“Mite fuihna thu eng emaw in neih chuan sawi rawh u.”—TIRHKOHTE 13:15.

HLA: 53, 45

1, 2. Engvângin nge mi dangte fuih chu a pawimawh?

“KA NU leh pa chuan min fuih khât hle a, chu ai chuan min sawisêl hrep zâwk ṭhîn. An ṭawngkam chhuak chu a na thei hle a. Mi puitling lo, inzirna nei lo leh thau lutuk niin min sawi a. Chuvângin, ka ṭap zing hle a, anni chu biak pawh ka be peih tawh lo. Hlutna rêng nei lo ni hian ka inhria,” tiin kum 18 mi Cristina-i chuan a sawi. [1] (Endnote en rawh.) Mi dangte’n min fuih loh chuan nun chu a harsa thei hle!

2 Kawng leh lamah chuan, mi dangte kan fuih hian nasa taka kan ṭanpui theih dân chu han ngaihtuah teh. Rubén-a chuan: “Hlutna rêng nei lo nia inhriatna chu kum tam tak chhûng ka do va. Ṭum khat chu, ni hman nuam ka ti lo tih hretu kohhran upa pakhat nên thu kan hril a. Ani chuan ka rirua awmte ka sawi chhuah chuan lainatna nei takin min ngaihthlâksak a. Tichuan, thil ṭha ka lo tih tawhte chu min hriatnawntîr a. Chawngzawng tam tak aia kan hlut zâwk thu Isua sawite pawh min hriatnawntîr bawk. Chu Bible châng chu ka hriat chhuah apiangin, ka thinlung a la khawih reng. Chu kohhran upa thusawite chuan nasa takin min thlâk danglam a ni,” tiin a sawi.—Matthaia 10:31.

3. (a) Mi dangte fuih chungchângah tirhkoh Paula’n eng nge a sawi? (b) He thuziakah hian eng nge kan sawiho vang?

3 Bible chuan kan infuih tawn ziah a ngai tih a sawi a. Tirhkoh  Paula chuan Hebrai Kristiante hnênah: “Unaute u, fîmkhur rawh u, chutilochuan Pathian nung chu bânsan tûrin in zîngah tu chhûngah pawh rin lohna thinlung sual a lo awm dah ang e. . . . Ni tinin infuih tawn zâwk rawh u,” tiin a ziak a. Ani chuan: “Chutilochuan in zînga mi tupawh hi sual bumnaa tihkhauhvin an awm dah ang e,” tiin a chhan a hrilhfiah a ni. (Hebrai 3:12, 13) Mi tuemawin a fuih hun che a, i rilru nawm dân kha han ngaihtuah teh. Chuti chu, kan unaute fuihna tûr chhan eng nge kan neih? Pathian Jehova, Isua leh Paulate’n mi dangte an fuih dân aṭangin eng nge kan zir theih? Kan infuih tawn theih dân kawng ṭhenkhat chu engte nge ni? Hêng zawhnate hi i lo sawiho vang u.

FUIHNA KAN MAMAWH ṬHEUH

4. Tute’n nge fuihna mamawh? Engvângin nge tûn laiah mi tam takin mi dangte an fuih loh?

4 Kan vai hian fuihna kan mamawh ṭheuh va. Nu leh pate tân an fate fuih chu a ṭûl lehzual a ni. Zirtîrtu Timothy Evans-a chuan, naupangte hian “thingkûngin tui a mamawh angin fuihna an mamawh” tih a sawi a. Ani chuan: “Fuihna chuan naupang chu ṭangkai leh hlu nia inhriatna a neihtîr a ni,” tiin a sawi belh bawk. Mahse, ‘ni hnuhnûnga’ kan nun avângin mi tam tak chuan mahni hma an sialin, “hmangaihna pianpui” an neih tawh lo va. (2 Timothea 3:1-5) Nu leh pa ṭhenkhat chuan an nu leh pate ngei aṭanga fuihna an dawn loh avângin an fate chu an fuih lo va. Puitlingte pawhin fuihna an mamawh a; mahse, fuihna an dawng mang meuh lo. Entîr nân, mi tam tak chuan an hnathawhnaah fak an hlawh ngai loh avângin an lungnih loh thu an sawi a ni.

5. Engtin nge mi dangte kan fuih theih?

5 Mi dangte chu an thiltih ṭhat engemaw avângin kan fak thei a. Mi dang lehte chu an neih mize ṭhate hrilhna hmangin kan fuih thei a, an lungchhiat hun leh lunghnual huna thlamuanna hmangin kan fuih thei bawk. (1 Thessalonika 5:14) Kan unaute nêna kan awmho ṭhin avângin anmahni fuih theihna hun remchâng tam tak kan nei a. (Thuhriltu 4:9, 10 chhiar rawh.) Chuvângin, heti hian inzâwt rawh: ‘Mi dangte chu anmahni ka ngaihluin, ka hmangaih tih ka hriattîr em? Hei hi ka tih theih hun apiangah ka ti em?’ tiin. Bible sawi: “A hun taka chhâna dik hriat hi a va lâwmawm êm!” tih hi ngaihtuah ang che.—Thufingte 15:23.

