A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Zalênna Pathian Jehova Rawng Chu Bâwl Rawh

Zalênna Pathian Jehova Rawng Chu Bâwl Rawh

“Lalpa thlarau awmna apiangah chuan zalênna a awm ṭhîn.”—2 KORINTH 3:17.

HLA: 11, 137

1, 2. (a) Engvângin nge sal tânna leh zalênna thu chu tirhkoh Paula hun laia thu pawimawh tak a nih? (b) Paula’n zalênnna dik tak lo Chhuahna chu tu nge nia a sawi?

KRISTIAN hmasate chu Rom Lalramah an awm a, chuta mite chuan dân te, rorêlna te, leh zalênna an neihte chu an chhuang hle a. Mahse, chu lalram thiltithei tak chuan hna hahthlâk tam tak thawk tûrin salte a rinchhan a ngai a ni. Tûn hma chuan Rom Lalrama mi 3 zêla 1 chu sal an ni a. Sal tânna leh zalênna chu Kristiante pawh tiamin, mi nâwlpuite tâna thu pawimawh tak a ni tih a chhiang hle.

2 Tirhkoh Paula chuan zalênna chungchâng a ziak fo va. Mahse, he khawvêl buainate chinfel tum a ni lo, chutih hun laia mi tam tak chuan buainate chinfel chu an duh a ni. Mahse, Paula leh a Kristian unaute chu mite hnêna Pathian Ram chanchin ṭha hrilhnaah leh Krista Isua tlanna inthawina hlutzia hre thiam tûra ṭanpuinaah an thawkrim hle zâwk a ni. Paula chuan a Kriatian unaute hnênah zalênna dik tak lo  Chhuahna chu a hrilh a. Ani chuan: “Lalpa chu thlarau a ni a; Lalpa thlarau awmna apiangah chuan zalênna a awm ṭhîn,” tiin a ziak a ni.—2 Korinth 3:17.

3, 4. (a) Paula chuan 2 Korinth 3:17 hma lama Bible chângahte chuan eng thute nge a sawi? (b) Jehova hnên aṭanga lo kal zalênna nei tûrin eng nge kan tih ngai?

3 Korinth khuaa mite hnêna a lehkha thawn pahnihnaah tirhkoh Paula chuan Mosia chu Jehova vântirhkoh hmaa a lan hnua Sinai Tlâng aṭanga a lo chhuk laia a chunga thilthleng chungchâng a sawi a. A hmai vun chu a lo êng chhuak a ni! Israel mite’n Mosia an hmuh chuan an hlau va, ani chuan a hmai chu hmaikhuhnain a khuh ta a. (Exodus 34:29, 30, 33; 2 Korinth 3:7, 13) Paula chuan: “An thinlung chu Lalpa lama a hawi tik apiangin khuhna chu lâk bo a ni tawh ang,” tiin a hrilhfiah a ni. (2 Korinth 3:16) Paula sawi tum chu eng nge ni?

4 Thil zawng zawng Siamtu Jehova chauhvin chin tâwk nei lo, zalênna pumhlûm a nei tih thuziak hmasaah kan hre tawh a. Chuvângin, Jehova awmnaah leh “Lalpa thlarau awmna apiangah” zalênna a awm chu thil inâwm tak a ni. Mahse, Paula chuan chu zalênna chu neih kan duh chuan Jehova lam kan hawi tûr a ni a ti a. Chu chu Pathian nêna inlaichînna ṭha tak kan neih a ngai tihna a ni. Thlalêra an awm laiin Israelte chuan Jehova thlîr dân aṭang ni lovin, mihring thlîr dân aṭang chauhvin thil an thlîr a. An thinlung leh an rilru chu khuhtu awm ang a ni. Zalênna thar an neih chu an châkna phuhhrûk nân hman an duh a ni.—Hebrai 3:8-10.

Lung in tâng tuemaw pawhin zalênna a nei thei

5. (a) Jehova thlarau chuan eng ang zalênna nge min pêk? (b) Sal emaw, lung in tâng emawin Jehova hnên aṭanga lo kal zalênna chu a nei thei tih engtin nge kan hriat? (c) Eng zawhnate nge kan chhân ang?

