“Sual a la pun dâwn avângin mi tam zâwk hmangaihna chu a la dai ang.”—MATTHAIA 24:12.

HLA: 23, 24

1, 2. (a) Matthaia 24:12-a Isua thu hi a hmasain tute tâna sawi nge a nih? (b) Kristian hmasa a tam zâwkte’n an hmangaihna an tinghet reng tih engtin nge Tirhkohte Lehkhabuin a târ lan? (A thupui chunga milem en rawh.)

ISUA leia a awm lai khân, “khawvêl tâwpna chhinchhiahna” chu mite awm dân aṭangin a hriat theih tih a sawi a. Chûng zîngah chuan: “Mi tam zâwk hmangaihna chu a la dai ang,” tih pawh a sawi tel bawk. (Matthaia 24:3, 12) Kum zabi khatnaa Judate chu Pathian mite niin an inchhâl a; mahse, Pathian an hmangaihna chu a lo dai ta a ni.

2 Chutih hun laia Kristian tam zâwkte rilru put hmang chu a danglam a. Anni chuan “Isua chu Krista a ni,” tiin ṭhahnemngai takin an zirtîr a, Pathian leh an unaute leh thutak la hre lo mite chungah pawh hmangaihna an lantîr a ni. Hêng Kristiante hian Pathian an hmangaihna chu an tinghet reng a. (Tirhkohte 2:44-47; 5:42) Lungchhiatthlâk takin, Kristian hmasa ṭhenkhatte’n an hmangaihna an tidai ta a. Chu chu engtin nge kan hriat theih?

3. Engin nge Kristian ṭhenkhatte hmangaihna chu tidai?

 3 Isua’n Ephesi khuaa Kristian hmasate hnênah: “I hmangaihna hmasa ber kha i bân tâk avângin,” tiin a sawi a. (Thu Puan 2:4) Ephesi khuaa Kristiante chu mahni duh dâna nung an chhehvêla mite thununin an awm a ni ngei ang. (Ephesi 2:2, 3) Ephesi khua chu thil dang zawng aia nawmchenna lam ûmtute awmna khawpui hausa tak a ni a. Chu mi khuaa mi tam zâwkte chu nungchang bawlhhlawh leh Pathian dân zah lo mite an ni a. Pathian leh mi dangte hmangaih aia mahni nawmna zawngtute an ni.

4. (a) Engtin nge tûn laiah hmangaihna a daih theih? (b) Eng thil pathumah nge kan hmangaihna kan tihngheh reng theih?

4 Hmangaihna dai chungchânga Isua thusawi hi kan tân pawh a ni a. Tûn laia mite chuan Pathian an hmangaihna an tidai telh telh a. Mi maktaduai tam tak chuan khawvêl buainate chingfel tûra Pathian rinchhan aiin mihring inawpna pâwl chu an rinchhan zâwk a ni. An hmangaihna pawh a dai tawlh tawlh bawk. Hmân laia Ephesi khuaa mite hmangaihna a daih ang bawkin, Jehova chhiahhlawhte hmangaihna ngei pawh a dai thei a. Chuvângin, kan hmangaihna kan tihngheh reng tûr thil pathum: (1) Jehova kan hmangaihna, (2) Bible thutak kan hmangaihna, leh (3) kan unaute kan hmangaihna hi i lo sawiho vang u.

JEHOVA KAN HMANGAIHNA

5. Engvânga Pathian hmangaih tûr nge kan nih?

5 Tu nge kan hmangaih ber ang? Isua chuan: “‘Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni.’ Chu chu thupêk ropui leh pawimawh ber a ni,” tiin a sawi a. (Matthaia 22:37, 38) Pathian kan hmangaihna chuan a thupêkte zâwm a, chhel tûr leh leh sual haw tûrin min ṭanpui thei a ni. (Sâm 97:10 chhiar rawh.) Mahse, Setana leh a khawvêl chuan Pathian kan hmangaihna tinghet lova, tihbotîr min tum a ni.

