“Thlarau dâna awmte erawh chuan thlarau lam thilte an duh ṭhîn.”—ROM 8:5.

HLA: 45, 36

1, 2. Engvângin nge hriak thih Kristiante chuan Rom bung 8-na chu an ngaihven?

ISUA thih Hriatrengna hun chhûngin, Rom 8:15-17 hi i chhiar ngei a rinawm. He Bible chângte hian, hriak thih Kristiante’n vânah chatuan nun beiseina an nei tih an hriat dân a târ lang a. Rom 8:1 chuan hriak thihte chu “Kristaa awmte” niin a sawi. Mahse, Rom bung 8 chu hriak thihte tân chauh a ni em? Leia chatuana nun beiseina neite pawhin an ṭangkaipui ve thei em?

2 Rom bung 8 chu hriak thihte tân bîka ziak a ni a. Anni chuan ‘fa nihna nghâktute’ niin “thlarau” an dawng a ni. (Rom 8:23) Nakin hunah chuan, vânah Pathian fate an la ni ang. Jehova chuan tlanna zârah an sualnate chu a ngaidam tawh a. A fate an nih theih nân mi felah a ruat a ni.—Rom 3:23-26; 4:25; 8:30.

3. Engvângin nge leia chatuan nun beiseina neite pawhin Rom bung 8-na chu an zir ang?

 3 Mahse, Rom lehkhabu tîr lamah, Paula chuan hriak thih ni lo mah se, Jehova’n mi fela a ruat mi pakhat chungchâng a ziak a. Chu mi chu Abrahama a ni. Chu mi rinawm chu Isua’n tlanna a tâna a nun a pêk hma daiha awm tawh a ni a. (Rom 4:20-22 chhiar rawh.) Jehova chuan tûn laia leia chatuan nun beiseina nei mi rinawm Kristiante chu mi felah a ruat a ni. Anni pawhin Rom bung 8-a thurâwn pêk hi an hlâwkpui thei bawk.

4. Rom 8:21 kan chhiar hunah, eng nge kan inzawh ang?

4 Rom 8:21-ah hian, khawvêl thar a lo thleng ang a, mihringte hi sual leh thihna ata chhuah zalên an ni ang tih Jehova thutiam kan hmu a. He Bible châng hian mite’n “Pathian fate zalênna ropui,” an chên ang tih a sawi a ni. Chu khawvêl thara awmah i inngai thei em? Chuta awm tûra kan tih ngaite i lo sawiho vang u.

‘TISA LAM THILTE DUHNA’

5. Paula’n Rom 8:4-13-ah hian eng dinhmun nge a târ lan?

5 Rom 8:4-13 chhiar rawh. Rom bung riatnaah hian, Paula chuan “tisa dâna awmte” leh “thlarau dâna awmte” tiin mi chi hnih chungchâng a sawi a. Paula hian Kristiante leh Kristian ni lote chungchâng a sawi niin ṭhenkhat chuan an ngai a. Mahse, ‘mi thianghlima awm tûra koh’ Kristiante hnêna a lehkha ziak a ni. (Rom 1:7) Chuvângin “tisa dâna awmte” leh  “thlarau dâna awmte” hi Kristian an ni ve ve a. A nih leh engtin nge anni chu an inan loh?

6, 7. (a) Bible-a “tisa” tih thumal awmze ṭhenkhat chu eng nge ni? (b) Rom 8:4-13-ah “tisa” tih thumal hi engtianga hman nge a nih?

6 Bible-a “tisa” tih thumal hian thil chi hrang hrang a kâwk thei a. A châng chuan kan taksa tak tak sawina a ni a. (Rom 2:28; 1 Korinth 15:39, 50) Chhûngkaw inlaichînna sawina pawh a ni thei bawk. Entîr nân, Bible-in Isua chu, ‘tisa lam thu-ah chuan Davida thlah,’ a ni tih a sawi a, Paula chuan Judate chu ‘tisa lama a chipuite’ tiin a ko a ni.—Rom 1:2, 3; 9:3.

7 Paula’n Rom 8:4-13-a “tisa dâna awmte” chungchâng a sawi khân eng a sawi duhna nge ni? A chhânna hre tûr chuan Rom 7:5 kan en thei a. Chutah chuan: “Tisaa kan awm lai khân Dân avânga duhzâwng sual lo chhuakte chuan kan taksa pêngahte, thihna khawpa rah tûrin a thawk ṭhin,” tiin a ziak a ni. Hetah hian, Paula chuan “tisa dâna awmte” chu mahni châkna sual ringawt ngaihtuah a, an duh apiang ti ṭhîntute an ni tiin a hrilhfiah a ni.

