A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  June 2017

Thubuai Lian Tak Chu Thlîr Reng Rawh

Thubuai Lian Tak Chu Thlîr Reng Rawh

“Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân.”—SAM 83:18.

HLA: 46, 16

1, 2. (a) Mi zawng zawng nghawngtu thubuai lian tak chu eng nge ni? (b) Chu thubuai chu engvângin nge kan tâna thil pawimawh tak a nih?

TUN laia mi tam tak tân chuan sum leh pai hi a pawimawh ber a. Chu chauh chu an ngaihtuah a, neih loh an hlau hle bawk. Sum tam lehzual neih theih nân leh an neihsate khâwlkhâwm nân an hunte an hmang a. Mi dang tân chuan an chhûngkua te, an hrisêlna te, leh nuna hlawhtlin an duh thilte chu a pawimawh ber a ni.

2 Chûng zawng zawng aia pawimawh zâwk thil pakhat a awm a. Chu chu Jehova lalchungnunna thiam chantîr hi a ni. Hei hi englai maha kan ngaihthah loh tûr thil pawimawh tak a ni a. Kan fîmkhur loh chuan chumi pawimawh dân chu theihnghilh khawpin kan nî tin nunah kan buai hle thei a, a nih loh leh mahni buaina ringawt kan ngaihtuah thei a ni. Jehova lalchungnunna kan thlâwp chuan kan nî tin nuna buainate chu kan chingfel thei ang a, Jehova kan hnaih lehzual ang.

 ENGVANGIN NGE HE THUBUAI HI A PAWIMAWH?

3. Setana chuan Pathian rorêlna chungchângah eng nge a sawi?

3 Diabol Setana chuan Jehova’n rorêl tûra dikna a neih leh neih loh chungchângah zawhna a siam a. Mihringte’n Jehova chu Rorêltu sual tak leh an tâna ṭha ber tûr duh lotu nia an ngaih chu a duh a ni. Ani chuan mite chu mahnia ro an inrêl chuan an hlim zâwk ang tiin a sawi a. (Genesis 3:1-5) Chu bâkah, tumah hi Pathian chungah an rinawm tak tak lo va, an nun a harsat lutuk chuan, tupawhin Pathian chu Rorêltu atân an duh lo vang tiin a sawi bawk. (Joba 2:4, 5) Chuvângin, Jehova chuan A Rorêlna tel lova nun hrehawmzia târ lan nân hun a pe a ni.

4. Engvângin nge lalchungnunna thubuai chu chinfel a ngaih?

4 Jehova chuan Diabola sawichhiatna chu a dik lo tih a hria a. Engvângin nge Pathianin Setana chu a thusawite finfiah tûra hun a pêk? A chhânna chu lei leh vâna awm zawng zawngte nên a inkûngkaih a ni. (Sâm 83:18 chhiar rawh.) Adama leh Evi chuan Jehova rorêlna an hnâwl avângin, mi dang tam tak pawhin an hnâwl a. Chu chuan mi ṭhenkhat chu Diabola a dik tih ngaih dân a neihtîr a ni. Chu thubuai a awm chhûng chuan mihringte, leh vântirhkohte ngaihtuahna chu a buai reng a, remna leh inlungrualna dik tak a awm thei lo a ni. Mahse, Jehova lalchungnunna thiam chantîr a nih hnuah mi zawng zawng chu kumkhuain a rorêlna dik tak hnuaiah an awm ang a. Lei leh vânah remna a awm bawk ang.—Ephesi 1:9, 10.

5. Engtin nge lalchungnunna thubuaia kan tel?

5 Pathian lalchungnunna chu thiam chantîr a ni ang a, Setana leh mihringte rorêlna chu a hlawhchhamin, tihboral a ni ang. Pathian rorêlna chu Messia Lalram hmanga tihlawhtlin a ni ang. Mi rinawmte chuan mihringte chu an rinawm theiin, rinawm takin Pathian rorêlna an thlâwp thei tih an lantîr ang. (Isaia 45:23, 24) Chûng mi rinawmte zînga tel chu kan duh em? Duh teh rêng mai! Chuti a nih chuan he thubuai pawimawh dân dik taka kan hriatthiam a ngai a ni.

