A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  October 2016

“Mikhualte Chungah Hmangaih Chhuah Theihnghilh Suh U”

“Mikhualte Chungah Hmangaih Chhuah Theihnghilh Suh U”

“Mikhualte chungah hmangaih chhuah theihnghilh suh u.”—HEBRAI 13:2.

HLA: 50, 3

1, 2. (a) Tûn laia ram dang mite chuan eng harsatna nge an neih? (A thupui chunga milem en rawh) (b) Tirhkoh Paula chuan eng hriatnawntîrna nge a pêk a, eng zawhnate nge kan sawiho vang?

KUM 30 kalta khân, Jehova Thuhretu la ni lo Osei-a chuan Europe-a chêng tûrin Ghana ram chu a chhuahsan a. [1] (Endnote en rawh.) Ani chuan: “Min ngaihsaktu an awm meuh lo tih ka hre thuai a. Boruak awm dân lah chuan min ṭhâwng hle. Airport aṭanga ka chhuah a, a vawi khatna atâna khaw vâwt ka han tawrh chuan, ka ṭap ta ringawt mai,” tiin a sawi. Osei-a tân chuan ṭawng thar zir chu a harsat avângin, hna ṭha hmu tûrin kum khat chuang a zawn a ngai a. In hlat taka awm a nih avângin, a chhûngte chu a ngaiin, a lung a lêng hle bawk.

2 Chutiang dinhmunah awm ta la, cheibâwl i duh dân tûr chu han ngaihtuah teh. I hnam emaw, i vun rawng emaw chu eng pawh ni se, Kingdom Hall-a nangmah hmangaihtute’n ṭha taka an lo lawm che chu i duh ngei ang. Dik takin, Bible chuan Kristian dikte chu: “Mikhualte chungah hmangaih chhuah  theihnghilh suh u,” tiin a hrilh a. (Hebrai 13:2) Chuvângin, hêng zawhnate hi i lo ngaihtuah ang u: Engtin nge mikhualte chu Jehova’n a ngaih? Mikhualte chunga kan rilru put hmang siamrem a ngai em? Ram dang mi tuemaw chu kan kohhranin an lâwm tih hre tûrin engtin nge kan ṭanpui theih? tihte hi.

JEHOVA’N MIKHUALTE A THLIR DAN

3, 4. Exodus 23:9 sawi angin, Pathianin Israel mite’n hnam dang mite chu eng anga cheibâwl tûrin nge a duh, engvângin nge?

3 Jehova chuan Aigupta saltânna ata a mite a chhuahtîr hnu khân, an ruala chhuak ve hnam dang mite chunga hmangaihna lantîr tûra zirtîr nân dânte a pe a. (Exodus 12:38, 49; 22:21) Nun chu hnam dang mite tân a awlsam reng loh avângin, Jehova’n anni chu a ngaihsak hle. Entîr nân, anni chuan buh sengtute hnutchhiah buh ṭo chu an la thei a ni.—Leviticus 19:9, 10.

4 Jehova chuan Israel mite chu hnam dang mite zah tûra thu pe mai ni lovin, hnam dang mi nih chu engtiang nge a nih tih hre reng tûrin a duh a ni. (Exodus 23:9 chhiar rawh.) Israel mite chu Aigupta sala an tân hma pawhin, an danglam bîk avângin Aigupta mite chuan an duh lo va. (Genesis 43:32; 46:34; Exodus 1:11-14) Israel mite chuan hnam dang mi nih a harsatzia an hre tawh a. Chu chu hre reng tûr leh an zînga chêng hnam dang mite hmangaih tûrin Jehova’n anni chu a duh a ni.—Leviticus 19:33, 34.

Jehova chuan ram dang mite chungah hmangaihna a lantîr

5. Jehova’n hnam dang mite chunga hmangaihna a lantîr anga lantîr ve tûrin engin nge min ṭanpui ang?

5 Jehova chu a danglam ngai lo. Chuvângin, kan kohhranah hnam dang mite an lo kal hian, Jehova’n an chungah hmangaihna a la lantîr reng tih kan theihnghilh tûr a ni lo. (Deuteronomy 10:17-19; Malakia 3:5, 6) Hnam dang mite neih mai theih harsatnate chu han ngaihtuah teh. Entîr nân, ṭawng thar chu an hre thiam lo pawh a ni thei a, dik lo taka cheibâwl an ni mai thei bawk. Anmahni ṭanpui tûr leh an chunga hmangaihna lantîr tûrin theih tâwp i chhuah ang u.—1 Petera 3:8.

