A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  August 2017

Dawhthei Takin I Nghâk Peih Ang Em?

Dawhthei Takin I Nghâk Peih Ang Em?

“Nangni pawh dawhthei takin awm rawh u.”—JAKOBA 5:8 New World Translation.

HLA: 35, 139

1, 2. (a) “Eng chen nge ni ang?” tih zawhna hi engvânga zâwt nge kan nih? (b) Engvângin nge hmân laia mi rinawmte entawn tûr siam chuan tûn laiah min tihchak theih?

“ENG chen nge ni ang?” He zawhna hi zâwlnei rinawm Isaia leh Habakukate chuan an zâwt a. (Isaia 6:11; Habakuka 1:2) Lal Davida’n Sâm 13-na a ziah khân, chu zawhna bawk chu vawi li lai a zâwt a ni. (Sâm 13:1, 2) Isua Krista pawhin rinna nei lo mite hual vêla a awm khân, “Eng chen nge?” tiin a zâwt a. (Matthaia 17:17) Tûn laiah keini pawhin chu zawhna bawk chu kan zâwt ve mai thei.

2 “Eng chen nge ni ang?” tih zawhna hi engvânga zâwt nge kan nih? Kan chungah thil dik lo engemaw a thlen vâng a ni thei a. Kan dam loh vâng emaw, kan kum upat vâng emaw pawh a ni thei. ‘Ni hnuhnûng hun khirh taka’ kan awm avângin kan rilru a hah hle thei bawk. (2 Timothea 3:1) A  nih loh leh, kan chhehvêla mite rilru put hmang ṭha lo chuan min tichauvin, min tilunghnual pawh a ni thei. A chhan chu eng pawh ni se, Jehova’n hmân laia chûng zawhna zâwttu a chhiahhlawh rinawmte chu thiam loh a chantîr lo tih hriatna chuan min tichak hle a ni.

3. Dinhmun harsa taka kan awm hunah engin nge min ṭanpui thei?

3 Tawrh chhuah harsa tak dinhmuna kan awm hunah engin nge min ṭanpui thei? Isua unaupa Jokoba chu: “Lalpa lo kal hma loh zawng dawhthei takin awm rawh u,” tia min hrilh tûrin thlarauva thâwk khum a ni a. (Jakoba 5:7, NW) Chuvângin, dawhtheihna kan neih ṭheuh a ngai a ni. Mahse, dawhtheihna chu eng nge ni a, engtin nge chu mize duhawm tak chu kan lantîr theih?

DAWHTHEIHNA CHU ENG NGE NI?

4, 5. (a) Dawhtheihna chu eng nge ni a, chu chu engtin nge kan neih theih? (b) Engtin nge Jakoba’n dawhtheihna chu a hrilhfiah? (A thupui chunga milem en rawh.)

4 Bible chuan dawhtheihna chu Pathian thlarau thianghlim aṭanga lo awm niin a sawi a. Pathian ṭanpuina tel lo chuan dinhmun harsa tak kâra dawhtheihna neih chu mihring ṭha famkim lote tân thil harsa tak a ni thei a ni. Dawhtheihna chu Pathian thilthlâwn pêk a ni a, chu chu kan lantîr chuan Jehova leh mi dangte kan hmangaihzia lantîrna a ni ang. Dawhtheihna kan neih loh chuan Pathian leh mi dangte nêna kan inkâra hmangaihna a dai thei a. (1 Korinth 13:4; Galatia 5:22) Dawhtheihnaah chuan eng nge tel? Rilru put hmang ṭha nei chunga dinhmun harsa takte tawrh chhuahna a tel a ni. (Kolossa 1:10-12; Jakoba 1:3, 4) Harsatna engpawh nei mah ila, dawhtheihna chuan Pathian chunga rinawm tlat tûrin min ṭanpui thei a. Hrehawm kan tawrh hunah pawh lungnih lohna nei lo tûrin min ṭanpui bawk ang. Nghah peihna kan neih a ngai tih Bible-in a sawi a. Chu chu Jakoba 5:7, 8 aṭanga kan zir theih thil pawimawh tak a ni. (Chhiar rawh.)

5 Jehova hma lâk hun tûr chu engvânga nghâk peih tûr nge kan nih? Zirtîr Jakoba chuan kan dinhmun chu lo neitu dinhmun nên a khaikhin a. Lo neitu chuan thlaite chîngin thawkrim hle mah se, sik leh sa a thunun thei lo va, a thlaite chu ṭhang lian thuai tûrin a thunun thei lo. “Lei rah hlu tak chu” dawhthei taka a nghah a ngai a ni. Chutiang bawkin, Jehova thutiamte a thlen famkim hun kan nghah laiin, kan thunun theih loh thil tam tak a awm a. (Marka 13:32, 33; Tirhkohte 1:7) Lo neitu ang bawkin dawhthei taka kan nghah a ngai a ni.