8. Engvângin nge Paula’n hriak thih Kristiante chu ‘tisa dâna awm’ lo tûra a vaukhân a ngaih?

8 Engvângin nge Paula’n hriak thih Kristiante chu ‘tisa dâna awm’ lo tûra a vaukhân? Tûn laiah, engvângin nge Kristian zawng zawngte hian he vaukhânna hi kan mamawh? Pathian chhiahhlawh rinawm  tupawh hian mahni châkna hi nuna thil pawimawh berah kan dah palh theih vâng a ni. Entîr nân, Paula chuan Rom khuaa unau ṭhenkhatte chu “anmahni pum rawng an bâwl” tiin a ziak a. Hei hi mipat hmeichhiatna, ei leh in, a nih loh leh thil dang an nuam tihzâwngte chu an nunah an dah pawimawh ber tih a sawi duhna a ni thei. (Rom 16:17, 18; Philippi 3:18, 19; Juda 4, 8, 12) Ṭum khat chu, Korinth kohhranah unaupa pakhat chuan “a pa nupui” a mutpui a. (1 Korinth 5:1) Chûng Kristian hmasate chuan, ‘tisa dâna awm’ chungchânga Paula vaukhânna an mamawh tih a chiang hle.—Rom 8:5, 6.

9. Rom 8:6 hi eng chungchâng sawina nge a nih loh?

9 He vaukhânna hi tûn laiah pawh hman a ni a. Kum tam tak chhûng Jehova rawngbâwl tawhte pawhin “tisa dân” angin an nung ṭan thei a ni. Chuti a nih chuan, Paula’n ei leh in te, hnathawhna te, intihhlimna te, leh inngaihzâwnna ang chite hi kan ngaihtuah tûr a ni lo a tihna a ni em? Ni lo ve. Hêngte hi nuna thil pângngai mai an ni a. Isua pawhin a eiin, a in a, mi dangte pawh a hrai a. Chawlh hahdam a mamawh tih pawh a inhre bawk. Paula chuan mipat hmeichhiatna hman hi nupa inkâra thil pawimawh tak niin a ziak a ni.

Kan titinain eng nge a tar lan? (Paragraph 10, 11-na en rawh)

10. “Duh” tih thumal hian eng nge a kawh?

10 “Duh” tih thu mal Paula’n a hman hian eng a tihna nge? Paula hman Grik thu mal hian thil engemaw ngaihtuah a, ruahman tumna lam a kâwk a ni. Bible lama mi thiam pakhat chuan, he thu malin a kawhte hian mahni hmasial tak an châkna chungchâng ringawt an “ngaihvenin, eng lai pawhin an sawi reng ṭhîn” tih a sawi. Anni chuan, chûng châknate thununa awm an duh a ni.

Nuna kan ngaih pawimawh ber chu eng nge ni?

11. Eng thil ṭhenkhat nge kan nuna thil pawimawh ber ni thei?

11 Rom khuaa Kristiante tân mahni inbih chian a ngai a, an thil duhte an hriat a ngai bawk. An thil duhte chu “tisa lam thilte” a ni em? Tûn laiah pawh, kan tâna pawimawh ber chu kan ngaihtuah ve a ngai a ni. Kan thusawi duhzâwngte chu eng nge ni? Eng thiltihte nge nuam kan tih? Mi ṭhenkhat chuan uain chi hrang hrang in te, chênna hmun cheimawi dân te, thawmhnaw thar lei te, sum peipun te, leh chawlh lâkte ringawt an lo ngaihtuah reng tih an inhre chhuak mai thei. Hêngte hi thil sual a ni lo. Kan nuna thil pângngai mai a ni thei a. Entîr nân, Isua chuan inneihnaah uain a pe a, Paula’n Timothea chu hrisêlna atân “uain tlêm tê” in tûrin thurâwn a pe a ni. (1 Timothea 5:23; Johana 2:3-11) Mahse, an nunah uain chu thil pawimawh ber a ni lo. Eng nge kan chungchâng ve hi le? Kan nuna kan thil ngaih pawimawh ber chu eng nge ni?

12, 13. Kan thil ngaihtuahte chungchângah engvângin nge kan fîmkhur ang?

12 Paula chuan: “Tisa lam thilte duh chu thihna a ni si a,” tiin a vaukhân a.  (Rom 8:6) Eng a sawi tumna nge ni? “Tisa dâna” kan awm a nih chuan, tûnah Jehova nêna kan inlaichînna kan hloh thei a, nakin huna nun pawh kan hloh thei a ni. Mahse, chu chu a thlen kher a ngai lo. Mi chu a inthlâk danglam thei a. Korinth khuaa hnawhchhuah ngai nungchang bawlhhlawhpa kha i la hria em? A inthlâk danglam a, a châkna bawlhhlawh chu a bânsan ta a. A hnuah thianghlim takin Jehova rawng a bâwl leh a ni.—2 Korinth 2:6-8.

13 Chu pa chu “tisa dâna” awm entawn tûr ṭha lo tak ni mah se, a inthlâk danglam thei a. Chuvângin, tûn laia Kristian pakhatin Pathian Jehova tehnate aia a châkna sualte anga a awm ṭan chuan, a inthlâk danglam thei a ni. Paula vaukhânna chuan insiam ṭhat kan ngaihna apianga insiam ṭha tûrin min chêttîr thei tih hre reng ang che.

