“LALPA hming chu ka puang dâwn e . . . , Pathian rinawm, khawlohna nei lo.”—DEUTERONOMY 32:3, 4.

HLA: 15, 2

1, 2. (a) Nabotha leh a fapate’n eng ang dik lo taka rorêlna nge an tawh? (b) He thuziakah hian eng mize pahnih nge kan sawiho vang?

MI SUAL pahnihin pa pakhat chu sual pawi tak tiah an puh a. An puhna chu dâwt a ni. Mahse, chu pa chu thiam loh chantîrin, tihhlum tûra rorêlsak a ni a. Rorêl dikna ngainatute’n he pawisawi lo leh a fapate lunga an denhlum lai an hmuh huna an awm dân tûr chu han mitthla teh! Hei hi thawnthu mai a ni lo. Israel Lal Ahaba hun laia Jehova chhiahhlawh rinawm tak Nabotha chunga thil thleng a ni.—1 Lalte 21:11-13; 2 Lalte 9:26.

2 He thuziakah hian, Nabotha chunga thilthleng kan sawiho dâwn a. Kum zabi khatnaa Kristian kohhrana upa pakhatin sual pawi tak a tih chungchâng pawh kan sawiho bawk ang. Jehova rorêl dikna entawn kan duh chuan inngaihtlâwmna leh ngaihdam peihna kan neih a ṭûlzia hêng entîrna pahnihte hian min hriattîr ang.

 DIK LO TAKA RORELNA

3, 4. Nabotha chu eng ang mi nge ni a, engvângin nge a grêp huan chu Lal Ahaba hnênah a hralh duh loh?

3 Israel mi tam takin Lal Ahaba leh a nupui Lalnu suaksual Jezebeli te entawn tûr siam ṭha lo tak chu an entawn laiin Nabotha chu Jehova chungah a rinawm tlat a. Israel mite chuan pathian dik lo Baala an bia a, Jehova leh a dânte an zah lo a ni. Mahse, Nabotha chuan a nunna ai pawhin Jehova nêna an inlaichînna chu a ngaihlu zâwk a ni.

4 1 Lalte 21:1-3 chhiar rawh. Ahaba’n Nabotha hnênah a grêp huan leisak emaw, grêp huan ṭha zâwk nêna inthleng emaw a dîl khân ani chuan a duh lo va. Engvângin nge? Ani chuan zah takin heti hian a sawi: “Ka pute ro han pêk che chu ka tân a âwmin a âwm lo ve,” tiin. Israelte tân an chhûngte rochun hralh hlen chu Jehova dân nên inkalh a nih avângin Nabotha chuan Lal Ahaba dîlna chu a pawm lo a ni. (Leviticus 25:23; Numbers 36:7) Nabotha chuan Jehova thu a âwih tih a chiang hle.

5. Jezebeli chuan Nabotha grêp huan neih a duh avângin eng thil nge a tih?

5 Nabotha’n a grêp huan a hralh duh loh khân, Lal Ahaba leh a nupui chuan thil râpthlâk tak an ti a. Grêp huan a neih theih nân, Lalnu Jezebeli chuan Nabotha chu thil sual titua puh tûrin mipa pahnih a ruat a. Chuvângin, Nabotha leh a fapate chu tihhlum an ni ta a ni. He dik lo taka rorêlna râpthlâk tak chungchângah Jehova’n eng nge a tih?

PATHIAN RORELNA DIK

6, 7. Jehova chuan rorêl dikna a ngaina tih engtin nge a târ lan a, chu chu engvângin nge Nabotha chhûngte leh ṭhiante tân thlamuanthlâk tak a nih?

6 Jehova chuan Ahaba hmu tûrin Elija a tîr nghâl a. Elija chuan Ahaba chu tualthattu leh rûkru a ni tih a hrilh a ni. Jehova thu tlûkna chu eng nge ni? Ahaba, a nupui, leh a fapate chu Nabotha leh a fapate chunga thilthleng ang chiahin tihhlum tûr an ni.—1 Lalte 21:17-25.

7 Nabotha chhûngte leh ṭhiante chu Ahaba thil râpthlâk tak tih avângin an tuarna êm êm a. Jehova chuan dik lo taka rorêlna chu a hmu a, hma a la nghâl a ni. Chu chu an tân a thlamuanthlâk ngei ang. Mahse, an inngaihtlâwmna leh Jehova an rinna chu a hnua thilthleng avângin fiah a ni mai thei.

