A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  August 2017

Mihring Hlui Kan Hlîp Dân leh Kan Bânsan Dân

Mihring Hlui Kan Hlîp Dân leh Kan Bânsan Dân

“Mihring hlui chu a thiltihte chawpin in hlîp tawh a.”—KOLOSSA 3:9.

HLA: 52, 54

1, 2. Jehova Thuhretute chungchângah mite’n eng nge an hriat?

MI TAM tak chuan Jehova Thuhretute chu danglam bîk tak an ni tih an hria a. Entîr nân, lehkha ziaktu Anton Gill-a chuan Nazi Germany-a Thuhretute mizia chu a fak a ni. “Jehova Thuhretute chuan a bîk taka amahni hawtu Nazite ngaihven chu an hlawh a. . . . Kum 1939-ah Thuhretu 6,000 vêl chu [concentration camp-ah] an awm,” tiin a ziak. Hrehawm tam tak an tuar chung pawhin, mi rin tlâk, nêksâwrna kâra buai lo, an Pathian chunga rinawm, leh an inlungrualna avânga hriat hlawh tak an ni, tiin a sawi belh bawk.

2 Tûn hnai mai khân, South Africa rama mite pawhin Jehova Thuhretute danglam bîkna chu an hria a. Tûn hmâ chuan, chumi rama vun rawng inang lo Thuhretute chu inhmuh khâwm phalsak an ni lo. Mahse, December 18, 2011 Chawlhniah chuan, hnam hrang hranga mi Thuhretu 78,000 aia tamte chu South Africa ram aṭang leh an ṭhenawm ramte  aṭangin Johannesburg khawpuia stadium lian berah an kalkhâwm a. Stadium manager zînga pakhat chuan: “He stadium-a ka hmuh tawh azawngah chuan hêng mite nungchang hi a la ṭha ber a ni. An vaiin mawi hnai takin an inthuam a. Stadium chu fai takin an tithianghlim bawk. Chu aimahin, hnam tin chi tina mi an ni hlawm hi a ni,” tiin a sawi.

3. Engin nge kan inunauna chu tidanglam bîk?

3 Thuhretu ni lote pawhin khawvêl pum huapa kan innauna chu a danglam bîk tih an hria a. (1 Petera 5:9) Engvângin nge pâwl dangte laka kan danglam bîk? Bible leh thlarau thianghlim ṭanpuina avângin kan nuna Pathian Jehova tilâwm lo thei thil engpawh chu siam ṭhat kan tum a. ‘Mihring hlui chu kan hlîp a,’ “mihring thar chuan” kan inthuam a ni.—Kolossa 3:9, 10.

Kan nunah inthlâk danglamna lian tak kan siam thei a ni

4. He thuziakah hian eng nge kan sawiho vang? Engvângin nge?

4 Mihring hlui kan hlîp hnu chuan kan bânsan a ngai a. He thuziakah hian mihring hlui kan hlîp theih dân leh a pawimawh chhan kan zir hmasa ang a. Thil sual engpawh lo ti ṭhîntu chuan a nun a thlâk danglam thei tih kan hmu ang. Chu bâkah, kum tam tak chhûng thutaka lo awm tawhte’n mihring hlui an bânsan theih dân pawh kan sawiho bawk ang. Engvângin nge chu chu kan sawiho a ngaih? Jehova rawng lo bâwl tawh ṭhîn mi ṭhenkhatte an fîmkhur reng ṭhin lo chu a pawi hle. Jehova an hriat hmaa an ngaihtuah dân leh an thiltih angin an ti ṭan leh ṭhîn a ni. Kan vai hian: “Dinga inring chu fîmkhur rawh se, chutilochuan a tlu dah ang e,” tih vaukhânna hi kan hre reng tûr a ni.—1 Korinth 10:12.

CHAKNA BAWLHHLAWH ENGPAWH PAIH BO RAWH

5. (a) Mihring hlui hlîp vat a ngaih chhan târ langtu entîrna pe rawh. (A thupui chunga milem en rawh.) (b) Mihring hlui zînga tel eng thiltihte nge Kolossa 3:5-9-a târ lan a nih?

5 I thawmhnaw chu a bâlin, a rimchhia tih i hriat chuan eng nge i tih ang? A rang thei ang berin i thlâk ngei ang. Chutiang bawkin, Jehova huat zâwng thil kan ti tih kan inhriat chhuah chuan kan inthlâk danglam vat tûr a ni. Chûng thil chîn ṭha lote chungchâng chu sawiin Paula chuan: “Hêng zawng zawng hi . . . tibo rawh u,” tiin a sawi a. Chûng zînga pahnih: inngaihna leh bawlhhlawhna chungchâng chu i lo ngaihtuah ang u.—Kolossa 3:5-9 chhiar rawh.