6. Zâwlnei Mika entawn tûr siam aṭangin eng nge kan zir theih?

6 Tûn laia kan tawrh ang bawkin zâwlnei Mika chuan dinhmun harsa tak a tâwk a. Ani chu Lal Ahaza hun laia awm a ni a. Ahaza chu lal sual tak a nih avângin, ram chhûngah eirûkna a tam hle a ni. Thil awm dânte a ṭhat loh êm avângin Bible chuan mite chu ‘thil ṭha lo ti tûrin an themthiam’ hle tih a sawi. (Mika 7:1-3 chhiar rawh.) Mika chuan dinhmun chu a tidanglam thei lo tih a hria a. Chuvângin, eng nge a tih ang? Ani chuan: “Kei erawh chuan LALPA lam ka en ang a; ka chhandamna Pathian  chu ka nghâk ang: ka Pathian chuan mi ngaithla dâwn a ni,” tiin min hrilh a. (Mika 7:7) Mika ang bawkin, ‘nghah peihna’ kan lantîr ve a ngai a ni.

7. Engvângin nge Jehova thutiamte thlen famkimna nghah mai aia tam kan tih a ngaih?

7 Mika neih ang rinna kan neih chuan Jehova nghah peihna kan nei ngei ang. Kan dinhmun chu lung in tâng pakhatin tihhlum a nih hun tûr a nghâk ang a ni lo. Lungin tâng chuan chu mi nî chu beisei taka nghâk ni lovin, a nghâk satliah mai a ni. Chu chu kan thil nghah nên chuan a inang lo hle a ni! Jehova’n chatuan nunna min pêk a tiam chu a hun dik takah a thleng dâwn tih kan hriat avângin ani chu duh vâng rengin kan nghâk a ni! Chuvângin, ‘hlim takin chhelna leh dawhtheihna tinrêng’ kan nei a. (Kolossa 1:10-12) Kan nghah laiin, Jehova chu hma la chak tâwk lo anga sawisêl lo tûrin kan fîmkhur a. Kan fîmkhur loh chuan Pathian a lâwm lo vang.—Kolossa 3:12.

DAWHTHEIHNA KAWNGA ENTAWN TUR ṬHATE

8. Hmân laia mi rinawm a hmei a pate hnên aṭangin eng nge kan zir theih?

8 Engin nge nghah peihna nei tûrin min ṭanpui ang? Jehova thutiamte thlen famkimna dawhthei taka nghâktu hmân lai mi rinawm a hmei a pate chungchâng kan ngaihtuah thei a. (Rom 15:4) An entawn tûr siamte kan ngaihtuah chuan, eng chen nge an nghah a, engvânga nghâk duh nge an nih a, an dawhtheihna avânga Jehova’n mal a sâwm dânte chu hriat reng a ṭha a ni.

Abrahama chuan a tupa Esauva leh Jakoba te pian hun chu kum tam tak a nghah a ngai (Paragraph 9, 10-na en rawh)

9, 10. Abrahama leh Sari te chuan eng anga rei nge Jehova chu an nghah?

 9 Abrahama leh Sari te entawn tûr siam hi han ngaihtuah teh. Anni chuan “rinna leh dawhtheihna” an lantîr avângin “thutiamte” an rochun a. Abrahama chuan “dawhthei taka a nghah hnuah” Jehova’n mal a sâwmin, hnam lian tak paa siam tûra a tiam thu Bible-in min hrilh a. (Hebrai 6:12, 15, NW) Engvângin nge Abrahama tân dawhtheihna neih a ngaih? Chu thutiam thleng famkim tûr chuan hun engemaw chên a ngaih dâwn vâng a ni. B.C.E. 1943, Nisan ni 14-ah, Abrahama leh Sari te chu an chhiahhlawh zawng zawngte nên Euphrates Lui kânin, Ram Tiamah an lût a ni. Mahse, Abrahama chuan a fapa Isaaka piang tûrin kum 25 a nghah a ngai a, kum 60 dang a nghah hnuah a tupa Esauva leh Jakoba an piang a ni.—Hebrai 11:9.