Elija’n Ahaba hnênah a inngaihtlâwm avângin a thih hma chu Jehova’n a chhûngte a hrem lovang tih a hrilh

8. Ahaba’n Jehova thuchah a hriat khân engtin nge a chhân lêt a, eng nge a rah chhuah?

8 Jehova’n a chunga a tih tûrte Ahaba’n a hriat chuan, “a puan a pawtthlêr a, saiip puan a sin a, chaw a nghei a, saiip puanah a mu a, dîm takin a che ta a.” Ahaba chu a inngaitlâwm ta a ni! Eng nge a rah chhuah? Jehova’n Elija hnênah: “Ka hmaa a inngaihtlâwm avâng hian ama chhanah hi chuan thil ṭha lo ka thlentîr lo vang a, a fapaa chhanah erawh chuan a chhûngte  chungah thil ṭha lo ka thlentîr ang,” tiin a hrilh a. (1 Lalte 21:27-29; 2 Lalte 10:10, 11, 17) ‘Thinlung enfiahtu’ leh mi eng ang nge kan nih tih hretu Jehova chuan Ahaba chungah zahngaihna a lantîr a ni.—Thufingte 17:3.

INNGAIHTLAWMNA CHU INVENHIMNA A NI

9. Engvângin nge inngaihtlâwmna chu Nabotha chhûngte leh a ṭhiante tân invênhimna a nih?

9 Ahaba a thih hma chu a chhûngte hrem an ni lovang tih Nabotha chhûngte leh a ṭhiante’n an hriat chuan, chu chu an rinna fiahna a ni thei a. Mahse, inngaihtlâwmna chuan an rinna vênghim tûrin a ṭanpui ngei ang. Engvângin nge? An inngaihtlâwm chuan, Pathian Jehova’n fel lo takin thil a ti lo vang tih ring tlatin an be zawm zêl thei dâwn a ni. (Deuteronomy 32:3, 4 chhiar rawh.) Nakin huna thawhlehnaah, Nabotha chhûngte chuan an hmangaih takte hmu lehin malsâwmna an dawng ang. Hei hi Nabotha leh a fapate tân rorêlna ṭha famkim a ni ang. (Joba 14:14, 15; Johana 5:28, 29) “Pathian chuan thiltih zawng zawng chungah ro a la rêl dâwn si a, thil inthup engkim, a chhia emaw, a ṭha emawte” chungah pawh tih hi mi inngaitlâwm chuan a hria a ni. (Thuhriltu 12:14) Jehova’n kan hriat loh thilte  pawh a ngaihtuah a. Chuvângin, inngaihtlâwmna chuan Jehova kan rinna hloh lo tûrin min vênghim a ni.

Inngaihtlâwmna chuan Jehova kan rinna hloh lo tûrin min vênghim

10, 11. (a) Eng dinhmunin nge rorêl dikna chungchânga kan thlîr dân chu fiah mai thei? (b) Inngaihtlâwmna chuan eng kawngtein nge min vênhim ang?

10 Upate chuan i hriatthiam loh leh i pawm theih loh thu tlûkna siam ta se, engtin nge i chhân lêt ang? Entîr nân, nangmah emaw, i hmangaih tak emaw chuan Jehova rawngbâwlnaah chanvo chân ta ula, eng nge i tih ang? I kawppui emaw, i fapate emaw, a nih loh leh i ṭhian kawm ngaih tak chu hnawhchhuah niin, kohhran upate thu tlûkna siam chu pawm lo ta la engtin nge ni ang? Upate chuan thil tisualtu chunga zahngaihna lantîrnaah thil an tidik lo niin hre ta la engtin nge ni ang? Hêng dinhmunte hi Jehova leh tûn laia a kohhrante a rêl bâwl dân kawngah kan rinna fiahna a ni thei. Hêng dinhmun zînga pakhatah fiahna tawng ta la, engtin nge inngaihtlâwmna chuan a vênhim ang che? Min vênhim dân kawng hnih i lo ngaihtuah ang u.

