A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Mite Inan lohna Chu Hmu Thiam Rawh

Mite Inan lohna Chu Hmu Thiam Rawh

“Mi fel leh mi suaksual, . . . in thliar thei tawh ang.”—MALAKIA 3:18.

HLA: 29, 53

1, 2. Engvângin nge tûn laia Pathian chhiahhlawhte tân nun chu a harsat theih? (A thupui chunga milem en rawh.)

DOCTOR leh nurse tam tak chu inkaichhâwn theih natna neite kârah hna an thawk a. Dam lote chu an ṭanpui duh vângin an ngaihsak hle a ni. Mahse, tihdam an tum natna chu an kai loh nân an inven ṭhat a ngai a. Jehova chhiahhlawhte kan nih angin, keini pawh chutiang dinhmun angah chuan kan awm a ni. Kan zînga a tam zâwk chu Pathian mizia nêna inkalh tak rilru put hmang leh mizia lantîrtute zîngah awmin hna an thawk a. Hei hi kan tân thil harsa tak a ni thei.

2 He hun hnuhnûngah hian, Pathian hmangaih lotute chuan thil dik leh dik lo chungchânga Pathian tehnate chu an ngaihthah a. Tirkhkoh Paula’n Timothea hnêna a lehkha thawnah chûng an mize ṭha lote chu a sawi lang a ni. Paula chuan khawvêl tâwp kan hnaih telh telh rualin chûng mize ṭha lote chu a hluar telh telh ang tih a sawi bawk. (2 Timothea 3:1-5, 13 chhiar rawh.) Chûng mize ṭha lote hlauhawm dân hre reng chung pawhin, kan chheh vêla mite ngaihtuah dân, ṭawng dân, leh chêt dânte chuan min la thunun thei reng a ni.  (Thufingte 13:20) He thuziakah hian chûng miziate chu Pathian mite lantîr mizia laka a danglam dân kan hmu ang. Jehova hre tûra mite kan ṭanpui laiin chûng mize ṭha lote thununa awm lo tûra kan invên theih dân pawh kan hmu bawk ang.

3. 2 Timothea 3:2-5-ah eng ang mite nge târ lan an nih?

3 Paula’n nî hnuhnûngahte chuan “hun khirh takte a lo awm ang” tiin a ziak a. Tichuan, tûn laia hluar êm êm mize ṭha lo tak tak chi 19 a târ lang a ni. Chûng miziate chu Rom 1:29-31-a Paula târ lan miziate nên a inang a; mahse, Timothea hnêna a lehkha thawna a târ lan miziaahte chuan Kristian Grik Pathian Lehkha Thu-a kan hmuh ngai loh ṭawngkamte a hmang a ni. Paula chuan “mi” tih thu malin a ṭan a. Heta, “mi” tih hi “mite” a sawina a nih avângin a hmei a pa tute pawhin mize ṭha lo an nei thei a ni. Mahse, mi zawng zawngin Paula târ lan mize ṭha lote chu an nei vek kher lo. Kristiante chuan mize danglam tak an nei a ni.— Malakia 3:18 chhiar rawh.

MAHNI KAN INTHLIR DAN

4. Inngaihlu tih awmzia chu eng nge ni?

4 Paula’n mi tam tak chu mahni inhmangaihtute leh tangka sum ngainatute an ni ang tih a sawi hnuah intivei te, chapo te, leh inngaihlute pawh an ni ang tiin a sawi bawk. Chûng mizia neite chuan an lan dân te, an thiltih theih te, an thil neih te, a nih loh leh an dinhmunte avângin mi dangte aia ṭha zâwkah an inngai fo ṭhîn a ni. Chûngtiang mi chuan thil dang zawng aiin mite ngaihsân hlawh a duh ṭhîn. Mi thiam pakhatin chutiang mi chungchângah heti hian a ziak a: “A thinlungah chuan mahni hma ngeia kûna chibai a inbûkna maicham tê pakhat a awm a ni,” tiin a ziak. Ṭhenkhat chuan inngaihhlutna hi a duhawm loh êm avângin, mi inngaihlute pawhin inngaihhlutna nei mi dangte chu an duh lo niin an sawi.