6. Engvângin nge Setana chuan Pathian mite tihlunghnual a duh? Chutianga tih a tum dân chu entîrna pe rawh.

6 Thufingte 24:10 chuan: “Mangan nîa i chauh mai chuan i chakna a bei tham a ni,” tiin a sawi a. Setana chuan min tihlunghnual chuan Jehova nêna kan inlaichînna a tiderthâwng thei tih a hria a ni. Joba chu hrehawm nasa tak tawrh tîrin tihlunghnual a tum a. Mahse, Setana ruahmanna râwng tak chu a hlawhchham a ni. Joba chu Jehova chungah a rinawm tlat a. (Joba 2:3; 22:3; 27:5) Keini pawhin Setana chu kan do thei a, a hlawhtling lo vang tih kan hre chiang a ni. Kan chhûngkuate leh kohhrana kan unaute kan fuih zawm zêl chuan, hlimna nei tûr leh Jehova hnaih tlat tûrin kan inṭanpui tawn thei ang.

KAN ENTAWN THEIH ENTAWN TURTE

7, 8. (a) Engtin nge Jehova’n mite chu a fuih? (b) Engtin nge nu leh pate’n Jehova entawn tûr siam chu an entawn theih? (A thupui chunga milem en rawh.)

7 Jehova chuan mite a fuih a. Fakna hla phuahtu chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tiin a ziak a. (Sâm 34:18) Zâwlnei Jeremia chu hlauva a lunghnual lai khân, Jehova’n ṭanpui a tiam a. (Jeremia 1:6-10) Jehova chuan kum upa tak  zâwlnei Daniela chu tichak tûrin vântirhkoh pakhat a tîr a. Chu vântirhkoh chuan Daniela chu “mi duhawm tak” tiin a ko a ni. (Daniela 10:8, 11, 18, 19) Pioneer-te leh tûn hmaa an thawh anga thawk thei tawh lo kum upate pawh tiamin, i unaute chu chutiangin i fuih ve thei ang em?

8 Jehova leh Isua chu kum tam tak awm tlang tawh mah se, Isua leia a lo awm khân, Jehova chuan a Fapa chu fuih a la ngai reng tih a hria a. Isua’n thuhrilh rawngbâwlna a ṭan lai leh leila a nun hman tawp kum khân, vân aṭangin a Pa aw a hria a ni. Ṭum hnih chu, Jehova chuan: “Hei hi ka Fapa duh tak, ka lawm êm êma chu a ni,” tiin a sawi a. (Matthaia 3:17; 17:5) A Pain a hmangaih a, a chhuang hle tih Isua’n a hriat chuan a phûr hle ang. A hnuah, Isua chu a thih hman zân khân, a lung ngai hle a. Jehova chuan amah tichak a, thlamuan tûrin vântirhkoh pakhat tîrin a fuih a ni. (Luka 22:43) Nu leh pate u, infate fuih ziahin Jehova entawn tûr siam chu in entawn thei a ni. Thil engemaw an tihṭhat hian fak rawh u. School-a fiahna an tawh hunah, chhel taka tuar chhuak thei tûrin anni chu tichak a, ṭanpui tûrin theih tâwp chhuah rawh u.

9. Isua’n a tirhkohte a cheibâwl dân aṭangin eng nge kan zir theih?

9 Isua pawhin kan tân entawn tûr ṭha a siam bawk. A thih hman zân khân, a tirhkohte ke silsakin inngaihtlâwm a pawimawhzia a hrilh a. Mahse, anni chu an chapovin tunge ropui ber tiin an inhnial a, Petera chuan Isua chu a phatsan ngai lo vang tiin chapo takin a sawi a ni. (Luka 22:24, 33, 34) Mahse, Isua chuan an thil tihsualna lai chauh a ngaihtuah lo. Chu ai chuan, a chunga an rinawm avângin a fak zâwk a. A thiltih aia nasa zâwk an ti ang tih a tiam bâkah, Jehova’n anni chu a hmangaih tih a hriatchiantîr a ni. (Luka 22:28; Johana 14:12; 16:27) Heti hian kan inzâwt thei a ni: ‘Isua entawn tûr siam chu entawnin, mi dangte thil tihsualna lai ngaihtuah aiin an mize ṭhate chu ka fak zâwk em?’ tiin.

10, 11. Paula chuan a unaute chu engtin nge a fuih a, eng tih nge a inhuam?