MIKHUALTE CHUNGA KAN THLIR DAN SIAMREM A NGAI EM?

6, 7. Juda Kristian hmasate chuan inpâwngpaw huatna hneh an zir tih engin nge târ lang?

6 Kristian hmasate chuan Juda mite zînga hluar tak inpâwngpaw huatna chu hneh an zir a. C.E. 33 Penticost nîah, Jerusalema chêng Juda Kristiante chuan ram hrang hrang aṭanga lo kal mi tharte chungah khualchhâwn thiamna leh hmangaih taka ngaihsakna an lantîr a ni. (Tirhkohte 2:5, 44-47) Chu chuan Juda Kristiante’n “khualchhâwn thiamna” tih awmzia, ‘mikhualte hmangaihna’ chu an hre thiam tih a târ lang a ni.

7 Mahse, chûng hun lai chuan thil engemaw a thleng a. An hmeithaite’n ngaihsak an hlawh loh avângin Grik ṭawng hmang Juda mite chu an phunnawi a ni. (Tirhkohte 6:1) Dik taka cheibâwl an nih vek nân tirhkohte chuan buaina chingfel tûrin mipa pasarih an thlang a. Hmeithaite’n thlamuang lehzuala an inhriat theih nân tirhkohte  chuan Grik hming pu mipate chu an thlang a ni.—Tirhkohte 6:2-6.

8, 9. (a) Inpâwng huatna kan neih leh neih loh hre tûrin eng zawhnate’n nge min ṭanpui ang? (b) Eng nge kan paih bo ngai? (1 Petera 1:22)

8 Kan hria emaw, hre lo emaw pawh ni se, kan vai hian kan hnam dânin nasa takin min thunun a. (Rom 12:2) Chu bâkah, kan ṭhenawm te, kan hnathawhpui te, a nih loh leh kan school kalpuite chuan mi dangte ṭobul te, hnam te, leh vun rawngte chungchâng ṭha lo taka an sawi kan hre mai thei bawk. Chutiang ngaih dân ṭha lo takte chuan engtianga nasain nge min thunun? A nih loh leh, tuemawin kan hnam emaw kan hnam dân emaw chu nuihza siam nân a hman hunah engtin nge kan chhân lêt?

9 Ṭum khat pawh tirhkoh Petera chuan Juda mi ni lote chu a pâwngpaw huat a. Mahse, chutiang ngaih dân ṭha lo chu zawi zawiin a paih bo thei a ni. (Tirhkohte 10:28, 34, 35; Galatia 2:11-14) Chutiang bawkin, in pâwngpaw huatna rilru emaw, mahni hnam ngaihsânna emaw kan nei tih kan inhriat chuan chu chu paih bo kan tum tûr a ni. (1 Petera 1:22 chhiar rawh.) Chutianga paih bo tûrin engin nge min ṭanpui thei? Khawi ram aṭanga lo kal pawh ni ila, ṭha famkim kan awm lo va, chhandam nih phû kan awm hek lo tih kan hre reng tûr a ni. (Rom 3:9, 10, 21-24) Chuvângin, mi dangte aia ṭha bîk nia inngaih chhan tûr kan nei lo! (1 Korinth 4:7) Tirhkoh Paula ngaih dân chu kan nei ve tûr a ni. Ani chuan a Kristian unaute chu: “Mikhual leh mi châm in ni tawh lo va, . . . Pathian chhûngte in ni ta zâwk a ni,” tiin a hrilh a. (Ephesi 2:19) Mihring thara kan inthuam theih nân inpâwng huatna eng pawh paih bo tûrin theih tawp kan chhuah ṭheuh tûr a ni.—Kolossa 3:10, 11.

MIKHUALTE CHUNGA HMANGAIHNA LANTIR DAN

10, 11. Engtin nge Boaza chuan mikhualte chunga Jehova thlîr dân chu a entawn?

