A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  August 2017

Hmangaihna—Mize Hlu Tak

Hmangaihna—Mize Hlu Tak

JEHOVA chuan tirhkoh Paula chu thlarau thianghlim thiltih aṭanga lo awm mizia pakua chungchâng ziak tûrin thlarauvin a thâwk khum a. (Galatia 5:22, 23) Hêng mize duhawm takte hi “thlarau rah” tia koh a ni a. * (Footnote en rawh.) He thlarau rah pêngte hi Kristiante inthuam tûr ‘mihring thara’ tel a ni bawk. (Kolossa 3:10) Thingkûng chu ṭha taka tuia châwm a nih chuan a rah ṭha ṭhîn angin, thlarau thianghlimin mi nuna hna a thawh chuan hêng mize duhawm takte hi a nei dâwn a ni.—Sâm 1:1-3.

Paula târ lan hmasak ber mizia chu hmangaihna a ni. He mizia hi engtiang khawpa hlu nge a nih? Paula’n hmangaihna tel lo chuan “engmah” a nih loh thu a sawi a. (1 Korinth 13:2) A nih leh, hmangaihna chu eng nge a nih a, chu chu engtin nge kan neih chhoh thei a, nî tin nuna kan lantîr theih?

HMANGAIHNA CHU ENG NGE NI?

Hmangaihna chu eng nge a nih chiah tih hrilhfiah har hle mah se, Bible-in hmangaihna neitu ngaihtuah dân leh a thiltih dânte chu a târ lang a ni. Entîr nân, hmangaihna neitu chu ‘a dawhtheiin, ngil a nei a,’ ‘thutak a lâwmpui ṭhîn’ a ni. Miin hmangaihna a neih chuan “engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn.” Mi dangte chu a hmangaihin a ngaihsak tak zet a, ṭhian rinawm a ni ṭhîn. Miin hmangaihna a neih loh erawh chuan thîkna a nei a, a chapo va, a chemawi lova, mahni hma a sial a, ngaihdamna a nei lo a ni. Keini chuan hêng mize ṭha lo takte lantîr aiin ‘mahni hma sial lo’ hmangaihna ang chi hmangaihna dik tak chu mite chungah lantîr kan duh zâwk a ni.—1 Korinth 13:4-8.

JEHOVA LEH ISUA’N HMANGAIHNA KAWNGAH ENTAWN TUR ṬHA FAMKIM AN SIAM

“Pathian chu hmangaihna a ni.” (1 Johana 4:8) Chu chu a hnathawh leh a thiltih zawng zawngah a lang a. Mihringte chunga a hmangaihna thiltih ropui ber chu kan tâna tuar tûr leh thi tûra Isua leia a tirh hi a ni. Tirhkoh Johana chuan: “He miah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e,” tiin a sawi a. (1 Johana 4:9, 10) Pathian hmangaihna avângin kan sualte ngaihdam theih a ni a, beiseina leh nunna kan nei thei a ni.

Isua chuan Pathian duhzâwng ti tûra a nun hlânin mihringte a hmangaihzia a lantîr a. Tirhkoh Paula chuan: “Chu mi duhzâwng chuan Isua Krista taksa vawi khata hlan nghâl vâng khân tihthianghlimin kan awm ta,” tiin min hrilh a ni. (Hebrai 10:9, 10) Tûman chu aia hmangaihna ropui zâwk an lantîr thei lo. Isua chuan: “Mihringin a ṭhian aia a nun a paih aliama hmangaihna nasa zâwk tuman an nei lo,” tiin a sawi a. (Johana 15:13) Ṭha famkim lo mihringte hian Jehova leh  Isua lantîr hmangaihna chu kan entawn thei em? Thei e! Kan entawn theih dân i lo en ang u.

