“Baptisma chuan . . . tûnah a chhandam che u a ni.”—1 PETERA 3:21.

HLA: 7, 6

1, 2. (a) Nu leh pa ṭhenkhat chuan an fate’n baptisma chan an duh hunah eng nge an ngaihtuah? (b) Engvângin nge baptisma chang tûrte chu Jehova hnêna an inpumpêk tawh leh tawh loh an zawh? (A thupui chunga milem en rawh.)

BAPTISMA chang tûrte zînga ding tleirâwl Maria-i chu a nu leh pate’n an en a. Thusawitu chuan zawhna pahnih a zâwt a. Maria-i chuan ring tak leh fiah takin a chhâng a. Chu mi hnu chuan baptisma a chang ta a ni.

2 Maria-i nu leh pate chuan an fanuin Jehova hnêna inpumpêk a, baptisma a chang chu an chhuang hle a. Mahse, chu mi hma chuan a nuin hlauhthâwnna a nei deuh va. Heti hian a ngaihtuah a ni: ‘Maria-i chu baptisma chang tûrin a la nuapang lutuk em? Jehova hnêna inpumpêk a pawimawh dân a hre chiang tak tak em? Baptisma chang tûrin a nghah deuh a la ngai em?’ tiin. Hmangaihna nei nu leh pa tam tak chuan an fate’n baptisma chan an duh thu an sawi hunah chutiang  zawhnate chu an inzâwt a. (Thuhriltu 5:5) Eng pawh ni se, miin thu tlûkna a siam theih azawnga pawimawh ber chu Jehova hnêna inpumpêk a, baptisma chan hi a ni.— “Jehova Hnênah I Inpumpêk Tawh Em?” tih bâwm chu en rawh.

3, 4. (a) Tirhkoh Petera chuan baptisma chan chu thil pawimawh tak a ni tih engtin nge min zirtîr? (b) Engvângin nge Petera’n baptisma chu Nova lawng tukna nên a khaihkhin?

3 Tirhkoh Petera chuan baptisma chan chu Nova lawng tuk nên a khaikhin a. Ani chuan: “Chu mi anpui (baptisma) chuan . . . tûnah a chhandam che u a ni,” tiin a sawi. (1 Petera 3:20, 21 chhiar rawh.) Lawng chuan Nova’n thinlung zawng zawnga Pathian duhzâwng tih a duhzia mite chu chiang takin a hriattîr a ni. Nova’n Jehova pêk hna chu rinawm takin a thawk a. Jehova chuan Nova chu a rinna avângin a chhûngte nên Tuilêtah a chhandam a ni. Petera min zirtîr duh chu eng nge ni?

4 Mite’n lawng an hmuh chuan Nova’n Pathian a ring tih an hria a. Mite’n tuemaw baptisma chang an hmuh hunah tho leh Krista a rin avânga Pathian hnêna inpumpêk a ni tih an hria a ni. Baptisma changte chuan Nova angin Pathian thu an âwih a, a hna pêkte chu an thawk a. Jehova’n Tuilêta Nova a chhanhim angin he khawvêl suaksual tak a tihboral hunah baptisma chang tawh a chhiahhlawh rinawmte chu a chhanhim ang. (Marka 13:10; Thu Puan 7:9, 10) Jehova hnêna inpumpêk a, baptisma chan chu thil pawimawh tak a ni tih a chiang hle. Dik takin, tuemawin baptisma chang tûra a vuaicha a nih chuan chatuana nun theihna hun remchâng a hloh thei a ni.

5. He thuziakah hian eng nge kan sawiho vang?

 5 Tûnah chuan baptisma chan pawimawh dân kan hre tawh a, hêng zawhna pathumte chhânna hi kan hriat a ngai a ni: Bible-in baptisma chungchâng eng nge a sawi? Miin baptisma a chan hmain eng nge a tih ang? Kan fate leh Bible zirpuite kan zirtîr hunah engvângin nge baptisma chan pawimawh dân chu kan hriat reng ang? tih hi.

