‘Engati nge i la awm reng le? Tho la, baptisma chang ta che.’—TIRHKOHTE 22:16.

HLA: 7, 11

1. Kristian nu leh pate chuan an fate baptisma chan hmain eng nge hriat chian an duh?

“THLA engemawti chhûng chu ka nu leh pate hnênah baptisma chan ka duh thu ka hrilh a, chumi chungchâng chu min sawipui ṭhîn bawk. Ka thu tlûkna siam a pawimawhzia hre chiang tûrin min duh a. Kum 1934, December 31-ah ka nuna chu hun pawimawh tak chu a lo thleng ta a ni.” Hei hi Blossom Brandt-i’n baptisma chang tûra thu tlûkna a siam laia thilthleng a sawi chu a ni. Tûn laiah, nu leh pate pawhin an fate chu thu tlûkna fing siam tûrin ṭanpui an duh a. Fate chuan chhan ṭha awm lem lova baptisma a la chang lo a nih chuan, chu chuan Jehova nêna an inlaichînna a tichhe thei a ni. (Jakoba 4:17) An fate baptisma chan hmain, nu leh pa fing chuan an fate chu Krista zirtîr ni tûrin an inpeih tawh tih hriat chian an duh a ni.

2. (a) Bial kantu ṭhenkhat chuan eng harsatnate nge awm nia an hriat? (b) He thuziakah hian eng nge kan sawiho vang?

 2 Bial kantu ṭhenkhat chuan kum 20 la tling lo leh pêl tawh ṭhalai tam tak chu thutaka seilian ni mah se, baptisma an la chang lo tih an hria a. Chûng ṭhalaite chuan inkhâwmah leh rawngbâwlnaah tel ziahin, Jehova Thuhretute niin an inngai a. Mahse, chhan engemaw avângin Jehova hnênah inpumpêkin baptisma an la chang lo a ni. Dinhmun ṭhenkhatah, nu leh pate’n an fate chu baptisma chang tûr chuan la inpeih lo nia an hriat vâng a ni. He thuziakah hian, nu leh pa ṭhenkhatin an fate baptisma chang tûra an fuih hreh chhan pali kan sawiho vang.

KAN FATE CHU AN PUITLING TAWK EM?

3. Blossom-i nu leh pate chuan eng nge an hlauhthâwn?

3 Paragraph hmasa bera kan sawi tâk Blossom-i nu le pate chuan an fanu chu baptisma chan awmzia leh a pawimawh dânte hre thiam tûrin a puitlin tâwk leh tâwk loh an ngaituah a. Engtin nge nu leh pate chuan an fate chu Jehova hnêna inpumpêk tûrin an inpeih tawh tih an hriat theih?

4. Engtin nge Matthaia 28:19, 20-a kan hmuh Isua thupêkin tûn laia nu leh pate chu a ṭanpui theih?

4 Matthaia 28:19, 20 chhiar rawh. Bible chuan baptisma chang tûrin kum bithliah chin a awm tih a sawi lo va. Mahse, nu leh pate chuan zirtîra siam tih awmzia chu ngun taka an ngaihtuah a ṭha a ni. Matthaia 28:19-a “zirtîrahte siam” tih Grik thu mal hi tuemaw chu zirlai emaw, zirtîr pakhat emaw nihtîr tuma zirtîr tihna a ni. Zirtîr tih chu Isua thute zira, hre thiamtu leh a thuâwih duhtu hi a ni. Chuvângin, nu leh pate chuan an fate chu Jehova hnêna inpumpêka, Kirsta zirtîrte nih chu thiltuma neiin an pian aṭangin an zirtîr tûr a ni. Ni e, nausênte chu baptisma chang tûrin an tling lo ngei mai. Mahse, Bible chuan naupangte pawhin Bible thutak chu an hre thiamin an ngaina thei tih a târ lang a ni.

5, 6. (a) Timothea chungchâng Bible sawi lanna chuan baptisma chungchângah eng thu tâwp nge kan siam theih? (b) Nu leh pa fingte tân fate ṭanpui dân kawng ṭha ber chu eng nge ni?

