A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Ram Danga Rawng I Bâwl Laiin I Thlarau Lam Hrisêlna Enkawl Reng Rawh

Ram Danga Rawng I Bâwl Laiin I Thlarau Lam Hrisêlna Enkawl Reng Rawh

“I thu chu ka thinlungah ka khâwl khâwm a.”—SAM 119:11.

HLA: 142, 47

1-3. (a) Kan dah pawimawh reng tûr chu eng nge ni? (b) Ṭawng thar zir mêkte chuan a bîk takin eng harsatnate nge an tawh a, chu chuan eng zawhnate nge a tihchhuah? (A thupui chunga milem en rawh)

TUN laiah, Jehova Thuhretu tam tak chu “hnam tinrêng te, chi tinrêng te, ṭawng tinrêng te,” hnêna thu hrilin hrilh lâwkna tihfamkimnaah an buai hle a. (Thu Puan 14:6) Ṭawng dang zir mêkte zîngah i tel em? Ṭhenkhat chuan missionary niin rawng an bâwl a, a nih loh leh ram danga mamawh zualna hmunah thu an hril a. Mi dang lehte chu an rama ṭawng dang hmanna kohhranah an inkhâwm a ni.

2 Pathian chhiahhlawh zawng zawngte chuan mahni leh an chhûngkuate thlarau lam hrisêlna an dah pawimawh ber tûr a ni a. (Matthaia 5:3) Mahse, awmze nei taka mahnia inzirna hun nei thei lo khawpa buai châng pawh kan nei thei a ni. Ṭawng dang hmang kohhrana awmte chuan harsatna dangte pawh an nei a ni.

3 Chûng ṭawng dang hmang kohhrana rawngbâwlte chuan  ṭawng thar an zir a ngai a, Pathian thu rilte pawh an zir ziah a ngai bawk. (1 Korinth 2:10) Kohhrana thusawite an hre thiam vek lo a nih chuan, eng nge an tih theih? Ṭawng dang hmang kohhrana rawngbâwl Kristian nu leh pate chuan engvângin nge an fate thinlungah thutak a thleng ngei tih an chian ang?

JEHOVA NENA KAN INLAICHINNA ATANA HLAUHTHAWNAWM

4. Engin nge Jehova nêna kan inlaichînna tihlauhawm thei? Entîrna pe rawh.

4 Ṭawng dang hmannaa Bible zirtîrnate kan hriat thiam loh chuan, Jehova nêna kan inlaichînna atân hlauhthâwnawm tak a ni. Nehemia Jerusalema a kîr leh khân, naupang ṭhenkhatte chuan Hebrai ṭawng an thiam lo tih a hre ta a. (Nehemia 13:23, 24 chhiar rawh.) Hêng naupangte hian Pathian Thu an hriatthiam theih loh avângin, Jehova nêna an inlaichînna chu a derthâwng a ni.—Nehemia 8:2, 8.

5, 6. Ṭawng dang hmang kohhrana rawngbâwl nu leh pate chuan eng nge an hriat a, eng harsatna nge awm?

5 Ṭawng dang hmang kohhrana rawngbâwl Kristian nu leh pa ṭhenkhat chuan Jehova leh an fate inlaichînna chu a derthâwng tih an hria a. An fate chuan inkhâwmnaa thusawite an hriat thiam vek loh avângin, an thuhriatte chuan thil ti tûrin a chêttîr lo a ni. South America ram aṭanga Australia rama an chhûngkuaa insawn Pedro-a chuan: “Thlarau lam thilte kan sawi hian, thinlung leh rilru a tel tûr a ni,” tiin a sawi. [1] (Endnote en rawh.)—Luka 24:32.

6 Hnam dang ṭawnga thu kan chhiar hian, kan ṭawnga kan chhiar tlukin kan rilru a lût kher lo mai thei. Chu bâkah, ṭawng danga inbiak pawh a harsatna chuan min tihchauh êm avângin Jehova kan biaknaah nghawng ṭha lo a nei thei bawk. Chuvângin, ṭawng dang hmang kohhrana rawngbâwl duhna nasa tak kan nei chung pawhin, Jehova nêna kan inlaichînna kan humhim a ngai a ni.—Matthaia 4:4.

