“Ka fate thutakah an awm tih ka hriat aliama lâwmna nasa zâwk rêng ka nei lo ve.”—3 JOHANA 4.

HLA: 41, 4

1, 2. (a) Ram danga pêm naupangte’n eng harsatnate nge an tawh? (b) He thuziakah hian eng zawhnate nge kan sawiho vang?

JOSHUA chuan: “Ka naupan têt aṭangin ram danga pêm ka nu leh pate pianpui ṭawng chu inah leh kohhranah ka hmang a. Mahse, school ka kal ṭan chuan, tualchhûng ṭawng hman chu nuam ka ti ta zâwk a. Kum rei lote chhûngin, chu ṭawng chauh chu ka hmang ta a ni. Inkhâwmnaa thusawite ka hre thiam tawh lo va, ka nu leh pate hnamzia chu ka ṭâwmpui thei tawh lo,” tiin a sawi. Joshua thiltawn hi thil thleng pângngai tak a ni.

2 Tûn laiah, mi 240,000,000 aia tamte chu an pianna ramah an chêng lo va. Ram danga pêm nu leh pa i nih chuan, i fate’n Jehova an hmangaih theih nân leh “thutakah an awm” theih nân engtin nge a ṭha thei ang bera i ṭanpui theih ang? (3 Johana 4) Chu bâkah, mi dangte pawhin engtin nge an ṭanpui ve theih ang?

 NU LEH PATE U, ENTAWN TUR ṬHA SIAM RAWH U

3, 4. (a) Engtin nge nu leh pate’n an fate tân entawn tûr ṭha an siam theih? (b) Nu leh pate’n an fate hnên aṭangin an beisei loh tûr chu eng nge ni?

3 Nu leh pate u, in fate’n Jehova nêna inlaichînna ṭha leh chatuan nunna an neih in duh chuan in entawn tûr siam chu a pawimawh hle a ni. ‘A ram leh a felna in zawng hmasa’ tih in fate’n an hmuh chuan an nî tin mamawhte atân Jehova rinchhan dân an zir thei ang. (Matthaia 6:33, 34) Sum leh pai ûm zêl aiin Jehova rawngbâwlna chu dah hmasa zâwk ang che. Samkhâi taka nungin leibâ neih loh tum ang che. Sum leh pai emaw, “mihring hnêna ropuina” zawn emaw ai chuan “vânah ro” khawlkhâwm rawh, chu chu Jehova pawm hlawhna a ni si a.—Marka 10:21, 22 chhiar rawh; Johana 12:43.

4 I fate tân hun nei lo khawpin buai ngai suh. An tân emaw, in tân emaw hming thanna, a nih loh leh sum leh pai zawng lova Jehova an dah hmasak avângin i hlutzia hriattîr ang che. Fate’n nu leh pate nuamsa takin an awmtîr tûr a ni tih ngaih dân dik lo chu pumpelh rawh. “Faten nu leh pate tân an khâwl khâwmsak tûr a ni lo va, nu leh paten fate tân an khâwl khâwmsak zâwk tûr a ni si a,” tih hi hre reng ang che—2 Korinth 12:14.

NU LEH PATE U, ṬAWNG HARSATNA CHU HNEH TUM RAWH U

5. Engvângin nge nu leh pate chuan an fate hnênah Jehova chanchin an sawi fo vang?

5 Hrilh lâwk angin, “hnam ze tinrêng aṭanga lo chhuakte” chu Jehova inawpna pâwlah an kal a. (Zakaria 8:23) Mahse, i fate’n i pianpui ṭawng chu ṭha taka an hriatthiam loh chuan thutak zirtîrnaah i tân a harsa thei a ni. Anni chu i Bible zirpui pawimawh berte an ni a, Jehova an “hriat” chu an tân chatuan nunna a ni. (Johana 17:3) I fate’n Jehova zirtîrnate an hriat theih nân, a thute chu “in sawi ṭhîn tûr a ni.”—Deuteronomy 6:6, 7 chhiar rawh.

