A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

“Huai Takin Awm La, Bei Rawh”

“Huai Takin Awm La, Bei Rawh”

“Chak tak leh huai takin awm la, bei rawh; hlau suh la, zâm hek suh; LALPA Pathian, . . . i hnênah a awm e.”—1 CHRONICLES 28:20.

HLA: 60, 29

1, 2. (a) Solomona’n eng chanvo pawimawh tak nge a dawn? (b) Engvângin nge Davida’n Solomona chu a ngaihtuah?

SOLOMONA chuan chanvo ropui tak a dawng a. In sak tawh azawnga pawimawh ber Jerusalem biak in sakna hna huaihawt tûrin Jehova chuan a thlang a ni! Biak in chu “ropui tak,” leh a mawina avânga hmingthang tak tûr a ni a. Chu aia pawimawh zâwk chu, chu in chu “LALPA Pathian in,” tûr a ni.—1 Chronicles 22:1, 5, 9-11.

2 Lal Davida chuan Solomona chu Pathianin a ṭanpui ang tih a ring tlat a. Mahse, Solomona chu “a la naupangin, engmah a la hre rih lo va.” Biak in sa tûra mawhphurhna chu a pawm ngam ang em? A nih loh leh, a naupangna leh engmah a hriat rih lohna chuan a hna thawh tûr chu a dâl ang em? Hlawhtlingna nei tûr chuan, Solomona’n huaisenna a neih a ngai a, tichuan a hna chu a thawk ngei tûr a ni.

3. Solomona chuan a pa hnên aṭangin huaisenna chungchâng eng nge a zir?

3 Solomona’n a pa Davida hnên aṭangin huaisenna  chungchâng nasa taka a zir a ngai a. Davida chuan a tleirâwl laiin a pa berâmte rawn seh tum ram sakawlhte a bei a ni. (1 Samuela 17:34, 35) Pa sek tak leh sipai hlauhawm tak, mi hrawl Goliatha a beih pawh khân huaisenna nasa tak a lantîr a. Pathian ṭanpuinain, Davida chuan lung mân pakhat hmangin Goliatha chu a hneh a ni.—1 Samuela 17:45, 49, 50.

4. Engvângin nge Solomona’n huaisenna neih a mamawh?

4 Davida chu huaisenna nei tûr leh biak in sa tûra Solomona fuihtu tûr âwm rêng a nih chhan chu kan hre thei a. (1 Chronicles 28:20 chhiar rawh.) Solomona’n huaisenna a lantîr loh chuan, hlauhnain a man ang a, chu chuan hna pawh thawk ṭan lovin a awmtîr thei a ni. Chu chu a chanvo a hlen loh aiin a pawi zâwk ang.

Huaisena nei tûr leh a hna min pêk thawk thei tûrin Jehova ṭanpuina kan mamawh

5. Engvângin nge huaisenna kan mamawh?

5 Solomona ang bawkin, keini pawh huaisenna nei tûr leh Jehova min pêk hna thawk thei tûr chuan a ṭanpuina kan mamawh a. Chuvângin, huaisenna lantîrtu tûn hmaa mi ṭhenkhatte entawn tûr siam chu i lo en ang u. Chu bâkah, huaisenna lantîr theih dân leh kan hna kan hlen theih dânte kan ngaihtuah bawk ang.

HUAISENNA KAWNGA ENTAWN TURTE

6. Josefa huaisenna chungchângah engin nge i rilru khawih ber?

6 Potiphara nupuiin mutpui tûra a thlêm khân, Josefa chuan huaisenna a lantîr a. Chu thlêmna chu a hnâwl chuan, a nunah chhiatna a thleng thei tih pawh a hria. Mahse, thlêmna laka tlâwm mai lovin, huaisenna lantîrin Potiphara nupui chu a tlân chhuahsan a ni.—Genesis 39:10, 12.

