A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  April 2017

Pathian Ram A Lo Thlen Hunah Eng Thilte Nge Thleng Ang?

Pathian Ram A Lo Thlen Hunah Eng Thilte Nge Thleng Ang?

“Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.”—1 JOHANA 2:17.

HLA: 55, 24

1, 2. (a) He khawvêl suaksual hi eng kawngin nge tihhlum mai tûr mi sualpa nên a inan? (A thupui chunga milem en rawh.) (b) He kalhmang suaksual tihchhiat a nih hunah, lei leh vâna awm zawng zawngte chu engtin nge an awm tawh ang?

HEI hi han mitthla teh. Mi sual hlauhawm tak chu vêngtute nên lung in hung chhûnga an kal laiin, “Mitthi a kal!” tiin an au va. Engvângin nge chutianga an sawi theih? Mi sual chu dam leh hrisêl tak angin lang mah se, thi tûra a chungthu rêl a ni tawh a, tihhlum a ni tawh dâwn vâng a ni. Ani chu thi tawh ang mai a ni. *—Footnote en rawh.

2 Kan chênna khawvêl suaksual hi kan sawi tâk tihhlum mai tawh tûr mi sual ang a ni a. Bible chuan: ‘Khawvêl hi a boral mêk a ni,’ tiin a sawi. (1 Johana 2:17) Jehova chuan he kalhmang hi a tihtâwp mai tawh dâwn avângin a tâwp chu a thleng ngei dâwn tih a chiang hle a. Mahse, he kalhmang tâwpna leh chu mi sualpa tihhlum a nih dânah inan lohna  pawimawh tak pakhat a awm. Mi ṭhenkhat chuan chu mi sualpa chunga rorêlna chu dik lova ngaiin chhanchhuah an duh mai thei a, tihhlum loh a nih an beisei mai thei bawk. Mahse, Jehova chu rorêltu ṭha famkim a ni a, he kalhmang tichhe tûra a thu tlûkna siam pawh a fel famkim a ni. (Deuteronomy 32:4) Chu tâwpna hun chu a tlai lo vang. He kalhmang tihchhiat a nih hnuah, lei leh vâna awm zawng zawngte’n Jehova rorêlna chu a dik tih an pawm tawh ang. A va hahdamthlâk dâwn êm!

3. Pathian Ram lo thlen hunah eng buaina palite nge tihboral a nih dâwn?

3 Chu ‘khawvêl boral mêkah’ chuan engte nge tel? Chutah chuan tûn lai nuna thil ṭha lote hi a tel a. Chûng thil ṭha lo zawng zawngte chu a boral thuai dâwn a ni. Hei hi “Ram chanchin ṭha” zînga pakhat a ni tak meuh mai. (Matthaia 24:14) He thuziakah hian Pathian Ram a lo thlen huna boral tûr buaina pali kan sawiho vang: mi suaksual te, pâwl rin tlâk lo te, dik lo taka thiltih te, leh dinhmun ṭha lote hi a ni. (1) Chûng thilte’n tûna min nghawng theih dân, (2) chûngho chunga Jehova thiltih tûr, leh (3) chûng chu eng nên nge a thlâk dâwn tihte kan hria ang.

MI SUAKSUALTE

4. Mi suaksualte’n tûnah engtin nge min nghawng?

4 Mi suaksualte’n tûnah engtin nge min nghawng? Tirhkoh Paula chuan ni hnuhnûngahte chuan “hun khirh takte a lo awm ang” a ti a. Tichuan, heti hian a sawi belh a ni: “Mi sual leh tihdertute erawh chu . . . an sual zual deuh deuh ang,” tiin. (2 Timothea 3:1-5, 13) Chutiang chu i tawng tawh ngai em? Kan zînga mi tam tak chuan hnehchhiahna te, hnam inhuatna te, leh mi sual kutthlâkna ang chite chu an tuar a. Mi suaksualte chuan an thil sual tihte chu a lang apauvin an ti a. Mi dangte erawh chu mite ṭanpui tum angin lang mah se, dik tak chuan mi sual an ni. Mi suaksualte kut kan tuar ngai lo a nih pawhin, an thiltihte chuan min nghawng tho va. Mi sualte’n naupangte, kum upate, leh mahni invêng thei lo mi dangte râwng taka kut an thlâk dânte kan hriat hian kan rilru a na êm êm a. Hêng mi suaksualte hi ram sakawlh, a nih loh leh ram huaite ang maiin an chê a ni. (Jakoba 3:15) Mahse, Jehova Thuin beiseina min pe chu thil lâwmawm tak a ni.

