“Aw LALPA, . . . nang min vawtu i ni; tichuan kan za hian i kut chhuak kan ni.”—ISAIA 64:8.

HLA: 11, 26

1. Engvângin nge Jehova chu Bêlvawtu ropui ber a nih?

KUM 2010 November thla khân, belleia siam hmân lai Chinese no tung mawi tak chu England-ah dollar maktaduai 70 dâwn laia hralh a ni a. Bêlvawtuin thil tlâwm leh pângngai tak bellei chu no tung mawi tak leh man to taka a siam thei hi a mak hle. Bêlvawtu Jehova chu mihring bêlvawtu tupawh aiin a ropui a. Ani chuan, ‘leia vaivut,’ a nih loh leh belleiin mi ṭha famkim a siam tih Bible chuan a sawi. (Genesis 2:7) Chu Adama chu “Pathian fa” a ni a, Pathian miziate entawn thei tûra siam a ni.—Luka 3:38.

2, 3. Engtin nge Israel inlamlêtte rilru put hmang chu kan entawn theih?

2 Amah Siamtu chunga a hel khân, Adama chu Pathian fa a ni tawh lo va. Mahse, a thlah tam takte chuan Jehova chu Rorêltu atân an thlang a ni. (Hebrai 12:1-2) Anni chuan inngaitlâwm taka Siamtu thu âwihin, Setana aiin Jehova chu an Pa ni tûr leh an Bêlvawtu ni tûrin an thlang zâwk tih an târ lang a. (Johana 8:44) Pathian chunga an rinawmna chuan:  “Aw LALPA, nang chu kan pa i ni a; keini hi bellei kan ni a, nang min vawtu i ni; tichuan kan za hian i kut chhuak kan ni,” tia Israel inlamlêtte thusawi chu min hriatchhuahtîr a ni.—Isaia 64:8.

3 Chutiang bawkin, tûn laia Jehova betu dik takte chuan inngaitlâwm tûr leh a thuâwih tûrin theih tâwp an chhuah a. Pa anga Jehova an ko thei chu chawimawina niin an ngai a, an tân Bêlvawtu ni tûrin an duh bawk a ni. Pathianin bêl hlu tak ni tûra a siam theih bellei nêm tak ang nih kan inhuam em? Kan unau zawng zawngte chu Pathianin a la siam ṭhat mêk angin kan hmu em? Rilru put hmang dik nei tûra min ṭanpui tûrin Jehova’n a siam ṭhat tûrte a thlan dân, a siam ṭhat chhan, leh a siam ṭhat dânte kan sawiho vang.

JEHOVA’N A SIAM ṬHAT TURTE A THLANG

4. Engtin nge Jehova chuan a lama a hîp tûrte chu a thlan? Entîrna pe rawh.

4 Jehova chuan mite chu kan en dân angin a en lo. An thinlung a fiahin, kan nih dân dik tak a hre zâwk a ni. (1 Samuela 16:7b chhiar rawh.) Chu chu Kristian kohhran a din lai khân a târ lang a. Ṭhenkhatin hlutna nei lo nia an ngaih mi tam tak chu amah leh a Fapa lamah a hîp a ni. (Johana 6:44) Entîrna pakhat chu, “sawichhetu leh tiduhdahtu leh sawisatu,” Pharisai Saula kha a ni. (1 Timothea 1:13) Mahse, Jehova’n Saula thinlung a fiah chuan, hman tlâk loh bellei angin a ngai lo va. (Thufingte 17:3) Ani chu “Jentaite, lalte, Israela thlahte hnêna” thu hril tûra siam ṭhat theih “bêl ruat” angin a hmu zâwk a ni. (Tirhkohte 9:15) Jehova chuan tûn hmaa zu ruih hmangte, nungchang bawlhhlawh te, leh rûk hmangte pawh tiamin, ‘bêl hlu taka’ siam ṭhat theih mi dangte pawh a thlang bawk. (Rom 9:21; 1 Korinth 6:9-11) Anni chuan Pathian Lehkha Thute an zir chuan, Jehova an rinna a lo nghet a, a siam ṭhatin an awm ta a ni.

Kan thu hrilhna biala mite emaw, kan kohhrana mite emaw chungthu chu kan rêl tûr a ni lo

5, 6. Bêlvawtu Jehova kan rinna chuan engtin nge (a) thu hrilhna biala mite chunga kan rilru put hmang chu a nghawng ang? (b) kan unaute chunga kan rilru put hmang chu a nghawng ang?