I fate chu i Bible zirpui pawimawh berte an ni

6. I fate’n i pianpui ṭawng an thiamna chu engtin nge an hlâwkpui theih? (A thupui chunga milem en rawh.)

6 I fate chuan tualchhûng ṭawng chu school-ah leh mi dangte hnên aṭangin an zir thei a. Mahse, i pianpui ṭawnga i biak reng chuan i ṭawng chu an thiam thei ang. I fate’n i pianpui ṭawng an thiam chuan biak che leh an ngaih dânte hrilh che nuam an ti ang. Chu chuan hlâwkna dang pawh a la nei a. I fate’n ṭawng pakhat aia tam an thiam chuan ngaihtuah thiamna an nei lehzualin, mi dangte thlîr dân pawh an hre thiam thei ang. Rawngbâwlnaah pawh tam lehzuala thawh theihna an nei bawk ang. A nu leh pa ram danga pêm Carolin-a chuan: “Ṭawng dang hmanna kohhrana awm chu a nuam khawp mai. Mamawh zualna hmuna ṭanpuina pêk pawh a châk awm hle a ni,” tiin a sawi.

7. In chhûngkuaah ṭawng hman avânga harsatna a awm chuan eng nge i tih theih?

7 Ram danga pêm naupangte’n tualchhûng hnamzia leh ṭawngte an thiam hian ṭhenkhat chuan an nu leh pate ṭawng hman  chu an hmang hrehin, an theihnghilh hial pawh a ni thei a. Nu leh pate u, in fate chu chutiang an nih chuan tualchhûng ṭawng tal in zir thei ang em? An tîtî te, an intihhlimna te, school-a an awm dân in hriatthiamna te, leh an zirtîrtute tlang taka biak pawh theihnate chuan in fate chu Kristian ni tûra enkawl seilen a tiawlsam ang. Ṭawng thar zir tûr chuan hun leh tha leh inngaihtlâwmnate i neih a ngai ang. Chu chu manhla tak a ni ang. Entîr nân, i fa chu bengngawng lo ni ta se, amah i biak theih nân sign language thiam i tum dâwn lâwm ni? Ṭawng dang hman nuam tizâwk naupang chuan ngaihsak a phû tih chu a dik a ni lâwm ni?

8. Tualchhûng ṭawng i thiam loh chuan i fate chu engtin nge i ṭanpui theih ang?

8 Ram danga pêm nu leh pate tân an fate hman ṭawng thar chu thiam taka sawi a harsa thei a. Chu chuan an fate chu “Lehkha Thianghlimte” hre thiam tûra an ṭanpuinaah a tiharsa mai thei a ni. (2 Timothea 3:15) Chutiang dinhmun i tawng a nih pawhin, i fate chu Jehova hre tûr leh hmangaih tûrin i la ṭanpui thei tho va. Upa Shan-a chuan: “Ka nu hmeithai chuan kan ṭawng hriatthiam ber chu a hre thiam vak lo va, kei leh ka unaunute’n a ṭawng hman chu kan thiam chiang bawk si lo. Mahse, Bible a zirna te, a ṭawngṭaina te, leh chawlhkâr tin chhûngkuaa Pathian biakna kaihruai tûra theih tâwp a chhuahnate kan hmuh hian Jehova hriat a pawimawhzia kan hre thiam a ni,” tiin a sawi.

9. Nu leh pate chuan ṭawng chi hniha zirtîr ngai an fate chu engtin nge an ṭanpui theih?

9 Naupang ṭhenkhatte chuan ṭawng chi hnihin Jehova chungchâng an zir a ngai a. Engvângin nge? School-a an ṭawng hman leh ina an ṭawng hman a inan loh vâng a ni. Chuvângin, nu leh pa ṭhenkhatte chuan chûng ṭawng chi hniha chhuah thu leh hla chhuah te, ngaihthlâk tûr awthun te, leh video-te an hmang a ni. Ram danga pêm nu leh pate chuan Jehova hnaih lehzual tûra an fate an ṭanpuinaah ṭan an la lehzual tûr a ni tih a chiang hle.

ENG ṬAWNG HMANG KOHHRANAH NGE I AWM?