5 Timothea chu a naupang lai aṭanga Jehova rawngbâwl tûra thu tlûkna siamtu zirtîr pakhat a ni a. Tirhkoh Paula chuan Timothea chu a “naupan têt ata” Pathian Thu a zir tih a sawi a. A pa chu Jehova rawngbâwltu ni lo mah se, a nu leh a piin Timothea chu Pathian Thu ngaina tûrin an ṭanpui a ni. A hnuah, ani chuan rinna nghet tak a nei a. (2 Timothea 1:5; 3:14, 15) Kum 20 a tlin hma emaw, a pelh hnu deuh emaw chuan, kohhrana chanvo pawimawh takte dawng tûrin a tling tâwk mai thei a ni.—Tirhkohte 16:1-3.

6 Naupangte chu an inang lo va. Kum inang mah se, puitlin dân erawh a inang thei lo. Naupang ṭhenkhat chuan thutak an hria a, thu tlûkna fing an siam a, an naupang lai aṭangin baptisma chan an duh a ni. Ṭhenkhat erawh chu an upat deuh hnuah pawh baptisma chang tûrin an la inpeih lo va. Nu leh pa fingte chuan an fate chu baptisma chang tûrin an tilui lo. Chu ai chuan, an phû tâwka hamsâwn tûrin an ṭanpui a ni. Nu leh pate chuan an fate’n Thufingte 27:11-a thute an nunpui hian  an hlim a. (Chhiar rawh.) An fate zirtîr ni tûra ṭanpui chu thiltumah an dah tlat tûr a ni. Chu chu rilrua dahin, heti hian an inzâwt tûr a ni: ‘Kan fate chuan Pathian hnêna inpumpêka baptisma chang tûrin hriatna an nei tâwk em?’ tiin.

KAN FATE CHUAN AN HRE TAWK EM?

7. Mi chu baptisma a chan hmain Bible zirtîrna zawng zawng chu chipchiar taka a hriat a ngai em? Hrilhfiah rawh.

Krista zirtîrte chuan baptisma an chan hnuah pawh an zir zawm zêl tûr a ni

7 Nu leh pate’n fate an zirtîr hian, thutak hre chiang tûrin an ṭanpui a. Chu hriatna chuan Pathian hnêna inpumpêk tûrin a chêttîr ang. Mahse, chu chu an fate’n inpumpêka baptisma an chan theih hmain Bible zirtîrnate chipchiar taka an hriat a ngai tihna a ni lo. Krista zirtîrte chuan baptisma an chan hnuah pawh an zir zawm zêl tûr a ni. (Kolossa 1:9, 10 chhiar rawh.) A nih leh, mi chu baptisma a chan hmain eng chen nge hriatna a neih ngai?

8, 9. Philippi khuaa tân in vêngtu chungah eng thil nge thleng a, a thiltawn aṭangin eng nge kan zir theih?

8 Tûn hmaa chhûngkaw khat thiltawn chuan tûn laia nu leh pate chu a ṭanpui thei a. (Tirhkohte 16:25-33) Paula chuan C.E. 50-naa missionary a zin ṭum hnihnaah Philippi khua chu a tlawh a. Chuta a awm laiin, Sila nên dik lo taka puh an ni a, an man a, tân ina khung a ni. Chumi zân chuan, nasa takin lîr a nghîng a, tân in kawngkhâr zawng zawng a inhawng a. Tân in vêngtu chuan tâng zawng zawng chu an tlân bo emaw tiin intihhlum a tum a. Mahse, Paula’n a khap a. Paula leh Sila chuan tân in vêngtu leh a chhûngte chu Isua chungchâng thutak an zirtîr a ni. An thu hriatte chu an ring a, Isua thuâwih a pawimawh dânte an hria a. Chuvângin, baptisma an chang ta nghâl a ni. An thiltawn aṭangin eng nge ka zir theih?

9 Tân in vêngtu chu Rom sipaia ṭang tawh a ni thei a. Ani chuan Pathian Thu chu a hre lo a ni. Chuvângin, Kristian ni tûr chuan Bible thutak bulpuite a zir a, Jehova’n a chhiahhlawhte chunga a thil phûtte a hriatthiam a, Isua zirtîrnate zawm chu a duh tûr a ni a. Chu hun rei lote chhûnga a thil hriatte chuan baptisma chang tûrin a chêttîr a. Ni e, baptisma a chan hnuah pawh a zir belh zêl ngei ang. Chuvângin, i fate’n Jehova an hmangaih a, a thuâwih an duh avânga baptisma chan an duh thu an hrilh che hunah eng nge i tih theih? Baptisma chang tûra an tlin leh tlin loh upate’n thu tlûkna an siam theih nân upate be tûrin i hrilh thei a ni. * (Footnote en rawh.) Baptisma chang tawh Kristian tinte angin, an dam chhûng zawngin Jehova chanchin an zir zawm zêl thei a, chu chu chatuan pawh a ni thei ang.—Rom 11:33, 34.