5. (a) Mi suaksualte chuan eng hun remchâng nge an la neih? (b) Inthlâk danglam duh lotute chungah eng nge thleng ang?

5 Jehova’n eng nge a tih dâwn? Tûnah Jehova’n mi suaksualte chu inthlâk danglamna hun remchâng a pe a. (Isaia 55:7) He kalhmang hi tihchhiat ni thuai dâwn mah se, chûng mi sualte chu rorêlsak an la ni lo. A nih leh, inthlâk danglam duh lotute leh hrehawm nasa tak thleng pawha he kalhmang thlâwp tlattute chungah eng nge thleng ang? Jehova’n mi suaksualte chu leilung ata a tiboral dâwn tih a tiam a. (Sâm 37:10 chhiar rawh.) Tûn laiah mi tam tak chuan an thil ṭha lo tihte chu an thup a, hrem an ni lo fo ṭhîn. (Joba 21:7, 9) Mahse, Bible chuan: “Mihring awm dân chungah [Pathianin] mit a lên a, a pheikhai zawng zawng a hmu vek si. Khawlohna titute an bihrûk theihna tûr thim a awm lo va, thihna daihlim a awm hek lo,” tiin min hriat nawntîr a. (Joba 34:21, 22) Chuvângin, Jehova lakah engmah thup theih a ni lo. Mi sualte thiltih chu a hmu vek a ni. Armageddon  zawhah chuan, an awmna hmunte chu en mah ila, kan hmu ngai tawh lovang. Chatuanin an boral tawh dâwn a ni!—Sâm 37:12-15.

6. Mi suaksualte an boral hunah tute nge dam khawchhuak ang a, chu chu engvângin nge chanchin ṭha a nih?

6 Mi suaksualte an boral hunah tute nge dam khawchhuak ang? “Thuhnuairawlhte erawh chuan ram hi an luah ang a: remna chênin an hmuingîl ang,” tiin Jehova’n a tiam a. A hnuah chu Sâm buah vêk chuan: “Mi felte chuan ram hi an luah ang a, a chhûngah hian kumkhuain an awm ang,” tiin kan chhiar a ni. (Sâm 37:11, 29) “Thuhnuairawlhte” leh “mi felte” chu tute nge ni? Thuhnuairawlhte chu Jehova thuâwih a, a hnên aṭanga inzir duhte an ni a. Mi felte chu Pathianin dik a tih anga thil ti duhtute an ni. Tûn lai khawvêlah, mi fel aiin mi sual an tam zâwk a. Khawvêl tharah erawh thuhnuairawlh leh mi felte chauh an awm tawh ang a, lei hi paradis-ah an chantîr ang!

PAWL RIN TLAK LO

7. Engtin nge tûn laiah pâwl rin tlâk lote’n min nghawng?

7 Engtin nge tûn laiah pâwl rin tlâk lote’n min nghawng? Tûn lai khawvêla sualna tam tak hi mi mal vâng ni lovin, pâwl dinte vânga awm a ni a. Sakhaw pâwlte chuan mi maktaduai tam takte chu an bum a. Entîr nân, Pathian hi tu nge a nih tih thu-ah dâwt an sawi a, Bible hi a rinchhan tlâk loh an ti a, leilung leh mihringte tâna nakin hun chungchângah mite an bum bawk a ni. Sawrkâr rin tlâk lote chuan indona leh hnam avânga tharum thawhnate an tichhuak a, mi retheite leh ṭanpuitu nei lote chu an hnehchhiah a ni. Chûng sawrkârte chuan mi duhsak bîkna an nei a, thamnate dawngin an hausa tial tialin thu an nei tial tial a ni. Sumdâwnna pâwl duhâm takte chuan boruak leh leilung hausakna tihchhiat chu pawi an ti lova, mipuite hamṭhatna an lâksak avângin mi tlêmtê chauh an hausak phah a ni. Pâwl rin tlâk lote hi tûn lai khawvêla hrehawm tam tak awmtîrtu an ni tih a chiang hle.