JEHOVA NENA AN INLAICHINNA AN HUMHIM

7. Engtin nge Babulon mite chuan Daniela chu an hnam dân leh sakhua pawm luihtîr an tum?

7 Babulonah Daniela leh a ṭhiante hruai an nih khân, Babulon mite chuan an hnam dân leh sakhuate pawm luihtîr an tum a. Engtin nge an tum? “Kaldai ṭawng” an zirtîr a, Babulon hmingte an pea. (Daniela 1:3-7) Daniela hming thar chu Babulon mite biak ber pathian Bel sawina a ni a. Chu chu Lal Nebukadnezzara’n Babulon pathian chu Daniela Pathian, Jehova aiin a chak zâwk tih Daniela rintîr a duh vâng a ni thei a ni.—Daniela 4:8.

Daniela chuan Hebrai ṭawnga ziak ‘lehkhabute’ a zir avângin Jehova nêna an inlaichînna a tinghet reng

8. Engtin nge Daniela’n Jehova nêna an inlaichînna chu a tihngheh reng?

8 Babulon ramah chuan, Daniela chu lal chaw tui tak ei ve tûra tih a ni a. Mahse, Pathian dân bawhchhiat loh “a tum tlat” a ni. (Daniela 1:8) Hebrai ṭawnga ziak ‘lehkhabute’ chu a zir zawm zêl avângin, ram danga a awm lai chuan Jehova nêna an inlaichînna a tinghet reng a. (Daniela 9:2) Dik takin, Babulon-a a thlen hnu kum 70 thlengin, a Hebrai hming Daniela tia hriat reng a la ni.—Daniela 5:13.

9. Sâm 119-na ziaktu chuan Pathian Thu chu engtin nge a ngaih?

 9 Sâm 119-na ziaktu chu lal ina khawsate’n an sawisêl hunah chhelna a neih a ngai a. Mahse, Pathian Thuah chakna a hmu a, chu chuan mi dangte laka danglam thei tûrin a ṭanpui a ni. (Sâm 119:23, 61) A ngaihtuahnate chu Pathian Thu a thununtîr a ni.—Sâm 119:11, 46 chhiar rawh.

JEHOVA NENA INLAICHINNA TINGHET RENG RAWH

10, 11. (a) Pathian Thu kan zir huna kan thiltum ber tûr chu eng nge ni? (b) Engtin nge chu kan thiltum chu kan hlen chhuah theih? Entîrna pe rawh.

10 Kohhranah leh hnathawhnaah mawhphurhna kan nghah hle thei a; mahse, mahnia inzirna leh chhûngkuaa Pathian biakna kan nei ṭheuh tûr a ni. (Ephesi 5:15, 16) Kan tum chu phêk tam tak chhiar mai emaw, inkhâwmnaa chhâng tûra inbuatsaih mai emaw a ni lo va. Pathian Thu inthununtîrin, kan rinna tihchak kan tum zâwk tûr a ni.

11 Kan thiltum hlen thei tûr chuan, inbûktâwkna kan neih a ngai a. Zirna kan neih hian, mi dangte mamawh chauh ngaihtuah lovin, kan mamawhte pawh kan ngaihtuah tel tûr a ni. (Philippi 1:9, 10) Rawngbâwlna te, inkhâwmna te, leh thusawi tûr atân tea kan inbuatsaih hian, kan thu chhiarte chu mahni tân kan lo ngai lo pawh a ni thei tih kan hre tûr a ni. Entîr nân, eiin siamtuin a thil siamte a hlui hmain a tem chhin ṭhîn a; mahse, chûng chu chawah a ring thei lo. Hrisêl a duh chuan, mahni tân chaw ṭha a inchhum a ngai a ni. Chutiang bawkin, Jehova nêna kan inlaichînna tihngheh kan duh chuan, Bible kan zir ziah a ngai a. Chutianga ngun taka inzirna chuan thlarau lama kan mamawhte a phuhru a ni.