10 Tirhkoh Paula chuan a unaute chungchâng a ṭha zâwngin a sawi ṭhîn a. An zînga ṭhenkhat chu kum tam tak khual a zinpui avângin a hre chiang hle a; mahse, an thil tihsual chungchâng a ziak lo. Chu ai chuan, a fak zâwk a ni. Entîr nân, Paula chuan Timothea chu “Lalpaa ka fa duh tak leh rinawm” tia a sawi bâkah, mi dangte mamawh a ngaihsak ang tih a ring tlat bawk. (1 Korinth 4:17; Philippi 2:19, 20) Paula chuan Korinth khuaa Kristiante hnênah Tita chu a ‘ṭhian leh anmahni lama a hnathawhpui’ a nih thu a hrilh a. (2 Korinth 8:22, 23) Paula’n a ngaihtuah tih Timothea leh Tita’n an hriat chuan an phûr ngei ang!

11 Paula leh a ṭhian Barnaba chuan an unaute fuih tûrin an nun an thâp hial a. Entîr nân, Lustra khuaa mi tam takin anni chu tihhlum an duh tih an hria a. Chuti chung pawhin, zirtîr tharte fuih tûr leh Jehova chunga rinawm reng thei tûra ṭanpui tûrin an kîr leh a ni. (Tirhkohte 14:19-22) A hnuah, Paula chu Ephesi khuaa mipui thinur tak hmachhawn chungin, a unaute fuih tûrin hun engemaw chen a châm a ni. Tirhkohte 20:1, 2 chuan: “Paulan zirtîrhote a kohtîr a, a fuih a, ṭawng ṭhain a ṭhen a. Makedonia rama kal tûrin a chhuak ta a. Tin, thu tam taka zirtîrhote fuih zêlin chu mi ram chu a fang chhuak a, Grik ram a thleng ta a,” tiin a sawi a ni.

INFUIH TAWN RAWH U

12. Engvângin nge inkhâwm chu kan tân a ṭhat?

12 Jehova chuan kan tâna ṭha ber tûr chu a duh a. Chuvângin, inhmu khâwm ziah  tûrin min hrilh a ni. Kan inkhâwm hian a chungchâng kan zirin, kan infuih tawn a. (1 Korinth 14:31; Hebrai 10:24, 25 chhiar rawh.) He thuziak ṭan tirha kan sawi tâk Cristina-i chuan: “Inkhâwmnaa ka duh ber chu hmangaihna leh fuihna ka dawng hi a ni. Lunghnual taka Kingdom Hall thlen châng ka nei a. Mahse, unaunute’n min rawn panin, min kuah a, nalh min tih thute an sawi a. Min hmangaih thu leh ka thlarau lam hmasâwnna an hmuh avânga an lâwm thute min hrilh a ni. An mi fuihnate chuan ka rilru an tinuam hle!” tiin a sawi a. Mi dangte fuih chu kan tân a va pawimawh tak êm!—Rom 1:11, 12.

13. Hun rei tak chhûng Jehova rawngbâwl tawhte pawhin engvângin nge fuihna an mamawh?

13 Hun rei tak chhûng Jehova rawngbâwl tawhte pawhin fuihna an mamawh a. Josua chungchâng hi han ngaihtuah teh. Israel mite Ram Tiama an luh dâwn khân Jehova’n Josua chu hruaitu atân a thlang a. Ani chuan kum tam tak chhûng Jehova rawng lo bâwl tawh mah se, amah fuih tûrin Jehova’n Mosia chu a hrilh a ni. Pathian Jehova chuan: “Josua hi thu pe la, fuih ṭha la, tichak rawh; hêng mipuite hi a hruai kai dâwn a, i han hmuh tûr ram chu a luahtîr dâwn a ni,” tiin a sawi a. (Deuteronomy 3:27, 28) Israel mite’n râl tam tak an beih dâwn avângin Josua chuan fuihna a mamawh a, a lo berah vawi khat chu râl beihnaah an tlâwm a ni. (Josua 7:1-9) Tûn laiah pawh, Pathian mite ngaihsaka thawkrim upate leh bial kantute chu kan fuih thei a. (1 Thessalonika 5:12, 13 chhiar rawh.) Bial kantu pakhat chuan: “A châng chuan unaute chuan kan tlawh avânga an lâwmzia chu lehkha ziakin min pe a. Chûng lehkha ziakte chu kan dah ṭha a, kan rilru a hah chângin kan chhiar ṭhîn. Chûngte chuan min tiphûr thei tak meuh a ni,” tiin a sawi.