10. (a) Eng ṭawng hmanna kohhranah nge an awm dâwn tih chungchângah tuin nge thu tlûkna siam ang? (b) Chhûngkaw lû chuan thu tlûkna a siam hmain eng nge a tih ang?

10 “Mikhualte” chu an ṭawng hmang Thuhretute awmna aṭanga hla taka an awm chuan tualchhûng ṭawng hmanna kohhran chu an zawm a ngai a ni. (Sâm 146:9) An pianpui ṭawng hmang kohhran an bul hnaia a awm chuan chhûngkaw lûin eng ṭawng hmanna kohhran nge a chhûngkaw tân ṭha ber ang tih chungchângah thu tlûkna a siam tûr a ni. Thu tlûkna a siam hmain, ngun taka ngaihtuahin a ṭawngṭai tûr a ni a. A nupui fanaute pawh a râwn thei bawk. (1 Korinth 11:3) Engte nge a ngaihtuah ang? Eng Bible thu bulte’n nge thu tlûkna siam tûra ṭanpui?

Chhûngkaw lû chuan a chhûngkaw tâna ṭha ber tûr ṭawng hmanna chungchângah thu tlûkna a siam tûr a ni

11, 12. (a) Ṭawng hman azirin naupangin inkhâwmte a hlâwkpui tih engtin nge kan hriat theih? (b) Engvângin nge naupang ṭhenkhatin an nu leh pate pianpui ṭawng chu an zir duh loh?

 11 Nu leh pate chuan an fate mamawh dik tak chu an ngaihtuah tûr a ni a. Bible thutak hre thiam tûrin naupangte chuan chawlhkâr tin inkhâwma Bible kaihhruainate dârkâr tlêm azâwng ngaihthlâk mai aia tam an mamawh a ni. Hei hi han ngaihtuah teh: An ṭawng thiam ber inkhâwmnaa an va telna ringawt aṭang pawhin naupangte chu an nu leh pate rin ai daihin thil an zir tam zâwk a ni. Naupangte’n ṭawng an hriatthiam vek loh chuan chutiang chu a ni thei lo vang. (1 Korinth 14:9, 11 chhiar rawh.) Naupang tân a pianpui ṭawng chu a ngaihtuah dân leh a rilru vei zâwng nghawngtu ber a ni tawh lo mai thei. Dik takin, naupang ṭhenkhatte chuan an nu leh pate pianpui ṭawnga chhânna pêk dân te, thu hrilh dân te, leh thusawi dânte chu an zir thei a; mahse, chûng chu an irâwm chhuaka sawi an ni lo.

12 Chu bâkah, naupang thinlung chu ṭawng chauhvin a thunun lo. A chunga kan sawi tâk Joshua pawh, chutiang chiah chu a ni. A unaunu Esther-i chuan: “Naupangte tân chuan an nu leh pate ṭawng hman, hnam dân, leh sakhuana chu thil inkawp tlat a ni,” tiin a sawi. Naupang chuan a nu leh pate hnam dân chu ṭâwmpui ve pha lova a inhriat chuan a nu leh pate ṭawng leh sakhuana chu a zui duh lo pawh a ni thei bawk. Ram danga pêm nu leh pate’n eng nge an tih theih?

13, 14. (a) Engvângin nge ram danga pêm chhûngkaw pakhat chu tualchhûng ṭawng hmanna kohhrana an insawn? (b) Engtin nge nu leh pate chuan Jehova nêna an inlaichînna nghet tak chu an vawn reng theih?