5. Engtin nge Jehova chhiahhlawh rinawmte meuh pawh an lo chapo theih?

5 Jehova chuan Bible-in “mit chapo” tia a sawi chapona chu a hua a. (Thufingte 6:16, 17) Dik tak chuan, chaponain mi chu Pathian a hlattîr a ni. (Sâm 10:4) Chapona chu Diabola mizia a ni a. (1 Timothea 3:6) Thu dik lungchhiatthlâk tak chu Jehova chhiahhlawh rinawm ṭhenkhatte meuh pawh an lo chapo palh hi a ni. Entîr nân, Juda Lal Uzia chu kum tam tak chûng a rinawm a. Mahse, Bible chuan: “A lo chak tâk hnu chuan a rilru a lo sâng ta a, ṭha lo takin thil a ti a, LALPA a Pathian chungah thil a tisual ta a,” tiin a sawi. Uzia chu biak inah lûtin a tih loh tûr rimtui hâl chu a ti ta a. A hnuah, Lal rinawm Hezekia pawh hun rei lotê chhûng chu a lo chapo ve bawk.—2 Chronicles 26:16; 32:25, 26.

6. Engin nge Davida chu chapotîr thei? Mahse, engvângin nge a inngaihtlâwm reng?

6 Mi ṭhenkhat chu an hmêl ṭhatna te, hmingthanna te, rimawi tum an thiamnate, an chaknate, leh ngaihsân an hlawhnate avângin an chapo ṭhîn a. Davida chuan chûng nihna zawng zawng chu nei mah se, a dam chhûngin a inngaitlâwm a ni. Entîr nân, Davida’n Goliatha a thah hnu chuan Lal Saula’n a fanu nupuia a neih theih thu a hrilh a. Mahse, Davida chuan: “Tunge maw ka nih a, ka nunna leh Israel-te zînga ka pa chhûngte pawh engnge maw an nih a, lal mâkpa ka han nihna tûr chu?” tiin a sawi a ni. (1 Samuela 18:18) Davida chu inngaitlâwm  reng tûrin engin nge ṭanpui? A mize neih te, a theihna te, leh chanvo hlu a neihte chu Pathian inngaihtlâwm vâng leh amah a ngaihsak vânga nei a ni tih a hria a. (Sâm 113:5-8) Davida’n a neih thil ṭha zawng zawngte chu Jehova hnên aṭanga a dawn a ni tih a hria a ni.—1 Korinth 4:7 khaikhin rawh.

Mite chu Pathian chhiahhlawhte inngaihtlâwmna avângin A lama hîpin an awm thei

7. Inngaihtlâwmna lantîr tûrin engin nge min ṭanpui ang?

7 Tûn laia Jehova mite chuan Davida ang bawkin inngaihtlâwmna neih an tum a. Chungnungber Jehova meuh pawh a inngaitlâwm a ni tih hriat chu a thlamuanthlâk hle. (Sâm 18:35) Hêng thute nunpui chu kan duh a ni: “Lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u,” tih hi. (Kolossa 3:12) Hmangaihna chu “a infak lo va, a uang lo va,” tih pawh kan hria. (1 Korinth 13:4) Mite’n kan inngaitlâwm tih an hriat chuan Jehova hriat duhna an nei ve mai thei a ni. Ring lotu pasal chu a Kristian nupui nungchang ṭha avânga Jehova lama hîpa a awm thei ang bawkin, mite chu Pathian chhiahhlawhte inngaihtlâwmna avângin A lama hîpin an awm thei a ni.—1 Petera 3:1.

MI DANG KAN CHEIBAWL DAN

8. (a) Tûn laiah, mi ṭhenkhatin nu leh pa thuâwih loh chu engtin nge an ngaih? (b) Bible-in naupangte chu eng ti tûrin nge a hrilh?

