“Phunnawi lovin inmikhual tawn ula.”—1 PETERA 4:9.

HLA: 50, 20

1. Kum zabi khatnaa Kristiante chuan eng harsatnate nge an tawh?

TIRHKOH Petera chuan C.E. 62 aṭanga 64 inkâr hun engemawah, “Ponto ram te, Galatia ram te, Kappadokia ram te, Asia ram te, Bithunia ram tea Darhho awm” hnênah lehkha a ziak a. (1 Petera 1:1) Chûng unaute chu hmun hrang hrang aṭanga lo kalte an ni. “Fiahna nasa tak,” a nih loh leh tihduhdahna an tawh avângin fuihna leh kaihhruaina an mamawh a. Chu bâkah, hun hlauhawm takah an nung a ni. Petera chuan: “Thil zawng zawng tâwpna chu a hnai tawh,” tiin a ziak a. Kum sâwm a liam hmain, Jerusalem chu tihchhiat a ni dâwn a. Engin nge chûng hun harsaahte chuan Kristian hmun tina awmte chu ṭanpui ang?—1 Petera 4:4, 7, 12.

2, 3. Engvângin nge Petera chuan a unaute chu khualchhâwn thiamna lantîr tûra a fuih? (A thupui chunga milem en rawh.)

2 Petera’n a unaute ti tûra a fuih pakhat chu “inmikhual tawn” tûr tih hi a ni a. (1 Petera 4:9) “Inmikhual” tih Grik thu mal hi a ngial a ngan chuan “hmêl hriat lohte chunga ngainatna, a nih loh leh ngilneihna lantîr,” a ni a. Petera chuan a  unaute chu inhre tawhin hna lo thawk tlâng ṭhîn tawh mah se, inmikhual “tawn” tûrin a fuih a ni. Engtin nge khualchhâwn thiamna chuan anni chu ṭanpui ang?

3 Chu chuan a inhnaih lehzualtîr dâwn a ni. Nang eng nge i nih ve? Tuemawin a inah a sâwm chein, hun hlimawm tak inhman lai chu i la hria em? I ina tuemaw i sâwm hunah, chu chuan a inhnaih lehzualtîr che a ni. Unaute kan hriat chian theih dân kawng khat chu an chunga khualchhâwn thiamna lantîr hi a ni a. Buainate a nasat tulh tulh dâwn avângin Petera hun laia Kristiante chu an inhnaih lehzual sauh a ngai a ni. Keini pawh he “ni hnuhnûngahte” hian chutianga kan tih a ngai a ni.—2 Timothea 3:1.

4. He thuziakah hian eng zawhnate nge kan sawiho vang?

4 Eng kawngtein nge kan inmikhual “tawn” theih ang? Engin nge khualchhâwn thiamna lantîrtu min nih lohtîr thei a, engtin nge hma kan sâwn theih? Mikhual ṭha tak ni tûrin engin nge min ṭanpui thei?

KHUALCHHAWN THIAMNA LANTIRNA HUN REMCHANGTE

5. Engtin nge kan Kristian inkhâwmnaah khualchhâwn thiamna kan lantîr theih?

5 Inkhâwmnaahte: Jehova leh a inawpna pâwl chuan inkhâwma tel tûrin min sâwm a. Kan inkhâwmnaa lo tel zawng zawng, a bîk takin mi tharte chu lawm hlawh nia inhre tûrin kan duh a ni. (Rom 15:7) Anni pawh Jehova mikhualte an nih avângin, an lan dân leh an inthuam dân chu engpawh ni se, rilru hahdam taka kan awmtîr a ngai a. (Jakoba 2:1-4) Mi thar rawn inkhâwm chu amah chauh a ni tih i hriat chuan i ṭhutpui thei ang em? Kan inkhâwm dânte hre thiam tûr leh Bible châng chhiar laite hmu tûra i ṭanpui chuan a lâwm hle ang a. Chu chu ‘mikhualte lawm dân’ kawng ṭha tak a ni ngei ang.—Rom 12:13.

