A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Engvângin Nge Pathian Be Tûra Kan Inkhâwm?

Engvângin Nge Pathian Be Tûra Kan Inkhâwm?

“Inpâwlin, . . . ṭhahnemngai takin an awm reng a.” —TIRHKOHTE 2:42.

HLA: 20, 22

1-3. (a) Engtin nge Kristiante chuan inkhâwm an châkzia an târ lan? (A thupui chunga milem en rawh.) (b) He thuziakah hian eng nge kan sawiho vang?

CORINNA-I kum 17 mi a nihin, a nu chu man a ni a, labor camp hla taka tântîr a ni. A hnuah, ani pawh chu an in aṭanga mêl a sâng têla hla Siberia-ah hruai a ni a. Chutah chuan lovah hna thawkin, sal anga cheibâwl a ni. A châng chuan kawrlum pawh ha lovin, pâwn khawvawt takah hna thawhluihtîr a ni a. Chutiang a ni chung pawhin, Corinna-i leh unaunu dang pakhat chuan lova an hnathawh kalsana an inkhâwm theih nân an tih theih apiang ti tûrin thu tlûkna an siam a ni.

2 Corinna-i chuan: “Zânah kan hnathawhna hmun chu chhuahsanin, kilometer 25-a (mêl 15) hla rêl chawlhhmun chu kein kan kal a. Rêl chu zîng dâr hnihah a chhuak a, dârkâr ruk chhûng rêla kan kal hnu chuan inkhâwmna hmun thleng tûrin kilometer sâwm (mêl ruk) chu kein kan kal leh a ni,” tiin a sawi. Chutianga a kal avângin Corinna-i chu a hlim hle a: “Inkhâwmnaah Vênnainsâng kan zirin, Lalram  hlate kan sa a. Chu chu kan tân rinna tichaktu thiltawn a ni tak meuh a ni,” tiin a sawi bawk. Ni thum hnuah, unaunu pahnihte chu an hnathawhna lovah an thleng leh a; mahse, lo neitu chuan an kal chhuak tih pawh a hre lo.

3 Jehova mite chuan inhmuhkhâwm chu an châk hle ṭhîn a. Entîr nân, Kristian hmasate chuan Jehova be tûr leh a chungchâng zir tûra inhmuhkhâwm chu an châk hle a ni. (Tirhkohte 2:42) Nang pawhin, inkhâwm chu i châk ve ngei a rinawm. Mahse, unau dangte ang bawkin inkhâwmnaa tel ziah chu harsa i ti mai thei. Dârkâr tam tak hna i thawh a ngai emaw, thawh tûr tam tak i nei emaw, a nih loh leh i chauh hle ṭhin emaw vâng a ni thei bawk. Chuti a nih chuan, kan inkhâwm theih nâna kan tihtheih apiang ti tûrin engin nge min ṭanpui ang? [1] (Endnote en rawh.) Engtin nge kan Bible zirpuite leh mi dangte chu kan inkhâwmnaa tel ziah tûrin kan fuih theih ang? He thuziak hian inkhâwma tel chu (1) kan tân a ṭhat chhan, (2) mi dangte a ṭanpui chhan, leh (3) Jehova a tihlâwm chhante a hrilhfiah ang. [2]—Endnote en rawh.

INKHAWMTE KAN TAN A ṬHA

4. Engtin nge kan inkhâwmna chuan Jehova chanchin zir tûra min ṭanpui?

4 Inkhâwmte chuan min zirtîr. Kan inkhâwm tinte hian Jehova chanchin zir belh tûrin min ṭanpui a. Entîr nân, tûn hnai mai khân kohhran a tam zâwkte chuan Draw Close to Jehovah tih lehkhabu chu Kohhrana Bible Zirnaah an zir zo va. Jehova miziate kan sawiho hunah leh unaute’n Jehova chungchânga an ngaih dân an sawi i hriat hunah engtin nge i awm? Chu chuan Jehova i hmangaihna a tizual tih a chiang hle. Inkhâwmnaah chuan, thusawite leh lemchante bâkah, Bible chhiarte ngun taka ngaihthlâkna aṭangin Bible thute kan hriat belh thei bawk a ni. (Nehemia 8:8) Chu bâkah, chawlhkâr khat chhûnga chhiar tûr Bible chângte kan chhiar huna kan hmuh chhuah thil tam tak leh mi dangin an chhân huna kan thil hriatte hi ngaihtuah bawk teh.