6, 7. (a) Mihring hlui hlîp tûr chuan theih tâwp kan chhuah a ngai tih engtin nge Paula thusawiin a târ lan? (b) Sakura-i nun kawng chu eng nge ni? Inthlâk danglam tûrin engtin nge chakna a neih?

6 Inngaihna. Bible-a “inngaihna” tih ṭawngkamah hian kan nupui pasalte ni lo mi dangte nêna mipat hmeichhiatna hman a tel a. Kristiante chu inngaihna chungchângah an ‘taksa pêngte an tihlum tûr a ni’ tiin Paula’n a sawi a. Chu chu châkna dik lo paih bo tûrin theih tâwp kan chhuah a ngai tihna a ni. Chutianga tih chu harsa hle mah se, kan hlawhtling thei a ni!

 7 Chu chu Japan rama unaunu Sakura-i thiltawn aṭangin kan hre thei a. * (Footnote en rawh.) A tleirâwl chhoh chuan mal hle nia inhriain a lunghnual ṭhîn hle a. Mal nia inhriatna nei lo tûrin kum 15 mi a nih aṭangin, mipat hmeichhiatna a hmang ṭan a ni. Sakura-i chuan mi hrang hrangte chu mipat hmeichhiatna hmanpuiin vawi thum ngawt nau a titla a. Ani chuan: “Atîr chuan mipat hmeichhiatna ka hman hian him niin ka inhria a, mi duh leh hmangaih niin ka inhre bawk. Mahse, mipat hmeichhiatna ka hman tam poh leh him lo niin ka inhre lehzual a ni,” tiin a sawi. Kum 23 mi a nih thlengin chutiang chuan a nung a. Chumi hnuah Jehova Thuhretute nên Bible an zir ṭan a, a thu zirte chu a duh hle a ni. Jehova chuan a nungchang ṭha lo tak chu bânsan tûra a ṭanpui avângin, sual nia inhriatna leh inthiam lohna a neih chu a hneh thei ta a ni. Tûnah chuan regular pioneer nia rawngbâwlin, mal nia inhriatna a nei tawh lo. Ani chuan: “Nî tin hian Jehova hmangaihna dawngin ka hlim tak zet a ni,” tiin a sawi.

THILTIH BAWLHHLAWHTE BANSAN DAN

8. Eng thiltihte avângin nge Pathianin mi bawlhhlawh anga min thlîr theih?

8 Bawlhhlawhnate. Bible-in “bawlhhlawhnate” a tih hian inngaihna aia tam a tel a. Chutah chuan zialzûk leh fiamthu bawlhhlawh sawite a tel thei a ni. (2 Korinth 7:1; Ephesi 5:3, 4) Chu bâkah, tisa châkna chawktho thei lehkhabu chhiarte leh saruak lem leh thuziakte en ang chi mahni chauhva thil sual tihte a tel thei bawk. Chûng thilte chuan mahnia châkna hrîkthlâkna thiltih bawlhhlawh takah min hruai thei a ni. (Kolossa 3:5, NW.) *—Footnote en rawh.

9. Mi tuemaw chuan “thunun loh châkna” a nei chho a nih chuan eng thil nge thleng thei?

9 Saruak lem leh thuziak en ṭhînte chuan “thunun loh châkna” neiin, mipat hmeichhiatna an âtchilh thei a. Saruak lem leh thuziak en ṭhînte chu zû leh ruihhlo ngaite ang an ni tih zir chîk mite’n an sawi a. Chûng thil chîn ṭha lo chuan rah ṭha lo tak a chhuah thei chu a mak lo ve. Chutah chuan nasa taka inngaihnêpna te, hnathawh ṭhat peih lohna te, chhûngkaw hlim lohna te, inṭhenna te, leh mahni intihhlum duhnate a tel thei a ni. Pa pakhat chuan saruak lem leh thuziakte en ṭhin a bânsan aṭanga kum khat hnuah mahni inzahna a nei leh thei tih a sawi.