6. Mite’n Pathian hmangaihna an hloh hian an chungah eng nge thleng?

6 Khawvêl chuan hmangaihna chungchângah thlîr dân veiherh tak a nei a. Mi tam tak chu Pathian hmangaih aiin “mahni inhmangaihtu te,” an ni. (2 Timothea 3:2) Anni chuan “tisa châkna te, mit châkna te, dam chhûng ropuina lem te hi,” an ngaihven a ni. (1 Johana 2:16) Tirhkoh Paula’n mahni lâwm zâwng kan dah hmasak chuan eng thil nge thleng thei tih min vaukhân a. Ani chuan: “Tisa lam thilte duh chu thihna a ni,” tiin a sawi. Engvângin nge? Chutianga titute chu Pathian hmêlma an rawn nih vâng a ni. (Rom 8:6, 7) Sum leh pai leh tisa châkna ringawt ûmtute chu a tâwpah lungchhiatnain a tlâkbuak ṭhîn a ni.—1 Korinth 6:18; 1 Timothea 6:9, 10.

7. Tûn laia Kristiante nghawng thei ngaih dân hlauhawm tak chu eng nge ni?

7 Pathian awm ring lote, Pathian a awm leh awm loh hriat phâk a ni lo tih ring tute, leh chanchhâwnna ringtute chuan mi dangte chu Pathian hmangaih lo tûr leh a awm tih pawh ring lo tûrin hmin an tum a. Mi âte, a nih loh leh lehkha thiam lote chauhvin Siamtu an ring ṭhîn tih ngaih dân an siam hial a ni. Chu bâkah, mi tam tak chuan Siamtu aiin scientist-te an zah zâwk mah a. (Rom 1:25) Chûng ngaih dânte chuan Kristian chu a nghawng thei a ni. Jehova nêna  kan inlaichînna a derthawng thei a, kan hmangaihna pawh a dai thei bawk.—Hebrai 3:12.

8. (a) Eng dinhmunte’n nge Jehova mite chu tibeidawng thei? (b) Sâm 136-nain engtin nge min thlamuan theih?

8 Setana khawvêl suala kan nun avângin min tibeidawng theitu thil tam tak a awm a. (1 Johana 5:19) Beidawng lutuka kan awm chuan kan rinna a chak lo theiin, Pathian kan hmangaihna a dai thei bawk. Entîr nân, kum upatna te, hrisêl lohna te, leh sum leh pai harsatnate avângin buaina kan hmachhawn mai thei a. A nih loh leh, kan duh anga thil kan tih theih loh avângin kan lunghnual mai thei bawk. Kan beisei anga thil a thlen loh hunah pawh kan beidawng thei a ni. Eng harsatna pawh tâwk mah ila, Jehova’n min kalsan niin kan ngai tûr a ni lo. Sâm 136:23-a thu thlamuanthlâk tak: “Ani chuan kan hnam tlâwm lai khân min hre reng a: a ngilneihna chu kumkhuain a awm dâwn si a,” tih hi ngaihtuah ang che. Jehova’n ‘khawngaih kan dîlnate’ chu min ngaihthlâksakin, min chhâng ang tih kan chiang thei a ni.—Sâm 116:1; 136:24-26.

9. Engin nge Paula chu Pathian a hmangaihna tinghet reng tûra ṭanpui?

9 Tirhkoh Paula chu Jehova’n a ṭanpui dân ngun taka ngaihtuahtu Pathian chhiahhlawh a ni a, chutianga a tihna chuan nghet taka awm reng tûrin a ṭanpui a ni. Ani chuan: “Lalpa chu mi ṭanpuitu a ni, ka hlau lo vang; mihringin engnge mi tih theih ang?” tiin a sawi a. (Hebrai 13:6) Jehova a rinchhanna chuan nun harsatnate hmachhawn tûrin a ṭanpui a ni. Paula’n dinhmun harsate a tawh laiin Jehova a rinchhanna a hlauh ngai lo. Lung ina a tân lai pawhin, kohhrante hnêna fuihna lehkhate ziakin a Kristian unaute chu a tichak a. (Ephesi 4:1; Philippi 1:7; Philemona 1) Paula chuan eng buaina pawh tâwk mah se, Jehova a hmangaihna chu a vawng tlat a. ‘Thlamuanna zawng zawng Pathian, . . . kan hrehawmna zawng zawnga min thlamuantu,’ chu  a rinchhan tlat a ni. (2 Korinth 1:3, 4) Engtin nge Paula chu kan entawn theih?