Kan fate chu ṭha taka kan fuih chuan Jehova hnaih lehzual tûrin kan ṭanpui (Paragraph 14-na en rawh)

14. Mi dangte zilhna kan pêk hunah anmah ni fak a ṭha tih eng entîrnain nge târ lang?

14 Ṭum khat chu, tirhkoh Paula chuan Korinth khuaa mite zilhna a pêk a ngai a. Chu zilhna chu an nunpui avângin a fak a ni. (2 Korinth 7:8-11) A thusawite chuan thil dik ti zawm zêl tûrin a tichak tih a chiang hle. Tûn laia upate leh nu leh pate chuan Paula entawn tûr siam chu an zui thei a. Fa pahnih nei Andreas-a chuan: “Fuihna chuan naupangte chu thlarau lam leh rilru lama ṭhang chho tûrin a ṭanpui a. I fuihna thute chuan zilhna i pêkte chu a tinghet lehzual a ni. Kan naupangte chuan thil dik chu an hria a; mahse, kan fuih rengna avângin an nunah thil dik an ti a ni,” tiin a sawi.

MI DANGTE FUIH TURIN ENGIN NGE ṬANPUI CHE?

15. Mi dangte kan fak theih dân kawng khat chu eng nge ni?

15 Unaute chu theih tâwp an chhuahna leh an mize ṭhate i hlutzia hrilh rawh.  (2 Chronicles 16:9; Joba 1:8) Chutianga kan tih chuan Jehova leh Isua kan entawn a ni. Kan duh anga tama kan ti thei lo a nih pawhin, an tâna kan tih apiang chu an hlut a. (Luka 21:1-4; 2 Korinth 8:12 chhiar rawh.) Entîr nân, kan ngaihhlut tak kum upate chu inkhâwma tel tûr leh rawngbâwlnaa chhuak ṭhîn tûrin theih tâwp an chhuah a ngai tih kan hria. Chutiang ti tûr chuan kan fuihin, kan fak em?

16. Engtik hunah nge mi dangte kan fuih ang?

16 A remchân apiangin mi dangte chu fuih rawh. Miin thil ṭha eng emaw a ti tih i hriat chuan fak ngei ngei ang che. Paula leh Barnaba chu Pisidia rama Antiokei khuaa an awm chuan, inkhâwmna in hotute’n an hnênah: “Unaute u, mite fuihna thu eng emaw in neih chuan sawi rawh u,” an ti a. Paula chuan, chu chu mite fuihna remchângah a hmang a ni. (Tirhkohte 13:13-16, 42-44) Mi dangte kan fuih hian, anni pawhin min fuih ve an duh ang.—Luka 6:38.

17. Mi dangte kan fak theih dân kawng ṭha ber chu eng nge ni?

17 Sawi bîk nei rawh. Isua’n Thuatira khuaa Kristiante a fak khân, sawi bîk a nei a, an thiltih ṭhatna lai chu a sawi lang a. (Thu Puan 2:18, 19 chhiar rawh.) Ani chu engtin nge kan entawn theih? Mahni chauhva fate enkawltu nu chu harsatna kâra a fate a enkawl seilen avângin kan fak thei a. A nih loh leh, nu emaw, pa emaw i nih chuan i fate’n Jehova rawngbâwl tûra theih tâwp an chhuahna chu i fak thei bawk. An thil tih ṭhat i hriatte chu hrilh ang che. Mi dangte kan fuih hunah sawi bîk kan neih chuan kan sawi tum tak chu an hria ang.

18, 19. Engtin nge Jehova hnaih reng tûra kan inṭanpui tawn theih?

18 Pathian Jehova chuan Mosia chu Josua fuih a, tichak tûrin a hrilh a. Tûn laiah, tuemaw fuih tûrin Jehova chuan min biain min hrilh tawh lo va. Mahse, theih tâwp chhuaha mi dangte kan fuih a hmuh hian a lâwm a ni. (Thufingte 19:17; Hebrai 12:12) Entîr nân, kan kohhranah unaupain vântlâng thusawina a neih hian a thusawi ṭha kan tih thute kan hrilh thei a. A thusawi chuan kan buaina chingfel tûr leh Bible châng pakhat hre thiam tûrin min ṭanpui pawh a ni thei. Unaunu pakhat chuan vântlâng thusawitu hnênah heti hian lehkha a ziak a: “Minute rei lotê chauh inbe mah ila, ka rilru hahna i hmu a, min thlamuanin ka rilru min tizângkhai a. Platform aṭang leh mi mala inbiaknaah ngilnei taka thu i sawi hian hei hi Jehova thil pêk a ni tih hriattîr che ka duh ,” tiin.

19 “Infuih tawnin, intisâwt tawn ṭheuh rawh u, in tih rêng ṭhîn ang hian,” tih Paula fuihna kan zawm chuan Jehova hnaih reng tûrin kan in ṭanpui tawn thei ang. (1 Thessalonika 5:11) ‘Ni tina kan infuih tawn’ chuan Pathian Jehova kan tilâwm tak zet ang! (ws16.11-E)

^ [1] (paragraph 1-na) Hming ṭhenkhat thlâk a ni.