13 Kristian nu leh pate chuan anmahni duhzâwng aiin an fate mamawh chu an dah pawimawh zâwk a. (1 Korinth 10:24) Joshua leh Esther-i te pa, Samuel-a chuan: “Ka fate chu eng ṭawngin nge thlarau lamah hma an sâwn ber tih kan nupain kan chîk chiang a, tichuan finna nei tûrin kan ṭawngṭai a ni. A chhânna chu kan tâna thil awlsam a ni lo. Kan pianpui ṭawnga neih inkhâwmte chu an hlâwkpui vak lo tih kan hmuhin, tualchhûng ṭawng hmanna kohhrana insawn tûrin thu tlûkna kan siam ta a. Kan fate nên chuan kan inkhâwm tlângin, rawngbâwlnaahte kan telho ṭhîn. Chaw ei tûr leh zinho tûrtein tualchhûng ṭhiante kan sâwm ṭhîn a. Chûng thiltihte chuan kan fate chu unaute hre chiang tûr leh Jehova chu Pathian ang chauh ni lovin, an Pa leh an Ṭhian nia hre tûrin a ṭanpui a ni. Hei hi kan ṭawng an thiam ai pawhin kan ngai pawimawh zâwk a ni,” tiin a sawi.

14 Samuel-a’n tihian a sawi belh a: “Keimahni ngei pawh thlarau lama kan chak theih nân, ka nupui nên kan ṭawng hmang kohhranah kan inkhâwm ṭhîn a ni. Kan buaiin, kan chau thei hle bawk. Mahse, kan thawhrimna leh kan inpêknate Jehova’n mal a sâwm avângin kan lâwm tak zet a. Kan fate pathum chuan hun kimin Jehova rawng an bâwl a ni,” tiin.

NAUPANGTE TIH THEIH

15. Engvângin nge unaunu Kristina-i chuan tualchhûng ṭawng hmanna kohhran chu atân ṭha zâwka a hriat?

15 Naupangte an lo ṭhan len chuan an ṭawng thiam ber hmanna kohhranah ṭha lehzualin Jehova rawng an bâwl thei tih an hre mai thei a. Chutiang a nih chuan, an nu leh pate chuan anmahni dah pawimawh  lo angin an ngai tûr a ni lo. Kristina-i chuan: “Ka nu leh pate pianpui ṭawng chu tlêm azâwng ka hria a; mahse, inkhâwmnaa hman ṭawng erawh ka hre thiam pha lo. Kum 12 mi ka nihin, tualchhûng ṭawnga neih inkhâwmpuiah ka tel a. A vawikhatna atân, ka thu hriat chu thutak a ni tih ka hre thiam ta! Tualchhûng ṭawnga ka han ṭawngṭai chuan thil ṭha zâwk dang a thleng leh a. Thinlung takin Jehova ka be pawh thei ta!” tiin a sawi. (Tirhkohte 2:11, 41) Kum 18 mi a nihin, Kristina-i chuan chûng thilte chu a nu leh pate a sawipui hnuah tualchhûng ṭawng hmanna kohhrana insawn tûrin thu tlûkna a siam a. “Tualchhûng ṭawnga Jehova chanchin zirna chuan a taka nunpui tûrin min chêttîr a ni,” tiin a sawi. Tichuan rei vak lovah, Kristina-i chu regular pioneer thawkin a hlim tak zet a ni.

16. Engvângin nge Nadia-i chuan ṭawng dang hmanna kohhrana a awm avânga nuam a tih?

16 Ṭhalaite u, tualchhûng ṭawng hmanna kohhrana tel chu in tân a ṭhat zâwk in ring em? In rin chuan heti hian inzâwt ang che u: Chutiang kohhrana i insawnna chuan Jehova a hnaih lehzualtîr che ang em? (Jakoba 4:8) A nih loh leh, i nu leh pate’n i thiltih an hriat i duh loh vânga insawn nge i nih a, theih tâwp i chhuah peih loh vângin i insawn zawk? tiin. Tûna Bethela thawk mêk Nadia-i chuan: “Ka unaute nên kan tleirâwl chhuah chhohvin, tualchhûng ṭawng hmanna kohhrana insawn chu kan duh a,” tiin a sawi a. Mahse, a nu leh pate chuan chutianga an insawnnain Jehova leh naupangte inlaichînna a ti ṭha dâwn lo tih an hria a. “Ka nu leh pate chuan an pianpui ṭawng min zirtîr avâng leh ṭawng dang hmanna kohhranah min awm chhunzawmtîr avângin kan lâwm tak zet a ni. Chu chuan min tihlim a, Jehova hre tûra mi dangte ṭanpui theih nân hun remchâng tam zâwk min neihtîr a ni,” tiin a sawi zawm a ni.