“HMANGAIHNAAH AWM RAWH U”

Paula chuan: “A fa duh takte angin Pathian awm dân latute ni rawh u. Tin, Kristan a hmangaih che u a, . . . kan aia a inpêk ang bawk khân hmangaihnaah awm rawh u,” tiin min fuih a. (Ephesi 5:1, 2) ‘Hmangaihnaa awm’ tih awmzia chu eng nge ni? Englai pawha hmangaihna lantîr tihna a ni. Mite kan hmangaih tiin thu chauhvin kan sawi lo va. Kan hmangaihna chu thiltihin kan lantîr a ni. Johana chuan: “Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tih tak zetin ni zâwk rawh se,” tiin a ziak a. (1 Johana 3:18) Entîr nân, Jehova leh kan vêngte kan hmangaih avângin “Ram chanchin ṭha” kan hril a ni. (Matthaia 24:14; Luka 10:27) Kan dawhtheih a, ngil kan neih a, ngaihdam kan peih chuan ‘hmangaihnaah kan awm’ tihna a ni bawk. “Lalpa chuan a ngaidam che u ang tak khân ngaidam ve rawh u,” tih Bible thurâwn hi kan zâwm a ni.—Kolossa 3:13.

Mahse, mi dangte kan fuih a, kan zilh hian hmangaihna kan nei lo tihna a ni lo. Entîr nân, nu leh pa ṭhenkhat chuan an fa ṭap thlêm nân a dîl apiang an tihsak mai ṭhîn. Mahse, fate hmangaih tak taktu nu leh pate chu a ṭûl hunah chuan an khauh ngei ang. Chutiang bawkin, Pathian chu hmangaihna ni mah se, “a hmangaih chu a thunun ṭhîn” a ni. (Hebrai 12:6) Chuvângin, a ṭûl huna zilhna inâwm tak pêk hi hmangaih vâng a ni zâwk. (Thufingte 3:11, 12) Mahse, kan zavai hian ṭha famkim lo kan nih avângin hmangaihna kan lantîr lo fo ṭhîn tih erawh chhinchhiah ang che. Chuvângin, hmangaihna lantîrna kawngah hma kan sâwn ṭheuh thei a ni. Chu chu engtin nge kan tih theih? Kan tih theih dân kawng thum i lo ngaihtuah ang u.

ENGTIN NGE HMANGAIHNA KAN NEIH RENG THEIH?

A hmasa berin, hmangaihna hi thlarau rah zînga pakhat a nih avângin chu thlarau thianghlim dawng tûrin Pathian hnênah dîl rawh. Jehova chuan “a dîltute chu thlarau thianghlim” a pe dâwn tih Isua’n a sawi a. (Luka 11:13) Chuvângin, thlarau thianghlim dawng tûra kan ṭawngṭai a, a ṭanpuina kan pawm chuan hmangaihna kan nei lehzual dâwn a ni. (Galatia 5:16) Entîr nân, kohhran upa i nih chuan mi dangte chu Bible aṭanga fuihna i pêk hunah hmangaihna lantîr tûrin thlarau thianghlim i dîl thei a ni. A nih loh leh, nu leh pa i nih chuan i fate chu thinrim lo va hmangaih taka zilh thei tûrin Pathian thlarau thianghlim i dîl thei bawk.

Pahnihna, Isua’n dik lo taka cheibâwl a nih laia hmangaihna a lantîr dân chu ngun takin ngaihtuah rawh. (1 Petera 2:21, 23) Miin an tithinrim che emaw, dik lo taka rorêlsak i nih emaw chuan, ‘Isua chu ni se, engtin nge a tih ang?’ tiin inzâwt rawh. Chutianga inzawhna chuan unaunu Leigh-i chu thil tih hmaa ngaihtuah hmasa tûrin a ṭanpui a ni. Ani chuan: “Ṭum khat chu ka hnathawhpui pakhatin ka ṭhiante hnênah ka chungchâng leh ka hnathawh dân chungchâng a chhe zâwngin e-mail a thawn a. Chu chuan ka rilru a tina hle. Mahse, a hnuah, ‘Amah ka dâwr dânah engtin nge Isua ka entawn theih ang?’ tiin ka inzâwt a. Isua tih dân tûr ka ngaihtuah hnu chuan, chu thil chu la na lutuk lo va, ngaihthah mai ka tum ta a ni. A hnuah, chu ka hnathawhpui chu a dam lo nasain rilru manganna nasa tak a lo nei reng tih ka hria a. A tum vâng rênga chutianga ziak a lo ni lo tih ka hre ta a ni. Tihthinrima a awm huna Isua hmangaihna lantîr dân ngaihtuahna chuan ka hnathawhpui nu chunga chutiang hmangaihna lantîr ve tûrin min ṭanpui a ni,” tiin a sawi. Isua kan entawn chuan mi dangte chungah hmangaihna kan lantîr reng thei ang.