8 Paula chuan nî hnuhnûnga mite incheibâwl tawn dân tûr chu a târ lang a. Naupangte chu nu leh pa thuâwih lo te an ni ang tiin a ziak a ni. Tûn laiah, lehkhabu te, film te, leh television program-ahte chuan nu leh pate thuâwih loh chu thil pângngai leh pawm theih angin târ lang a ni a. Mahse, thuâwih lohnain pâwl azawnga pâwl tê ber anga ngaih chhûngkua a tiderthâwng tih chu thudik a ni. Mihringte’n he thudik an hriatna chu a rei tawh a. Entîr nân, hmân lai Grik hun lai chuan, a nu leh pa kutthlâktu chu khawtlângah a dikna a châng ang. Rom dân hnuaiah chuan a pa vawtu chu tual thattu hremna anga hrem a ni ang. Hebrai leh Grik Pathian Lehkha Thu-ah chuan naupangte chu an nu leh pate chawmawi tûra tih an ni.—Exodus 20:12; Ephesi 6:1-3.

9. Engin nge naupangte chu an nu leh pate thuâwih tûra ṭanpui ang?

9 An chhehvêla mite chu thuâwih lote ni mah se, naupangte chu an nu leh pate thuâwih tûrin engin nge ṭanpui thei? Naupangte chuan an tâna an nu leh pate tihsak zawng zawng an ngaihtuah chuan lâwmnaa khatin an thuâwih an duh ngei ang. Kan Pa, Pathian chuan nu leh pate thuâwih tûrin min beisei tih ṭhalaite pawhin an hre bawk tûr a ni. Ṭhalaite chuan an nu leh pate chungchâng a ṭha lam thu an ṭhiante hnêna an sawi a nih chuan, anni pawh an nu leh pate zah ve tûrin an ṭanpui tihna a ni. Nu leh pate chu hmangaihna pianpui nei lo te an nih chuan, an fate tân nu leh pate thuâwih chu a harsa lehzual ngei ang. Mahse, ṭhalai naupang pakhatin a nu leh pate’n an hmangaih tak zet tih a hriatna chuan an thuâwih  a harsat hunah pawh thuâwih tûrin a ṭanpui thei a ni. Ṭhalai unaupa Austin-a chuan: “Mahni chauhva awm duhna ka nei ṭhîn nachûngin, ka nu leh pate chuan kaihhruaina inâwm tâwk tak an siam a, dân an siam chhânte min hrilh bâkah inbiakpawhna nei reng tûrin an ti a. Chu chuan thuâwih tûrin min ṭanpui a. Min ngaihsak tih ka hriatna chuan an thu âwih duhna min neihtîr a ni,” tiin a sawi.

10, 11. (a) Mite chuan inhmangaih tawnna an nei lo tih eng mizia ṭha lote’n nge târ lang? (b) Kristian dikte chuan engtiang khawpin nge mi dangte chu an hmangaih?

10 Paula chuan mite’n inhmangaih tawnna an neih lohzia târ langtu mize dangte a sawi a. “Nu leh pa thuâwih lo te,” chungchâng a sawi hnuah lâwm nachâng hre lo te chungchâng pawh a sawi a ni. Hei hi thil inâwm tak a ni a, a chhan chu lâwm nachâng hre lote chuan an chunga mite thil ṭha tih chu an hlut lo vâng a ni. Paula chuan mite chu thianghlim lo te an ni ang tih pawh a sawi bawk. Anni chu huaikawmbâwl te an ni a, mi dangte nên inrem an duh lo tihna a ni. Chûng mite chu Pathian sawichhetute leh vervêkte an ni a, mite leh Pathian chungchâng chu chaltlai tak leh a chhe zâwngin an sawi ṭhîn a ni. Chu bâkah anni chu hêktu te an niin, mite hming chhiatna tûrin dâwt hlauhawm tak takte an sawi ṭhîn a ni. *—Footnote en rawh.