‘THLARAU LAM THIL DUH RAWH’

14, 15. (a) Paula’n kan rilruah eng nge dah tûra min fuih? (b) “Thlarau lam thil duh” tih chuan eng nge a kawh loh?

14 Paula chuan “tisa lam thilte duh” a hlauhawm dân a sawi hnuah: “Thlarau lam thil duh erawh chu nunna leh thlamuanna a ni,” tiin a sawi a. Kan dawn theih malsâwmna ropui tak a va ni êm!

15 Mahse, “thlarau lam thilte duh” tih hian mi chu a tak ramah a chêng lo tihna a kâwk lo. Chu bâkah, Jehova leh Bible chungchâng chauh a ngaituahin, a sawi reng tihna pawh a ni hek lo. Entîr nân, kum zabi khatnaa Pathian chhiahhlawhte chu pângngai takin an nung a. An eiin an in a, nupui pasal an innei a, chhûngkua an din a, hnate an thawk bawk a ni.—Marka 6:3; 1 Thessalonika 2:9.

Paula nuna thil pawimawh ber chu Pathian rawngbâwl hi a ni

16. Paula nuna thil pawimawh ber chu eng nge ni?

16 Mahse, Paula leh Kristian hmasa dangte chuan an nuna hêng an thiltih ṭhinte hi thil pawimawh berah an dah lo va. Entîr nân, Paula chuan a inchâwm nân puan in a siam tih kan hria a ni. Mahse, a hna chu a nuna thil pawimawh ber a ni lo. A nuna thil pawimawh ber chu Pathian rawngbâwl a ni a. Thu hrilhna leh zirtîrna hna chu a ngai pawimawh ber a ni. (Tirhkohte 18:2-4; 20:20, 21, 34, 35 chhiar rawh.) Rom khuaa unaute chuan Paula an entawn a ngai a, keini pawhin kan entawn ve tûr a ni.—Rom 15:15, 16.

17. “Thlarau lam thil” kan duh avângin eng hlâwknate nge kan dawn?

17 Pathian Jehova rawngbâwl kan tum tlat chuan kan nun chu eng ang nge a nih ang? Rom 8:6 chuan: “Thlarau lam thil duh erawh chu nunna leh thlamuanna a ni,” tiin a sawi a. Thlarau lam thil duhnaah chuan Jehova thlarau inkaihhruaitîr leh a ngaihtuah anga ngaihtuah dân zirte a tel a ni. Jehova chuan tûna nun hlimawm leh lungawithlâk tak mai bâkah, nakin huna chatuan nunna pawh min tiam a ni.

Rilru thlamuanna dik tak kan neih theih avângin Jehova chungah kan lâwm hle

18. “Thlarau lam thilte” kan duh hian engtin nge thlamuanna kan neih theih?

 18 Paula’n ‘thlarau lam thil duhnain’ thlamuanna, a nih loh leh remna min thlen thei tia a sawi hian eng a tihna nge? Mi tinte hian thlamuanna, a bîk takin rilru thlamuanna neih an duh a; mahse, chu chu mi tlêm tê chauhvin an nei thei a ni. Rilru thlamuanna dik tak kan neih theih avângin Jehova chungah kan lâwm hle a. Chhûngkuaa mite leh kohhrana mite nên pawh kan inrem thei bawk. Mi ṭha famkim lo kan nih avângin, kan unaute nên buaina kan neih châng pawh a awm thei a. Chutiang thil a thlen chuan: “I unau rem zet la,” tih Isua thurâwn pêk chu kan zâwm a ni. (Matthaia 5:24) I unaute pawhin, “remna Pathian,” Jehova rawng an bâwl tih hre reng ang che.—Rom 15:33; 16:20.

19. Eng thlamuanna danglam bîk tak nge kan neih theih?

19 “Thlarau lam thilte,” kan duh chuan Pathian nêna inremna kan nei thei bawk ang. Zâwlnei Isaia chuan: “I [Jehova] chunga rilru nghattu chu, nangmah a rin che avângin, thlamuang tak maia awm tûrin i vêng ang,” tiin a ziak a ni.—Isaia 26:3; Rom 5:1 chhiar rawh.

20. Engvângin nge Rom bung 8-naa thurâwn pêk avângin kan lâwm?

20 Chatuan nun kan beiseina chu vânah emaw, leiah emaw pawh ni se, Rom bung 8-naa kan hmuh thufing tak hi kan hlâwkpui ṭheuh thei a ni. Mahni duh zâwngte aia Jehova rawngbâwlna lam ngaihtuah tlat tûra Bible-in mih fuih avângin kan lâwm hle. “Thlarau lam thilte,” kan duh avângin lâwmman ropui tak kan nei thei tih kan hria a. Paula chuan: “Pathian thilthlâwnpêk erawh chu kan Lalpa Krista Isua zârah chatuana nunna a ni,” tiin a ziak a ni.—Rom 6:23. (ws16.12-E)