7. Engtin nge Rahabi’n huaisenna a lantîr? (A thupui chunga milem en rawh.)

7 Huaisenna chungchânga entîrna dang leh chu Rahabi hi a ni a. Israel enthlatute chu Jeriko khua a ina an va kal khân, a hlauvin anni chu a ṭanpui duh lo thei a. Mahse, Jehova a rinchhan avângin, mi pahnihte chu a thukru ngam a, him taka tlân chhuak thei tûrin a ṭanpui a ni. (Josua 2:4, 5, 9, 12-16) Rahabi chuan Jehova chu Pathian dik a ni tih leh Israel mite chu ram a pe ngei ang tih a ring tlat a. Jeriko lal leh a mite pawh tiamin, mi dangte a hlauh avângin engmah ti thei lovin a awm lo va. Chu ai chuan, huaisen takin thil a ti a, amah leh a chhûngte a chhandam a ni.—Josua 6:22, 23.

8. Engtin nge Isua huaisennain tirhkohte chu a nghawng?

8 Isua tirhkoh rinawmte pawhin huaisenna nasa tak an lantîr a. Isua huaisenziate an hmu ṭhîn a, chu chuan amah entawn tûrin a ṭanpui a ni. (Matthaia 8:28-32; Johana 2:13-17; 18:3-5) Saddukaite’n Isua chanchin sawi lo tûra an tih pawh khân, tirhkohte chuan sawi lovin an awm lo.—Tirhkohte 5:17, 18, 27-29.

9. Huaisenna hi khawi aṭanga lo awm nge tih hre tûrin 2 Timothea 1:7-na chuan engtin nge min ṭanpui?

9 Josefa, Rahabi, Isua, leh tirhkohte  chuan thil dik tih an tum tlat a. Huaisenna an lantîr theih chhan chu, mahni theihna rinchhan lova Jehova an rinchhan vâng zâwk a ni. Huaisenna kan neih a ngaih châng hian, keini pawh mahni inrinchhan lovin, Jehova kan rinchhan tûr a ni. (2 Timothea 1:7 chhiar rawh.) Huaisenna kan neih a ngaihna hmun pahnih i lo en ang u: chhûngkuaah leh kohhranah.

HUAISEN A NGAIHNA DINHMUNTE

10. Engvângin nge Kristian ṭhalaite chuan huaisenna an mamawh?

10 Kristian ṭhalaite chuan Jehova rawngbâwl tûra huaisenna an lantîr a ngaihna dinhmun tam tak a awm a. Biak in sa zo tûra huaisen taka thu tlûkna fing siamtu Solomona hnên aṭanga inzirin, a entawn tûr siam chu an zui thei a ni. Ṭhalaite chu an nu leh pate kaihhruai tûr ni mah se, thu tlûkna pawimawhte chu mahniin an siam tûr a ni. (Thufingte 27:11) An ṭhian kawm tûr te, intihhlimna an neih tûr te, nungchâng thianghlim an vawn dân tûr te, leh baptisma an chan hun tûrte chungchângah thu tlûkna fing siam tûrin huaisenna an neih a ngai a. Pathian sawichhetu Setana duh zâwng nêna inkalha thil an tih dâwn avângin chutiang huaisenna chu an neih a ngai a ni.

11, 12. (a) Engtin nge Mosia’n huaisenna a lantîr? (b) Engtin nge ṭhalaite chuan Mosia entawn tûr siam chu an entawn theih?

11 Ṭhalaite siam tûr thu tlûkna pawimawh tak pakhat chu eng thiltum nge ka neih ang tih hi a ni. Ram ṭhenkhatah chuan, ṭhalaite chu zirna sâng zâwk ûm tûr leh sum tam tak lâkluh theihna hna hmu tûra nawr luih an ni a. Ram dang lehah chuan, sum zawnnate a harsa a, ṭhalaite chuan an chhûngkaw châwm chu an tih tûr ber niin an ngai mai thei. Chûng dinhmunte i tawng a nih chuan, Mosia entawn tûr siam hi ngaihtuah rawh. Pharaoa fanu enkawlna hnuaia seilian a nih avângin, mi hausa emaw, mi pawimawh tak emaw nih chu a tum thei a. Aigupta mi a chhûngkua te, zitîrtu te, leh thurâwn petute hnên aṭanga nêksâwrna a dawnte chu han ngaihtuah teh! Mahse, Mosia chuan huaisen takin Pathian mite nêna awm chu a thlang a. Aigupta leh a hausaknate a chhuahsan hnuah, Jehova a rinchan pumhlum ta a ni. (Hebrai 11:24-26) Chuvângin, Jehova’n nasa takin mal a sâwm a, nakinah pawh chu aia nasain mal a la sâwm ang.