Jehova chungah hmangaihna lantîr rawh (Paragraph 10-na en rawh)

10. Engtin nge Jehova kan hmangaihna kan tihngheh reng theih?

10 Pathian kan hmangaihna tihngheh theih dân kawng khat chu Paula’n: “Bâng lovin ṭawngṭai ula,” tiin a ziak a. A hnuah: “Ṭawngṭaina kawngah chuan ṭawngṭai fan fan ula,” tiin a ziah belh bawk. (1 Thessalonika 5:17; Rom 12:12) Engvângin nge ṭawngṭaina chuan Pathian min hnaihtîr? Kan ṭawngṭai hian Pathian nên kan inbia tihna a ni a. Chu chuan amah nên inlaichînna ṭha min neihtîr a ni. (Sâm 86:3) Kan Pa vâna mi hnênah kan thinlung chhûnga awmte kan hrilh hian Amah kan hnaih lehzual a. (Sâm 65:2) Chu bâkah, kan ṭawngṭaite a chhân dân kan hmuh hian Jehova kan hmangaihna a nghet lehzual a ni. “LALPA chuan a kotu zawng zawngte chu a hnaih ṭhîn,” tih kan ring tlat a. (Sâm 145:18) Jehova hmangaihna leh min ṭanpuina rinchhanna chuan tûnah leh nakina kan tawh theih buainate chingfel tûrin min ṭanpui ang.

BIBLE THUTAK KAN HMANGAIHNA

11, 12. Bible thutak kan hmangaihna chu engtin nge kan tihpun theih ang?

11 Kristian kan nih angin, thutak kan hmangaih a. Pathian Thuah thutak kan hmu a ni. Isua’n a Pa hnênah: “I thu chu thutak a ni,” tiin a sawi a. (Johana 17:17) Bible thutak hmangaih tûr chuan, Bible thute chu kan hriat a ngai a ni. (Kolossa 1:10) Mahse, chu mai chu a tâwk lo. Sâm 119 ziaktuin kan tih ngaite hre thiam tûra min ṭanpui dân hi han ngaihtuah teh. (Sâm 119:97-100 chhiar rawh.) Bible-a kan thu chhiarte chu ni lênga kan ngaihtuah emaw, kan chhût ngun emaw a ngai a. Bible thutak kan nunpui avânga hlâwkna kan neih dân kan ngaihtuah chuan kan ngaina lehzual ang.

12 Fakna hla phuahtu chuan: “I thute hi ka kâ atân a va thlum êm! a ni, ka kâ atân chuan khawizû aiin a thlum zâwk,” tiin a sawi a. (Sâm 119:103) Pathian inawpna pâwlin a buatsaih Bible ṭanchhan thu leh hla chhuahte hi chaw tui tak ang a ni a. Kan duhzâwng thilte kan ei hian, a tuina hre tûrin muangchânga ei kan duh a. Chutiang bawkin, inzir nân hun pêk a ngai a ni. Chutianga kan tih chuan “thu pawm tlâk” thutak chu kan duh tak zet ang a, kan chhiarte hriat reng a tiawlsamin, mi dangte ṭanpui nân kan hmang thei ang.—Thuhriltu 12:10.

13. Jeremia chu Pathian Thu hmangaih tûrin engin nge ṭanpui? Chu chuan a chungah engtin nge a nghawng?

13 Zâwlnei Jeremia chuan Pathian Thute a hmangaih a. Ani chuan: “I thute chu tihlan a ni a, ka ei a, i thute chu ka tân lâwmna leh ka thinlung hlimna a ni; Aw LALPA, Sipaihote Pathian, i hming kan pu ta si a,” tiin a sawi a. (Jeremia 15:16) Jeremia chuan Pathian thu hlu tak chu ngun takin a ngaihtuah a, tichuan chûngte chu a hmangaih a ni. Jehova aiawh nih chu a ngaihluin a thuchahte chu a puang a. Bible thutak kan hmangaih chuan, Jehova Thuhretute nih theihna leh he hun hnuhnûnga Lalram chanchin puan chhuah theihna chanvo hlu kan nei tih kan hria ang.

