A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Engvângin Nge Engkim Neitu Hnênah Kan Pêk?

Engvângin Nge Engkim Neitu Hnênah Kan Pêk?

“Kan Pathian, lâwm thu kan hrilh chia, i hming ropui hi kan fak e.”—1 CHRONICLES 29:13.

HLA: 1, 48

1, 2. Engtin nge Jehova chu kan chunga a thilphal?

JEHOVA chu Pathian thilphal tak a ni a. Kan thil neih zawng zawng hi a hnêna aṭanga kan dawn a ni. Leia thil hlu zawng zawngte hi ata a ni a, chûngte chu nun chhawmdâwl nân a hmang a. (Sâm 104:13-15; Haggaia 2:8) Jehova chuan kawng mak taka a mite ṭanpui nân chûng thil hlute a hman dân chu Bible aṭangin kan hria a ni.

2 Entîr nân, Jehova chuan Israel mite thlalêra kum 40 an awm lai khân manna leh tuiin a châwm a. (Exodus 16:35) Chuvângin, an mamawh engkim an nei a. (Nehemia 9:20, 21) A hnuah, Jehova’n hmeithai rinawm neih chhun sahriak tlêmtê chu tihpunsak tûrin zâwlnei Elisa chu thiltihtheihna a pe a. He Pathian thilpêk avângin leibate a rûl thei a, a fate nêna an nun zawm zêl theih nâna an mamawh tâwk sum a nei bawk. (2 Lalte 4:1-7) Jehova ṭanpuinain, Isua chuan chhang te, a ṭûl huna hman tûr chêngte chu mak takin a pe a ni.—Matthaia 15:35-38; 17:27.

3. He thuziakah hian eng nge kan sawiho vang?

 3 Jehova chuan a thil siamte chhawmdâwl tûrin engpawh a hmang thei a. Chutichung pawhin, a inawpna pâwl hnathawh ṭanpui nân an pêk theih apiang pe tûrin a chhiahhlawhte chu a sâwm a ni. (Exodus 36:3-7; Thufingte 3:9 chhiar rawh.) Engvângin nge Jehova chuan kan neih thil hlute chu a hnêna pe lêt leh tûra min beisei? Jehova hna chu Bible hun laia a chhiahhlawhte’n engtin nge an ṭanpui? Tûn laia thawh sum leh paite chu inawpna pâwlin engtin nge a hman? Chûng zawhnate chu he thuziak hian a chhang ang.

ENGVANGIN NGE JEHOVA HNENA KAN PEK?

4. Jehova hnathawh kan ṭanpui hian a chungah eng nge kan lantîr?

Jehova kan hmangaih avângin thil kan pe

4 Jehova hnêna kan pêk chhan chu amah kan hmangaih vâng leh a chunga kan lâwm vâng a ni a. Jehova thil min tihsak zawng zawngte kan ngaihtuah hian kan thinlung a khawih hle a ni. Lal Davida chuan biak in sak nâna mamawhte a hrilh khân, chutiang chuan a ngai a. Davida chuan kan neih zawng zawng hi Jehova hnên aṭanga kan dawn a ni a, a ta chu kan pe lêt leh mai a ni tiin a sawi a ni.—1 Chronicles 29:11-14 chhiar rawh.

5. Mahni hmasialna nei lova thilpêk chu biakna dik pêng pawimawh tak a ni tih engtin nge Bible-in min zirtîr?

5 Jehova hnêna kan pêk chhan dang leh chu amah biakna pêng pakhat a nih vâng a ni. Inlârnaah, vâna Jehova chhiahhlawhte’n: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tia an sawi chu tirhkoh Johana’n a hria a. (Thu Puan 4:10,11) Jehova chu ropuina leh chawimawina zawng zawng hmu tlâk a nih avângin kan neih ṭha ber pêk kan duh a ni. Jehova chuan Mosia hmangin Isarelte chu kum khatah kût vawithum nei tûrin thu a pe a. Chûng kût nî an hmannaahte chuan Jehova hnêna thilpêkte a tel a ni. Mite chu “LALPA hmaah tumah kutruakin in inlan tûr a ni lo” tia hrilh an ni. (Deuteronomy 16:16) Tûn laiah pawh, kan biakna pêng pawimawh pakhat chu mahni hmasialna nei lova thilpêk hi a ni a. Chutiang kawng chuan Jehova inawpna pâwl hnathawh chu kan hlutzia leh kan thlâwpzia kan lantîr thei a ni.