11 Jehova chhiahlhlawte chu mi dangte chunga hmangaihna dik tak an lantîr avângin khawvêl mite lakah an danglam hle a. He hi englai pawhin a dik a ni. Dik tak chuan, Mosia Dâna mi dang hmangaih tûr tih thupêk aia pawimawh zâwk thupêk awm chhun chu Pathian hmangaih tûr tih thupêk hi a ni tiin Isua’n a sawi. (Matthaia 22:38, 39) Kristian dikte chu an inhmangaih tawnna avângin mite hriat an ni ang tih a sawi bawk. (Johana 13:34, 35 chhiar rawh.) Kristian dikte chuan an hmêlmate pawh an hmangaih tûr a ni.—Matthaia 5:43, 44.

12. Engtin nge Isua’n mi dangte chungah hmangaihna a lantîr?

12 Isua chuan mite a hmangaih tak zet tih a lantîr a. Pathian Ram chanchin ṭha mite hrilh tûra khaw tinah zin kualin a lantîr a ni. Mitdel te, kebai te, phâr te, leh bengngawngte a tidam a. Mitthite pawh a kai tho a ni. (Luka 7:22) Mi tam tak huat hlawh mah se, mite chhandam nân a nun hial pawh a pe a. Isua chuan a Pa hmangaihna chu ṭha famkimin a entawn a. Khawvêl pum puiah, Jehova Thuhretute chuan Isua entawnin mi dangte chungah hmangaihna an lantîr a ni.

13. Mite chunga hmangaihna kan lantîrna chuan anni chu engtin nge Jehova chungchâng hriat duhna nei tûra a ṭanpui theih?

13 Mite chunga hmangaihna kan lantîrna chuan kan Pa vâna mi chanchin hriat duhna a neihtîr thei a. Entîr nân, Thailand rama pa pakhat chu regional inkhâwmpuiah a kal a, unaute inhmangaih tawn dân a hmuh chuan a rilru a khawih hle a ni. Ina a haw hnuah, Jehova Thuhretute hnênah chawlhkâr khata vawi hnih Bible zirpui tûrin a dîl a. A hnuah a thu hriatte chu a chhûngkhat laina zawng zawngte a hrilh a. A hnu thla ruk chhûng lekin, ani chuan Kingdom Hall-ah a vawi khatna atân Bible chhiarna chanvo a nei a ni. Mi dangte chungah hmangaihna kan lantîr em? Heti hian kan inzâwt thei a: ‘Chhûngkuaah, kohhranah, leh rawngbâwlnaah ka theih tâwpin mite ka ṭanpui em?  Jehova’n mite a thlîr angin thlîr ka tum ve em?’ tiin.

CHINGHNIA LEH BERAM

14, 15. Eng mize ṭha lote nge mi tam takin an lantîr? Engtin nge mi ṭhenkhatte chuan an miziate chu an thlâkthleng?

14 Nî hnuhnûngahte chuan mite’n kan pumpelh tûr mize ṭha lo dangte pawh an lantîr bawk a. Entîr nân, mi tam tak chu ṭha duh hauh lo te an ni a. Thil ṭha chu an huain an dodâl pawh a ni thei. Chutiang mite chu mi insûm thei lo te, mi kawlhsen te an ni. Ṭhenkhat chu thuhnudâwn lo te an ni a. Ngaihtuah lêk lovin thil an ti a, an thiltihin mite a nghawng dân tûr pawh an pawisa lo a ni.

15 Ramsa kawlh anga mize nei ṭhîn mi tam tak chuan an miziate chu an thlâk tawh a. Chu inthlâk danglamna mak tak chu Bible hrilh lâwknaah a sawi lâwk a ni. (Isaia 11:6, 7 chhiar rawh.) Chutah chuan chinghniate leh sakeibaknei ang ramsa kawlh takte chu berâm no leh kêl no ang chi ransate nên an inrem tûr thu a sawi a. Engvângin nge remna an neih ang? Hrilh lâwkna chuan: “Leilung hi LALPA hriatnain a khat zo vek dâwn a ni,” tiin a sawi a. (Isaia 11:9) Ramsate chuan Jehova chungchâng an zir theih loh avângin he hrilh lâwkna hian mize thlâkthlengtute chungchâng chu entîr nei ṭawngkamin a sawi a ni.