12 Ṭhalaite’n huaisen taka Jehova rawngbâwlnaa thiltumte an neih a, an nunah Lalram hmasâwnnate an dah hmasak chuan malsâwmnate an dawng ngei ang. Pathianin an chhûngkaw mamawhte chu a pe ngei ang. Kum zabi khatnaa ṭhalai Timothea chuan Pathian rawngbâwl chu a nuna a dah hmasak ang bawkin, nang pawhin i ti ve thei a ni. * (Footnote en rawh.)— Philippi 2:19-22 chhiar rawh.

I nun kawng tinrêngah huaisenna lantîr i tum em? (Paragraph 13-17-na en rawh)

13. Engtin nge huaisennain ṭhalai unaunu chu a thiltum hlen tûra a ṭanpui?

13 U.S.A. Alabama biala awm unaunu chuan Pathian rawngbâwnnaa thiltumte nei tûrin huaisenna a neih a ngai a. Ani chuan: “Ka tleirâwl chhoh chuan mi zakzum tak ka ni a. Kingdom Hall-ah pawh mite ka be ngai mang lo, in tin kalnaah hmêlhriat ngai lohte kawngka chu ka kit khât hle a ni,” tiin a sawi. A nu leh pate leh kohhranna mite ṭanpuina avângin, he ṭhalai Kristian unaunu  hian a thiltum, regular pioneer chu a thawk thei a ni. “Setana khawvêl chuan zirna sâng te, hmingthanna te, sum leh pai te, leh neihnunnate chu thiltum ṭha tak angin a thlîr a,” tiin a sawi a. Mahse, mi tam zâwkte chuan chûng an thiltumte an hlâwhtling loh avângin rilru hahna leh natnate a thlen zâwk tih a hria a. “Jehova rawngbâwlna chuan hlimna nasa tak leh hlawhtling nia inhriatna min pe a ni,” tiin a sawi belh bawk.

14. Eng hunahte nge Kristian nu leh pate chuan huaisenna neih an mamawh?

14 Kristian nu leh pate pawhin huaisenna an mamawh a. Entîr nân, i hnathawhna pu chuan chhûngkaw Pathian biakna te, thlawhhma rawngbâwlna te, leh kohhran inkhâwm i neih nîahte overtime thawk tûrin a phût ṭhîn che pawh a ni thei. I thawh theih loh thu a hnêna i sawi ngam a ngai a, i fate tâna entawn tûr ṭha i siam a ngai a ni. A nih loh leh, kohhrana nu leh pa ṭhenkhat chuan i fate tih atâna i duh loh chu an fate tih an phal pawh a ni thei a. I phal loh chhan an zawh che chuan, huaisen tak leh zah thiam takin i sawi ang em?

15. Engtin nge Sâm 37:25-na leh Hebrai 13:5-na chuan nu leh pate chu a ṭanpui theih?

15 Pathian rawngbâwlnaa thiltum nei tûr leh hlen tûra fate ṭanpui tûr chuan huaisen a ngai a. Entîr nân, nu leh pa ṭhenkhat chuan an fate chu pioneer thawk tûr leh mamawh zualna hmuna rawngbâwl tûr te, Bethela rawngbâwl tûr te, a nih loh leh Kingdom Hall leh Assembly Hall sakna ṭanpuitûrtein  an fuih ngam lo pawh a ni thei. An upat huna an fate’n an enkawl theih loh an hlauh vâng pawh a ni thei ang. Mahse, nu leh pa fingte chuan Jehova’n a thutiamte a hlen ang tih ringin huaisenna an lantîr a ni. (Sâm 37:25; Hebrai 13:5 chhiar rawh.) Chutiang huaisenna lantîra Jehova rinchhantu nu leh pate chuan anmahni ang ni ve tûrin an fate chu an ṭanpui a ni.—1 Samuela 1:27, 28; 2 Timothea 3:14, 15.