BAPTISMA CHUNGCHANGA BIBLE ZIRTIRNATE

6, 7. (a) Johana pêk baptisma chuan eng awmzia nge a neih? (b) Tu baptisma channa nge mi dang zawng zawng laka danglam bîk, engvângin nge?

6 Bible-ah, mite baptis hmasa bertu chu Baptistu Johana a ni a. (Matthaia 3:1-6) Baptisma chang tûrin engvângin nge mite chu a hnêna an rawn kal? Mosia Dân an bawhchhiatna chu pawmin pawi an ti tak zet a, an sualte an simzia lantîr an duh vâng a ni. Mahse, Johana baptis zînga pawimawh ber baptisma chuan awmze danglam tak a nei a. Johana chuan Pathian Fapa, mi ṭha famkim Isua baptis theihna hun remchang ṭha tak a nei a ni. (Matthaia 3:13-17) Isua chuan sualna engmah a nei lo va. Inchhîr tûr pawh a nei lo. (1 Petera 2:22) A nih leh, engvângin nge Isua’n baptisma a chan? Pathian duhzâwng ti tûra a nun hmang tûrin a inpeih tawh tih a târ lanna a ni.—Hebrai 10:7.

7 Isua’n thu hrilhna a ṭan hnuin a zirtîrte chuan mi dangte chu an baptis ṭan a. (Johana 3:22; 4:1, 2) Chûng mite pawh chu Mosia Dân bawhchhiatna avânga an sualte sima baptisma changte an ni a. Mahse, Isua thih hnu leh a thawhleh hnua a zirtîr nih duhtute baptisma channa chuan chhan dang a nei a ni.

8. (a) Isua’n a thawhleh hnu khân eng thu nge a pêk? (b) Engvângin nge Kristiante chu baptisma chang tûr an nih?

8 Isua chuan a thawhleh hnu lawk C.E. 33 khân naupangte pawh tiamin, a hmei a pa mi 500 aia tam a bia a. Chu hun chu: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tia a sawi laiin a ni ngei ang. (Matthaia 28:19, 20; 1 Korinth 15:6) Isua chuan zirtîra siam tûrin a hnungzuite chu thu a pe a. A zirtîr nih duh, a nih loh leh a “nghâwngkawl” bât duh apiangin baptisma an chan a ngai a ni. (Matthaia 11:29, 30) Pathian duhzâwnga a rawngbâwltu chuan Pathianin a duhzâwng tihfamkim nân Isua a hmang tih a pawm tûr a ni a. A hnuah, Pathian pawm ni tûrin baptisma a chang thei a ni. Isua zirtîr hmasate chuan baptisma chan a pawimawhzia an hriat thu Bible-ah finfiahna tam tak a chuang a. Anni chuan baptisma chan nân hun a la tlai lo tiin an ngaihtuah lo a ni.—Tirhkohte 2:41; 9:18; 16:14, 15, 32, 33.

BAPTISMA CHANG TURIN VUAICHA SUH

9, 10. Ethiopia mi leh Saula te baptisma channa aṭangin eng nge kan zir theih?

9 Tirhkohte 8:35, 36 chhiar rawh. Juda mite rinna pawmtu Ethiopia mi pakhat chu Jerusalem biak ina Pathian a biak hnu chuan in lamah a haw a. Jehova vântirhkoh chuan a hnêna thu hrilh tûrin Philipa chu a tîr a, tichuan, “Isua thu” a zirtîr a. Engtin nge Ethiopia mi chuan a chhân lêt? Isua chu Lalpa nia pawm a pawimawhzia a hria a, tichuan Jehova’n Kristiante tâna ti  tûra a phûtte chu tih a duh a. Chuvângin, vuaicha lovin baptisma a chang ta nghâl a ni.