10 Mi rinawm Boaza chuan mikhualte chunga Jehova thlîr dân chu a entawn a. Engtin nge a entawn? Buh seng laiin Boaza chu a lo en tûrin a kal a, Moab ram aṭanga lo kal hnam dang mi Ruthi chu a hmu a ni. Ruthi chuan taima takin buh ṭo a zawng a. Ani chuan Mosia Dân hnuaiah buh ṭo zawn theihna a nei a ni. Mahse, Boaza chuan Ruthi’n a lova buh ṭo zawn a dîl tih a hriat chuan mak a ti hle a, buhphal zînga mite pawh chhar a phalsak hial a ni.—Ruthi 2:5-7, 15, 16 chhiar rawh.

11 Hnam dang mi a nih avânga Ruthi dinhmun khirh tak chu Boaza’n a ngaihtuah tih a hnua thilthleng chuan a târ lang chiang hle. Ani chuan, lova mipa hnathawkte’n ṭha lo taka an cheibâwl loh nân a chhiahhlawh nulate zînga awm ve tûrin a sâwm a. A hnathawktute ang bawka, ei tûr leh in tûr kham khawp nei ngei tûrin a ruahmansak bawk a ni. Boaza chuan he hnam dang hmeichhe rethei tak chungah hian zahna a lantîr a, a fuih bawk a ni.—Ruthi 2:8-10, 13, 14.

12. Hmangaihna chuan mikhualte chungah eng nghawng nge a neih theih?

12 Ruthi chuan a pi zawn Naomi a hmangaih vâng chauh ni lovin, Jehova rawngbâwl a, A vênhimna a zawn avângin Boaza chuan a chungah hmangaihna a lantîr a ni. Boaza chuan Ruthi chunga hmangaihna lantîrin Jehova hmangaihna rinawm a entawn tak zet a. (Ruthi 2:12, 20; Thufingte 19:17) Chutiang bawkin, tûn laiah pawh  hmangaihna kan lantîr hian, “mi zawng zawng” chu thutak hre tûr leh Jehova’n a hmangaih hle tih hre tûrin kan ṭanpui thei a ni.—1 Timothea 2:3, 4.

Kingdom Hall-ah mikhualte an lo kal hian ṭha takin kan lo lâwm em? (Paragraph 13, 14-na en rawh)

13, 14. (a) Engvângin nge Kingdom Hall-ah mikhualte kan chibai ang? (b) Hnam dang tuemaw biak hreh lo tûrin engin nge ṭanpui thei che?

13 Mikhualte chu Kingdom Hall-ah ṭha taka lâwmin an chungah hmangaihna kan lantîr thei a. Tûn hnai maia ram dang aṭanga rawn pêm lûtte chu a châng chuan an zakin, mal hle nia inhriatna an nei thei a ni. An hnam dân leh khawtlâng dinhmun avângin hnam dang mite laka hnuaihnung zâwk niin an inhre mai thei bawk. Chuvângin, anni chu kan chibai hmasa tûr a ni a, hmangaihna lantîrin, tih tak zetin kan ngaihsak tûr a ni. In ṭawnga hmuh theih a nih chuan, JW Language app chuan an ṭawnga chibai dân hre tûrin a ṭanpui thei che.—Philippi 2:3, 4 chhiar rawh.

14 Hnam dang tuemaw biak chu i hreh mai thei a. Chutiang rilru put hmangte hneh tûr chuan, i chungchâng engemaw i hrilh thei a ni. I beisei aiin inanna tam tak in lo nei tih i hmu mai thei a. Hnam dangte hian ṭhatna lai leh ṭhat lohna laite an nei tih hre reng ang che.

LAWM NIA INHRE ṬHEUH TURIN ṬANPUI RAWH

15. Ram thar mila insiamremte hre thiam tûrin engin nge min ṭanpui ang?

15 Mi dangte chu kohhranah lawm an ni tih hre tûra ṭanpui tûr chuan, ti hian inzâwt rawh, ‘Ram danga awm ni ta ila, eng anga cheibâwl nge ka duh?’ tiin. (Matthaia 7:12) Ram thar mila insiamrem mêkte chungah chuan dawhthei ang che. A tîrah chuan, an  ngaihtuah dân leh an chhân lêt dânte chu kan hre thiam vek lo mai thei. Kan hnam dân anga ngaihtuah tûr leh thilti tûra beisei ai chuan, engvângin nge an tih dân chu kan pawmpui mai loh vang?—Rom 15:7, chhiar rawh.