CHHANDAMNA AIA PAWIMAWH ZAWK THIAM CHANTIRNA

6. Jehova lalchungnunna thiam chantîrna chu engtiangin nge a pawimawh?

6 Jehova lalchungnunna thiam chantîrna chu kan mi mal hlimna aiin a pawimawh zâwk a. Mahse, kan chandamna chu a pawimawh lovin, Jehova’n min ngaihsak tak tak lo tihna a ni lo. Chu chu engtin nge kan hriat?

Jehova lalchungnunna thiam chantîrna chu kan mi mal hlimna leh chhandamna aiin a pawimawh zâwk

7, 8. Pathian lalchungnuna thiam chantîrna chu engtin nge kan hlâwkpui ang?

7 Jehova chuan mihringte a hmangaih hle a. A nihna takah chuan, atâna mi duhawm tak kan nih avângin a Fapa min pe a, tichuan chatuan nunna kan nei thei a ni.  (Johana 3:16; 1 Johana 4:9) Jehova’n kan nakin hun atâna a thutiamte a vawn loh chuan Setana leh min dodâltu mi dangte chu an dik tihna a ni ang. Setana’n Jehova chu mihringte tâna thil ṭha thupa dâwt sawitu leh an chunga dik lo taka rorêltu niin a puh a. Dodâltute chuan Jehova thutiamte chu: “A lo kal lehna thutiam chu khawiah nge? Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,” tiin an nuihsawh a ni. (2 Petera 3:3, 4) Mahse, Jehova chuan a thutiamte chu a vawng tlat ang a. A lalchungnunna thiam chantîrnaah chuan thuâwih mihringte tân chhandamna a teltîr ngei ang. (Isaia 55:10, 11 chhiar rawh.) Jehova lalchungnunna chu hmangaihnaa innghat a ni a. Chuvângin, a chhiahhlawh rinawmte chu a hmangaihin a ngaihlu reng ang tih kan chiang thei a ni.—Exodus 34:6.

8 Jehova lalchungnunna chu chutianga pawimawh a nih avângin kan chhandamna chu a tân a pawimawh lo tihna a ni lo. Jehova chuan min ngaihsak tak zet a. Thil pawimawh zâwkte hre rengin, Jehova rorêlna chu rinawm takin kan thlâwp tlat tûr a ni.

JOBA’N A NGAIH DAN A THLAK DANGLAM

9. Sentana’n Job chungchângah eng nge a sawi? (A thupui chunga milem en rawh.)

9 Jehova lalchungnuna chungchânga thlîr dân dik tak neih chu thil pawimawh tak a ni a. Chu chu Bible bute zînga ziak hmasak ber pâwl Joba lehkhabu chhiarna aṭangin kan hre thei a ni. Setana chuan Joba’n nasa taka na a tawrh chuan Pathian a phatsan ang tih a sawi chu kan chhiar a. Pathian hnênah Joba hrehawm tuartîr tûrin a dîl bawk. Jehova’n chutiang chuan a ti lo va; mahse, “ngai rawh, a neih zawng zawng chu i kutah a awm e,” tia sawiin Joba fiah chu a phalsak ta a ni. (Joba 1:7-12 chhiar rawh.) Chu mi hnu lawkah, Joba chuan a chhiahhlawhte leh a thil neihte chu a chân ta a. Chu bâkah, a fa sâwmte chu râpthlâk takin an thi tih a hre bawk. Setana chuan chûng chhiatnate chu Pathian thlentîr angin a lantîr a. (Joba 1:13-19) Chumi hnuah, Joba chu nasa takin pânchhia a veitîr a. (Joba 2:7) Joba tihrehawm lehzual tûrin, a nupui leh a ṭhian der pathumte chuan ṭawngkam na tak leh tilunghnual thei thute an sawi bawk a ni.—Joba 2:9; 3:11; 16:2.

10. (a) Engtin nge Joba chuan Pathian laka a rinawmna chu a târ lan? (b) Engvângin nge Joba chuan siam ṭhat a mamawh?

10 Setana puhna chu a dik em? Dik lo. Joba chuan thil râpthlâk tak tak a tuar chung pawhin, Jehova a phatsan ngai lo. (Joba 27:5) Mahse, hun engemaw chen chu thil pawimawh ber hre lovin, mahni chauh a inngaihtuah a. Thil sual engmah ti lo niin a insawi reng a ni. Hrehawm a tawrh chhan chu hre tûrah a inngai bawk. (Joba 7:20; 13:24) Joba rilru put hmang chu kan hriatthiampui thei a. Mahse, Joba thlîr dân chu a dik lo tih Jehova’n a hriat chuan a siam ṭhatsak ta a ni. Engtin nge a siam ṭhatsak?