10 Entîrna dang leh chu Juda mi pakhat Saula hi a ni a. Juda hnam pumpui chu Pathian hnêna inpumpêk tawh ni mah se, a thu an âwih loh avângin Jehova’n a hnâwl a. Saula chuan Juda mite chu kawng dik taka Pathian rawng la bâwl nia a rin avângin Kristiante chu a tiduhdah a ni. Mahse, ni khat chu thi tawha a ngaih, tho leh Isua ngeiin Saula chu vân aṭangin a rawn bia a. Engtin nge Saula’n a chhân lêt? Kristian zirtîr Anania ṭanpuina chu lâwm takin a pawm a. Bible chuan: “A tho va, baptisma a chang ta a,” tiin a sawi. (Tirhkohte 9:17, 18; Galatian 1:14) A hnuah ani chu tirhkoh Paula tia hriat a ni. Pathianin a duhzâwng tifamkim tûrin Isua a hmang tih Saula’n a hriat veleh vuaicha lovin baptisma a chang nghâl tih chhinchhiah ang che.—Tirhkohte 22:12-16 chhiar rawh.

Bible zirlaite chuan thutak an hriat avângin an lâwm hle a, baptisma chan an châk hle a ni

11. (a) Engin nge tûn laia Bible zirlaite chu baptisma chang tûra thu tlûkna siamtîr? (b) Tuemawin baptisma a chan hian engtin nge kan awm?

11 Tûn laiah, Bible zirlai a pui apang tam tak pawhin chutiang chuan an ti a. Bible sawite chu an ngainain, an ring tlat a, Jehova hnêna inpumpêk a, baptisma chan chu an châk hle a ni. A nihna takah chuan, baptisma channa thusawi chu inkhâwmpuia hun pawimawh tak a ni ṭhîn. Bible zirlaite’n thutak an pawm a, baptisma chang tûra thu tlûkna an siam hian Jehova Thuhretute chu an hlim hle a ni. Nu leh pate pawh an fate’n chutianga thu tlûkna an siam chuan a hlim hle bawk. Kum 2017 rawngbâwl kum chhûng khân mi thar 2,84,000 aia tam chuan Jehova hnênah inpumpêkin baptisma an chang a. (Tirhkohte 13:48) Kristiante tân baptisma chan a ṭûl tih an hre chiang hle a. Mahse, baptisma an chan hmain eng nge an tih ngai?

12. Bible zirlaite chuan baptisma an chan theih hmain eng nge an tih ang?

12 Bible zirlaite chuan baptisma an chan theih hmain Pathian chungchâng thutak te, mihring leh leilung tâna a thiltum te, leh mihringte chhandam tûra a thiltihte chu an hre tûr a ni. (1 Timothea 2:3-6) Chu bâkah, Pathian dânte zâwm tûr leh a thil huatte bansan tûra ṭanpuitu rinna an neih chhoh a ngai a. (Tirhkohte 3:19) Thil pawimawh tak chu, Jehova’n a thil huatzâwng ti rengtute inpumpêkna chu a pawm lo hi a ni. (1 Korinth 6:9, 10) Mahse, thil dang pawh a la awm a. Jehova hnêna inpumpêk duhtute chu kohhran inkhâwmahte leh chanchin ṭha hrilhnaahte an tel ziah a, mi dangte an zirtîr a ngai a ni. Chu chu Krista hnungzui duhtu apiangte tâna thil phût a ni. (Tirhkohte 1:8) Bible zirlaiin hêng thil zawng zawngte hi a tihmasa tûr a ni. Jehova hnênah mi mal taka ṭawngṭaiin a inpumpêk ang a, tichuan baptisma a chang thei ang.

 BAPTISMA CHAN CHU BIBLE ZIRLAITE THILTUM NIHTIR RAWH

Mi dangte i zirtîr hunah, baptisma chan chu thil pawimawh tak a ni tih hre thiam tûra ṭanpui tûrin hun remchâng i zawng em? (Paragraph 13-na en rawh)

13. Mi dangte kan zirtîr hunah, Kristian dik tak ni tûrin baptisma an chan a ngai tih engvângin nge kan hriat reng ang?

13 Hêng thil pawimawh takte ti tûra kan fate leh Bible zirlaite kan ṭanpui hunah, Isua hnungzui dik tak nih duhtute chuan baptisma an chan a ngai tih kan hre reng tûr a ni. Tichuan inpumpêk a, baptisma chan pawimawh dân chu a remchân hunah hrilh kan hreh lo vang. Kan fate leh kan Bible zirpuite’n hma an sâwn a, baptisma an chan chu kan va duh tak êm!