5 Jehova chuan mi dik takte chu thlangin, a hîp thei tih kan ring a. Chuvângin, kan thu hrilhna biala mite emaw, kan kohhrana mite emaw chungthu chu kan rêl tûr a ni lo. Entîr nân, Jehova Thuhretute’n an tlawh laia Michael-a chhân lêt dân kha han ngaihtuah teh. Heti hian a sawi a ni: “Hawisanin, awm lo ang maiin ka ngaihthah hmak a. Ka hawihhâwm lo hle! A hnuah, an nungchang ṭhatna avânga ka ngaihsân êm êm chhûngkaw khat ka tâwk a. Ni khat chu, ka thil hriat chuan min ṭhawng hle—anni chu Jehova Thuhretute an lo ni reng mai! An nungchang chuan Thuhretute ka huat chhan fiah tûrin min chêttîr a. Ka rilru put hmang chu thu dikah a innghat lo va, khual thuthang leh thudik ka hriat loh vâng a ni tih ka hre chhuak ta thuai a ni,” tiin. Michael-a chuan hriat tam  lehzual a duh vângin, Bible a zir ta a. A hnuah baptisma changin, hunbi kimin rawng a bâwl ta a ni.

6 Jehova chu Bêlvawtu anga kan pawm hian unaute chunga kan rilru put hmang pawh a inthlâk bawk ang. Anni chu siam ṭhat mêk angin kan hmu ṭheuh vang. Chu chu Jehova’n anmahni a hmuh dân a ni. Ani chuan chhûng lama an nihna dik tak chu a hmuin, an famkim lohna chu rei lo te tân chauh a ni tih a hria a. Eng ang mi nge an nih theih tih a hre bawk a ni. (Sâm 130:3) Kan unaute chunga chutiang rilru put hmang ṭha kan neih chuan Jehova kan entawn thei a. Kan unaute chu hmasâwn tûra ṭanpuiin, Bêlvawtu kan thawhpui thei bawk. (1 Thessalonika 5:14, 15) He mi kawngah hian kohhran upate’n entawn tûr ṭha an siam tûr a ni.—Ephesi 4:8, 11-13.

ENGVANGIN NGE JEHOVA’N MIN SIAM ṬHAT?

7. Engvângin nge Jehova thununna chu i ngaihhlut?

7 Mi ṭhenkhat chuan: ‘Fa ka neih thlengin ka nu leh pate min thununna chu ka ngaihlu tak tak lo,’ tiin an sawi mai thei a. Kan lo upat chhoh zêl hian, thununna chu hmangaihna lantîrna a ni tih kan hriat avângin kan ngaihlu a ni. (Hebrai 12:5, 6, 11 chhiar rawh.) Ni e, Jehova chuan a fate anga min hmangaih avângin, dawhthei taka min thununin, min siam ṭha a. Fing tak leh hlim taka awm tûrin min duh a, Pa anga amah hmangaih tûrin min duh bawk a ni. (Thufingte 23:15) Hrehawm kan tawrh a duh lo va, mi sual inlamlêt duh lote anga kan thih pawh a duh bawk hek lo.—Ephesi 2:2, 3.

Jehova chuan a fate anga min hmangaih avângin, dawhthei taka min thununin, min siam ṭha

8, 9. Tûn laiah, engtin nge Jehova’n min zirtîr a, chu zirtîrna chu engtin nge neih chhunzawm a nih ang?

8 Jehova kan hriat hmain, mize ṭha lo tam tak kan nei mai thei a. Mahse, Jehova chuan min siam ṭhain, inthlâk danglam tûrin min ṭanpui a, chuvângin mize duhawm tak takte kan nei tawh a ni. (Isaia 11:6-8; Kolossa 3:9, 10) Thlarau lam paradis-ah kan awm a. Chu chu tûn laia Jehova thil siam, keimahni min siam ṭhatu dinhmun ṭha bîk tak a ni a. Chutah chuan min hual vêltu khawvêl hi chhe hle mah se, kan râl muangin kan him a ni. Chhûngkaw hmangaihna dawng lova seiliante chuan, tûnah chuan unaute hnên aṭangin thlarau lam paradis-ah hmangaihna dik tak an dawng tawh a ni. (Johana 13:35) Chu bâkah, mi dangte chunga hmangaihna kan lantîr dân kan hre tawh a. Mahse, a pawimawh ber chu Jehova kan hriain, pa anga a hmangaihna kan dawng hi a ni.—Jakoba 4:8.

9 Khawvêl tharah chuan thlarau lam paradis chu a kimin kan hlâwkpui ang. Pathian Ram rorêlna hnuaia lei paradis pawh kan chên bawk ang. Chutih hunah chuan, tûna kan ngaihtuah phâk bâkin Jehova chuan min siam ṭhain, min zirtîr zawm zêl ang. (Isaia 11:9) Ani chuan kan rilru leh  taksa chu ṭha famkimin a siam bawk ang a. Chu chuan a kaihhruainate hriatthiam leh zawm pumhlûm chu kan tân a tiawlsam lehzual ang. Chuvângin, Jehova chu insiam ṭhattîr zêl ila, he min hmangaihzia a lantîrna hi kan ngaihlu tih i lantîr ang u.—Thufingte 3:11, 12.