6. Tute chungah nge khualchhâwn thiamna kan lantîr ber ang?

6 Thingpui in tûrin, a nih loh leh chaw ei tûrin: Bible hun laia mite chuan ṭhian ni tûr leh inremna nei tûra an duhzia lantîr nân mi dangte chu chaw eia sâwmin khualchhâwn thiamna an lantîr ṭhîn a ni. (Genesis 18:1-8; Rorêltute 13:15; Luka 24:28-30) Tute chungah nge khualchhâwn thiamna kan lantîr ber ang? Kohhrana unaute chungah a ni. He khâwvêl hi a chhiat zual deuh deuh avângin unaute kan inrinchhan tawn a, ṭhian rinawm kan nih a ngai a. Kum 2011 khân, Governing Body chuan United States Bethel chhûngkaw tâna neih Vênnainsâng zirna hun chu dâr 6:45 p.m. aṭangin 6:15 p.m.-ah a sawn a. Engvângin nge? Thupuan chhuahnaah tûn aia inkhâwm kan bân hma chuan Bethel-a awmte tân khualchhâwn thiamna lantîr a awlsam lehzual ang tih a tel a. Branch dangte pawhin chutiang chuan an ti ve a ni. Chu chu Bethel chhûngkuate tân inhriat tawn theihna hun remchâng ṭha tak a ni.

Mi tharte chu thingpui in tûrin emaw, chaw ei tûrin emaw, a nih loh leh hmun pakhat khata kal tûrin emaw i sâwm thei ang em?

7, 8. Kan kohhrana thusawi tûra lo kalte chungah engtin nge khualchhâwn thiamna kan lantîr theih?

7 A châng chuan kohhran danga mi, bial kantu, a nih loh leh Bethel aiawha lo kalte chuan kan kohhranah thu an rawn sawi a. Chu mi hun chu unaute chunga khualchhâwn thiamna lantîrna hun remchângah kan hmang thei ang em? (3 Johana 5-8 chhiar rawh.) Kan tih theih dân kawng khat chu thingpui in tûr, a nih loh leh chaw ei tûra sâwm hi a ni.

8 United States rama unaunu pakhat chuan: “Kum tam tak chhûng chu thusawitu  leh an nupuite chu inah sâwmin khualchhâwn thiamna lantîrna hun remchâng kan nupain kan nei a,” tiin a sawi. Chutianga an sâwm apiangin an rinna a chak phah a, hun nuam tak hmang niin a ngai a. “Chutianga kan tih chu kan inchhîr ngai lo,” tiin a sawi.

9, 10. (a) Hun engemawti chhûng chu tute nge kan mikhual a ngaih mai thei? (b) In tê tak tê neite pawhin ṭanpuina an pe thei em? Entîrna pe rawh.

9 Rei taka châm mikhualte: Bible hun lai chuan mikhual ṭhenkhat tâna thlenna tûr hmun buatsaihsak chu thil pângngai tak a ni a. (Joba 31:32; Philemona 22) Tûn laiah pawh chutianga kan tih ve a ngai mai thei. Bial kantute chuan kohhrante an tlawh hunah thlenna tûr in an mamawh fo va. Theocratic school zirlaite leh insakna lama inpete tân pawh chutianga tihsak a ngai mai thei a ni. A nih leh, leilung chhiatna a thlen hnua chênna tûr in nei lote chungchâng hi eng nge ni ve? An in sak ṭhat leh a nih hma chu awmna tûr hmun an mamawh thei a. In lian tak neite chauhvin ṭanpui thei tûrah kan ngai tûr a ni lo. Anni chuan tûn hmain chutiang chuan vawi tam tak an lo ti tawh pawh a ni thei. I in chu a tê a nih pawhin, mi pakhat tal i thlentîr thei ang em?

10 South Korea rama unaupa chuan theocratic school kal tûra zirlaite a ina an thlen lai chu a hre reng a. “Innei hlim hlawl kan nih bâkah, in tê tak têa awm kan nih avângin atîr chuan kan hreh deuh va. Mahse, kan ina zirlaite an lo thleng chu thiltawn hlimawm tak a ni. Nupa tuak thar kan nih angin, Jehova rawngbâwl dûn a, thlarau lam thiltumte ûmna chuan nupaa min tihhlim theih dân kan hmu a ni,” tiin a sawi.