16. Engtin nge nu leh pa ṭhenkhatin an fate chu Pathian rawngbâwlnaa thiltumte nei tûra an ṭanpui a, chu chu engtin nge an fate’n an hlâwkpui?

16 United States rama nupa tuak khat chuan an fate chu Jehova rawngbâwl tûrin an fuih a. A pasal chuan: “Kan fate kêa an kal theih hma leh an ṭawng theih hmain, pioneer thawh leh kohhranna rawngbâwl a nawmziate kan hrilh ṭhîn a. Tûnah chuan chu chu thiltumah an nei ta a ni,” tiin a sawi. An fate’n chutiang thiltumte an neih a, an hlen avângin, Setana khawvêl thlêmnate chu an do theiin Jehova rawngbâwl chu an ngaihven reng thei a ni. Fa pahnih nei unaupa chuan: “Nu leh pa tam takin, an fate chu infiamna te, intihhlimna te, leh zirnate ang chi thiltumte nei tûrin theih tâwp an chhuahin, sum leh pai tam tak an sêng a. Jehova nêna inlaichînna ṭha neihtîr theitu thiltumte an ûm theih nân, theih tâwp chhuaha fate ṭanpui a, sum leh pai sên chu a ṭha zâwk daih a ni. Chutiang thlarau lam thiltumte an hlen kan hmuh bâkah, thlarau lam thila kan thawhhona chuan lungawina nasa tak min neihtîr a ni,” tiin a sawi. Pathian rawngbâwlnaa thiltumte nei tûr leh hlen tûra fate ṭanpuitu nu leh pate chu Pathian pawm hlawh an ni tih i chiang thei a ni.

KOHHRANNA HUAISENNA

17. Kristian kohhranna huaisenna lantîr a ṭûl chhan entîrnate pe rawh.

17 Kohhranah pawh huaisenna kan lantîr a ngai a. Entîr nân, upate chuan sual lian tak titute chungchâng an rêl hunah leh damdawi inenkawlna avânga nun hlauhthâwn awm dinhmuna awmte an ṭanpui hunah huaisenna an neih a ngai a ni. Upa ṭhenkhat chuan tân ina awm ngaihventute chu Bible zirpui tûrin emaw, inkhâwmna neihpui tûrin emaw an va tlawh ṭhîn a. Pasal nei lo unaunute chungchâng hi eng nge ni ve? Huaisenna lantîr tûr leh Jehova rawngbâwl tûrin hun remchâng tam tak an nei a ni. Pioneer an thawk thei a, mamawh zualna hmuah an insawn thei a, Local Design/Construction program-ah an thawk thei a, Lalram Chanchin Puangtute School-ahte an tel thei a ni. Ṭhenkhat chu Gilead School-a kal tûra sâwm a ni bawk.

18. Engtin nge kum upa unaunute’n huaisenna an lantîr theih?

18 Kum upa unaunute chu kan hmangaih a, anni ang mite kohhrana an awm avângin kan lâwm tak zet a ni! An zînga ṭhenkhat chu Pathian rawnbâwlnaah tûn hmaa an lo thawh angin thawk thei tawh lo mah se, huaisenna lantîrin an theih ang tâwkin an la thawk zawm zêl a. (Tita 2:3-5 chhiar rawh.) Entîr nân, inchawi tâwk taka thawmhnaw hâk dân chungchânga ṭhalai unaunu va hrilh tûra upate’n an tih hunah kum upa unaunu chuan huaisenna a neih a ngai a ni. Ani chuan unaunu thawmhnaw hâk dân chu sawisêl lovin, a duh thlannain mi dangte a nghawng dân ngaihtuah tûrin ṭha takin a hrilh zâwk tûr a ni. (1 Timothea 2:9, 10) Kum upa unaunute’n chutiang kawnga hmangaihna an lantîr chuan kohhran an tinghet thei a ni.