5 Jehova thlarauvin min pêk zalênnaah chuan sal nihna laka zalênna aia tam a tel a. Chu thlarau chuan mihringte pêk theih aia tam zalênna a pe thei a ni. Sual leh thihna bâwih ata min zalêntîr bâkah, biakna dik loh leh a chîn dân thilte lak ata pawh min zalêntîr bawk. (Rom 6:23; 8:2) Zalênna ropui a va ni tak êm! Sal emaw, lung in tâng emaw pawhin chu zalênna chu a nei thei a. (Genesis 39:20-23) Unau Nancy Yuen-i leh Unau Harold King-a te chu an rinna avânga kum rei tak lung ina khung ni mah se, chu zalênna chu an nei a ni. An thiltawn chungchâng an sawite chu JW Broadcasting-ah i en thei a ni. (INTERVIEWS AND EXPERIENCES > ENDURING TRIALS tih hnuaiah en rawh.) Tûna zawhna pahnih kan chhân tûrte chu: Kan zalênna chu kan tân a hlu tak zet tih engtin nge kan lantîr theih? Engtin nge kan zalênna chu fing taka kan hman theih? tih hi a ni.

PATHIAN MIN PEK ZALENNA HI HLU TAK A NI

6. Israel mite chuan Jehova pêk zalênna chungah an lâwm lo tih engtin nge an lantîr?

6 Thilpêk hlu tak kan dawn hian min petu chungah kan lâwm hle a. Israelte erawh chuan Jehova pêk zalênna chungah lâwmna  an nei lo. Jehova’n Aigupta aṭanga a chhuah zalên hnu thla rei lo têah tûn hmaa an ei ṭhinte leh an in ṭhinte chu an châk ngawih ngawih a. Jehova’n an ei atâna a pêk manna chu an sawisêl a. Aigupta rama kîr leh an duh hial a ni! An tân chuan, ‘sangha te, fanghmate, hmazilte, purûn hel ei mite, rûn bâlte, purûn vârte’ chu Jehova’n amah an biak nâna a pêk zalênna aiin an ngai pawimawh zâwk a. An chungah Jehova a thinrim hle pawh hi thil mak a ni lo. (Numbers 11:5, 6, 10; 14:3, 4) Chu chuan zir tûr pawimawh tak min pe a ni.

7. Paula chuan 2 Korinth 6:1-a a thurâwn pêk chu engtin nge a nunpui a, engtin nge kan nunpui ve theih?

7 Paula chuan Jehova’n a Fapa, Isua Krista hmanga min pêk zalênna avânga lâwmna lantîr theihnghilh lo tûrin Kristian zawng zawngte chu min vaukhân a. (2 Korinth 6:1 chhiar rawh.) Paula chu ṭha famkim lo, sual leh thihna bâwiha awm a ni a, chu chuan a rilru a tihah hle a ni. Chuti chung pawhin, ani chuan: “Isua Krista kan Lalpa avângin Pathian hnênah lâwmthu ka sawi a ni,” tiin a sawi a. Engvânga chutianga sawi nge a nih? A Kristian unaute chu: “Krista Isuaa Nunna thlarau dân chuan sualna leh thihna dân ata chu mi tichhuak tawh si a,” tiin a hrilhfiah a ni. (Rom 7:24, 25; 8:2) Paula ang bawkin, Jehova’n sual leh thihna bâwih ata min zalêntîr tih kan theihnghilh ngai tûr a ni lo. Tlanna avângin chhia leh ṭha hriatna thiang tak neiin Pathian rawng kan bâwl thei a, chu chuan hlimna dik tak min pe a ni.—Sâm 40:8.

Zalên taka i duh thlan theihna chu Jehova duhzâwng tih nân nge i hman a, i duhzâwng tih nân? (Paragraph 8-10-na en rawh)

8, 9. (a) Kan zalênna hman dân chungchângah tirhkoh Petera’n eng vaukhânna nge min pêk? (b) Engtin nge miin a zalênna chu a dik lo zâwnga a hman theih?

8 Jehova hnênah kan lâwmzia sawi mai aiin, kan zalênna chu a dik lo zâwnga hmang lo tûrin kan fîmkhur zâwk tûr a ni. Entîr nân, tirhkoh Petera chuan kan zalênna chu thilsual ti tûra chhuanlam  siam nâna hmang lo tûrin min vaukhân a. (1 Petera 2:16 chhiar rawh.) He vaukhânna hian thlalêra Isarel mite chunga thilthleng chu min hriat chhuahtîr a ni. He vaukhânna hi tûn laiah kan mamawh zâwk pawh a ni mai thei. Setana leh a khawvêl chuan silh tûr, ei tûr, in tûr, leh thil duhawm tam takte min hmuhtîr a. Thiam taka fakna tichhuaktute chuan mi hmêl ṭha tak takte chu hmangin kan mamawh tak tak loh thilte lei ṭûl niin min ngaihtîr a. Kan zalênna chu a dik lo zâwnga hmang tûrin khawvêl chuan awlsam takin min bum thei a ni.