11. Engvângin nge in kohhrana rawn insawn mi tharte chunga khualchhâwn thiamna lantîr a ngaih mai theih?

11 Kohhrana unau tharte: Unau ṭhenkhatte, a nih loh leh chhûngkaw ṭhenkhat chu kohhran dang aṭanga i awmna hmuna rawn insawn an ni thei a. I awmna kohhranin ṭanpui a mamawh avânga rawn insawn an ni mai thei. A nih loh leh, pioneer niin i kohhranah rawngbâwl tûra ruat pawh an ni thei bawk. Chu chu an tân inthlâk danglamna lian tak a ni. Hmun thar, kohhran thar, ṭawng thar, leh hnam dân thar mila an insiamrem a ngai dâwn a. Thingpui in tûrin emaw, chaw ei tûrin emaw, a nih loh leh hmun pakhat khata kal tûrin emaw i sâwm thei ang em? Chu chuan ṭhian siam tûr leh an dinhmun thar azira insiamrem thei tûrin a ṭanpui ang.

12. Khualchhâwn thiamna lantîr tûrin thil tam tak i buatsaih a ngai lo tih eng thiltawnin nge târ lang?

12 Khualchhâwn thiamna lantîr tûrin thil tam tak i buatsaih a ngai lo va. (Luka 10:41, 42 chhiar rawh.) Unaupa pakhat chuan an nupaa missionary an nih ṭana thilthleng chu an la hre reng a. “Kan la naupangin, thiltawn kan neih tlêm bâkah, in lam kan ngai thei hle a ni. Tlai khat chu ka nupuiin in lam a ngai hle a, theih tâwp chhuahin ka ṭanpui a; mahse, a sâwt chuang lo. A hnuah, 7:30 p.m. vêlah kawngka kik rî kan  hria a. Sêr thlum pathu min rawn kensaktu Bible zirlai pakhat chu a lo ding reng mai a. Missionary thar a lawm duh avânga lo kal a ni. In chhûnga lût tûrin kan sâwm a, tuite kan intîr a. Tichuan, thingpui leh chocolate tui tak kan siam a. Swahili ṭawng kan thiam lo va, ani pawhin Sâp ṭawng a thiam lo,” tiin a sawi. Chu thiltawn chuan tualchhûnga unaute nêna ṭhian siam ṭan tûr leh hlimna nei lehzual tûrin a ṭanpui tih unaupa chuan a sawi.

KHUALCHHAWN THIAMNA I LANTIR CHU ENGMAHIN DAL SUH SE

13. Khualchhâwn thiamnain engtin nge a ṭanpui che?

13 Khualchhâwn thiamna lantîr hreh châng i nei ṭhîn em? I neih chuan, i neih theih hun hlimawm tak leh chatuana i ṭhian ni thei tûrte nêna ṭhian siam theihna hun remchâng i hloh mai thei a ni. Khualchhâwn thiamna lantîr chu mal nia inhriatna nei tawh lo tûra ṭanpuitu ṭha tak a ni. A nih leh, engvângin nge mi chuan khualchhâwn thiamna lantîr chu a hreh mai theih? A chhan ṭhenkhat a awm a ni.

14. Khualchhâwn thiamna lantîr nân leh dawn theih nân hun leh tha kan nei tâwk lo a nih chuan eng nge kan tih theih?

14 Hun leh tha: Jehova mite chu an buai hlein, thawh tûr tam tak an nei a. Mi ṭhenkhat chuan khualchhâwn thiamna lantîr tûrin hun leh tha nei tâwk lovah an inngai a ni. Chutianga i inngaih chuan, khualchhâwn thiamna i lantîr emaw, i dawn emaw theih nân i hun duante i siamrem a ngai mai thei. Bible-in inmikhual tawn tûra min fuih avângin hei hi thil pawimawh tak a ni. (Hebrai 13:2) Chuvângin, khualchhâwn thiamna lantîr chu thil tih tûr dik tak a ni. Chutianga ti thei tûr chuan thil pawimawh lo zâwkte tâna hun i pêk tlêm deuh chu a ngai mai thei a ni.

15. Engvângin nge mi ṭhenkhatin khualchhâwn thiamna lantîr thei lo tûra an inngaih mai theih?

15 Mahni i inhmuh dân: Khualchhâwn thiamna lantîr duh mah la, ti thei lo tûrah i inngai tawh ṭhîn em? I zakin, i mikhualte’n nuam an tih loh i hlau pawh a ni mai thei. Sum i neih tam loh avângin unau dangte anga i tih theih loh i hlau pawh a ni thei bawk. Mahse, i hriat rêng tûr chu in ṭha tak i neih kher a ngai lo. I in chu thianghlim tak leh felfai tak a ni a, hawihhâwm tak i nih bawk chuan i mikhualte chu an hlim ngei ang.

