A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  February 2018

Hlimna—Pathian Hnên Aṭanga Kan Neih Mizia

Hlimna—Pathian Hnên Aṭanga Kan Neih Mizia

MITE chuan hlim taka awm an duh a. Mahse, tûn hi ni hnuhnûng a ni a, mi tin hian buaina “khirh takte” an hmachhawn ṭheuh a ni. (2 Timothea 3:1) Mi ṭhenkhat chuan dik lo taka cheibâwlna te, dam lohna te, hna chânna te, a nih loh leh hmangaih tak chânnate avângin an hlimna neih chu an hloh va. Mi dangte erawh chuan lungngaihna leh manganna thlentu thilthlengte avângin an hloh bawk. Jehova betute meuh pawhin lunghnualin, a tâwpah an hlimna neih chu an hloh thei a ni. Chutianga i hloh a nih chuan engtin nge hlimna i neih leh theih ang?

Chu zawhna chhâng tûr chuan hlimna dik tak nihna leh mi dangte’n harsatna an tâwk chung pawha hlimna an neih reng theih dânte kan hriat hmasak a ngai ang. Chumi hnuah, hlimna kan neih reng theih dân leh kan tihpun theih dânte kan hmu ang.

HLIMNA CHU ENG NGE NI?

Hlimna dik tak neih leh hlim thei tak nih a inang lo va. Hei hi han ngaihtuah teh: Zu rui chu a nui vak vak pawh a ni thei. Mahse, a harhfîm hun chuan a nui tawh lo va, buaina tam tak a la nei tih a inhre chhuak thei a ni. A hlim theihna chu rei lo te chhûng tân chauh a ni a, hlimna dik tak a ni lo.—Thufingte 14:13.

Kawng leh lamah chuan, hlimna chu thil ṭha kan neih hun leh kan beisei huna kan awm dân hi a ni a. Hlimna nei tih awmzia chu kan dinhmun a ṭha emaw, a ṭha lo emaw pawh ni se, lâwm taka awm hi a ni. (1 Thessalonika 1:6) Dik tak chuan, thil engemaw chungchânga kan lungnih loh hunah pawh hlimna kan nei reng thei a. Entîr nân, tirhkohte chu Isua chanchin an sawi avângin vuak an tuar a. Mahse, “rorêltute zîng ata an kal chhuak a, chu hming avâng chuan mualpho tuar tlâka ruat an nih avângin an lâwm hle a.” (Tirhkohte 5:41) Vuak an tawrh avânga lâwm an ni lo, Pathian chunga an rinawm theih vânga lâwm an ni zâwk a ni.

Hlimna chu kan pianpui lo va, amaha lo awm mai lah a ni hek lo. Engvângin nge? Hlimna dik tak chu Pathian thlarau rah pêng pakhat a nih vâng a ni. Pathian thlarau thinghlim chuan ‘mihring thara’ inthuam tûrin min ṭanpui a, chutah chuan hlimna pawh a tel a. (Ephesi 4:24; Galatia 5:22) Hlimna kan neih chuan kan harsatna tawhte hmachhawn chu a awlsam lehzual ang.

ENTAWN KAN DUH ENTIRNATE

Jehova chuan tûn laia kan hmuh thil ṭha lote ni lovin, thil ṭhate a thleng hmuh chu a duh a. Mite’n thil sual ti mah se, a hlimna neih chu a hloh phah chuang lo. Bible chuan: “Chakna leh hlimna a hmun thianghlimah a awm,” tiin a sawi. (1 Chronicles 16:27, NW) Chu bâkah, a chhiahhlawhte thil ṭha tih chuan Jehova chu a tihlim bawk a ni.—Thufingte 27:11.

Kan beisei anga thil a lo thlen loh huna hlimna kan hloh loh hian Jehova kan entawnin, amah an kan tum tihna a ni a. Lungngaih mai aiin, tûna kan neih thil ṭhate kan ngaihtuah a, nakina kan la hmuh tûr thil ṭha zâwkte chu dawhthei  takin kan nghâk fan fan zâwk a ni. *—Footnote en rawh.

