A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

‘Pathian Thu Chuan Thil A Ti Thei’

‘Pathian Thu Chuan Thil A Ti Thei’

“Pathian thu hi a nung a, thil a ti thei a.”—HEBRAI 4:12.

HLA: 37, 50

1. Pathian Thu hian thiltihtheihna a nei tih engin nge rintîr che? (A thupui chunga milem en rawh.)

JEHOVA mite chuan a thu—mihring hnêna a thuchah—chu “a nung a, thil a ti thei,” tih an ring tlat a. (Hebrai 4:12) Kan nunah leh mi dangte nunah Bible-in thil a tihtheihzia chu kan hmu a ni. Thuhretu an nih hmain ṭhenkhat chu zu ngawl veite, leh nungchang bawlhhlawh takte an ni a. Mi ṭhenkhat chu hmingthang tak leh sum ngah takte ni mah se, an nunah thil engemaw kim lo niin an hria a ni. (Thuhriltu 2:3-11) Beisei bo leh beiseina nei lo mi tam takte chuan tûnah kaihhruaina leh beiseina an nei leh ta chu a lâwm awm hle a. Vênnainsângah “Bible-in nun a thlâk danglam” tih thuziak inzawm a awm a, chutiang thiltawnte chhiar chu nuam kan ti a ni. Mite chuan Kristian an nih hnuah pawh Bible ṭanpuinain, Jehova nêna an inlaichîna chu an tinghet chhunzawm zêl a ni.

2. Pathian Thu thiltihtheihnain kum zabi khatnaa mite chungah engtin nge hna a thawh?

2 Mi tam takin thu tak an hriat huna inthlâk danglamna lian  tak an nei hi a mak lo. Kum zabi khatnaa vân lam beiseina nei kan uanaute pawhin chutiang inthlâk danglamna chu an nei a. (1 Korinth 6:9-11 chhiar rawh.) Paula’n Pathian Ram luah lo tûrte chungchâng a sawi khân, heti hian a sawi belh a ni: “Nangni ṭhenkhat chutiang mi in nih ṭhin kha,” tiin. Pathian Thu leh a thlarau thianghlimin chûng mite chu inthlâk danglam tûrin a ṭanpui a. Mahse, Kristian an nih hnuah pawh, an zînga ṭhenkhat chu Jehova nêna an inlaichînna tichhe thei sual lian takte an ti a ni. Entîr nân, Bible chuan hnawhchhuah tûr hriak thih unau pakhat chungchâng a sawi a. A hnuah, a inthlâk danglam a, tichuan Kristian kohhran zînga mi a ni leh thei a ni. (1 Korinth 5:1-5; 2 Korinth 2:5-8) Pathian Thu thiltihtheihna avânga kan unau tam takte an inthlâk danglam thei tih hriat chu a phûrawm hle a ni.

3. He thuziakah hian eng nge kan zir ang?

3 Pathian Thu chuan thil a ti thei hle a. Chu chu Jehova’n min pêk avângin, ṭha taka hman kan duh a ni. (2 Timothea 2: 15) He thuziakah hian Bible thiltihtheihna chu (1) kan nunah, (2) rawngbâwlnaah, leh (3) platform aṭanga zirtîr hunahte kan lantîr theih dân kan sawiho vang. Kan thu zirte chuan kan ṭhatna tûra min zirtîrtu vâna kan Pa kan hmangaihzia leh a chunga kan lâwmzia lantîr tûrin min ṭapui ang.—Isaia 48:17.

KAN NUNAH

4. (a) Pathian Thuin min thunun tûr chuan eng nge kan tih ngai? (b) Bible chhiar tûrin engtin nge hun i insiam?

4 Pathian Thuin min thunun tûr chuan, kan chhiar ziah a ngai a. Nî tin chhiar kan tum tûr a ni. (Josua 1:8) Nî tin hian buai hle mah ila, kan chanvo neihte pawh tiamin, engmahin kan Bible chhiar a dâl tûr a ni lo. (Ephesi 5:15, 16 chhiar rawh.) Zîng hma takah, a nih loh leh a châng chuan chhûnahte emaw, zân mut dâwnahte emaw kan chhiar thei a. Chutianga kan tih chuan, “Aw, i dân hi ka va ngaina êm! Nilênga ka ngaihtuah ṭhin a ni,” tia hla phuahtu sawi hi kan ṭâwmpui a ni ang.—Sâm 119:97.

Kan chanvo neihte pawh tiamin, engmahin nî tina Bible kan chhiarna chu a dâl tûr a ni lo

5, 6. (a) Engvângin nge kan chhût ngun a ngaih? (b) Engtin nge nghawng nei taka kan chhût ngun theih? (c) Engtin nge Bible chhiarna leh chhût ngunnain a ṭanpui theih che?