16, 17. Khualchhâwn thiamna lantîr chungchângah hlauhthâwnna i nei a nih chuan eng nge i tih theih?

16 Mikhualte lawm dân chungchângah hlauhthâwnna i neih chuan nangmah chauh i ni lo. Britain rama upa pakhat chuan: “Mikhual kan nei dâwn tih kan hriat chuan kan zâm mai thei a. Mahse, Jehova rawngbâwlna nêna inkûngkaih thil rêng rêngah a hlâwknate leh lungawinate chu lungkhamna kan neihte aiin a nasa zâwk ṭhîn a ni. Mikhualte nên coffee inho va, tîtîho mai mai pawh nuam ka ti,” tiin a sawi. Mikhualte chunga mi mal ngaihsakna lantîr chu a ṭha reng ṭhîn a. (Philippi 2:4) Mi tam zâwk chuan an thiltawnte sawi chu nuam an ti a. Mite nêna kan inkawmho chuahvin an thiltawnte ka hre thei a ni. Upa dang pakhat leh chuan: “Kohhrana ṭhiante chu ina lêng tûra ka sâwm chuan anmahni ka hriat chian bâkah, thutak an hmuh dân hriat theihna hun ṭha tak ka neih phah a ni,” tiin a ziak a. I mikhualte chunga mi mal ngaihsakna i lantîr chuan, an vaiin nuam an ti ngei ang tih i chiang thei a ni.

17 Theocratic school hrang hranga zirlaite  lo mikhual ṭhîn pioneer unaunu pakhat chuan: “Atîr chuan ka hlauthâwng deuh va, a chhan chu, ka in chu in pângngai ve mai a nih bâkah, ka bungraw neihte chu mi min pêkte mai a ni. School kaihruaitu zînga unaupa nupui chuan rilru hahdam taka awm tûrin min ṭanpui a. A pasal nêna bial an kan laia chawlhkâr hun an hman ṭhat ber hunte chu hausa vak lo mah se, anmahni ang bawka Jehova rawngbâwlna leh nun tihsamkhai tum tlattu thlarau lam mite nêna hun hman dun a ni tih a sawi. Chu chuan ka nuin keini naupangte hnêna min hrilh ṭhin: ‘Hmangaihna awmnaa anhnah chawa rin chu a ṭha zâwk,’ tih min hriat chhuahtîr a ni,” tiin a sawi. (Thufingte 15:17) Thil pawimawh ber chu mikhualte chunga hmangaihna lantîr a nih avângin lungkham tûr engmah a awm lo.

18, 19. Khualchhâwn thiamna lantîrna chuan mi dangte chunga kan rilru put hmang ṭha lo hneh tûrin engtin nge min ṭanpui theih?

18 Mi dangte i thlîr dân: In kohhranah tilungni lotu che an awm em? I lungnih lohna chu hneh i tum loh chuan amahin a inthlâk lo vang. A miziate i duh loh tuemaw chu i inah i sâwm duh lo ngei ang. A nih loh leh, tûn hmaa i rilru lo tina tawh, i theihnghilh theih loh tuemaw an awm pawh a ni mai thei.

19 Khualchhâwn thiamna lantîrtu i nih chuan mi dangte, i hmêlmate hial nên pawh in inlaichînna i tihmasâwn thei tih Bible chuan a sawi a. (Thufingte 25:21, 22 chhiar rawh.) Tuemaw chu i ina lêng tûra i sâwm chuan a chunga i rilru put hmang dik lote i hneh theih bâkah, in inlaichînna chu a ṭha lehzual thei a ni. Jehova’n thutaka a hîp  laia a hmuh a mize ṭhate chu i hmu ṭan ve thei a. (Johana 6:44) Hmangaihnain i sâwmna beisei lo tuemaw sâwm tûra a chêttîr che chuan, chu chu in inṭhian ṭhatna inṭanna tûr a ni thei. Hmangaihnain a chêttîr tak zet che tih engtin nge i chian theih? Kawng khat chu Philippi 2:3-a thu: “Mi tinin inngaitlâwm takin mahni aiin mi dang ṭha zâwkah ruat ṭheuh rawh se,” tih fuihna zawm hi a ni. Mahni aia kan unaute an ṭhat zâwk dân chu kan ngaihtuah tûr a ni. An rinna, an chhelna, a nih loh leh an Kristian mize dangte aṭangin kan inzir thei a ni. An mize ṭhate ngaihtuahna chuan anmahni kan hmangaihna a tihpun bâkah, an chunga khualchhâwn thiamnna lantîr a tiawlsam lehzual ang.