MI DANGTE’N AN ṬANPUI THEIH DAN

17. (a) Fate enkawl seilian tûrin tute hnênah nge Jehova’n mawhphurhna a pêk? (b) Nu leh pate’n an fate thutak zirtîrnaah engtin nge ṭanpuina an hmuh theih?

17 Jehova chuan nu leh pate chu an fate thutak zirtîr tûrin mawhphurhna a pe a. Chu chu an pi leh pute emaw, mi dangte emaw hnênah a pe lo. (Thufingte 1:8; 31:10, 27, 28 chhiar rawh.) Chuti chung pawhin, tualchhûng ṭawng thiam lo nu leh pate chu an fate thinlung thleng tûra zirtîrnaah ṭanpui an ngai mai thei a. Nu leh pate’n ṭanpui an dîl hunah, an fate enkâwl tûra an mawhphurhna chu pumpelh an tum tihna a ni lo. Chu chu “Lalpa thununnaah leh zilhnaah” an fate enkawl hnaa pêng pakhat mai a ni. (Ephesi 6:4) Entîr nân, nu leh pate chuan upate hnênah chhûngkuaa Pathian biakna chungchânga kaihhruainate leh an fate’n ṭhian ṭha an neih theih nân ṭanpuinate an dîl thei a ni.

Naupangte leh nu leh pate chuan kohhran an hlâwkpui (Paragraph 18, 19-na en rawh)

18, 19. (a) Engtin nge Kristian dangte’n ṭhalaite chu an ṭanpui theih? (b) Nu leh pate’n eng nge an tih chhunzawm ang?

18 Nu leh pate chuan an fate ṭanpui tûrin an chhûngkaw Pathian biaknaah engemaw chângin mi dangte an sâwm thei a. Chu bâkah, ṭhalai tam takte chuan thu hrilhna leh thil dang an tih honaah Kristian dangte hnên aṭangin an inzir thei a ni. (Thufingte 27:17) A chunga kan sawi tâk Shan-a  chuan: “Min kaihruaitu unaupate chu ka la hre reng a. Inkhâwmnaa thusawi chanvo ka neih huna min ṭanpuina aṭangin thil tam tak ka zir a. Chu bâkah, kan hun âwla thil kan tiho ṭhîn chu nuam ka ti hle,” tiin a sawi.

19 Ni e, an fate ṭanpui tûra an sâwmte chuan nu leh pate zah thiam tûrin naupangte chu an fuih ṭhîn tûr a ni. An nu leh pate chungchâng a ṭha zâwnga sawina leh fate enkawlnaa nu leh pate mawhphurhna lâksak lohna hmangin a tih thei a. Chu bâkah, chutianga ṭanpuitute chuan kohhran chhûnga mite leh pâwna mite rinhlelh kai lo tûrin an chêt dânah an fîmkhur tûr a ni. (1 Petera 2:12) Nu leh pate chuan mi dangte ṭanpuina dîl thei mah se, an fate thutak zirtîr chu an mawhphurhna a la ni reng a. Kristian dangte ṭanpuina pêk chu an hriatpui tûr a ni.

20. Engtin nge nu leh pate chuan an fate chu Jehova chhiahhlawh rinawm ni tûra an ṭanpui theih?

20 Nu leh pate u, Jehova hnênah ṭanpuina dîlin ṭawngṭai ula, theih tâwp chhuah rawh u. (2 Chronicles 15:7 chhiar rawh.) I thil duhzâwngte aiin Jehova leh i fate inlaichînna chu dah hmasa zâwk rawh. Pathian Thuin i fate thinlung a hneh theih nân i tih theih apiang chu ti rawh. I fa chu Jehova chhiahhlawh a ni thei tih ringhlel ngai suh. I fate’n Pathian Thu leh i entawn tûr ṭha siam an zui i hmuh chuan tirhkoh Johana’n: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tia a sawi hi i ṭâwmpui ve ngei ang.—3 Johana 4.