5 Mahse, Bible chhiar mai hi a tâwk lo. Kan thil chhiarte chu ngun taka kan ngaihtuah emaw, kan chhût ngun emaw a ngai a. (Sâm 1:1-3) Chutia kan tih chauhvin, Bible finnate chu kan nunpui thei dâwn a ni. Bible chu lehkhabu aṭangin emaw, mobile leh tablet aṭangin emaw chhiar pawh ni ila, Pathian Thuin min chêttîr a, min thlâk danglam chu kan duh tûr a ni.

6 Engtin nge nghawng nei taka kan chhût theih ang? Bible kan chhiar hunah, châwl lawkin: ‘Hei hian Jehova chungchâng eng nge mi zirtîr? Ka thu lo chhiar tawhte chu engtin nge ka nunpui? Eng inthlâk danglamnate  nge ka la siam ngai?’ tiin kan inzâwt tûr a ni. Pathian Thu kan chhût ngun a, kan thu chhiarte chungchânga kan ṭawngṭai chuan, chûngte chu nunpui kan duh ngei ang. Tichuan, Bible-in thil a tih theihzia chu kan nunah a lang dâwn a ni.—2 Korinth 10:4, 5.

RAWNGBAWLNAAH

7. Engtin nge rawngbâwlnaah Pathian Thu ṭha taka kan hman theih?

7 Thu kan hrilh leh kan zirtîr hian Pathian Thu kan hman a pawimawh a. Unaupa pakhat chuan, “Jehova nên in tina thu hrila in kal hian, nangmaha sawi vek nge i duh a, amah sawitîr?” tiin a sawi a. Tuemaw Bible kan chhiarsak hian Jehova kan sawitîr ang a ni. Ṭha taka thlan Bible châng pakhat chuan kan thusawi theih eng dang zawng aiin thil a tithei zâwk a. (1 Thessalonika 2:13) Rawngbâwlnaa i tel hunah, a remchân apiangin Bible chhiar i tum em?

Mite hnêna Bible kan chhiarsak hian Jehova kan sawitîr tihna a ni

8. Engvângin nge thu kan hrilh hunah Bible châng chhiar mai aia tam kan tih a ngaih?

8 Thu kan hrilh hunah, mite hnêna Bible châng pakhat chhiar mai chu a tâwk lo. Mi tam tak chuan Bible chângin a sawi tum chu an hre thiam lo va. Chu chu kum zabi khatnaah pawh a thleng dik a, tûnah pawh a la ni tho a ni. (Rom 10:2) In neitu chu kan Bible châng chhiarte hre thiam nghal mai tûrah kan ngai tûr a ni lo. Kan Bible châng chhiara thu pawimawh laite chu kan sawi nawn ang a, tichuan a awmziate kan hrilhfiah tûr a ni. Chutiang kawng chuan, mite thinlung leh rilruah Pathian Thu a thleng thei a ni.—Luka 24:32 chhiar rawh.

9. Mite’n Bible zahna nei tûrin Bible châng kan chhiar hmaa kan thusawiin engtin nge a ṭanpui theih? Entîrna pe rawh.

9 Bible châng kan chhiar hmaa kan thusawi chuan in neitu chu Bible zahna nei tûrin a ṭanpui thei a. Entîr nân, heti hian i sawi thei a ni: “He mi chungchângah min Siamtuin eng nge a sawi tih i lo en ang aw,” tiin. A nih loh leh, Kristian ni lo te hnêna thu kan sawi a nih chuan: “Lehkha Bu Thinghlimin eng nge a sawi tih i lo en ang aw,” tiin kan sawi thei bawk. Sakhaw ngaihsak lo mite kan tâwk a nih chuan: “Hmân laia he thusawi hi i lo hre tawh ṭhîn em?” tiin kan sawi thei ang. Mi tinte hian ṭobul leh ngaih dân an nei ṭheuh tih kan hriat chuan, kan thuhmahruaite chu mite ngaihven tûr zâwnga sawi kan duh ngei ang.—1 Korinth 9:22, 23.

10. (a) Unaupa pakhat thiltawn chu eng nge ni? (b) Rawngbâwlnaah Pathian Thu-in thil a tihtheihzia hi engtin nge i hmuh?

10 Pathian Thu kan hman hian kan thu hrilh mite chungah nasa takin nghawng a nei thei tih mi tam takin an hmu a. Entîr nân, unaupa pakhatin kum tam tak chhûng kan magazine-te lo chhiar ṭhîn kum upa pakhat chu a va tlawh a. Ni khat chu, Vênnainsâng chhuak thar pe nghal mai lovin, Bible châng chhiar hmasak a tum a.  Tichuan, 2 Korinth 1: 3, 4: “Khawngaihnate Pa leh thlamuanna zawng zawng Pathian chuan . . . kan hrehawmna zawng zawngah min thlamuan ṭhîn,” tih chu a chhiar a. Chu thu chuan a thinlung a khawih êm avângin chhiar nawn leh tûrin a ngên a ni. Chu pa chuan a nupui nêna thlamuanna an mamawhzia a hrilh a. Chu Bible châng avâng chuan Bible hriat belh a duh ta a ni. Kan rawngbâwlnaa Pathian Thu hmanna chuan thil a va tithei tak êm!—Tirhkohte 19:20.