Bible thu bulte chuan nun a thlâk danglam thei! (Paragraph 16-na en rawh)

16. Engtin nge Bible chuan mite chu an miziate thlâkthleng tûra a ṭanpui?

Inthlâkthleng chu thil awlsam a ni lo; mahse, Pathian thlarau chuan a duhzâwng tihduhtute chu a ṭanpui ang

16 Kan unau tam tak chu tûn hmain chinghnia anga kawlhte an ni a, tûnah erawh chuan remna ngainatute an ni tawh a ni.  An thiltawn ṭhenkhat chu jw.org-a “Bible-in Nun A Thlâk Danglam,” tihah i chhiar thei a. Jehova hriaa a rawngbâwltu rawn ni tate chu Pathian ngaihsak anna nei a, nimahsela a thiltihtheihna âwih lo mite ang an ni lo. Mite chuan Pathian bia angin an inchhâl a; mahse, an nungchangin an biak lohzia an lantîr a ni. Jehova mite zînga mi tam tak chu tûn hmaa nunrâwng tak ni mah se, tûnah chuan ‘mihring thar, thutak felna leh thianghlimnaa Pathian anga siamin an inthuam” tawh a ni. (Ephesi 4:23, 24) Mite’n Pathian chungchâng an rawn hriat hian, a tehnate an zui a ngai tih an hria a. Chu chuan an thurin te, an ngaihtuah dân te, leh an thiltihte thlâkthleng tûrin a ṭanpui a ni. Chutianga inthlâkthleng chu thil awlsam a ni lo; mahse, Pathian thlarau chuan a duhzâwng tihduhtute chu a ṭanpui ang.

“CHUNG ANG CHU HAWISAN RAWH”

17. Mize ṭha lo neitute thununna chu engtin nge kan pumpelh theih?

17 Pathian rawngbâwltute leh bâwl lotute inan lohna chu hmuh a awlsam tawlh tawlh a. Pathian rawngbâwl lotute neih mize ṭha lote chuan min thunun loh nân kan fîmkhur tûr a ni. 2 Timothea 3:2-5-a târ lan mite chu hawisan tûra Jehova kaihhruaina zawm chu kan duh a. Mize ṭha lo neitu zawng zawngte chu kan pumpelh vek thei lo ngei mai. Chûng mite chu kan hna thawhpui te, kan school kalpui te, leh kan chênpuite pawh an ni mai thei a. Mahse, an ngaihtuah dân leh an thiltih dân angin kan ti tûr a ni lo. Engin nge min ṭanpui thei? Bible zirna leh Pathian hmangaihtute ṭhian ṭhaa siamin Jehova nêna kan inlaichînna chu kan tinghet thei a ni.

18. Engtin nge kan thusawi leh thiltihin mi dangte chu Jehova hriat duhna a neihtîr theih?

18 Mi dangte chu Jehova hre tûrin kan ṭanpui duh bawk a. Thu hrilhna hun remchâng zawng la, a hun taka thu dik tak sawi thei tûrin Jehova hnênah ṭanpuina dîl ang che. Jehova Thuhretute kan ni tih mi dangte kan hriattîr tûr a ni. Tichuan, kan nungchâng ṭhain keimahni ni lovin, Pathian a chawimawi ang. Jehova chuan: “Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian ngaihsakin kan awm tûr a ni,” tiin min zirtîr a ni. (Tita 2:11-14) Jehova kan entawn a, ti tûra min duhte kan tih chuan, chu chu mi dangte pawhin an hmu ang. Mi ṭhenkhat chuan: ‘In hnênah Pathian a awm tih kan hriat avângin in hnênah kan kal ve dâwn e,” tiin an sawi hial a ni.—Zakaria 8:23.

^ par. 10 “Hêktu te,” tih Grik thumal chu di·aʹbo·los a ni a. Bible-ah, he thu mal hi dik lo taka Pathian sawichhetu Setana hming atâna hman a ni.