12, 13. Engvângin nge mi tam tak chuan mahni pianpui ṭawng ngeia Bible zir chu a ṭangkai tih an hriat?

12 Ṭawng dang hmang kohhrana rawngbâwl tam tak chuan mahni ‘pianpui ṭawnga’ Bible zir ziah chu ṭangkai tak niin an hria a. (Tirhkohte 2:8) An rawngbâwlnaa nghet taka awm reng thei tûr chuan, inkhâwmnaa an thu hriatte chauh an rinchhan thei lo tih missionary-te pawhin an hria a ni.

13 Kum riat vêl Persia ṭawng zir tawh Alain-a chuan: “Inkhâwm atâna Persia ṭawnga ka inbuatsaih hian, a ṭawngah chauh ka rilru ka lo pe palh ṭhîn a. Ṭawng thiam duhna lam ringawt ka buaipui tâkah chuan, thlarau lam thu ka chhiarte chuan ka thinlung a khawih mai ṭhîn lo. Chuvângin, Bible leh thu leh hla chhuahte chu ka pianpui ṭawng ngeia zir ziah tûrin hun ka insiam ta a ni,” tiin a sawi.

 I FATE THINLUNGA THLENG TURIN ZIRTIR RAWH

14. Nu leh pate chuan eng nge an chian ngai a, engvângin nge?

14 Kristian nu leh pate chuan an fate rilru leh thinlungah thutak a thleng tih an chian tûr a ni. Ṭawng dang hmang kohhrana kum thum chuang rawngbâwl tawh Serge-a leh a nupui Muriel-i te hi han ngaihtuah teh. An fapa kum 17 mi chuan rawngbâwlnaah leh inkhâwmnaah nuam a ti lo tih an hre ṭan a. “Tûn hma chuan a pianpui French ṭawnga thu hrilh chu nuam ti mah se, ṭawng dang hmanna biala rawngbâwla chhuah chu nuam a ti vak tawh lo,” tiin Muriel-i chuan a sawi. Serge-a pawhin: “Chu chuan thlarau lamah kan fapa a tihmasâwn thei lo tih kan hriat chuan, kan kohhran hmasaa kîr leh kan tum ta a ni,” tiin a sawi bawk.

I fate thinlungah thutak a thleng ngei tih chian rawh (Paragraph 14, 15-na en rawh)

15. (a) An kohhran an sawn dâwn leh dâwn loh thu tlûkna siam tûrin nu leh pate chu engin nge ṭanpui thei? (b) Deuteronomy 6:5-7 hian nu leh pate hnênah eng kaihhruaina nge a pêk?

15 Nu leh pate chu an fate hriat thiam ber ṭawng hmanna kohhrana an insawn luh leh dâwn leh dâwn loh thu tlûkna siam tûrin engin nge ṭanpui thei ang? A hmasain, an fate chu Jehova hmangaih tûra zirtîr nân leh ṭawng dang zirtîr nâna hun leh tha an pêk theih dâwn leh dâwn loh an ngaihtuah tûr a ni. A pahnihnaah, an fate chuan thu hrilh te, inkhâwm te, leh ṭawng dang hmanna biala rawngbâwlte chu an duh lo tih an hre mai  thei bawk. Chutiang dinhmunah nu leh pate chuan an fate hriat thiam ber ṭawng hmang kohhrana insawn luh leh chu an rêlthlu thei ang. Naupangte’n Jehova nêna an inlaichînna an tihngheh hnuah nu leh pate chuan ṭawng dang hmang kohhrana insawn chu an ngaihtuah thei bawk ang.—Deuteronomy 6:5-7 chhiar rawh.

16, 17. Nu leh pa ṭhenkhat chu an fate Jehova chungchâng zirtîr tûrin engin nge ṭanpui?