9 Petera thurâwn hi duh thlanna kan siam ngai zirna te, hna te, leh eizawnnate ang chi nuna kan ngaih pawimawh tûrte atân pawh a ṭangkai a. Entîr nân, ṭhalaite chu university ṭha bera an kal theih nân nasa taka thawkrim tûra nawr luih an ni a. Mi tam takin ṭhalaite chu zirna sâng zâwk an ûm chuan hna ṭhate an hmu ang a, sum tam tak an la lût ang a, mite zah an kai ang tiin an hrilh a. Chûng mite chuan ṭhalaite hnênah university zir chhuakte chu high school chauh zirte aiin sum an la lût tam zâwk nia rintîrtu thute an hrilh mai thei a ni. Ṭhalaite tân chuan zirna sâng ûm chu dam chhûnga nun nghawng theitu duh thlanna an siam hunah thil ṭha tak angin a lang mai thei a. Mahse, ṭhalaite leh an nu leh pate chuan eng nge an hriat reng ang?

10. Mi mal thila duh thlanna kan siam hunah eng nge kan hriat reng ang?

10 Mi ṭhenkhat chuan chûngte chu mi mal tih tûr a nih avângin an chhia leh ṭha hriatna a khawih pawi loh phawt chuan duh thlang tûra zalênna nei niin an inngai mai thei a. Anni chuan Paula thusawi: “Engah nge mi dang chhia leh ṭha hriatnain ka zalênna a sawisêl ni?” tih hi an ngaihtuah mai thei a ni. (1 Korinth 10:29) Zirna leh eizawnna chungchângah duh thlan theihna nei mah ila, kan zalênnain chin tâwk a nei tih leh kan thu tlûkna siamin sawhkhâwk a nei tih kan hre reng tûr a ni. Paula chuan: “Thil engkim tih a thiang a, nimahsela thil engkim tih a ṭha kher lo. Thil engkim tih a thiang a, nimahsela thil engkim tihin mi a siam ṭha lo,” tiin a sawi. (1 Korinth 10:23) Chuvângin, mi mal thila duh thlanna siam tûrin zalênna nei mah ila, kan tih duh chu thil pawimawh ber a ni lo a ni.

JEHOVA RAWNG KAN BAWL HUNAH FING TAKIN ZALENNA KAN HMANG

11. Jehova’n min chhuah zalên chhan chu eng nge ni?

11 Petera’n kan zalênna chu a dik lo zâwnga hmang lo tûra min vaukhân khân, dik taka hman dân chu “Pathian bâwiha awm” hi a ni a ti a. Sual leh thihna bâwih ata min chhuah zalên tûra Jehova’n Isua a hman chhan chu A rawngbâwl tûra kan nun pumhlûm kan hman theih nân a ni.

Kan zalênna hman dân ṭha ber chu Jehova rawngbâwl tûra kan hun leh thate a tam thei ang bera hman hi a ni

12. Nova leh a chhûngte’n kan tân eng entawn tûr nge an siam?

12 Kan zalênna hman dân ṭha ber chu Jehova rawngbâwl tûra kan hun leh thate a tam thei ang bera hman hi a ni a. Chutianga tihna chuan khawvêl thiltumte leh mahni duhzâwngte chu kan nunah thil pawimawh ber nihtîr lo tûrin min ṭanpui ang. (Galatia 5:16) Nova leh a chhûngte thiltih hi han ngaihtuah teh. Inpâwngnêkna leh nungchang bawlhhlawhna khawvêlah an nung a. Mahse, an chhehvêla mite thiltumte leh thiltihnaahte a inhnamhnawih  lo a ni. Jehova’n ti tûra a pêk hnaah an buai reng zâwk a. Lawng an tuk a, an tân leh ramsate tân ei tûr an la khâwm a, Tuilêt tûr thu mite an vaukhân a ni. “Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a.” (Genesis 6:22) Chuvângin, Nova leh a chhûngte chu, chu khawvêl tihtâwp a nih khân an dam khawchhuak a ni.—Hebrai 11:7.

13. Eng ti tûrin nge Jehova’n thu min pêk?

13 Jehova’n tûn laiah eng ti tûrin nge thu min pêk? Isua zirtîrte kan nih angin, Pathianin thu hril tûrin thu min pe tih kan hria a. (Luka 4:18, 19 chhiar rawh.) Tûn laiah, Setana chuan mi tam zâwkte mit a tihdêlsak avângin, anni chuan sakhaw dik lo, sum leh pai, leh politics kal phungte bâwihah an awm tih an inhre lo va. (2 Korinth 4:4) Isua angin, keini pawh mite’n zalênna Pathian Jehova hria a, chibai bûk tûrin ṭanpui theihna chavo kan nei a ni. (Matthaia 28:19, 20) Mite hnêna thu hrilh chu thil awlsam a ni lo. Hmun ṭhenkhatah, mite’n Pathian ngaihsakna an nei lo va, mi ṭhenkhat chu an hnêna thu kan hrilh hian an thin a rim hial a ni. Mahse, Jehova’n thu hril tûra thu min pêk avângin, heti hian kan inzâwk tûr a ni: ‘Jehova rawngbâwlnaah tam lehzuala tel tûrin ka zalênna ka hmang thei ang em?’ tiin.