8. Tûn laia mi tam tak ngaiha nghet tak anga lang pâwlte chunga thil thleng tûr chu engtin nge Bible-in a sawi?

8 Jehova’n eng nge a tih dâwn? Politics thuneitute’n Bible-in nawhchizuar Babulon Khaw Ropui tia a koh sakhaw dik lo pâwlte an beih hunah hrehawm nasa tak chu a inṭan ang. (Thu Puan 17:1, 2, 16; 18:1-4) Chûng sakhaw pâwlte chu tihboral phiar an ni ang. A nih leh pâwl rin tlâk lo dangte chu engtin nge a awm ang? Chûngte chu an ngheh êm avangin, Bible-in tlângte leh thliarkârte nên a khaikhin a. (Thu Puan 6:14 chhiar rawh.) Mahse, sawrkârte leh Pathian Ram thlâwp lotu pâwl dangte pawh tihboral an ni ang tih a sawi bawk. Chu chu hrehawm nasa tak tâwp lamah a ni ang. (Jeremia 25:31-33) Chumi hnuah chuan pâwl rin tlâk lo rêng rêng a awm tawh lo vang!

9. Lei thar chu ṭha taka ruahman a ni dâwn tih engvângin nge kan chian theih?

9 Pâwl rin tlâk lote chu engin nge thlâk ang? Armageddon zawhah, leilungah pâwl pakhat tal a la awm ang em? Bible chuan: “A thutiam ang chuan vân tharte leh lei thar, a chhûnga felna awmte chu kan beisei a ni,” tiin a sawi a. (2 Petera 3:13) Vân hmasa leh lei hmasate chu sawrkâr ṭha lote leh an thuhnuaia awm mite an ni. Chûngte chu tihboral an nih hnuah, engin nge an aiawh ang?  “Vân thar leh lei thar,” a ni ang. Vân thar chuan Isua Krista leh a rorêlpuitu mi 1,44,000 hmanga din sawrkâr thar a kâwk a. Lei thar chuan Pathian Ram awpna hnuaia awm mite chu a kâwk a ni. Isua leh a rorêlpuite chuan ruahmanna fel Pathian Jehova chu ṭha takin a entawn dâwn a. (1 Korinth 14:33) Chuvângin, “lei thar” chu ṭha taka ruahman a ni ang. Thil enkawltu tûr mi ṭhate an awm ang a. (Sâm 45:16) Chûng mite chu Krista leh mi 1,44,000-te chuan an kaihruai ang. Pâwl rin tlâklo zawng zawng chu tihchhiata awm ngai lo tûr pâwl pakhatin a thlâk hun tûr chu han mitthla teh!

DIK LO TAKA THILTIHTE

10. Kan chênna khawvêlah hian dik lo taka thiltih engte nge hluar êm êm a, keimahni leh kan chhûngte chu engtin nge a nghawng?

10 Engtin nge tûnah dik lo taka thiltihtein min nghawng? Nungchang bawlhhlawlhna, rinawm lohna, leh nunrâwnnate hluar êm êmna khawvêlah kan awm a. Khawvêl intihhlimnate chuan chûngte chu thil duhawm angin a siam a, thil dik leh dik lo chungchânga Jehova tehnate chu a ngainêp a ni. (Isaia 5:20) Nu leh pate chuan an fate chu chûng thununna ṭha lo lak ata him tûra an vên a ngai a. Dik tak chuan, Pathian tehna ngaihlu lo khawvêlah hian Kristian zawng zawngin Jehova nêna an inlaichînna chu theih tâwpin an vênghim tûr a ni.

11. Jehova’n Sodom leh Gomorra chunga ro a rêlna aṭangin eng nge kan zir theih?

11 Dik lo taka thiltihte chu Jehova’n engtin nge a tih dâwn? Sodom leh Gomorra khuaa thil sual tihte chu Jehova’n engtin nge a tih han ngaihtuah teh. (2 Petera 2:6-8 chhiar rawh.) Lota chu mi fel a ni a, an chhehvêla mite thiltih ṭha lo chuan amah leh a chhûngte chu nasa takin a nghawng a ni. Jehova chuan chuta thil sual titu zawng zawngte chu a tiboral vek a. Chu chu tûn laia mi suaksualte tân “entîrnaah a hmang” a ni. Jehova’n chutih laia nungchang ṭha lo thiltih zawng zawng a titâwp ang bawkin, he kalhmang a tihchhiat hunah thil sual zawng zawng chu a titâwp dâwn a ni.

12. He kalhmang a tâwp huna i nghahhlelh hnathawh tûr ṭhenkhatte chu eng nge ni?

12 Dik lo taka thiltih chu engin nge thlâk ang? Khawvêl tharah chuan, hna lungawithlâk tak takte thawkin kan buai hle dâwn a. Entîr nân, leilung hi paradis-ah kan chantîr ang a, kan tân leh kan hmangaihte tân inte kan sa ang. Mi maktaduai tam takte chu kan lo hmuak ang a, Jehova leh mihringte tâna a thiltih zawng zawng chungchâng kan zirtîr ang. (Isaia 65:21, 22; Tirhkohte 24:15) Chutih hunah chuan, hna lungawithlâk tak tak thawkin kan buai ang a, Jehova kan fak ang!