PLATFORM AṬANGA ZIRTIR HUNAH

11. Platform aṭanga zirtîrtu unaupate chuan eng mawhphurhna nge an neih?

11 Kohhran inkhâwmah leh inkhâwmpuia tel chu nuam kan ti a. Inkhâwma kan tel chhan ber chu Jehova biak hi a ni a. Kan thu zirte chu kan hlâwkpui bawk. Chumi avâng chuan, platform aṭanga zirtîrtu unaupate chuan chanvo ropui tak leh mawhphurhna rit tak an nei a ni. (Jakoba 3:1) An zirtîrnate chuan Pathian Thu a ṭanchhan tih an chian a ngai a. He chanvo i nei a nih chuan, ngaithlatute thinlung thleng tûrin Bible thiltihtheihna chu engtin nge i hman theih?

12. Thusawitu chuan a thusawiin Bible a ṭanchhan tih engtin nge a chian theih?

12 Eng thusawiah pawh ni se, Bible hi a pawimawh ber tûr a ni a. (Johana 7:16) Chuvângin, i thusawi dânah fimkhûr hle la,  thiltawn leh entîrna i sawite chuan Bible aiin ngaihsak a hlawh zâwk tûr a ni lo. Chu bâkah, Bible aṭanga chhiar chu Bible hmanga zirtîrna nên a inang lo tih hria ang che. Dik takin, Bible châng i chhiar tam lutuk a nih chuan, chûng chu an chhinchhiah vêk thei lo vang. Chuvângin, i chhiar duh Bible chângte chu ngun takin thlang ang che. Tichuan, chhiar nân te, hrilhfiah nân te, tehkhinthu hman nânte hun pe la, a taka nunpui theih dânte sawi lang rawh. (Nehemia 8:8) Outline hmanga thusawi a nih chuan, outline chu zir chiang la, chuta Bible chângte chu hmang ang che. Outline leh Bible chângte inkungkaih dân chu hriatthiam tum bawk rawh. Chumi hnuah, outline-a târ lan thu pawimawhte zirtîr nân chûng Bible châng ṭhenkhatte chu hmang ang che. (He mi chungchânga rawtna ṭhate chu Benefit From Theocratic Ministry School Education tih lehkhabu zirlai 21 aṭanga 23-ah hmuh theih a ni.) A pawimawh ber chu, Bible-a kan hmuh Jehova ngaih dân ropui takte hre thiam tûrin a ṭanpuina dîl hi a ni.—Ezra 7:10; Thufingte 3:13, 14 chhiar rawh.

13. (a) Unaunu chu inkhâwma a hriat Bible châng pakhatin engtin nge a rilru a khawih? (b) Inkhâwmnaa Bible hman dânin engtin nge a nghawng che?

13 Australia rama unaunu pakhat chu a naupang laiin lungchhiatthlâk tak tak thilte a chungah a thleng a, Pathian Jehova a  hriat hnuah pawh, Jehova’n a hmangaih tih a ring thei lo a ni. He unaunu hian inkhâwmnaah a rilru khawih tak Bible châng pakhat a hria a. Chu chu chhût ngunin, a zir bing a, chu chuan Bible châng dangte pawh chhiar tûrin a chettîr a. Tichuan, Jehova’n a hmangaih tih a ring nghet ta a ni. * (Footnote en rawh.) Kohhran inkhâwmnaah leh inkhâwmpuiahte chutianga i rilru khawihtu Bible châng i hre tawh ṭhîn em?—Nehemia 8:12.

14. Jehova Thu chu kan hlutin kan ngaina tih engtin nge kan lantîr theih?

14 Jehova’n a Thu, Bible min pêk avângin kan lâwm hle a ni lawm ni? A Thu chu a awm reng ang tih min tiam a, a thutiam chu a vawng reng a ni. (1 Petera 1:24, 25) Chuvângin, nî tin Bible chhiarin kan nunpui ang a, mi dangte kan ṭanpui hunah pawh kan hmang ṭhîn tûr a ni. Chutianga kan tih chuan, he ro hlu leh a bîk takin, a Ziaktu Pathian Jehova chu kan hmangaihin, kan hlutzia kan lantîr a ni ang.

^ par. 13 Inthlâk Danglam Ṭanna” tih bâwm chu en rawh.