Pathumna, mahni hma sial lo hmangaihna lantîr zir rawh. He hmangaihna hi Isua hnungzuitu dik takte hriat hran theihna a ni a. (Johana 13:34, 35) Isua ngeiin chutiang hmangaihna a neih avângin kan tân entawn tûr ṭha tak a hnutchhiah a ni. Engtin nge a hnutchhiah? Vân kalsanin, “thi khawp hialin” kan tân “amah leh amah a intitlâwm ta zâwk” a ni. (Philippi 2:5-8) Isua lantîr mahni hmasial lo hmangaihna kan entawn chuan amah angin  kan ngaihtuah ve ang a, mahni aiin mi dangte kan dah pawimawh zâwk ang.

HMANGAIHNA LANTIR AVANGA HLAWKNATE

Hmangaihna lantîrna avângin hlâwkna tam tak a awm a. Chûng zînga pahnih chu i lo en ang u:

Hmangaihna lantîr chu engtin nge kan hlâwkpui theih?

  • KHAWVEL PUM HUAPA INUNAUNA: Kan inhmangaih tawnna avângin khawi hmunah pawh ni se, kan zinna kohhrana unaute chuan ṭha takin min lo lâwm ṭhîn a. “Unau khawvêla awmhote” hmangaihna kan dawng thei tih hriat chu malsâwmna a va ni tak êm! (1 Petera 5:9) Chutiang hmangaihna chu Pathian mite zîngah chauh hmuh theih a ni.

  • REMNA: ‘Hmangaihnaa kan indawh tawn’ chuan ‘remnaa phuarin’ kan awm thei ang. (Ephesi 4:1- 3) He remna hi kan inkhâwmnaah te, inkhâwmpuinaahte kan hmu thei a ni. Tûn lai inthliar hranna khawvêla chutianga inrem taka kan awm thei chu thil mak tak a ni tih i pawm dâwn lâwm ni? (Sâm 119:165; Isaia 54:13) Mi dangte nêna inrem kan tum hian, anmahni kan hmangaih tak zet tih kan lantîr a, chu chuan kan Pa vâna mi a tilâwm a ni.—Sâm 133:1-3; Matthaia 5:9.

‘HMANGAIHNA CHUAN MI A SIAM ṬHA ṬHIN’

Paula’n: ‘Hmangaihna chuan mi a siam ṭha ṭhîn,’ tiin a ziak a. (1 Korinth 8:1) Chu chu engtihna nge? “Hmangaihna Hla” tia ṭhenkhatin an koh 1 Korinth bung 13-ah hmangaihnain mi a siam ṭhat dân chungchâng sawi a. Hmangaihnain mi dangte ṭhatna tûr a zawng a. Hmangaihnain mi dangte mamawh a ngaihsak ṭhîn. (1 Korinth 10:24; 13:5) Hmangaihna chuan mite a ngaihtuah a, a dawhtheih a, ngil a neih avângin hmangaihna nei tak chhûngkua a siam a, kohhranah inpumkhatna a awmtîr a ni.—Kolossa 3:14.

Mi dangte chunga hmangaihna kan lantîr theih dân kawng tam tak a awm a; mahse, Pathian kan hmangaihna hi thil hlu ber leh min siam ṭha thei bertu a ni. Engvângin nge? Amah kan hmangaihna chuan min inpumkhattîr avângin! Ṭo bul te, hnam te, leh ṭawng hrang hranga mite chuan Pathian Jehova an beho va, ‘thu khat vuain’ a rawng an bâwl a ni. (Zephania 3:9) Chuvângin, he Pathian thlarau rah hmêl hmang hlu tak hi kan nî tin nunah lantîr i tum reng ang u.

^ par. 2 Hei hi thlarau rah pêng chi hrang hrang chungchâng kan sawiho tûr thuziak pakuate zînga hmasa ber a ni.