6. Engvângin nge thil kan pêk chu kan tân a ṭhat? (A thupui chunga milem en rawh.)

6 A dawngtu chauh ni lovin phal taka petu nih hi kan tân a ṭha a. (Thufingte 29:21 chhiar rawh.) Nu leh pate hnên aṭanga a dawn pawisa tlêmtê zînga ṭhenkhat chu a pêk lêt leh tûr thil lei nâna hmangtu naupang pakhat chu han mitthla teh. Chu a thilpêk avângin a nu leh pate chu engtin nge an awm ang? A nih loh leh, nu leh pate nêna awm a, in luah man, leh chhûngkaw ei tûr lei nâna a nu leh pate pawisa tlêm azâwng petu pioneer ṭhalai pakhat chu han mitthla teh. A nu leh pate chuan chutianga a tih chu beisei lo mah se, a thilpêk chu an pawm a. Engvângin nge? A nu leh pate’n a tâna an tihsak  zawng zawng chunga a lâwmzia lantîrna a nih vâng a ni. Chutiang bawkin, Jehova chuan kan neih thil hlute kan pêk hi kan tân a ṭha tih a hria a ni.

TUN HMAA PATHIAN CHHIAHHLAWHTE THILPEK DAN

7, 8. Bible hun laia Jehova mite’n thawhlâwm an thawh hunah (a) thil engemaw bîk atân (b) Pathian hnathawh ṭanpuina atân, engtin nge entawn tûr an siam?

7 Jehova hnathawh ṭanpui nân a mite chuan thawhlâwmte an thawh ṭhîn tih Bible-ah kan hmu a. A châng chuan thil engemaw bîk atân an pe a ni. Entîr nân, Mosia chuan Israel mite chu biak bûk sak nân thawhlâwm thawh tûrin a fuih a. A hnuah, Lal Davida pawhin biak in sak nân chutiang bawkin a ti ve a ni. (Exodus 35:5; 1 Chronicles 29:5-9) Lal Jehoasa dam laiin, puithiamte chuan mite pêk thawhlâwm hmangin biak in an thuam ṭha a. (2 Lalte 12:4, 5) Kum zabi khatnaa Kristiante chuan Juda ramah ṭâm a tlâk avângin unaute chu ṭanpui an ngai tih an hria a. Chuvângin, Kristian tinte chuan chuta awm unaute hnênah an theih ang tâwk ṭheuhvin thawn an tum ta a ni.—Tirhkohte 11:27-30.

8 Jehova mite pawhin Pathian hna kaihruaitute ṭanpui nân sûm leh paite an thawh a. Entîr nân, Mosia Dân hnuaiah Levia mite chuan an hnampuite angin rochan an nei lo va. Chuvângin, Israel hnam dang zawngte chuan an neih zînga sâwma pakhat chu Levia mite an pe a. Chu chuan Levia mite chu an biak bûka hnathawh ngaihven tlat tûrin a ṭanpui a ni. (Numbers 18:21) Chutiang bawkin, hmeichhe thilphal takte chuan an thil neihte hmangin Isua leh a tirhkohte an ṭanpui a ni.—Luka 8:1-3.

Mi hausa leh mi rethei tupawhin thilpêk an pe thei

9. Tûn hmain, khawi aṭangin nge thawhlâwm an hmuh?

9 Chûng thawhlâwmte chu kawng chi hrang hranga thawh a ni a. Biak bûk sak nâna thawhlâwm thawh Israel mite chuan Aigupta ram aṭanga an neih thil hlute an pe pawh a ni thei. (Exodus 3:21, 22; 35:22-24) Kum zabi khatnaah, Kristian ṭhenkhat chuan an in leh lote hralhin a man chu tirhkohte hnênah an rawn thlen a. Tirhkohte chuan chu sum chu ṭanpui ngai unaute tân an hmang a ni. (Tirhkohte 4:34, 35) Kristian dangte chuan Pathian hnathawh ṭanpui nân sumte an khâwl ṭhîn. (1 Korinth 16:2) Chuvângin, mi hausa leh mi rethei tupawhin thilpêk an pe thei a ni.—Luka 21:1-4.

TUN LAIA KAN PEK DAN

10, 11. (a) Bible hun laia Jehova chhiahhlâwh thilphal takte chu engtin nge kan entawh theih? (b) Lalram hna ṭanpuina chu engtin nge i ngaih?

10 Tûn laiah pawh, thil engemaw bîk atân thawhlâwm thawh tûra phût kan ni mai thei. I awmna kohhran chuan Kingdom Hall thuam ṭhat, a nih loh leh a thar sak a tum pawh a ni thei a. Tualchhûng branch office thuam ṭhat a ngai pawh a ni thei bawk a. Inkhâwmpui sênsote pawh kan ṭanpui thei bawk. A nih loh leh, hmun danga kan unaute chuan leilung chhiatna an tâwkin ṭanpui an ngai pawh a ni thei. Kan thawhlâwmte chuan missionary-te, special pioneer-te,  bial kantute, leh world headquarter leh khawvêl puma branch office-a rawngbâwltute chu a ṭanpui bawk. In kohhran chuan khawvêl hmun hrana kan unaute tâna Assembly Hall-te leh Kingdom Hall-te sak nân thawhlâwmte in thawh ziah pawh a ni thei a ni.