JEHOVA MIN SIAM ṬHAT DAN

10. Engtin nge Isua chuan Bêlvawtu Ropui neih dawhtheihna leh thiamna chu a târ lan?

10 Bêlvawtu thiam takin a khawih lai bellei a hriat angin, Jehova chuan min hre chiang hle a. Kan chak lohna te, kan tlin tâwk te, leh kan hma sâwn chinte chu a hria a, chûng dinhmunte chu rilrua hre rengin min siam ṭha ṭheuh a ni. (Sâm 103:10-14 chhiar rawh.) Isua’n a tirhkohte ṭhat famkim lohna a chhân lêt dân aṭangin Jehova min thlîr dân chu kan hre thei a. A châng chuan, tirhkohte chu an zîngah tu nge ropui ber tih chungchângah an inhnial a. An zîngah chuan awm ta la, engtin nge tirhkohte chêt dân chu i ngaih ang? Anni chu bellei nêm tak ang ni lovah i ngai mai thei. Mahse, Isua chuan ngilnei tak leh dawhthei taka a thununna an ngaihthlâk a, a inngaihtlâwmna an entawn chuan siam ṭhat theih an ni tih a hria a ni. (Marka 9:33-37; 10:37, 41-45; Luka 22:24-27) Isua thawhleh hnu chuan tirhkohte’n Pathian thlarau thianghlim an dawng a, an zînga ropui ber chungchângah an buai tawh lo. Isua pêk thu hrilh rawngbâwlna chu an buaipui tawh zâwk a ni.—Tirhkohte 5:42.

11. Eng kawngin nge Davida chuan bellei nêm tak ang a ni tih a târ lan a, engtin nge ani chu kan entawn theih?

11 Tûn laiah, Jehova chuan Bible, a thlarau thianghlim, leh a kohhran hmangin min siam ṭha a. Engtin nge Bible-in min siam ṭhat theih? Bible chhiar te, kan thu chhiar chhût ngun te, leh kan thu hriatte nunpui thei tûra Jehova ṭanpuina dîlte a ngai a ni. Lal Davida chuan: “Ka khumlaizâwla ka hriat reng chia, zâna i chungchâng thu ka suangtuah lai chuan,” tiin a ziak a. (Sâm 63:6) “LALPA, rem mi ruatsaktu chu, ka fak ang a: a ni, zânahte hian ka rilruin mi thunun ṭhîn,” tiin a ziak bawk. (Sâm 16:7) Ni e, Davida chuan Jehova thununna chu a chhût ngun a, pawm harsa a tih hunah pawh, a ngaihtuahna chhûngril leh rilru veizâwngte a siam ṭhattîr a ni. (2 Samuela 12:1-13) Ani chuan inngaihtlâwmna leh thuâwihna kawngah kan tân entawn tûr ṭha tak a siam a. Chuvângin, heti hian inzâwt rawh: ‘Bible ka chhiar hian, ka chhût ngunin, Pathian thununna chu ka ngaihtuahna leh rilru veizâwng chhûngril berte ka khawihtîr em? Tûn aia nasa lehzualin ka ti thei ang em?’ tiin.—Sâm 1:2, 3.

12, 13. Engtin nge Jehova’n thlarau thianghlim leh Kristian kohhran hmanga min siam ṭhat?

12 Thlarau thianghlim chuan kawng chi hrang hrangin min siam ṭha thei a. Entîr nân, Isua miziate entawn tûrin min ṭanpui thei a, thlarau rah hmêlhmang chi hrang hrangte târ lang tûrin min ṭanpui thei bawk. (Galatia 5:22, 23) Chûng zînga pakhat chu hmangaihna a ni. Pathian kan hmangaihin, a thuâwih kan duh a, a thu pêkte chu kan ṭhatna tûr a ni tih kan hriat avângin a siam ṭhat nih chu kan duh a ni. Chu bâkah, thlarau thianghlim chuan he khawvêl suaksual anga awm lo tûrin chakna  min pe thei bawk. (Ephesi 2:2) Tirhkoh Paula chu a naupan lai chuan Juda sakhaw hruaitu chapo takte thununin a awm a. Mahse, thlarau thianghlim chuan inthlâk danglam tûrin a ṭanpui a ni. A hnuah: “Mi tichaktuah chuan engkim ka ti thei a ni,” tiin a ziak a. (Philippi 4:13) Jehova chuan tih tak zeta kan ṭawngṭaina chu a chhâng dâwn tih hriain, a thlarau thianghlim kan dîl ve tûr a ni.—Sâm 10:17-18.