14. Engvângin nge baptisma chang tûrin tumah kan tihlui loh vang?

14 Fate leh Bible zirlaite chu baptisma chang tûrin tuman an tilui tûr a ni lo. Jehova chuan a rawngbâwl tûrin kan zînga tumah a tilui lo va. (1 Johana 4:8) Mi dangte kan zirtîr hian, Jehova nêna mi mal inlaichînna neih a pawimawh dân hre thiam tûrin kan ṭanpui tûr a ni. Tichuan, Bible zirlai chuan Pathian chungchâng thutak hriat a duh tak zet a, Kristian dikte tih tûr engkim tih a duh tak zet chuan baptisma chan a duh ngei ang.—2 Korinth 5:14, 15.

15, 16. (a) Baptisma chang tûrin kum bithliah chin a awm em? Hrilhfiah rawh. (b) Bible zirlai chu sakhaw dangah baptisma a chang tawh a nih pawhin engvângin nge Jehova Thuhretute zînga mi nia baptisma a chan a ngaih?

15 Baptisma chang tûrte tân kum bithliah chin a awm lo va. Mi tinte chu kan inang vek lova, Bible zirlai ṭhenkhat chu mi dangte aiin an hmasâwn chak a. Mi tam tak chu an naupang laiin baptisma an chang a, an rawn upat chhoh hunah pawh Jehova  chungah an rinawm reng a ni. Mi dangte chu an upat hnuah Bible thutak zirin, baptisma an chan a. Chûng zînga ṭhenkhat chu kum 100 aia tam an ni!

16 Bible zirlai nu pakhat chu sakhaw pâwl dangah baptisma a chang tawh a. Chuvângin, amah Bible zirtîrtu hnênah baptisma chan nawn leh chu a ṭûl tak tak leh tak tak loh a zâwt a ni. A zirtîrtu chuan a zawhna chu Bible châng ṭhenkhat hmuhin a chhâng a. Chu nu chuan Bible-a thil phûtte a hriatthiam veleh, kum 80 lai a ni tawh chung pawhin baptisma a chang ta a ni. A entawn tûr siam aṭangin eng nge kan zir theih? Jehova chuan a duhzâwng chungchânga thutak kan hriat hnuah chauh kan baptisma chan chu a pawm ang. Sakhaw pâwl dangah baptisma chang tawh mah ila, Jehova Thuhretute zînga mi nia baptisma kan chan a ngai a ni.—Tirhkohte 19:3-5 chhiar rawh.

17. Baptisma changtuin a chan nîin eng chungchâng nge a ngaihtuah ang?

17 Baptisma chan nî chu a changtu tân hun hlimawm tak a ni a. Inpumpêkna leh baptisma chungchâng ngun taka a ngaihtuah hun tûr a ni bawk. Kristian dikte tâna thil phût engkim ti tûrin thawhrim a ngai a. Isua zirtîrte chu ‘mahni tâna nung tawh lovin, an thih aia thia tholeha tân chuan an nung,’ tûr a ni.—2 Korinth 5:15; Matthaia 16:24.

18. A dawta thuziakah eng zawhnate nge kan sawiho vang?

18 Kan hriat tâk angin, Kristian dik pakhat ni tûra thu tlûkna siam chu thil pawimawh tak a ni a. Chuvângin, Maria-i nu chuan thuziak tîr lama târ lan zawhnate chu mahniin a inzâwt a. Nu emaw, pa emaw i nih chuan heti hian i inzâwt thei a ni: ‘Ka fa chu baptisma chang tûrin a inpeih tawh tak zet em? Ka fa chuan Pathian hnêna inpumpêk tûrin Jehova chungchâng a hre tâwk em? Ka fa chu baptisma a chan hmain zirna ṭha leh hna ṭha tak a neih a ngai em? Baptisma a chan hnuah thil sual lian tak a tih chuan engtin nge ni ang?’ tiin. Hêng zawhnate hi a dawta thuziakah sawiho a ni ang a, Kristian nu leh pate chuan baptisma chungchânga thlîr dan dik an neih theih dânte kan sawiho bawk ang.