19. (a) Engtin nge baptisma chang tawh unaupate chuan huaisenna an lantîr theih? (b) Engtin nge Philippi 2:13 leh 4:13-na chuan unaupate chu huaisen tûra a ṭanpui theih?

 19 Baptisma chang tawh unaupate pawhin huaisenna lantîrin hna an thawh a ngai a. Kohhran rawngbâwltu emaw, upa emaw nia inhuam taka rawng an bâwl hian kohhranin nasa takin a hlâwkpui a ni. (1 Timothea 3:1) Mahse, ṭhenkhat chuan chutianga tih chu an hreh mai thei. Unaupa chuan tûn hmaa thil a lo tihsual avângin kohhran rawngbâwltu emaw, upa emaw nih chu a phû lo niin a ngai pawh a ni mai thei. Unaupa dang leh chuan rawngbâwl tûrin thiamna nei lovah a inngai pawh a ni thei bawk. Chutianga i inngai a nih chuan, huaisenna nei tûrin Jehova’n a ṭanpui thei che a ni. (Philippi 2:13; 4:13 chhiar rawh.) Mosia entawn tûr siam chu hre reng rawh. Ani pawhin Jehova’n ti tûra a tih chu ti thei lo tûrah a inngai a. (Exodus 3:11) Mahse, Jehova ṭanpuinain, tih tûrte chu huaisen takin a ti thei a ni. Engtin nge baptisma chang tawh unaupa chuan chutiang huaisenna chu a neih theih? Jehova hnêna ṭanpuina dîla ṭawngṭaiin nî tin Bible a chhiar ṭhîn tûr a ni. Bible-a huaisenna târ langtute entawn tûr siam chu a ngaihtuah thei a. Upate hnênah zirtîr a ngaih thu inngaitlâwm takin a hrilh thei a, chu bâkah, kohhrana thawh tûr a awm apiangin a ṭanpui theih thu a hrilh thei bawk. Baptisma chang tawh unau zawng zawngte chu huaisenna lantîr tûr leh kohhran tâna thawkrim tûrin kan sâwm a che u!

‘JEHOVA CHU I HNENAH A AWM E’

20, 21. (a) Davida’n Solomona chu eng nge a hriat nawntîr? (b) Eng nge kan chian theih?

20 Lal Davida chuan Solomona chu biak in a sak zawh hma loh Jehova’n a awmpui ang tih a hriat nawntîr a. (1 Chronicles 28:20) Solomona’n chu chu ngun takin a ngaihtuah ngei ang a, a naupanna leh thiltawn a neih tlêmna chu hna thawh ṭhulh phah nân a hmang lo. Huaisenna nasa tak a lantîr a, tichuan Jehova ṭanpuinain biak in chu kum sarih leh a chanveah a zo fel thei ta a ni.

21 Jehova chuan Solomona chu a ṭanpui a, keini pawh huaisenna nei tûr leh inchhûngkuaah leh kohhrana kan hnate hlen thei tûrin min ṭanpui ve thei a ni. (Isaia 41:10, 13) Jehova rawngbâwla huaisenna kan lantîr chuan, tûnah leh nakinah mal min sâwm ang tih kan chiang thei a ni. Chuvângin, “huai takin awm la, bei rawh.”

^ par. 12 Vênnainsâng, (English) July 15, 2004 chhuak, “I Siamtu Chawimawi Nân Thlarau Lam Thiltumte Nei Rawh,” tih thuziakah Pathian rawngbâwlnaa thiltum insiam theih dân chungchânga thurâwnte i hmu ang.