10 Abrahama chuan Ram Tiam chu eng chen chiah nge a rochun? Jehova chuan “hetah hi chuan engmah hmun luah tûr, a ke nghahna tham pawh a pe lo va; nimahsela amah leh a hnua a thlahte thlenga ro tûrin pêk a tiam a, fa a la neih hma pawhin,” tiin Bible chuan a sawi a. (Tirhkohte 7:5) Abrahama’n Euphrates Lui a kân aṭanga kum 430 a thlen hmâ chu, a thlahte chu, chu rama chêng tûr hnam an la ni lo.—Exodus 12:40-42; Galatia 3:17.

11. Engvângin nge Abrahama chuan nghah peihna a neih a, dawhtheihna a neih avângin eng malsâwmnate nge a dawn ang?

11 Abrahama chuan Jehova’n a thutiamte a vawng reng dâwn tih a hriat chian avângin nghah chu a duh a. Jehova rinna a nei a ni. (Hebrai 11:8-12 chhiar rawh.) Abrahama chuan a thih hmain Pathian thutiam zawng zawng thlen famkimna chu hmu vek lo mah se, hlim takin a nghâk a. Chuvângin, lei paradis-a a thawhleh huna a hlim dân tûr chu han mitthla teh. Bible hmun tam taka a nun kawng chanchin leh a chhûngkaw chanchinte a chhiar chuan mak a ti ngei ang. * (Footnote en rawh.) Thutiam Messia chungchânga Jehova thiltum thlen famkimnaa a chanvo pawimawh dânte a hriat huna a hlim dân tûr chu han ngaihtuah teh! Chûng malsâwmnate chu nghah manhla tak niin a ngai ngei ang tih kan chiang thei a ni.

12, 13. Engvângin nge Josefa tân dawhtheihna neih a ngaih a, eng rilru put hmang ṭha nge a neih?

12 Abrahama tu-chhuan Josefa pawhin dawhtheihna neih a duh a. Ani chuan dik lo taka rorêlnate a tuar a. A hmasain, kum 17 mi a nih laiin a unaute’n salah an hralh a. A hnuah, a pu nupuiin pawngsual tum anga dâwta a puh avângin, lung inah khung a ni. (Genesis 39:11-20; Sâm 105:17, 18) Josefa chu Pathian chhiahhlawh rinawm ni mah se, malsâwmna dawn aiin hremna a tuar zâwk niin a lang. Mahse, kum 13 a liam hnu chuan thil engkim a inthlâkthleng vek a ni. Josefa chu lung in ata chhuah a ni a, Aigupta rama rorêltu thiltithei ber pahnihna a rawn ni ta a ni.—Genesis 41:14, 37-43; Tirhkohte 7:9, 10.

Jehova’n thil engkim a thunun tih leh a malsâwmna chu nghah manhla tak a ni tih Josefa’n a hria

13 Chutianga dik lo taka rorêlna chuan Josefa chu a tithinrim em? Chutih lai chuan Jehova’n a thlahthlam niin a ngai em? Ngai lo ve. Josefa chuan dawhthei  takin a nghâk a. Engin nge ani chu ṭanpui? Jehova a rinna chuan a ṭanpui a. Thil engkim hi Jehova’n a thunun thei tih a hre thiam a ni. Chu chu a unaute hnêna: “Hlau suh u: Pathian aiawh em ka nih? Nangni zawngin ka chungah thil sual tih in rilrûk a; nimahsela Pathian chuan vawiin ang hian mi tam tak nungdama chhanhimna tûra thil ṭhaa chantîr a rilrûk zâwk a lo ni si a,” tia a thusawi aṭangin kan hre thei a ni. (Genesis 50:19, 20) Josefa chuan Jehova malsâwmnate chu nghah manhla tak a ni tih a hria a ni.

14, 15. (a) Engvângin nge Davida dawhtheihna chuan kan rilru a hneh? (b) Dawhthei taka nghâk tûrin Davida chu engin nge ṭanpui?

14 Lal Davida pawhin rorêl dik lohna tam tak a tuar a. Jehova chuan Davida tleirâwl laiin Israel lal ni tûrin hriak a thih a. Mahse, Davida chuan a chipuite tâna lal ni tûrin kum 15 a nghah a ngai a ni. (2 Samuela 2:3, 4) A nghah chhûng chuan amah thah tumtu Lal Saula hnên aṭanga tlân chhiain, a biru a. * (Footnote en rawh.) Chuvângin, Davida chu a inah pawh a awm thei lo a ni. Ram dang, a nih loh leh thlalêr pûkahte a awm a ngai a. A tâwpah, Saula chu indonaah tihhlum a ni ta a. Mahse, Davida chuan Israel rama lal ni tûrin kum sarih aia tam a nghah a la ngai a ni.—2 Samuela 5:4, 5.