Jehova chuan min siam ṭhat nân Kristian upate a hmang a; mahse, an thununna nunpuitu tûr chu keimahni kan ni (Paragraph 12, 13-na en rawh)

13 Jehova chuan min siam ṭhat nân kohhran leh upate a hmang bawk. Entîr nân, upate chuan chak lohna kan nei tih an hriat hian min ṭanpui an tum a. Mahse, anni chuan an ngaih dân ṭanchhanin thurâwn min pe lo. (Galatia 6:1) Chu ai chuan, hriatthiamna leh finna dîlin Jehova hnênah inngaitlâwm takin an ṭawngṭai zâwk a ni. Tichuan, min ṭanpui thei tûr thute zawngin Bible leh kan Kristian thu leh hla chhuahte hmangin zir bingna an nei a. Upate chuan i inchei dân chungchângah ngilnei tak leh hmangaih taka an thunun che a nih chuan, Pathian hmangaihna târ lanna a ni tih hre reng ang che. Thununna i nunpui chuan Jehova siam ṭhat theih bellei nêm tak ang i ni ang a, a siam ṭhatna chu i hlâwkpui ang.

14. Bellei chungah thu a nei chung pawhin, engtin nge Jehova chuan zalên taka duhthlan theihna kan neih chu min zahsak?

14 Jehova min siam ṭhat dân kan hriatthiamna chuan kan unaute nêna inlaichînna ṭha nei tûrin min ṭanpui thei a. Chu bâkah, kan Bible zirpuite pawh tiamin, kan thu hrilhna biala mite chungah rilru put hmang ṭha kan nei bawk ang. Bible hun lai chuan bêlvawtuin bêl a siam hmain, bellei chu a tifai a, lungtê leh thil dangte a paih chhuak phawt ṭhîn. Bêlvawtu Ropui, Jehova pawhin a siam ṭhatna pawm duhtute chu a ṭanpui ṭhîn a. Mite chu inthlâk tûrin  a tilui lo va, a thianghlimna tehnate chu a hriattîr zâwk a ni. Chutah, anni chuan a ṭûl anga an inthlâk dâwn leh dâwn loh chungchângah thu tlûkna an siam tûr a ni.

15, 16. Engtin nge Bible zirpuite chuan Jehova siam ṭhat an duhzia an târ lan? Entîrna pe rawh.

15 Australia rama unaunu Tessie-i chunga thilthleng hi han ngaihtuah teh. A tân chuan Bible thute zir chu thil awlsam tak a ni a. Mahse, hma a sâwn hlei thei lo va, a inkhâwm thei hek lo. Amah zirpuitu unaunu chuan Jehova hnênah ṭawngṭaiin, zirpui tawh loh a tum ta a. Chutah, thil mak tak a thleng ta. Zirna an neih lai chuan Tessie-i chuan amah zirpuitu hnênah hmasâwnna a neih loh chhan a hrilh a. Pawisa khelh hrât tak a nih avângin, vervêk tak nia inhriatna a neih thu leh tûnah chuan, pawisa khelh bânsan a tum tawh thu a hrilh a ni.

16 Rei lo têah, Tessie-i chu a inkhâwm ṭan a, tûn hmaa a ṭhian ṭhenkhatte’n an nuih zat chung pawhin Kristian miziate a lantîr a ni. A hnuah baptisma a chang a, fanau enkawl chungin regular pioneer a thawk a ni. Bible zirpuite’n Pathian tihlâwm nâna an inthlâk danglamna an neih hian, Pathianin anni chu a hnaihin, bêl hlu takah a siam ang tih a chiang hle.

17. (a) Bêlvawtu Jehova nihna chungchângah eng nge i duh ber? (b) A dawta thuziakah siam ṭhatna chungchâng eng thil dang nge kan ngaihtuah ang?

17 Tûn laiah, bêlvawtu ṭhenkhat chuan bellei chu bêl mawi taka siam nân kut an la hmang a. Chutiang bawkin, Jehova chuan a thununna hmangin dawhthei takin min siam ṭha a, kan chhân lêt dân chu a thlîr reng a ni. (Sâm 32:8 chhiar rawh.) Jehova’n a ngaihven che tih i hria em? Uluk taka a siam ṭhat dân che chu i hria em? I hriat chuan, eng miziate hian nge Jehova siam ṭhat theih bellei nêm tak ang ni tûra ṭanpui ang che? Siam ṭhat theih loh bellei sak tak ang ni lo tûrin eng miziate nge i pumpelh ang? Engtin nge nu leh pate chuan an fate siam ṭhatnaah Jehova an thawhpui theih? Hêng zawhnate hi a dawta thuziakah chhân a ni ang. (ws16.06-E)