11 Kan vai hian he hun hnuhnûnga Jehova inawpna pâwl hnathawh ṭanpui tûrin engemaw tal kan pe thei a. Thawhlâwm a tam zâwk chu a petu hriat a ni lo. Kingdom Hall-a thawhlâwm bâwmah emaw, jw.org online aṭangin emaw thawhlâwm kan pêk hian kan pêk zât mi dang kan hriattîr lo a ni. A nih leh, i thawhlâwm pêk chu tlêm lutuk angah ngai ta la engtin nge ni ang? Inawpna pâwlin thawhlâwm a dawn tam zâwk chu thlêm tê tê thawhna aṭanga tlingkhâwm a ni a, a hlâwma dawn chu tlêm tê a ni. Sum tlêm tê nei unaute pawhin Makedonia rama Kristian hmasate chu an entawn a. ‘Nasa takin rethei’ mah se, thil engemaw pêk theih dân an dîl a, tichuan phâl takin an pe ta a ni.—2 Korinth 8:1-4.

12. Engtin nge inawpna pâwl chuan thawhlâwmte chu a ṭha thei ang bera hman an tum?

12 Governing Body chu thawhlâwm hmanna kawngah a rinawmin a fing a. (Matthaia 24:45) Member tinte chuan thu thlûkna ṭha siam thei tûrin an ṭawngṭai a, sum hman dân tûr chungchângah fîmkhur takin ruahmanna an siam a ni. (Luka 14:28) Bible hun laiin, thawhlâwm enkawltu rinawmte chuan chûng thawhlâwmte chu Jehova biakna atân chauh hman a ni tih an tichiang a. Entîr nân, Ezra chu rangkachak te, tangkarua te, leh tûn laia U.S, Dollar maktaduai 100 aia man tam ro hlu dangte pawh tiamin, Persia lal hnên aṭanga a dawn thilpêk hlu tak takte nên Jerusalemah a kîr leh a. Chûng thawhlâwmte chu Jehova tâna thilpêk angin a thlîr a ni. Chuvângin, ani chuan zin kawng hlauhawm an kaltlang hunah chûng thawhlâwmte chu vênghim tûrin kaihhruaina ṭha tak a pe a. (Ezra 8:24-34) Kum tam tak hnuah, tirhkoh Paula chuan Juda rama ṭanpui ngai unaute ṭanpui nân sum a khawn a. Ani chuan sum pe chhuaktute chu ‘Lalpa ngaih chauhvah ni lovin mihring ngaih pawha thil mawi ngaihtuah lâwk ṭhîn,’ tûrin a chah a ni. (2 Korinth 8:18-21 chhiar rawh.) Tûn laiah, inawpna pâwl chuan Ezra leh Paulate entawnin thawhlâwmte chu fîmkhur takin a hmang a ni.

13. Engvângin nge inawpna pâwl chuan tûn hnai mai khân inthlâk danglamna ṭhenkhat a siam?

13 Chhûngkaw khat chuan an sum lâk luh aia tam an hman loh nân an sum hman dân an siamrem pawh a ni thei a. A nih loh leh, Jehova tân an thawh tam lehzual theih nân an nun tihsamkhai dân kawngte an zawng pawh a ni thei bawk. Jehova inawpna pâwl pawhin chutiang chuan a ti a ni. Tûn hnai mai khân, ruahmanna thar phûrawm tak takte neih a nih avângin sum hmuh aia tam hman chângte a awm a. Chuvângin, inawpna pâwl chuan kan sawi tâk chûngkaw khat angin, phal taka i pêk thawhlâwmte chu a ṭha thei ang bera hman a nih theih nân sum hman tlêm dân leh awlsam taka hna thawh dânte a zawng a ni.

I THAWHHLAWMTE AṬANGA HLAWKNA

I thawhlâwmte chuan khawvêl pum huap kan rawngbâwlna a ṭanpui (Paragraph 14-16-na en rawh)

14-16. (a) I thawhlâwm thawhte chu eng atâna hman nge a nih? (b) Chûng ruahmannate chuan a mi mal takin engtin nge a ṭanpui che?

14 Thutaka kum tam tak awm tawhte chuan tûn hma zawng aiin tûn laiah inawpna pâwl aṭangin thilpêk tam lehzual  an hmuh thu an sawi a. Tûn laiah jw.org leh JW Broadcasting-te kan nei a. Ṭawng tam taka tihchhuah New World Translation of the Holy Scriptures pawh kan nei bawk. Kum 2014/2015, khân, khawvêl hmun hrang hranga khawpui lian 14-a stadium lian tak takah “Pathian Ram Chu Zawng Hmasa Zêl Rawh!” tih nî thum chhûng awh International Inkhâwmpui neih a ni a. Chu inkhâwmpuia tel zawng zawngte chu an hlim hle!