15 Engvângin nge Davida chuan dawhthei taka nghah chu a inhuam? “Eng chen nge?” tia vawi li lai a zawhna Sâm bu vêkah chuan chhânna a pe a ni. “Nimahsela kei zawngin i ngilneihna hi ka ring a ni: i mi chhandamnaah hian ka thinlung a lâwm ang: ka chunga ṭha taka a tih tâk avângin LALPA chawimawiin hla ka sa ang,” tiin a sawi a. (Sâm 13:5, 6) Jehova’n a hmangaih tih leh a chungah a rinawm reng dâwn tih a hre bawk. Jehova’n tûn hmaa a ṭanpui dânte a ngaihtuah a, a hrehawm tawrhte a tih tâwpsak hun tûr pawh a beisei a ni. Davida chuan Jehova malsâwmnate chu nghah manhla tak a ni tih a hria.

Jehova chuan a tih duh loh thil engemaw ti tûrin min phût lo

16, 17. Engtin nge Pathian Jehova leh Isua Krista chuan nghah peihna kawngah entawn tûr ṭha an siam?

16 Jehova chuan a tih duh loh thil engemaw ti tûrin min phût lo va. Ani chuan nghah peihna kawngah entawn tûr ropui ber a siam a ni. (2 Petera 3:9 chhiar rawh.) Entîr nân, tûn hmâ kum sâng tam tak kalta khân, Eden huanah Setana chuan Jehova chu dik lo takin a puh a. Jehova chuan a hming tihthianghlim a nih hun tûr chu dawhthei takin a “nghâk” a ni. Chu chuan “amah nghâktute” tân malsâwmna ropui tak a thlen ang.—Isaia 30:18.

17 Isua pawhin nghah peihna a nei a. Leia a awm lai khân, thih thlengin a rinawm a ni. C.E. 33-ah, a inthawina hlu tak chu vâna Jehova hnênah a hlân a. Mahse, Lal nia rorêl ṭan tûrin kum 1914 a thlen hmâ  loh chu a nghah a ngai a ni. (Tirhkohte 2:33-35; Hebrai 10:12, 13) Chu bâkah, Isua hmêlma zawng zawngte chu Kum Sâng Rorêl a tâwp hnuah chauh tihboral an ni ang. (1 Korinth 15:25) Chu chu hun rei tak a ni. Mahse, malsâwmnate chu nghah manhla tak a ni ang.

ENGIN NGE MIN ṬANPUI ANG?

18, 19. Engin nge nghah peihna nei tûra min ṭanpui ang?

18 Jehova chuan dawhthei taka nghah peihna nei tûrin min duh tih a chiang hle a. Chutianga ti tûrin engin nge min ṭanpui ang? Pathian thlarau thianghlim kan dîl a ngai a. Dawhtheihna chu Pathian thlarau thianghlim aṭanga lo awm a ni tih hre reng rawh. (Ephesi 3:16; 6:18; 1 Thessalonika 5:17-19) Chuvângin, dawhtheihna nei tûra min ṭanpui tûrin Jehova hnênah ngên ang che!

19 Pathian thutiamte thlen famkim hun chu dawhthei taka nghâk tûra Abrahama te, Josefa te, leh Davida te ṭanpuitu chu hre reng bawk ang che. Chu chu Jehova an rinna leh rinchhanna a ni a. Mahni leh an thil duhte chauh an ngaihtuah lo va. An tâna thil a inher chhuah dânte kan ngaihtuah hian nghah peihna lantîr tûrin min tihchak ve ngei ang.

20. Eng tih nge kan tum tlat ang?

20 Chuvângin, hrehawm kan tuar chung pawhin “nghah” peihna lantîr kan tum tlat a. “Lalpa, eng chen nge ni ang?” tia kan zawh châng pawh a awm thei a. (Isaia 6:11) Mahse, Pathian thlarau thianghlim ṭanpuinain, zâwlnei Jeremia kan entawn thei a: “LALPA chu ka chanpual a ni, ka nunnain a ti a, chuvângin amah chu ka beisei ang,” tiin kan sawi thei a ni.—Ṭah Hla 3:21, 24.

^ par. 11 Abrahama nun kawng chu Genesis bung 15-naah târ lan a ni a. Kristian Grik Pathian Lehkha Thu ziaktute chuan Abrahama chu vawi 70 aia tam an sawi lang a ni.

^ par. 14 Jehova chuan Saula chu kum hnih aia tam a lal hnuah a hnâwl ta a. Chuti chung pawhin a thih thlengin kum 38 aia tam a la lal zawm zêl a ni.—1 Samuela 13:1; Tirhkohte 13:21.