5. Engtin nge inkhâwmte chuan Bible aṭanga i thu hriatte nunpui tûr leh i thu hrilh dân tihmasâwn tûra a ṭanpui che?

5 Inkhâwmte hian Bible aṭanga kan thu hriatte nunpui dân min zirtîr a. (1 Thessalonika 4:9, 10) Entîr nân, Jehova rawngbâwlnaa tam lehzuala thawh duhna te, i ṭawngṭaina tihmasâwn duhna te, a nih loh leh unau tuemaw ngaihdam duhnate neihtîrtu Vênnainsâng Zirna inkhâwmah i tel tawh ngai em? Chawlhkâr chhûnga kan neih inkhâwmna chuan chanchin ṭha hrilh dân leh mi dangte Bible thutak hre thiam tûra ṭanpui dân min zirtîr thei a ni.—Matthaia 28:19, 20.

6. Engtin nge kan inkhâwmte chuan min fuih a, min tihchak?

6 Inkhâwmte chuan min tichak. Setana khawvêl chuan kan rinna tihchauh a tum a,  rilru hahna leh lunghnualna min neihtîr thei a ni. Mahse, kan inkhâwmte chuan min tichakin, Jehova rawngbâwl zêl tûrin chakna min pe a. (Tirhkohte 15:30-32 chhiar rawh.) Bible hrilh lâwkna a thlen famkim dânte kan sawiho fo va. Chu chuan nakin hun atâna Jehova thutiamte a lo thleng famkim ngei ang tih rinnghehna min neihtîr lehzual a ni. Kan unaute chuan thusawi an neih hunah chauh ni lovin, chhânna an pêk hunah leh thinlung tak aṭanga Jehova fakna hla an sak hunahte pawh min tichak a. (1 Korinth 14:26) Inkhâwm ṭan hma leh bân hnua anmahni kan biak hian, min ngaihsak tak zettu ṭhian tam tak kan nei tih kan hriatna avângin hahdam huaiin kan inhria a ni.—1 Korinth 16:17, 18.

Kan inkhâwmte chuan min tichakin, Jehova rawngbâwl zêl tûrin chakna min pe

7. Engvângin nge inkhâwmnaa tel chu thil pawimawh tak a nih?

7 Inkhâwmnaah Pathian thlarau thianghlim ṭanpuina kan dawng. Isua chuan he thlarau thianghlim hi kohhran kaihhruai nân a hmang a. “Thlarauvin kohhranho hnêna thu a sawi” chu kan hre tûr a ni tih min hrilh a ni. (Thu Puan 2:7) Thlarau thianghlim chuan thlêmna do tûr leh huaisen taka thu hril tûrin min ṭanpui thei a. Chu chuan thu tlûkna ṭha siam tûrin min ṭanpui thei bawk. Chuvângin, kan inkhâwmnaa tel a, Pathian thlarau thianghlim ṭanpuina dawng tûrin theih tâwp kan chhuah tûr a ni.

INKHAWMNAAH MI DANGTE KAN ṬANPUI

8. Kan unaute’n inkhâwmnaa min hmun a, kan chhânna pêk leh hla sakte an hriat hian, chu chuan anni chu engtin nge a ṭanpui? (“ Haw Lamah A Ziaawm Zâwk Ṭhîn,” tih bâwm chu en bawk rawh.)

8 Inkhâwmnaah kan unaute kan hmangaih tih lantîr theihna hun remchâng kan nei. Kohhrana mi tam tak chuan harsatna lian tham takte chu chhel takin an tuar a. Tirhkoh Paula chuan: “Inngaihtuah tawn ang u,” tiin a ziak a ni. (Hebrai 10:24, 25) Infuih tawn tûra kan inkhâwmho hian kan unaute kan ngaihsakzia kan lantîr thei a. Kan inkhâwm hian, kan unaute nêna awmho kan duhin, anmahni biak a, an rilru veizâwngte kan ngaihven a ni tih kan  lantîr a ni. Kan chhânna pêkte leh thinlung taka kan hla sakte an hriat hian anni chu kan tichak bawk.—Kolossa 3:16.

9, 10. (a) Johana 10:16-a Isua thusawi chuan kan unaute nêna inhmuhkhâwm a pawimawhzia hre thiam tûra min ṭanpui dân hrilhfiah rawh. (b) Kan inkhâwm ziah chuan, engtin nge chhûngte hnâwlna tâwktu tuemaw chu kan ṭanpui theih?

