʼoʼn ex tuʼn kykubʼ qanqʼiʼn. Tukʼil kʼujlabʼil in nonin ansyan in bʼet kyojele Ja te Chmabʼil qiʼj tuʼn qajbʼen mas te Jehová. Bʼalo at maj il tiʼj tuʼn qtzaj tkawin erman (1Co 5:1-5). Kbʼantel taqʼun tukʼil tzalajbʼil qa ma qo bʼin ex qa ma kubʼ qin qibʼ (Heb 13:17).

  • Tuʼn t-xi qqʼoʼn chjonte kye. Qʼamanxa te ansyan in bʼet kyojele Ja te Chmabʼil tukʼil t-xuʼjil jniʼ ma tzʼonin tiʼja tkyaqilju in bʼant kyuʼn. Jaku txi tqʼamaʼna kye moqa jaku kubʼ ttzʼibʼina toj jun tarjeta moqa toj jun tal uʼj (Col 3:15).