14, 15. Jehova mite chuan eng ti tûrin nge thu tlûkna an siam? (A thupui chunga milem en rawh.)

14 Jehova mite chuan he khawvêl tâwpna a hnai tawh hle tih an hria a, nun tisamkhaia pioneer thawk ṭan tûra thu tlûkna an siam chu a phûrawm hle. (1 Korinth 9:19, 23) Mi ṭhenkhat chuan an awmna hmunah pioneer an thawk a, mi dangte chuan ṭanpui ngai kohhranahte an insawn a ni. Kal ta kum nga chhûng khân, mi 2,50,000 aia tamte chuan pioneer an thawk ṭan a, tûnah chuan mi 1,100,000 aia tamin regular pioneer an thawk a ni. Mi tam takin Jehova rawngbâwl tûra an zalênna chutianga an hmang chu a va ropui tak êm!—Sâm 110:3.

15 An zalênna chu fing taka hmang tûrin anni chu engin nge ṭanpui? Ram hrang hranga kum 30 lai rawng lo bâwl tawh John-a leh Judith-i te hi han ngaihtuah teh. Anni chuan kum 1977-ah Pioneer Rawngbâwlna School neih ṭan a nih khân, zirlaite chu mamawh zualna hmuna insawn a, rawngbâwl tûra fuih kan nih thu an sawi a. Chu thiltum hlen thei tûr chuan, John-a leh Judith-i te’n an nun an tihsamkhai a ngai a. Chuvângin, John-a chuan a hna a thlâk reng a ni. A tâwpah, ram dangah thu hril tûrin an kal ta a. Ṭawng thar zirte, hnam dân thar leh sik leh sa mila nunte ang chi harsatnate tuar chhuak thei tûrin engin nge ṭanpui? Jehova hnênah an ṭawngṭai a, a ṭanpuina an rinchhan a ni. Kum tam tak chhûng chutianga Jehova rawngbâwl chu engtin nge an ngaih?  John-a chuan: “Ka thil hriat leh ka thiltawn azawnga thiltih ṭha berah ka tel niin ka inhria. Jehova chu hmangaihna pa a nih angin ka tân a tak lehzual a. Tûnah chuan Jakoba 4:8–a thu: ‘Pathian hnaih rawh u, tichuan anin a hnaih ang che u,’ tih awmzia chu ka hre thiam lehzual ta a ni. Ka lo zawn ṭhin nuna thiltum lungâwihthlâk tak chu ka hmu ta tih ka hria,” tiin a sawi.

16. Engtin nge mi sâng tam takte chuan an zalênna chu an hman?

16 John-a leh Judith-i te angin, ṭhenkhat chuan hun rei tak chhûng pioneer an thawk a. Mi dangte erawh chuan an dinhmunte avângin hun rei lote chhûng chauh pioneer an thawk thei a ni. Mahse, mi tam tak chu khawvêl hmun hrang hranga insaknaahte tlâwmngaia thawk tûrin an inpe a. Entîr nân, unau 27,000 vêlte chu New York, Warwick-a world headquarter saknaa ṭanpui tûrin an lo kal a. Ṭhenkhat chu chawlhkâr hnih emaw, thla rei lote emaw, kum khat emaw, a nih loh leh chu aia rei emaw thawk an awm a ni. Chûng kan unaute chu Warwick-a rawngbâwl tûrin nasa takin an inpe a ni. Zalênna Pathian Jehova fak leh chawimawi tûra zalênna hmangtute tân entawn tûr ṭha an va ni tak êm!

17. Tûnah kan zalênna chu fing taka kan hman chuan eng nge kan beisei theih?

17 Jehova kan hriatna leh amah kan biakna aṭanga kan neih zalênna avângin kan lâwm hle a. Kan thu tlûkna siamna hmangin kan zalênna chu kan hlut tak zet tih i lantîr ang u. A dik lo zâwnga hmang lovin, Jehova rawngbâwlnaah a tam thei ang berin i hmang ang u. Tichuan, he hrilh lâwkna: “Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tih hi a thlen famkim hunah Jehova tiam malsâwmnate chu kan dawng thei ang.—Rom 8:21.