Upate’n i pawm lohzâwng thu tlûkna pakhat puang ta se, engtin nge i chhân lêt ang? (Paragraph 10, 11-na en rawh)

11 A hmasain, kan inngaihtlâwm chuan thil nih dân engkim kan hre vek thei lo tih chu kan pawm ang. Dinhmun engkim kan hre vek nia kan inngai a nih pawhin, Jehova chauhvin thinlunga awm chu a hria a ni. (1 Samuela 16:7) Chu chu kan hriat reng chuan, theih chin kan nei tih leh kan ngaihtuahnate siamṭhat a ngai tih inngaitlâwm takin kan pawm ngei ang. Pahnihnaah, dik lo taka rorêlna kan hmu emaw, kan tawng emaw a nih chuan, inngaihtlâwmnain thuâwih tûr te, dawhthei tûr te, leh Jehova’n dinhmun a siamṭhat hun nghâk tûrtein min ṭanpui ang. Bible chuan: “Pathian ṭihtuten, amah ngei an ṭih avângin a ṭha tho vang,” tiin a sawi a. Chu bâkah, “Mi suaksual tân kha chuan a ṭha lo vang a, a nî tihseite pawh,” tiin a sawi bawk a ni. (Thuhriltu 8:12, 13) Kan inngaihtlâwm reng chuan, keimahni leh mi dangte pawhin hlâwkna kan hmu ang.—1 Petera 5:5 chhiar rawh.

KOHHRAN CHHUNGA VERVEKNA A AWM HUNAH

12. Tûnah eng chungchâng nge kan ngaihtuah ang a, engvângin nge?

12 Suria Antiokei khuaa Kristian hmasate chuan an inngaihtlâwmna leh ngaihdam peihna fiahtu dinhmun an tawng a. Chu chu ngaihtuahin, ngaihdamna chungchânga kan rilru put hmang endik nân i hmang ang u. Chutianga kan tih chuan Jehova’n a tehnate sawhsawn si lovin, mi ṭha famkim lote a hman theih chhan kan hre thiam thei ang.

13, 14. Tirhkoh Petera’n eng chanvo nge a neih a, huaisenna a nei tih engtin nge a lantîr?

13 Tirhkoh Petera chu Kristian hmasaa mite hriat hlawh tak kohhran upa a ni a. Isua ṭhian hnai tak a nih bâkah chanvo pawimawh tak takte pêk a ni. (Matthaia 16:19) Entîr nân, C.E. 36-ah Petera chu Kornelia leh a ina chêng zawng zawngte hnêna thu hril tûra tirh a ni a. Hei hi engvânga  danglam bîk tak nge a nih? Kornelia chu Juda mi ni lovin, serhtan loh Jentail a nih vâng a ni. Kornelia leh a chhûngte’n thlarau thianghlim an dawn chuan, Petera’n anni chu Kristiante ni tûrin baptisma an chang thei tih a hria a. Ani chuan: “Hêng mite, keimahni anga thlarau thianghlim hmu ve hi baptisma an chan loh nân miin tui hman an khap thei em ni?” tiin a sawi a ni.—Tirhkohte 10:47.

14 C.E. 49-ah, Jentail Kristiante tân serh tan a ngaih leh ngaih loh thu tlûkna siam tûrin Jerusalema awm tirhkohte leh upate an inhmu khâwm a. Chu inkhâwmnaah, Petera chuan serh tan loh Jentailte’n thlarau thianghlim an dawng tih amah ngeiin a hmuh thu a unaute hnênah huaisen takin a hrilh a ni. Petera thiltawn chuan governing body chu thu tlûkna siam tûrin a ṭanpui a. (Tirhkohte 15:6-11, 13, 14, 28, 29) Petera’n huaisen taka thil nih dân a sawi avângin Juda Kristiante leh Jentail Kristiante chu an lâwm ngei ang. Kristian hmasate tân chu mi rinawm leh mi puitling rinchhan chu a awlsam phah ngei ang!—Hebrai 13:7.

15. Petera chuan Suria Antiokei khuaa a awm laiin eng thil nge a tihsual? (A thupui chunga milem en rawh.)

15 Jerusalema inhmuhkhâwmna neih zawh hnu lawkah, Petera chuan Suria Antiokei khua chu a tlawh a. Chuta a awm laiin, Jentail unaute zîngah a khawsa ve a ni. Petera hriatnate leh thiltawnte ngaihthlâk nuam an tih dân tûr chu kan mitthla thei a. Mahse, an zîng ata Petera a inla hrang leh thut chu mak an tiin, an rilru a na ngei ang. Ani chuan Barnaba pawh tiamin, Juda Kristiante chu chutianga awm hrang tûrin a thunun a ni. Engvângin nge chu Kristian puitling tak leh upa chuan kohhrana inṭhenna awmtîr thei khawp thil sual pawi tak chu a tih? A pawimawh zâwk chu, upa pakhat thusawiin emaw, thiltihin emaw min tina a nih chuan Petera thil tih sual aṭangin eng nge kan zir theih?