9 Kan inkhâwm hian, kohhran chu inhnaih tlat tûrin kan ṭanpui. (Johana 10:16 chhiar rawh.) Isua chuan amah chu berâmpu ang leh a hnungzuite chu berâm pâwl khat angin a tehkhin a. Hei hi han ngaihtuah teh: Berâm pahnih chu tlâng chungah an tlâ a, a dang pahnih chu ruamah an tlâ a, pakhat erawh chu hmun dangah a tlâ bawk a, hêng berâm pangate hi pâwl khat kan ti thei ang em? Ti thei lo vang, berâm pâwl khat chu an tlat khâwm bâkah, an pu hnung an zui diah diah ṭhin avângin. Chutiang bawkin, inkhâwm lohna hmangin kan unaute lak ata kan kal hrang tûr a ni lo. ‘Pâwl khata’ awm tûr leh “vêngtu pakhat” hnung zui tûr chuan kan inhmuhkhâwm a ngai a ni.

10 Kan inkhâwmte chuan chhûngkaw inhmangaih tak anga inpumkhat tûrin min ṭanpui a. (Sâm 133:1) Kohhrana mi ṭhenkhat chu an nu leh pate, a nih loh leh an unaute ang chi an chhûngkaw zînga mite’n an hnâwl a. Mahse, Isua chuan anmahni hmangaihtu tûr leh enkawltu tûr chhûngkua pêk a tiam a ni. (Marka 10:29, 30) I inkhâwm ziah chuan, kohhrana tuemaw tân a pa emaw, a nu emaw, a nih loh leh a unau emaw i ni thei a ni. Hêngte hi kan ngaihtuah hian, kohhran inkhâwm zawng zawngah theih tâwp chhuaha tel kim kan duh a ni.

 JEHOVA KAN TILAWM ANG

11. Engtin nge inkhâwma telna chuan Jehova hnênah a phû tak pe tûra min ṭanpui?

11 Inkhâwmnaah hian Jehova hnênah a phû tak kan pe. Min siamtu a nih avângin, a hnênah lâwmthu kan hrilhin, kan chawimawi ang a, kan fak tûr a ni bawk. (Thu Puan 7:12 chhiar rawh.) Inkhâwmnaah Jehova hnêna ṭawngṭaiin, amah fakna hlate sain, a chanchinte sawiin, chutiang chuan kan ti thei a ni. Chawlhkâr tina Jehova biak theihna hun remchâng kan nei chu a va ropui tak êm!

Jehova chuan inkhâwmnaah tel kan duh tak zet tih hriain, tel thei tûra theih tâwp kan chhuahna zawng zawng chu a hlut

12. Inkhâwm tûra Jehova thupêk kan zawm hian, chu chuan ani chu engtin nge a nghawng?

12 Jehova chu min siamtu a ni a, a thu kan zâwm tûr a ni. Ani chuan a bîk takin, tâwpna hun kan hnaih hle tawh avângin inkhâwmho reng tûrin thu min pe a. Chuvângin, chu thupêk kan zawm chuan Jehova a lâwm a ni. (1 Johana 3:22) Ani chuan inkhâwmnaah tel kan duh tak zet tih hriain, tel thei tûra theih tâwp kan chhuahna zawng zawng chu a hlut a ni.—Hebrai 6:10.

13, 14. Inkhâwmnaah eng kawngin nge Jehova leh Isua chu kan hnaih?

13 Kan inkhâwm hian, Jehova hnênah amah leh a Fapa hnaih kan duhzia kan lantîr. Inkhâwmnaah chuan Bible zirin, kan tih tûr leh kan nun dân tûr chu Jehova hnên aṭangin kan zir a ni. (Isaia 30:20, 21) Pâwn lam mi rawn inkhâwmte pawhin, Pathianin min kaihruai tih an hria a. (1 Korinth 14:23-25) Jehova chuan kan inkhâwmte chu a thlarau thianghlim hmangin a kaihruai a, kan thu zirte chu a hnên aṭanga lo kal a ni. Chuvângin, kan inkhâwm hian Jehova thusawite kan ngaithla a, min hmangaihziate kan hriain, amah kan hnaih lehzual a ni.

14 Kohhran lû, Isua chuan: “Mi pahnih emaw pathum emaw ka hminga an inkhâwmna apiangah chuan an zîngah ka awm si ṭhîn a,” tiin a sawi a. (Matthaia 18:20) Bible chuan Isua chu kohhran “zînga vei veia” niin a sawi a ni. (Thu Puan 1:20–2:1) Jehova leh Isua chu kan zîngah awmin, inkhâwmnaah chuan min tichak tih a chiang hle. Amah leh a Fapa hnaih tûra theih tâwp i chhuahna a hmuh hian Jehova’n eng anga a ngaih nge i rin?