11, 12. Joba chuan Jehova ṭanpuinain eng nge a hriatthiam? Engtin nge Joba’n a chhân lêt?

11 Joba hnêna Jehova thusawi chu Joba bung 38 aṭanga bung 41-ah kan chhiar thei a. Jehova chuan Joba hrehawm tawrh chhan chu a hrilh lo va. Chu ai chuan, Pathian nêna khaikhin chuan a têtzia hre  thiam tûrin ṭanpui a duh zâwk a ni. Joba buainate aia pawimawh zâwk daih thubuai a awm tih a hrilh a. (Joba 38:18-21 chhiar rawh.) Jehova thusawi chuan Joba thlîr dân thlâk tûrin a ṭanpui a ni.

12 Joba’n hrehawm tam tak a tawrh hnua Jehova’n chutianga thu a sawi chu lainatna a neih lo tihna a ni em? Ni lo ve, Joba chuan chutiang chuan a ngai lo va. Jehova zilhna chu a hre thiamin a hlut a ni. Heti hian a sawi a: “Ka inten a, vut leh vaivuta ṭhuin ka sim ta e,” tiin. (Joba 42:1-6) A hmain, ṭhalai Elihua chuan Joba ngaihtuahna siam ṭha tûrin a lo ṭanpui tawh a. (Joba 32:5-10) Joba chuan hmangaih taka Jehova zilhna chu a ngaihthlâk hnuah a ngaih dân chu a thlâk ta a, Jehova chuan Joba rinawmna chu a lâwm tih mi dangte a hriattîr a ni.—Joba 42:7, 8.

13. Joba’n fiahnate a tawh hnuah engtin nge Jehova zilhna chuan a ṭanpui?

13 Jehova zilhna chu Joba chuan fiahna a tawh hnuah pawh a la hlâwkpui zawm zêl a ni. “LALPA chuan Joba hun hnuhnûng chu a tîr aia nasa takin mal a sâwm a.” A hnuah, “fapa pasarih leh fanu pathum a nei bawk a.” (Joba 42:12-14) Joba’n hêng a fate hi hmangaih hle mah se, a fa hmasa boral tate chu a ngai ngei ang. Amah leh a chhûngte chunga thilthleng râpthlâk tak takte chu a theihngilh thei lo ngei bawk ang. A tâwpah Joba’n fiahna a tawh chhan chu lo hre ta rêng pawh ni se, Pathianin chutiang khawpa hrehawm tawrh a phal chhan chu a ngaihtuah mai thei a ni. Joba’n chutiang a ngaihtuah a nih chuan, Jehova’n a hnêna a sawite chu a hre chhuak thei ang a. Chu chuan a thlamuanin, ngaih dân dik tak nei tûrin a ṭanpui dâwn a ni.—Sâm 94:19.

Kan buainate aiin Jehova lalchungnunna chu kan ngai pawimawh zâwk thei ang em? (Paragraph 14-na en rawh)

14. Joba thiltawn aṭangin eng nge kan zir theih?

14 Joba chunga thilthlengte ngaihtuahna chuan kan ngaituah dân siamrem tûrin min ṭanpui thei a, min thlamuan thei bawk. Joba bu hi ‘Pathian lehkha Thua chhelna  leh thlamuanna hmua beiseina kan neih theihna tûr leh keimahni min zirtîrna tura’ Jehova ziah lehkhabu zînga pakhat a ni a. (Rom 15:4) Hei hian Jehova lalchungnunna thiam chantîrna chungchâng ngaihtuah thei lo khawpa kan buaina ringawt ngaihtuah lutuk lo tûrin min zirtîr a ni. Joba ang bawkin, harsatna kan tawh hunah pawh, Jehova chunga rinawm tlatin a lalchungnunna kan thlâwpzia kan târ lang a ni.