16 Nu leh pa dangte chuan ṭawng dang hmang kohhran, a nih loh leh group-a an inkhâwm ṭhin laiin mahni ṭawng ngeia an fate hnêna Jehova thu zirtîr dân kawngte an hria a. Charles-a chuan kum 9 aṭanga kum 13 inkâr fanu pathum a nei a. Lingala ṭawng hmang kohhranah an inkhâwm a ni. Ani chuan: “Naupangte chu mahni ṭawng ngeia zirna neihpui tûr leh chhûngkuaa Pathian biakna neihpui tûrin thu tlûkna kan siam a. Chu bâkah, Lingala ṭawngin tihchhinnate leh Bible hmanga infiamnate kan nei a, chutiang chuan hlim takin ṭawng an zir thei,” tiin a sawi bawk.

Tualchhûng ṭawng zir tûr leh inkhâwmnaa tel tûrin theih tâwp chhuah rawh (Paragraph 16, 17-na en rawh)

17 Kevin-a chuan kum nga mi leh kum riat mi fanu pahnih a nei a. Anni chuan chhûngkuaa an inkhâwmna ṭawng dang hmang kohhrana thusawite an hriat thiam vek loh avângin thutak zirtîr tûrin a thawk rim hle a ni. Ani chuan: “Kan nupain naupangte chu an pianpui French ṭawngin mahnia inzirna kan  neihpui a. Thla khatah vawikhat French ṭawng hmanna kohhrana inkhâwm kan tum bawk a, chawlh hun (vacation) kan neihte chu kan ṭawng hmanna regional inkhâwmpuia tel nân kan hmang ṭangkai bawk,” tiin a sawi.

18. (a) Engtin nge Rom 15;1, 2 hian i fate ṭanpui an ngaih huna thu tlûkna fing siam tûra a ṭanpui theih che? (b) Nu leh pa dangte chuan eng rawtnate nge an pêk? (Endnote en rawh.)

18 Chhûng tin hian an fate tâna thil ṭha ber tûr leh Jehova nêna an inlaichînna atân thu tlûkna an siam a ngai a.  [2] (Endnote en rawh.) (Galatia 6:5) Murial-i chuan a pasal nên ṭawng dang hmang kohhrana rawngbâwl duh hle mah se, an fapain Jehova a hmangaihna a tihngheh theih nân, chu kohhran chu chhuahsan an tum ta tih a sawi. (Rom 15:1, 2 chhiar rawh.) Serge-a chuan, thu tlûkna dik an siam tih a hria a. “French ṭawng hmang kohhrana kan kîr leh aṭangin, kan fapa chu thlarau lamah rawn ṭhang chhovin, baptisma a chang ta a. Tûnah chuan regular pioneer a thawk a. Ṭawng dang hmang group-a kîr leh a ngaihtuah a ni!” tiin a sawi.

PATHIAN THU I THINLUNGAH THLENTIR RAWH

19, 20. Pathian Thu kan ngaina tih engtin nge kan lantîr theih?

19 Jehova chuan mi zawng zawng a hmangaih a. ‘Mi zawng zawngin’ thutak hriatna dik tak an neih theih nân Bible chu ṭawng za têla chhiar theihin a tichhuak a ni. (1 Timothea 2:4) Kan hriat thiam ber ṭawnga Bible kan chhiar hian amah nêna kan inlaichînna a nghet dâwn tih a hria a ni.

20 Kan vai hian Jehova nêna kan inlaichînna tinghet reng tûrin theih tâwp kan chhuah a ngai a. Chu chu kan hriat thiam ber ṭawnga Bible zir ziahna hmangin kan ti thei a ni. Kan chhûngte chu thlarau lama hrisêl reng tûrin kan ṭanpui thei a, Pathian Thu kan ngaina tak zet tih kan lantîr thei bawk.—Sâm 119:11. (ws16.10-E)

^ [1] (paragraph 5-na) Hming thlâk a ni.

^ [2] (paragraph 18-na) I chhûngkua ṭanpui thei Bible thu bulte hriat nân, October 15, 2002, chhuak Vênnainsâng (English) “Ram danga Fate Enkawl Seilen—Harsatna leh Malsâwmna” tih thuziak chu en rawh.