MIKHUAL ṬHA TAK NI RAWH

In neitute chuan an mikhualte tân ṭha takin an buatsaih tlângpui ṭhîn (Paragraph 20-na en rawh)

20. Sâwmna kan pawm hunah engvângin nge mi rin tlâk kan nih ang a, engtin nge kan nih theih?

20 Fakna hla phuahtu Davida chuan: “LALPA, i puan inah chuan tunge lo mikhual ang?” tiin a zâwt a. (Sâm 15:1) Chumi hnuah, Jehova’n a mikhualte neih atâna a duh miziate a sawi a ni. Chûng zînga pakhat chu: “Mahni tâna pawi tûr pawh chhechhama tiam tawh chu tidanglam ngai lova,” tihah hian a lang a, chu chu mi rin tlâk nih hi a ni. (Sâm 15:4) Loh theih loh thil a nih chauh loh chuan sâwmna kan pawm tawh chu kan ṭhulh tûr a ni lo. Min sâwmtu chuan a lo inbuatsaih vek tawh pawh a ni thei a, kan ṭhulh leh a nih chuan a thawhrimna zawng zawng chu a thlâwn vek ang. (Matthaia 5:37) Mi ṭhenkhat chuan sâwmna ṭha zâwka an ngaihte an pawm theih nân sâwmna an pawm tawh chu an ṭhulh leh a ni. Chu chu hmangaihna leh zahna lantîrna a ni em? Min sâwmtuin kan tâna min tihsak apiang chu kan ngaihlu tûr a ni. (Luka 10:7) Loh theih lohva ṭhulh ngai a nih chuan, a rang thei ang bera kan hriattîr a ṭha a, chu chu hmangaihna leh ngaihsakna lantîrna a ni ang.

21. Engtin nge tualchhûng hnam dânte zahna chuan mikhual ṭha ni tûra min ṭanpui theih?

21 Tualchhûng hnam dânte zahna lantîr pawh a pawimawh bawk. Hnam dân ṭhenkhatah chuan, beisei lo taka lo tel mikhualte pawh lawm an ni a. Ṭhenkhatah chuan, kan kal hmaa hriattîr hmasak chu a ṭha zâwk a ni. Hmun ṭhenkhatah chuan, khualchhâwntu chuan a mikhualte chu ei tûr ṭha ber a eitîr hnuah chauh a chhûngte’n an ei ve a. Hmun dang lehah chuan, mi tin chu ang khat veka cheibâwl an ni. Hmun dang ṭhenkhatah chuan, mikhualte chuan an ei tûrte an intum tlângpui a. Hmun dang lehah chuan, a sâwmtu chuan mikhualte’n engmah an rawn ken loh chu a duh zâwk a ni. Hnam dân ṭhenkhatah chuan, mikhualte’n sâwmna hmasa ber emaw, a pahnihna emaw chu hawihhâwm takin an hnâwl ṭhîn a. Mahse, hnam dân dang lehah chuan sâwmna hmasa ber pawm duh loh chu thil mawi lo tak a ni. Min sâwmtu chu tihlâwm kan tum reng tûr a ni.

22. Engvângin nge “inmikhual tawn” chu thil pawimawh tak a nih?

22 Petera chuan: “Thil zawng zawng tâwpna chu a hnai tawh,” tiin a sawi a. (1 Petera 4:7) Tûn lai hian, khawvêl tâna hrehawmna nasa ber la ni tûr chu kan hmachhawn a. He khawvêl kalhmang hi a chhiat zual zêl avângin, unaute hmangaihna thûk tak kan neih a ngai ngei ang. Petera fuihna: “Inmikhual tawn ula,” tih hi tûn hma aiin kan nunpui lehzual a ngai a ni. (1 Petera 4:9) Ni e, khualchhâwn thiamna lantîr chu tûnah leh chatuan thleng pawhin a pawimawh hle a ni.