Ram thar mila insiamrem mêkte chungah dawhthei ang che

16, 17. (a) Engin nge hnam dang mite nên inhnaih tûra min ṭanpui thei? (b) Kan kohhrana hnam dang mi rawn pêm lûtte chu eng ṭanpuina ṭangkai tak nge kan pêk theih?

16 Ram dang mite chu an ram leh hnam dân chungchâng hre tûra hun kan pêk chuan, hriat chian an awlsam lehzual ang. Chhûngkuaa Pathian biakna kan neih hunah kan kohhran, a nih loh leh kan bial chhûnga rawn pêm lûtte hnam dân chungchâng zir bingna kan nei thei a. Chûng mite kan hriat chian theih dân kawng dang leh chu ina chaw ei tûra sâwm hi a ni. Jehova chuan ‘Jentailte tân rinna kawngkhâr a hawnsak a,’ chuvângin, Pathian entawnin “rinna chhûngte” zînga mikhualte chungah kan inhawng ve tûr a ni.—Tirhkohte 14:27; Galatia 6:10; Joba 31:32.

Ram dang aṭanga lo kal mi tharte chungah khualchhâwn thiamna kan lantîr em? (Paragraph 16, 17-na en rawh)

17 Ram dang aṭanga rawn pêm chhûngkuate hun kan hmanpui chuan kan hnam dân mila insiamrem tûra theih tâwp an chhuahna chu hre thiam a, ngai hlu tûrin min ṭanpui ang. Ṭawng zirnaah ṭanpui an ngai tih kan hre mai thei a. In ṭha emaw, hna ṭha emaw hmu thei tûra ṭanpui thei pâwlte kan  kawhhmuh thei bawk. Chutiang ṭanpuina chu kan unaute chuan an ṭangkaipui hle thei a ni.—Thufingte 3:27.

18. Tûn laia ram dang aṭanga rawn pêm lûtte chuan zahna leh lâwmna chungchângah tu nge an entawn theih?

18 Ram dang aṭanga rawn pêm lûtte chuan an pêm luhna ram hnam dân mila insiamrem tûrin theih tâwp chhuah an duh ngei ang. He mi kawngah hian Ruthi’n entawn tûr ṭha a siam a. A hmasa berin, buh ṭo zawng tûra phalna dîlin a awmna ram thara mite hnam dân a zahzia a lantîr a. (Ruthi 2:7) Buh ṭo zawn theihna a neih chu a tûr rêngah a ngai lo va, mi dangte’n a chunga ṭhatna lantîr an bâ niin a hre hek lo. A pahnihnaah chuan, a chunga hmangaihna an lantîr avânga a lâwmzia chu mi dangte hnênah a hrilh nghâl a ni. (Ruthi 2:13) Ram dang aṭanga rawn pêm lûtte’n chutiang rilru put hmang ṭha tak an lantîr chuan an unaute leh tualchhûng mite’n an zah lehzual ngei ang.

19. Mikhualte lo lawm chhan tûr eng nge kan neih?

19 Jehova chuan phû loh hmangaihna lantîrin, mi zawng zawngin chanchin ṭha an hriat a phal chu kan lâwm tak zet a ni. Mi ṭhenkhatte chu an ramah, Jehova mite nên Bible an zir thei lo emaw, inkhâwm an kal thei lo emaw pawh a ni thei a. Mahse, tûnah min hmuh theihna hun remchâng an nei a, mi khual anga an inngaih loh nân kan ṭanpui tûr a ni. Sum leh pai tam tak kan nei lovin, ṭanpuina ṭangkai tak kan pe thei lo pawh a ni thei; mahse, mikhualte chunga hmangaihna kan lantîr hian Jehova’n anmahni a hmangaihna chu kan entawn a ni. “Pathian  awm dân latute” kan nih angin kan zînga mikhualte lâwm tûrin theih tâwp i chhuah ang u!—Ephesi 5:1, 2. (ws16.10-E)

^ [1] (paragraph 1-na) Hming thlâk a ni.