 KAN FATE TANA ZIRNA ṬHA BER CHU ENG NGE NI?

10, 11. (a) Nu leh pa ṭhenkhat ngaih dân chu eng nge ni? (b) Engin nge fate chu vênghim tak zet ang?

10 Nu leh pa ṭhenkhat chuan an fate chu College kal a, hna ṭha an hmuh hnu chauhva baptisma an chan chu ṭha ber tûrah an ngai a. Chûng nu leh pate chuan thiltum ṭha tak an nei pawh a ni mai thei; mahse, heti hian an inzâwt tûr a ni: ‘Chu chuan kan fate chu hlawhtlinna nei tûrin a ṭanpui ang em? Chu chu Bible aṭanga kan thil zirte nên a inmil em? Engtin nge Jehova’n kan nun hmang tûra min duh?’ tiin.—Thuhriltu 12:1 chhiar rawh.

11 Khawvêl leh a chhûnga thil awmte hi Jehova duh dân leh ngaihtuah dân nên a inkalh tih kan hriat reng a pawimawh a. (Jakoba 4:7, 8; 1 Johana 2:15-17; 5:19) Jehova nêna inlaichînna ṭha neih chu fate tân Setana, a khawvêl, leh khawvêl ngaihtuahna ṭha lo laka invênhimna ṭha ber a ni. Nu leh pate’n nunah zirna leh hna ṭha hmuh an dah pawimawh zâwk chuan an fate’n khawvêl thilte chu Jehova nêna an inlaichînna ṭha aia pawimawh zâwkah an ngai thei a ni. Chu chu thil hlauhawm tak a ni. Hmangaihna ngah tak nu leh pate in nih angin, i fate chu khawvêl thlîr dânin hlimna a thlen thei tia ngai tûrin i duh tak zet em? Hlawhtlinna leh hlimna dik tak neih theih dân kawng awmchhun chu kan nuna Jehova dah hmasak hi a ni.—Sâm 1:2, 3 chhiar rawh.

KAN FATE’N THIL TISUAL PALH TA SE ENGTIN NGE NI ANG?

12. An fate baptisma chan rih loh chu engvângin nge nu leh pa ṭhenkhatin ṭha zâwk tûra an ngaih?

12 Nu pakhatin a fanu baptisma chang tûra a duh loh chhan a sawi a. “Hnawhchhuah ruahmanna a awm vâng a ni ber tia sawi chu ka hreh khawp mai,” tiin a sawi. Chu unaunu angin, nu leh pa ṭhenkhat chuan an fate’n sual âtthlâk tak pumpelh thei khawpa an puitlin hnu chauhva baptisma  an chan chu an tân ṭha ber tûrah an ngai a. (Genesis 8:21; Thufingte 22:15) An fate’n baptisma an chan loh chuan hnawhchhuah ni thei lo tûrah an ngai pawh a ni mai thei. Mahse, chutianga ngaih chu engvângin nge a dik loh?—Jakoba 1:22.

13. Mi chu baptisma a chan loh chuan Jehova lakah mawhphûrhna a nei lo tihna a ni em? Hrilhfiah rawh.

13 Ni e, nu leh pate chuan an fate chu Jehova hnêna inpumpêk tûra an inpeih hmaa baptisma chantîr chu an duh lo va. Mahse, baptisma chan hma chu Jehova lakah mawhphûrhna nei lo anga ngaih chu thil dik lo a ni. Fate chuan thil dik leh dik lo chungchânga Jehova sawite an hriat tawh chuan a chungah mawhphûrhna an nei a. (Jakoba 4:17 chhiar rawh.) Nu leh pa fingte chuan an fate baptisma chang tûr chu khapin an tibeidâwng lo vang. An fate chu naupang hle mah se, an tih ṭhin dân angin, Jehova’n dik a tihte ngaina tûr leh dik lo a tihte haw tûrin an zirtîr a ni. (Luka 6:40) Jehova’n dik a tihte chu i fate’n an tih duh dâwn avângin, Jehova an hmangaihna chuan sual lian tak ti lo tûrin a vênghim ang.—Isaia 35:8.