15. Engtin nge inkhâwmna chuan Pathian thu âwih kan duhzia a târ lan?

15 Kan inkhâwm hian, Jehova hnênah a thu zawm kan duhzia kan lantîr. Jehova chuan a sawi anga ti tûrin min tilui lo. (Isaia 43:23) Chuvângin, inkhâwm tûra a thupêk kan zawm hian, amah kan hmangaihin, kan tih tûr min hrilh tûrin dikna a nei tih kan rinzia kan lantîr a ni. (Rom 6:17) Entîr nân, kan hnathawhna puin hna thawk tam lehzual tûra min beisei avângin inkhâwm ziah thei lo ta ila eng nge kan tih ang? A nih loh leh, sawrkâr chuan Jehova be tûra inhmukhâwm apiangte chu chawitîr emaw, tântîr emaw, chûng aia na zâwka  hrem emaw a ni ang tih a sawi pawh a ni thei a. A châng chuan, inkhâwm aia thil dang tih duh zâwk kan nei pawh a ni thei bawk. Hêng dinhmunahte hian, kan tih tûr chu kan thlang tûr a ni a. (Tirhkohte 5:29) Mahse, a thuâwih kan thlan apiangin, Jehova kan tilâwm a ni.—Thufingte 27:11.

UNAUTE NEN INKHAWM ZEL RAWH

16, 17. (a) Engtin nge kum zabi khatnaa Kristiante tân inkhâwm hi a pawimawh hle tih kan hriat? (b) Engtin nge Unau George Gangas-a chuan Kristian inkhâwmnate chu a ngaih?

16 C.E. 33 Pentikost nîa an inhmuhkhâwm hnuah pawh, Kristiante chu Jehova be tûrin an inhmukhâwm zêl a. Anni chu, “tirhkohte zirtîrin, inpâwlin, . . . ṭhahnemngai takin an awm reng” a ni. (Tirhkohte 2:42) Rom sawrkâr leh Juda sakhaw hruaitute tihduhdahna an tâwk chung pawhin inkhâwm an bânsan chuang lo. Chu chu thil awlsam ni lo mah se, inkhâwm zawm zêl tûrin theih tâwp an chhuah a ni.

17 Tûn laiah pawh, Jehova chhiahhlawhte chu inkhâwma an tel avângin an lâwm hle a. Kum 22 aia tam Governing Body member nia rawngbâwltu George Gangas-a chuan: “Ka tân chuan, unaute nêna inkhâwm chu min tihlimtu ber leh min tichaktu ber a ni. A theih chuan, Kingdom Hall-a thleng hmasa ber ni a, chhuak hnuhnûng ber pâwla mi nih ka duh. Pathian mite nêna kan inbiak hian chhûngrila hlimna nei niin ka inhria a. An zînga ka awm hian thlarau lam paradis-a ka chhûngte nêna awmho angin ka inhria a ni,” tiin a sawi. Chu bâkah: “Rilrua ka ngaihtuah leh duh ber chu inkhâwmnaa tel hi a ni,” tiin a sawi belh bawk.

18. Kan inkhâwmna chu engtin nge i ngaih a, eng nge tih i tum tlat?

18 Jehova biakna chu, chutiang chuan i ngai ve em? I ngai a nih chuan, a harsat hunah pawh unaute nêna inkhâwm thei tûrin theih tâwp chhuah reng la. Jehova hnênah, “LALPA, i awmna in chu ka ngaina a,” tia sawitu Lal Davida ang i ni ve tih lantîr ang che.—Sâm 26:8. (ws16.04-E)

^ [1] (paragraph 3-na) Kan unaute zînga ṭhenkhat chu an thunun phâk bâk thilte avângin an inkhâwm ziah thei lo va. Entîr nân, anni chu an dam lo hle thei a ni. An dinhmun chu Jehova’n a hre thiam a, amah be tûra an tih engpawh chu a ngaihlu tih an chiang thei a. Upate chuan, chûng mite chu telephone-a thlun zawmin emaw, inkhâwma thusawite record-sakin emaw inkhâwma thusawite ngaithla tûrin an ṭanpui thei a ni.

^ [2] (paragraph 3-na) “ Inkhâwma Kan Tel Chhan” tih bâwm chu en rawh.