15 Mi tam tak chuan Jehova inawpna pâwl aṭanga kan dawn chûng thilpêkte avânga an lâwmzia an sawi a. Entîr nân, Asia rama rawngbâwl nupa tuakkhat chuan: “Kan rawngbâwlna hmun chu khaw lian vâk lovah a ni a. Chuvângin, mal nia kan inngaih chângte a awm a, Jehova rawngbâwlnain a huam zauzia kan theihnghilh palh ṭhîn a ni. Mahse, JW Broadcasting-a program chi hrang hrangte kan en hian khawvêl pum huap unaute zîngah kan tel ve tih kan inhre chhuak ṭhîn a ni. Tualchhûnga kan unau duh takte chuan JW Broadcasting chu an duh hle a. Thla tin chhuak program-te an en hnu chuan Governing Body member-te nên inhnaih lehzual nia an inngaih thu an sawite kan hre fo va. Pathian inawpna pâwla an tel avângin tûn hma zawng aiin an inchhuang lehzual,” tiin an ziak a ni.

16 Khawvêl pumah Kingdom Hall 2,500 vêl chu sak, a nih loh leh thawm ṭhat mêk a ni a. Honduras rama kohhran pakhata unaute chuan Kingdom Hall neih chu kan lo suangtuah ve ṭhîn a, tûnah chuan a takin kan hmu ta a. Heti hian an ziak a ni: “Lei leh vâna Jehova chhûngkuaa kan tel theih avâng leh khawvêl pum huap kan inunauna avângin kan lâwm tak meuh a ni,” tiin. Unau dang tam takte pawhin anmahni ṭawnga Bible leh thu leh hla chhuah te, leilung chhiatna an tawh laia unaute ṭanpuina te, leh khawpui lian tak leh an bial chhûnga vântlâng hmuna thu hrilhnain rah ṭha a chhuahte an hmuh chuan chutiang bawkin lâwm thu an sawi a ni.

17. Jehova’n tûn laia a inawpna pâwl chu a ṭanpui tih engtin nge kan hriat?

 17 Jehova Thuhretu ni lo tam tak chuan mahni duh thua pêk thawhlâwm chauh hmanga hêng thil zawng zawngte kan tih theih dân chu an hrethiam thei lo a ni. Company lian tak neitu pakhatin kan lehkhabu tihchhuahna hmunte an rawn tlawh a. Kan thiltih zawng zawngte chu mahni duh thua inpete leh mahni duh thua pêk thawhlâwmte hmanga tih a nih bâkah sum tihpun nâna tih a nih lohzia a hmuhin mak a ti hle a. Kan thiltih hi thil tih theih rual a ni lo tiin a sawi a. A sawi chu kan pawm a! He hna hi Jehova ṭanpuina avâng chauhva thawk thei kan ni tih kan hria a ni.—Joba 42:2.

JEHOVA KAN PEK LET LEHNA AVANGA MALSAWMNATE

18. (a) Lalram hna kan ṭanpui hian eng malsâwmnate nge kan dawn? (b) Kan fate leh mi tharte chu chutiang ti ve tûrin engtin nge kan ṭanpui theih?

18 Jehova chuan Lalram hna ropui tak ṭanpui theihna hun remchâng pein min chawimawi a. Chutianga kan tih chuan mal min sâwm ang tih min tiam bawk. (Malakia 3:10) Phal taka kan pêk chuan kan hmuingîl ang tih Jehova’n min tiam a ni. (Thufingte 11:24, 25 chhiar rawh.) ‘Englo lâk aiin pêkin lukhâwng a neih zâwk’ avângin thil kan pêk hian hlimna kan nei ang tih pawh min hrilh bawk a. (Tirihkohte 20:35) Kan fate leh mi tharte chu kan thusawi leh thiltihte hmangin he hna atâna thawhlâwm thawh dân leh malsâwmna tam tak hmuh theih dân kan zirtîr thei a ni.

19. He thuziak hian engtin nge a tihchak che?

19 Kan thil neih zawng zawngte hi Jehova hnên aṭanga kan hmuh a ni a. Amah kan pêk lêt leh chuan, kan hmangaihzia leh kan tâna a thiltih zawng zawngte avânga kan lâwmzia kan lantîr a ni ang. (1 Chronicles 29:17) Israel mite’n biak in sak nâna thawhlâwm an thawh khân, “mipuite chu an hlim êm êm mai a, rilru hmun khat pua lâwm taka LALPA an pêk avângin.” (1 Chronicles 29:9) Jehova thil min pêkte aṭanga amah pêk lêt lehna hmangin lâwmna leh lungawina i hmu chhunzâwm zêl ang u.