Harsatna tam tak hmachhawn chung pawha hlimna nei rengtute entawn tûr siam tam tak chu Bible-ah a chuang a. Abrahama chuan dinhmun hlauhawma a awm hunah leh mi dangin an tihbuai hnuah pawh hlimna a nei reng a ni. (Genesis 12:10-20; 14:8-16; 16:4, 5; 20:1-18; 21:8, 9) Engtin nge a neih reng theih? Messia rorêlna hnuaia awm khawvêl thara nun a beiseina ngaihtuah rengna hmangin a nei reng thei a ni. (Genesis 22:15-18; Hebrai 11:10) Isua chuan: “In thlahtu Abrahama kha, ka nî hmu tûr a nih avângin a hlim êm êm thîn,” tiin a sawi. (Johana 8:56) Nakina kan neih tûr hlimna chungchâng kan ngaihtuah reng hian Abrahama kan entawn tihna a ni.—Rom 8:21.

Paula leh Sila pawhin rinna nghet tak an nei a, harsatna tam tak an hmachhawn chung pawhin an hlimna neih chu an hloh chuang lo. Entîr nân, nasa taka vuak an nih a, tân ina khung an nih hnuah “Pathian hnênah an ṭawngṭai a, hla an sa” a ni. (Tirhkohte 16:23-25) Nakin hun atâna Pathian thutiamte an ngaihtuah reng avânga an hrehawmnate tuar chhuak thei an ni a. Krista hnungzuitu an nih avânga hrehawm tuar an ni tih an inhriatna chuan a tihlim a. Rinawm taka Pathian rawngbâwlna aṭanga lo chhuak rah ṭhate kan ngaihtuah hian Paula leh Sila kan entawn tihna a ni.—Philippi 1:12-14.

Tûn laiah pawh, harsatnate hmachhawn chunga hlimna nei reng entawn tlâk unau tam tak an awm a. Entîr nân, kum 2013, November thla khân, Typhoon Haiyan thlipui chuan Philippines rama Thuhretu 1,000 chuangte in chu a nuai chhia a ni. Tacloban khawpuia chêng, thlipuiin a in tichhe vek unau George-a chuan: “Chûng thilte chu thleng mah se, unaute chu an hlim a ni. Kan hlim dân chu sawi thiam a har,” tiin a sawi. Kan tâna Jehova min tihsakte kan ngaihtuaha a chunga kan lâwm reng chuan, harsatna nasa tak tâwk mah ila hlimna kan nei reng thei tho a ni. Jehova chuan kan hlim theih chhan tûr dang eng nge min pêk?

KAN HLIM THEIH CHHANTE

Kan hlim theih chhan ropui ber chu Jehova nêna inlaichînna kan nei hi a ni a. Lei leh vâna Lalber chu kan hria a. Ani chu kan Pa, kan Pathian, leh kan Ṭhian a ni!— Sâm 71:17, 18.

Jehova’n nunna leh nun hlim taka hman theihna min pêk avângin kan lâwm bawk a. (Thuhriltu 3:12, 13) A lama min hîp avângin kan tâna a duhzâwng chu kan hria a, kan nun hman dân tûr pawh kan hre bawk. (Kolossa 1:9, 10) Mahse, mi tam zâwkte chuan nunin a tum chu an hre lo. Chu inan lohna chu sawi uarin, Paula chuan: “‘Mita hmuh ngai loh, benga hriat ngai loh, mihring rilrua lût ngai lo, Pathianin a hmangaihtute tân a buatsaih apiangte chu,’ tih ziak ang zâwk khân. Keini erawh chu chûng chu Pathianin thlarauvin min hriattîr ta a ni,” tiin a ziak a ni. (1 Korinth 2:9, 10) Jehova duhzâwng leh a thiltumte hriatthiamna chuan hlimna min pe a ni.

Jehova chuan chu aia nasa pawh min tihsak a. Kan sualte chu ngaihdam theihin a siam a. (1 Johana 2:12) Nakin lawka lo thleng tûr khawvêl thar beiseina pawh min pe bawk. (Rom 12:12) Tûnah ngei pawh, Jehova chuan amah kan biakpui tûr ṭhian ṭha tam tak min pe a. (Sâm 133:1) Setana leh ramhuaite lakah min vênghim bawk. (Sâm 91:11) Jehova min pêk hêng thil ropui tak takte kan ngaihtuah reng hian hlimna kan nei lehzual thei ang.—Philippi 4:4.