MI DANGIN AN ṬANPUI THEI

14. Engtin nge upate chuan nu leh pate thiltih chu an thlâwp theih?

14 Upate chuan Jehova rawngbâwlnaa thiltumte neih a ṭhatzia sawipuiin nu leh pate thiltih chu an thlâwp thei a. Unaunu pakhat chuan kum ruk mi a nih laia Unau Russella’n a biak chu a la hre reng a. “Thlarau lam thiltum ka neihte chu minute 15 vêl min sawipui,” tiin a sawi. Chu chu engtin nge a hlâwkpui? A hnuah, chu unaunu chu pioneer a rawn ni a, kum 70 aia rei a thawk a ni! Thu ṭha tak sawi a, mite fuihna chuan dam chhûngin nghawng a nei thei tih a chiang hle. (Thufingte 25:11) Upate chuan nu leh pate leh an fate chu Kingdom Hall saknaahte ṭanpui tûrin an sâwm thei a. Naupangte chu an kum leh an tihtheih tâwk azirin an tîr thei a ni.

15. Engtin nge kohhrana mi dangte’n ṭhalaite chu an ṭanpui theih?

 15 Engtin nge kohhrana mi dangte’n an ṭanpui theih? Ṭhalaite chunga mi mal ngaihsakna inâwm tak lantîrna hmangin a ni. Entîr nân, ṭhalaite’n Jehova hnaih lehzual an tum tih târ langtu thiltihte chu hmuh i tum thei a. Naupang chuan inkhâwmah chhânnate a pêk bâkah chawlhkâr inkhâwmah chanvote a nei em? School-a tuemaw chu thu a hrilhin, thil sual titûra thlêm a nih hunah thil dik a ti em? Chutianga a tih chuan, i ti ṭha hle mai tih hrilh nghâl ang che! Inkhâwm hma leh bân hnuah ṭhalaite biak kan tum thei a ni. Chutianga kan tih chuan, naupangte chuan “inkhâwmna ropui takah” telve niin an inngai dâwn a ni—Sâm 35:18.

I FATE CHU BAPTISMA CHANG THEI TURIN ṬANPUI RAWH

16, 17. (a) Engvângin nge in fate baptisma chan chu a pawimawh? (b) Kristian nu leh pate chuan eng ang hlimna nge an neih theih? (A thupui chunga milem en rawh.)

16 Nu leh pate chanvo ropui ber zînga pakhat chu Jehova hmangaih tûra an fate zirtîr hi a ni a. (Sâm 127:3; Ephesi 6:4) Israel ramah chuan naupangte chu Jehova hnêna inpumpêk sain an piang a. Mahse, kan fate chu chutiang an ni lo. Nu leh pate’n Jehova leh thutak an hmangaih vâng maiin an fate pawhin an hmangaih ang tihna a ni lo. Nu leh pate chuan an fate chu an pian tirh aṭangin zirtîr ni tûr leh Pathian hnêna inpumpêk a, baptisma chang tûrin ṭanpui an tum tûr a ni. Eng nge pawimawh zâwk thei? Inpumpêk a, baptisma an chan a, rinawm taka Jehova rawng an bâwl chuan hrehawm nasa tak chhûngin chhanhim an ni thei ang.—Matthaia 24:13.

Nu leh pate chuan an fate chu zirtîr an tum tûr a ni (Paragraph 16, 17-na en rawh)

17 Blossom Brandt-i’n baptisma chan a duh thu a sawi chuan, a nu leh pate chuan a inpeih tawh tih hriat chian an duh a. An hriat chian chuan a thu tlûkna chu an ṭâwmpui a ni. Blossom-i’n baptisma a chan hma zâna a pa thiltih chu heti hian a sawi a: “Kan vaiin min ṭhingṭhittîr a, tichuan, a ṭawngṭai a. A fanuin Jehova hnêna inpumpêk tûra thu tlûkna a siam avânga a lâwmzia a sawi,” tiin. Kum 60 a liam hnu chuan Blossom-i’n: “Chumi zân chu engtikah mah ka theihnghilh thei lo vang tih ka chiang a ni!” tiin a sawi. Nu leh pate u, in fate chu Jehova hnêna inpumpêk a, baptisma changa a chhiahhlawh an ni tih in hmuh chuan chutiang hlimna leh lungawina chu in nei ve ngei ang.

^ par. 9 Nu leh pate chuan an fate chu Questions Young People Ask—Answers That Work, Volume 2, phêk 304-310-a thu ṭha tak takte chu an sawipui thei a. April 2011, Kan Lalram Rawngbâwlna phêk 2-naa “Zawhna Bâwm,” tih chu en bawk ang che.