15. Buainate kan neih hian kan rinawmna chuan eng nge a hlenchhuah?

15 Joba thiltawn chuan fiahna kan tawh hi kan chunga Jehova thinrim vâng a ni lo tih a târ lan avângin thlamuanna kan nei thei a ni. Fiahnate chuan Jehova lalchungnunna thlâwp theihna hun remchâng min pe a. (Thufingte 27:11) Rinawm taka kan tawrh chhuah chuan, Jehova kan tilâwmin, nakin hun atâna kan beiseina chu a nghet zual sauh vang. (Rom 5:3-5 chhiar rawh.) Joba thiltawn chuan, “Lalpa chu khawngaihnain a khahzia leh zah a ngaih theihzia,” a târ lang a. (Jakoba 5:11) Jehova lalchungnunna kan thlâwp chuan mal min sâwm ang. Chumi kan hriatna chuan “hlim taka chhelna leh dawhtheihna tinrêng nei” tûrin min ṭanpui ang.—Kolossa 1:11.

NGAIHVEN TLAT RAWH

16. Jehova lalchungnunna thiam chantîrna chu a pawimawh hle tih engvângin nge kan inhriatnawntîr fo vang?

16 Nuna buainate kan hmachhawn hian Jehova lalchungnunna thiam chantîrna ngaihtuah tlat chu thil harsa tak a ni tih chu a dik ngei mai. Buaina tê tham pawh kan ngaihtuah nasat lutuk chuan buaina lian tak angin a lang thei a. Chuvângin, eng harsatna pawh tâwk ila, Pathian lalchungnunna thlâwp a pawimawhzia kan inhriatnawntîr fo tûr a ni.

Jehova hnaa kan buai rengna chuan thil pawimawh ber hre reng tûrin min ṭanpui thei

17. Jehova hnaa buai rengna chuan engtin nge thil pawimawh ber chu ngaihtuah reng tûra min ṭanpui?

17 Jehova hnaa kan buai rengna chuan thil pawimawh ber hre reng tûrin min ṭanpui thei a. Entîr nân, unaunu Renee-i chu a  zeng thut avângin na a tuar reng a, cancer natna pawh a vei bawk. Damdawi ina a awm laiin, chuta hnathawk te, damlo dang te, leh rawn tlawhtute hnênah thu a hrilh ṭhîn a ni. Ṭum khat chu, damdawi ina chawlhkâr hnih leh a chanve a awm chhûngin thu hrilh nân dârkâr 80 lai a hmang a. Renee-i chuan a thi dâwn tih inhre mah se, thil pawimawh ber chu a theihnghilh ngai lo. Jehova lalchungnunna thlâwpna chuan thlamuanna a pe a ni.

18. Jennifer-i thiltawn chuan Jehova lalchungnunna thlâwpna chungchângah eng nge min zirtîr?

18 Nî tina kan tawh buaina tê thamte tâwk chungin Jehova lalchungnunna chu kan thlâwp thei tho va. Unaunu Jenifer-i chuan a hâwnna tûr thlawhna chu airport-ah ni thum chhûng a nghâk a. Thlawhnate chu a mal mala cancel a nih chuan, Jennifer-i chu a bedawngin mal tak niin a inhria a. A tân a pawi hle ngei ang. Mahse, chutianga awm aiin Jennifer-i chuan airport-a thlawhna nghâk ve mi dangte hnêna chanchin ṭha hril thei tûrin Jehova hnênah a ṭawngṭai a. Mi tam tak hnênah thu a hril theiin lehkhabu tam tak pawh a sem chhuak bawk. Jennifer-i chuan, “Harsatna tâwk mah ila, Jehova’n mal min sâwm a, a hming chawimawi thei tûrin chakna min pe,” tiin a sawi.

19. Betu dikte hriat hran theihna chu eng nge ni?

19 Jehova mite chauhvin Jehova lalchungnunna pawimawhzia chu chiang takin an hre thiam a. Chu chu betu dikte hriat hran theihna a ni. Chuvângin, mi mal tin hian Jehova lalchungnunna kan thlâwp a ni tih kan chiang tûr a ni.

20. Jehova chuan a lalchungnunna thlâwp tûra i tih zawng zawngte chu engtin nge a ngaih?

20 Jehova chuan rinawm taka a rawngbâwl leh fiahnate chhel taka tuar chhuak a, a lalchungnunna thlâwp tûra i tih zawng zawngte chu a hriain, a ngaihlu a ni. (Sâm 18:25) Jehova lalchungnunnain i thlâwp a phû chhan leh i thlâwp lehzual theih dânte chu a dawta thuziakah sawiho a ni ang.