HLIMNA NEIH LEHZUAL THEIH DAN

Hlimna nei Kristian chu a hlim lehzual thei em? Isua chuan: “Ka hlimna nangmahnia a awm reng nân leh, in hlimna a famkim nân, hêng thu hi in hnênah ka sawi a ni,” tiin a sawi. (Johana 15:11, Parallel Bible) Hei hian hlimna kan nei lehzual thei tih a târ lang a. Kan hlimna chu mei nên kan khaikhin thei ang. Mei chu a sat lehzual kan duh  chuan thing kan tuah belh a ngai a ni. Hei hi hre reng rawh: Thlarau thianghlimin hlimna nei tûrin min ṭanpui thei tih hi. Chuvângin, hlimna neih lehzual kan duh chuan ṭawngṭaiin Pathian thlarau thinghlim kan dîl reng tûr a ni a. Thlarau thinghlim thâwk khuma ziak Bible thute chu kan chhût ngun reng tûr a ni bawk.—Sâm 1:1, 2; Luka 11:13.

Hlimna min neihtîr lehzual thei thil dang leh chu Jehova tilâwmtu thilte tih rengna hi a ni. (Sâm 35:27; 112:1) Engvângin nge? Bible-in ‘Pathian ṭih a, a thupêkte vawng’ tûra siam kan nih thu a sawi hnuah heti hian a sawi belh a ni: “Hei hi mihring zawng zawng tih tûr chu a ni mai,” tiin. (Thuhriltu 12:13) Pathian duhzâwng ti tura siam kan ni a. Chuvângin, Jehova rawng kan bâwl chuan nuna hlimna dik tak kan hmu ang. *—Footnote en rawh.

HLIMNA NEIH A HLAWKNATE

Kan hlimna kan tihpun chuan hlâwkna dang tam tak pawh kan nei ang. Entîr nân, buaina nei chung pawha hlim taka a rawng kan bâwl chhunzawm zêl chuan, Jehova chu a lâwm lehzual ang. (Deuteronomy 16:15; 1 Thessalonika 5:16-18) Chu bâkah, hlimna dik tak kan neih avângin sum leh pai tam tak neih chu nuna thil pawimawh berah kan ngai lo vang. Chu aiin, Pathian Ram tâna nasa lehzuala inpêkna neih kan tum zâwk ang. (Matthaia 13:44) Jehova tân nasa lehzuala kan thawhna aṭanga thil ṭhate kan hmuh hian hlimna leh lungawina kan nei lehzual ang a, mi dangte kan tilâwm lehzual bawk ang.—Tirhkohte 20:35; Philippi 1:3-5.

Chu bâkah, kan hlimna a nasat poh leh kan hrisêlna a ṭha lehzual ang. Bible chuan: “Thinlung hlim hi damdawi ṭha tak a ni,” a ti a. (Thufingte 17:22) United States ram, Nebraska University-a hrisêlna lam zirtu mi thiam pakhat chuan Bible thu nêna inrem thu pakhat a sawi a ni: “Tûna i nunah hlimna leh lungawina i neih chuan, hma lam hunah i hrisêl lehzual thei ang,” tiin.

Chuvângin, hun khirh takah awm mah ila, ṭawngṭaina te, Pathian Thu zirna te, leh chhût ngunnate aṭanga thlarau thianghlim kan dawn hian hlimna dik tak kan nei thei a. Tûna Jehova min pêk thil ṭhate kan ngaihtuah a, mi dangte rinna kan entawn a, Pathian duhzâwng tih kan tum chuan hlimna kan nei lehzual bawk ang. Chutianga kan tih chuan, Sâm 64:10-a: “Mi felte chu LALPA-ah an lâwm ang a, amahah chuan rinna an nghat ang,” tia a sawi chu kan tawng ve thei ang.

^ par. 10 “Thlarau rah” chungchânga nakina la chhuak tûr thuziakah chuan dawhtheihna chungchâng kan la sawiho vang.

^ par. 20 Hlimna neih lehzual theih dân hriat belh nân, “Hlimna Tihpun Theih Dân Kawng Dangte” tih bâwm chu en rawh.