Bible thutak hmangaihna lantîr rawh (Paragraph 14-na en rawh)

14. Bible thutak kan hmangaihna tipung tûrin eng thil dang nge kan tih theih?

14 Eng thil dangin nge Bible thutak kan hmangaihna tinghet lehzual ang? Jehova min zirtîrna hmun, kohhran inkhâwmah kan tel ziah a ngai a. Chawlhkâr tina Vênnainsâng hmanga Bible zirna pawh hi zirtîrna kan dawnna bul ber zînga pakhat a ni bawk. He  inkhâwmna aṭanga hlâwkna pumhlûm hmuh kan duh chuan, kan inbuatsaih lâwk a ngai a ni. Entîr nân, târ lan Bible châng tinte chu kan lo en lâwk thei a. Tûn laiah, Vênnainsâng chu jw.org website-ah leh JW Library app-ah ṭawng tam taka hmuh theih a nih avângin mi tam tak chuan awlsam takin an chhiar theiin an download thei a ni. Electronic format ṭhenkhatah chuan Bible chângte chu rang takin a hmuh zung zung theih bawk. Mahse, thuziak tinte kan zir hunah Bible chângte ngun taka chhiar a, kan ngaihtuah hian Bible thutak kan hmangaihna chu a ṭhang chho dâwn a ni.—Sâm 1:2 chhiar rawh.

UNAUTE KAN HMANGAIHNA

15, 16. (a) Johana 13:34, 35-a kan hmuh angin, Isua’n eng thupêk nge min pêk? (b) Pathian leh Bible kan hmangaihna chu engtin nge kan unaute kan hmangaihna nên a inzawm tlat?

15 A lei lam nun tâwp dâwn zân khân, Isua’n a zirtîrte hnênah: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a hrilh a.—Johana 13:34, 35.

16 Unaute kan hmangaihna chu Jehova kan hmangaihna nên a inzawm tlat a. Pathian kan hmangaih loh chuan kan unaute kan hmangaih thei lo vang. Tichuan, kan unaute kan hmangaih loh chuan Pathian kan hmangaih thei lo bawk ang. Tirhkoh Johana’n: “A unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?” tiin a ziak a. (1 Johana 4:20) Jehova leh kan unaute kan hmangaihna chu Bible kan hmangaihna nên pawh a inzawm bawk. Engvângin nge? Bible aṭanga kan thil zirte kan ngainat chuan Pathian leh kan unaute hmangaih tûra thupêk chu kan zâwm duh ngei ang.—1 Petera 1:22; 1 Johana 4:21.

Unaute chungah hmangaihna lantîr rawh (Paragraph 17-na en rawh)

17. Hmangaihna kan lantîr theih dân kawng ṭhenkhat chu eng nge ni?

17 1 Thessalonika 4:9, 10 chhiar rawh.  Kohhrana mite chunga hmangaihna kan lantîr theih dân kawng ṭhenkhat chu eng nge ni? Kum upa unaute chu kohhran inkhâwm kal lam leh haw lama thlah an ngai mai thei a. Hmeithai unaunu chu a in siam ṭhatsak a ngai pawh a ni mai thei bawk. (Jakoba 1:27) Lunghnualna, lungngaihna, leh harsatna dang tâwktu unaute chuan kan ngaihsakna te, fuihna te, leh thlamuannate an mamawh a. (Thufingte  12:25; Kolossa 4:11) Kan thusawi leh thiltih hmangin “rinna chhûngte” kan hmangaihzia kan lantîr thei a ni.—Galatia 6:10.

18. Kan unaute nêna inrem lohna chingfel tûrin engin nge min ṭanpui ang?

18 Bible-in he kalhmang suaksual “ni hnuhnûngahte” hian mi tam takte chu mahni hmasial leh mi duhâmte an ni ang tih a sawi a. (2 Timothea 3:1, 2) Kristiante kan nih angin, Jehova, a Thu, leh unau inhmangaih tawnna nei chho zêl tûr chuan kan thawhrim a ngai a ni. Ṭha famkim lo kan nih avângin, kan unaute nên inrem loh châng pawh kan nei ngei ang. Mahse, kan inhmangaih tawn avângin, inrem lohnate chu hmangaihna nên a rang thei ang bera chinfel kan tum a ni. (Ephesi 4:32; Kolossa 3:14) Kan hmangaihna chu englai mahin i tidai ngai lo vang u! Chu ai chuan Jehova, a Thu, leh kan unaute hmangaihna nasa tak i nei chhunzawm zêl ang u.