10. Ribeiro-a chuan saruak lem leh thuziakte a en ṭhin chu engtin nge a bânsan?

10 Mi tam tak tân chuan saruak lem leh thuziakte laka inthiar fihlîm chu a harsa hle thei a. Mahse, chu harsatna chu hneh theih a ni. Brazil rama unau Ribeiro-a entawn tûr siam hi han ngaihtuah teh. A tleirâwl lai chuan in chhuahsanin, lehkha hluite thil danga siam chhuahna factory-a hna a thawk a. Chutah chuan, saruak lem leh thuziakte chuanna magazine-te a hmu a ni. Ribeiro-a chuan: “Zawi zawiin, a ngawl ka vei ta a. Ka hrâtzia mai chu, blue film ka en theih nân ka chênpui hmeichhia hnathawka a kal chhuah hun chu ka nghâkhlel hle ṭhîn,” tiin a sawi. Ribeiro-a chuan nikhat chu a hnathawhnaah siam ṭhat tûr  lehkhabu tian khâwm chu a en a, The Secret of Family Happiness tih lehkhabu a hmu a ni. Chu chu lain, a chhiar ta a. A thil hriat chuan Jehova Thuhretute nêna Bible zir duhna a neihtîr a. Mahse, saruak lem leh thuziak en bânsan tûr chuan hun rei tak a ngai a ni. Engin nge ani chu ṭanpui? Ani chuan: “Ṭawngṭaina, Bible zirna, leh ka thuzirte chhût ngunna aṭangin Pathian miziate ka ngaihhlutna chu a pung chho va, saruak lem leh thuziak en châkna aiin Jehova ka hmangaihna a nasa tawh zâwk a ni,” tiin a sawi. Bible leh Pathian thlarau thianghlim ṭanpuinain a nun dân chu a thlâk danglam a, baptisma a chang a, tûnah chuan kohhran upa niin rawng a bâwl a ni.

Jehova chu kan hmangaih tak zetin sual kan haw tûr a ni

11. Miin saruak lem leh thuziak en a chîn ṭhîn chu bânsan tûrin engin nge ṭanpui ang?

11 Ribeiro-a chuan saruak lem leh thuziakte a en ṭhîn chu bânsan tûrin Bible zir mai aia tam a tih a ngai tih chhinchhiah ang che. Bible-a a thu chhiarte chu ngun taka ngaihtuahin, a thinlunga a khung a ngai a. Jehova hnêna ṭawngṭaiin a ṭanpuina a dîl a ngai bawk. Chûngte chuan Pathian a hmangaihna tinghet lehzual tûra a ṭanpui avângin saruak lem leh thuziak a en châkna chu a hneh thei ta a ni. Saruak lem leh thuziakte en tawh lo tûr chuan Jehova kan hmangaih tak zet a, sual kan huat a ngai a ni.—Sâm 97:10 chhiar rawh.

THINURNA, SAWICHHIATNA, LEH DAWTSAWINA CHU BANSAN RAWH

12. Stephen-a chu thinurna leh sawichhiatna bânsan tûrin engin nge ṭanpui?

12 Mi ṭhenkhat chu an thinrim hma hle a, ṭawng chaltlai tak leh mi dangte tina thei thute an sawi a. Chutiang thil a thlen chuan an chhûngkuain an tuar a ni. Australia rama unau Stephen-a chu a âng bawrh bawrh ṭhîn a, thil hotêah pawh a thin a ur hle ṭhîn. Ani chuan: “Ka nupui nên chuan ṭum thum lai kan awm hrang a, inṭhen thei dinhmunah kan ding a ni,” tiin a sawi. A hnuah Thuhretute nên Bible an zir ṭan a, a thuzirte chu nunpui a tum a ni. Jehova a hriat hma chuan a lungnih loh apiangin a thinrim hle ṭhîn a, puak mai tûr bomb ang niin a inhria tih a sawi. Mahse, Bible thurâwnte a zui hnu chuan hma a sâwn chho va. Ani chuan: “Kan chhûngkaw nun chu nasa takin a ṭha chho va. Jehova ṭanpuina nên rilru thlamuanna leh hahdamna nasa tak ka nei tawh a ni,” tiin a sawi. Tûnah Stephen-a chu kohhran rawngbâwltu a ni a, a nupui pawhin kum tam tak chhûng regular pioneer niin rawng a bâwl a ni. A awmna kohhran upate chuan: “Stephen-a chu mi nunnêm tak, taima tak, leh mi inngaitlâwm tak a ni,” tiin an sawi. A thinur pawh an hmu ngai lo tih an sawi bawk. Stephen-a chuan a mizia a thlâk theih avângin a chapo lo va. Heti hian a sawi a ni: “Ka mizia thlâk thleng tûrin Jehova ṭanpuina pawm lo ta ila chuan hêng malsâwmna duhawm takte hi ka nunah a thleng lo vang,” tiin.

13. Engvângin nge thinurna chu a hlauhawm? Chumi chungchângah Bible-in eng nge min vaukhân?

 13 Bible chuan thinurna te, ṭawng chaltlai tak hmante, leh ânnate chu pumpelh tûrin min vaukhân a. (Ephesi 4:31) Chûngte chuan râwng taka thiltih a thlen fo ṭhîn a ni. Tûn laia mi tam tak chuan thinurna leh nunrâwnna hi thil pângngai takah an ngai a. Mahse, chutiang nun dân chuan min Siamtu a chawimawi lo a ni. Kan unau tam tak chuan an nungchang an thlâk danglam a, mihring thara an inthuam a ngai a ni.—Sâm 37:8-11 chhiar rawh.