DINHMUN ṬHA LOTE

13. Edena helna chuan eng nghawng nge a neih?

13 Engtin nge tûnah dinhmun ṭha lovin min nghawng? Mi suaksual te, pâwl rin tlâk lote, leh thiltih ṭha lotea khat khawvêl chuan dinhmun ṭha lo tak takte a awmtîr a. Indona te, retheihna te, hnam thliarna te, natna te, leh thihnate chuan kan zavaiin min nghawng ṭheuh a ni. Hêng dinhmun ṭha lote hi Setana, Adama, leh Evi-te Jehova laka an hel vânga lo awm a ni a. An helna avângin kan zavaiin kan tawrh phah a ni.

14. Jehova’n dinhmun ṭha lo chungchângah eng nge a tih ang?

14 Jehova’n dinhmun ṭha lo chungchângah eng nge a tih ang? Entîrna  ṭhenkhat hi han ngaihtuah teh. Jehova chuan indona zawng zawng a titâwp dâwn tih a tiam a. (Sâm 46:8, 9 chhiar rawh.) Natnate chu a tibo vang. (Isaia 33:24) Thihna chu chatuanin a nuaibo tawh ang. (Isaia 25:8) Retheihna a awm tawh lo vang a. (Sâm 72:12-16) Tûn laia nun tihrehawmtu dinhmun ṭha lo zawng zawngte pawh a tibo vek ang. Setana leh a ramhuaite thununa ṭha lo pawh tihboral vek a ni ang!—Ephesi 2:2.

Indona, natna, leh thihna awm lohna khawvêl chu han mitthla teh! (Paragraph 15-na en rawh)

15. Armageddon zawha chatuana boral tûr thilte chu eng nge ni?

15 Indona te, natna te, thihnate awm tawh lohna khawvêla nun chu eng ang nge ni ang tih han mitthla teh! Sipai te, râlthuam te, indona hriatrengnate a awm tawh lo vang a. Damdawiin te, doctor te, nurse te, leh thlânte pawh a awm tawh lo vang. Dân bawhchhiatna a awm tawh dâwn loh avângin police te, security alarm te a ngai tawh lo vang a, kawngkhâr kalhna leh chabi te hial pawh a ngai tawh hek lo vang! Lungngaihna tam tak min thlentu chûng dinhmun ṭha lo zawng zawngte chu chatuanin an boral tawh ang.

16, 17. (a) Armageddon-a dam khawchhuakte chu engtin nge an awm ang? Entîrna pe rawh. (b) He khawvêl hlui tihchhiat a nih hnuah kan dam khawchhuak ang tih engtin nge kan chian theih?

16 Dinhmun ṭha lote tihbo a nih hunah nun chu eng ang nge ni ang? Mitthla chu a awlsam lo. Dinhmun ṭha lovah hun rei tak kan lo awm tawh avângin nêksâwrna hian eng ang khawpin nge min nghawng tih pawh kan hre lo mai thei. Entîr nân, rêl chawlhna hmun kianga awmte chuan a bengchhenzia chu an hre lo pawh a ni mai thei a. Bawlhhlawh paihna kianga chêngte chuan a rim chhiatzia an hre lo pawh a ni mai thei. Mahse, Jehova’n dinhmun ṭha lo zawng zawng a tihtâwp hunah chuan hahdamthlâk tak a ni ang!

17 Tûna kan tawn nêksâwrnate chu engin nge thlâk dâwn? Sâm 37:11 chuan: “Remna chênin an hmuingîl ang,” tiin a sawi a. Hei hi Jehova’n kan tâna min duhsak a ni tih hriat chu a va thlamuanthlâk tak êm! He hun harsa takah hian, Jehova leh a inawpna pâwl hnaih reng tûrin theih tâwp chhuah rawh. Nakin hun i beiseina hi a hlut êm avângin chu chu ngun takin ngaihtuah ṭhîn la, i tân a tak nihtîrin mi dangte pawh hrilh ve ang che. (1 Timothea 4:15, 16; 1 Petera 3:15) Chutiang chuan he kalhmang a tâwp hunah i dam khawchhuak ang a, chatuanin i hlim tawh ang!

^ par. 1 He paragraph hian kum tam tak kaltaa United States-a hmun ṭhenkhata an tih dân ṭhin a târ lang a ni.