Petera chunga lungni lo Jentail Kristiante chuan engtin nge an chhân lêt?

16. Petera chu engtianga zilh nge a nih a, eng zawhnate nge lo chhuak?

16 Galatia 2:11-14 chhiar rawh. Petera chuan mihring a hlau a ni. (Thufingte 29:25) Jehova’n Jentailte a thlîr dân chu a hre tawh a. Mahse, Jentail Kristiante nêna an inkawm avângin Jerusalem aṭanga lo kal serh tan Juda Kristiante’n an ngainêp ang tih a hlau a ni. Tirhkoh Paula chuan Petera chu mi vervêk a ni tih a hrilh a. Engvângin nge? C.E. 49-a Jerusalema inkhâwmnaah Petera’n Jentailte a humhim tih Paula’n a hriat vâng a ni. (Tirhkohte 15:12; Galatia 2:13) Petera chunga lungni lo chûng Jentail Kristiante chuan engtin nge an chhân lêt ang? Tlûk phah nân an hmang ang em? Petera chuan a thil tih sual avângin a chanvo a chân ang em?

 NGAIDAM RAWH

17. Engtin nge Petera’n Jehova ngaihdamna a hlâwkpui?

17 Petera chu mi inngaitlâwm tak a nih avângin Paula zilhna chu a pawm a. Bible chuan Petera’n a chanvo a engamah a hloh thu a sawi lo. A nihna takah chuan, Bible-a lehkhathawn pahnih ziak tûrin thlarauva thâwkkhum a ni. A lehkhathawn pahnihnaah, Paula chu “unaupa duh tak” tiin a sawi hial a. (2 Petera 3:15) Petera thil tih sual chu Jentail Kristiante tân a na hle ang. Mahse, kohhran lû Isua chuan ani chu a hmang zawm zêl a ni. (Ephesi 1:22) Kohhrana unaunu leh unaupate chuan Petera ngaidamtu Isua leh a Pa chu an entawn thei a. Tute pawhin mi ṭha famkim lote thil tih sual chu tlûk phah nâna an hman loh kan beisei a ni.

18. Eng hunah nge Jehova rorêl dikna chu kan entawn a ngaih mai theih?

18 Kristian kohhran hmasaah khân ṭha famkim kohhran upa tumah an awm lo ang bawkin tûn laia Kristian kohhran upate zîngah pawh ṭha famkim an awm lo. Bible chuan: “Kan zain thil tam tak kan tisual fo ṭhîn,” tih a sawi a. (Jakoba 3:2) Hei hi pawm awl tak chu a ni; mahse, unaute ṭhat famkim lohna chu mi mal taka kan tawrh hunah eng nge kan tih ang? Jehova rorêl dikna chu kan entawn ang em? Entîr nân, upa pakhatin inpâwng huatna awmtîr thei zâwngin thu a sawi a nih chuan engtin nge i chhân lêt ang? Upain ngaihtuah lâwk lovin i rilru tina thei thil a sawi a nih chuan tlûk phah nân i hmang ang em? Chu unaupa chu upa ni tlâk lova ngai nghâl mai lovin, kohhran lû Isua chu dawhthei takin i nghâk ang em? A thil tihsual ngaihtuah reng aiin, rinawm taka kum tam tak rawng a lo bâwl tawh chu i hre reng ang em? I chunga thil tisualtu unaupa chu kohhran upa ni zawm zêlin, chanvo tam lehzual dawng hial ta se, i lâwmpui ang em? Ngaihdam i peih reng chuan, Jehova rorêl dikna chu i entawn tih i târ lang a ni.—Matthaia 6:14, 15 chhiar rawh.

19. Eng nge tih kan tum tlat ang?

19 Rorêl dikna kan ngainat avângin Setana leh a khawvêl suaksualin a thlentîr rorêl dik lohna zawng zawng Jehova’n a nuai bo hun chu kan nghâkhlel tak zet a. (Isaia 65:17) Chumi lo thlen hmaa, rorêl dik lohna kan tawn hunah thil engkim kan hre vek thei lo tih inngaitlâwm taka pawmin, kan chunga thil tisualtute chu inhuam takin i ngaidam zêl ang u. Chutianga kan tih chuan, Jehova’n rorêl dikna a thlîr dân kan entawn a lo ni ang.