14. Mi nunrâwng tak chu mi inngaitlâwm tak a ni thei em?

14 Unau Hans-a chu Austria rama kohhran upa pakhat a ni a. A kohhrana kohhran upate râwnkhâwmtu chuan: “Ani hi i hmuh thei azawnga mi inngaitlâwm berte zînga mi a ni,” tiin a sawi. Mahse, Hans-a chu engtik lai pawha inngaitlâwm a ni hran lo. A tlêirawl chhuah chuan zû a in nasat êm avângin a nunrâwng ṭan a. Zû a ruih ṭum chuan a thinur êm avângin a bialnu chu a that a ni. Lung ina kum 20 chhûng tâng tûra tih a ni a, lung ina khung a nihna chuan a mizia a thlâk danglam chuang lo. A hnuah a nuin amah va tlawh tûrin upa pakhat a ngên a, tichuan Hans-a chuan Bible a zir ṭan ta a ni. Ani chuan: “Ka mize hlui bânsan chu ka tân harsa tak a ni. Min tichaktu Bible chângte chu: ‘Mi suaksual chuan a awm dân chu bânsan sela,’ tih Isaia 55:7 leh ‘Nangni ṭhenkhat chutiang mi in nih ṭhin kha,’ tia nun kawng sual bânsantute chungchâng sawina 1 Korinth 6:11-na hi a ni. Jehova’n a thlarau thianghlim hmangin mize thara inthuam tûrin  kum tam tak chhûng min ṭanpui,” tiin a sawi. Hans-a chu lung ina a tân laiin baptisma a chang a, lung inah kum 17 leh a chanve a awm hnuah chhuah a ni ta a ni. Ani chuan: “Jehova zahngaihna leh ngaihdamna avângin ka lâwm tak zet a ni,” tiin a sawi.

15. Mihring hlui pêng dang pakhat chu eng nge ni? Bible-in chumi chungchâng eng nge a sawi?

15 Dâwtsawi hi mihring hlui pêng dang pakhat a ni bawk a. Entîr nân, mi tam tak chuan chhiah an chawi loh nân emaw, an thil tihsual laka mawh an phurh loh nân emaw dâwt an sawi ṭhîn a ni. Mahse, Jehova chu “thutak Pathian” a ni a. (Sâm 31:5) Chuvângin, Pathian chuan amah betu zawng zawng chu “thu dik tak sawi” tûr leh “dâwt” sawi lo tûrin a phût a ni. (Ephesi 4:25; Kolossa 3:9) A zahthlâk hunah leh a harsat hunah pawh, thu dik kan sawi tûr a ni tih a chiang hle.—Thufingte 6:16-19.

AN DO HNEH THEIH DAN

16. Mihring hlui hlîp tûrin engin nge min ṭanpui ang?

16 Mahni chakna rinchhanin mihring hlui hlîp chu thil theih a ni lo va. Sakura-i te, Ribeiro-a te, Stephen-a te, leh Hans-ate chuan an nun kawng hlui thlâk danglam tûrin theih tâwp an chhuah a ni. Anmahni ṭanpuitu chu Pathian Thu thiltihtheihna leh a thlarau thianghlim a ni a. (Luka 11:13; Hebrai 4:12) Chu thiltihtheihna hlâwkpui tûr chuan nî tin Bible kan chhiar a, kan ngaihtuah a ngai a, chu bâkah, kan thu zirte nunpui tûra finna leh chakna nei tûrin kan ṭawngṭai reng a ngai bawk. (Josua 1:8; Sâm 119:97; 1 Thessalonika 5:17) Inkhâwmna atâna kan inbuatsaih a, kan telte hian Pathian Thu leh a thlarau thianghlim chu kan hlâwkpui bawk a ni. (Hebrai 10:24, 25) Magazine te, JW Broadcasting te, JW Library te leh, jw.org te ang chi Jehova inawpna pâwlin min buatsaih hmanruate chu a tam thei ang bera hman kan duh a ni.—Luka 12:42.

Engtin nge mihring hlui chu kan hlîp theih? (Paragraph 16-na en rawh)

17. A dawta thuziakah eng nge kan sawiho vang?

17 Kristiante’n Jehova tilâwm tûra an hlihthlâk leh an bânsan ngai thil chîn ṭha lo tam tak kan sawi tawh a. Mahse, chu aia tam kan tih a ngai a ni. Mihring thara kan inthuam a ngai a, chu chu kan nun kawng pêng pakhatah kan chantîr tûr a ni. A dawta thuziakah chutianga kan tih theih dân kan sawiho vang.

^ par. 7 He thuziaka hming ṭhenkhat chu thlâk a ni.

^ par. 8 Pathian Hmangaihnaah Chuan Invawng Ṭha Rawh, tih lehkhabu thu belhna, phêk 218-219-na chu en rawh.