A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng  |  No. 2 2017

 A KAWM THU | SAKAWR CHUNGCHUANG PALI—AN CHUANNAIN A NGHAWN DAN CHE

Sakawr Chungchuang Palite—Tute Nge An Nih?

Sakawr Chungchuang Palite—Tute Nge An Nih?

Sakawr chungchuang palite chu mak tak leh hlauhawm tak angin an lang mai thei a; mahse, chutiang chu a ni lo. Engvângin nge? Bible leh tûn laia thilthlengte hian he sakawr chungchuangte’n an entîr thilte hre thiam tûra min ṭanpui vâng a ni. Hêng sakawr chungchuangte hian leia chhiatna lo thleng tûr hril mah se, nang leh i chhûngte tân chanchin ṭha a ni thei bawk. Engtin nge a nih theih? A hmasain, sakawr chungchuangte nihna chu a mal malin i lo en ang u.

SAKAWR VAR CHUNGA CHUANGTU

Inlârna chu heti hian a inṭan a: “Tichuan ka han en a, tin, ngai teh, sakawr vâr ka hmu a; a chunga chuang chuanin thalngul a keng a; tin, a hnênah chuan lallukhum an pe a; tin, hneh chung leh hneh zêl tûrin a chhuak ta a,” tiin.—Thu Puan 6:2.

Sakawr vâr chunga chuang chu tu nge ni? A nihna hriatthiamna tûr chu Thu Puan bu vêkah kan hmu thei a, a hnuah he vâna sakawr chunga chuangtu hi “Pathian Thua” tiin a târ lang a ni. (Thu Puan 19:11-13) Thua tih he nihna hi Pathian aiawha thusawitu, Isua Krista sawina a ni a. (Johana 1:1, 14) Chu bâkah, “lalte Lal leh hotute Hotu” tia koh a ni a, “Rinawma leh Diktaka” tia koh a ni bawk. (Thu Puan 19:11, 16) Râl do thiam lal ni tûrin thuneihna a nei tih a chiang hle a, a thuneihna chu chhe tak leh râwng takin a hmang lo. Mahse, zawhna ṭhenkhat a lo chhuak a ni.

Tuin nge Isua chu hnehna chang tûra thuneihna pe? (Thu Puan 6:2) Zâwlnei Daniela hmuh inlârnaah Messia chu “mihring fapa,” anga sawi a ni a, a hnênah tu dang ni lovin, “Hmâkhawsânga,” Pathian Jehova’n “rorêlna te, ropuina te, ram te” a pe a ni. * (Daniela 7:13, 14) Chuvângin, rorêl tûra thuneihna leh dikna Isua hnêna petu chu Engkimtithei Pathian a ni a. Bible-in rawng vâr hi felna nên a thlunzawm fo avângin, Sakawr vâr chuan Pathian Fapain a hlen chhuah tûr indona thianghlim chu inâwm takin a entîr a ni.—Thu Puan 3:4; 7:9, 13, 14.

Sakawr chungchuangte chu eng hunah nge an chuan ṭan? Sakawr chungchuang hmasa ber Isua chu lallukhum khumtîr a nih khân a chuang ṭan tih chhinchhiah ang che. (Thu Puan 6:2) Eng hunah nge Isua chu vânah Lallukhum khumtîr a nih? A thih hnua vâna a lâwn khân a ni lo. Hun engemaw chen a nghâk tih Bible-in a sawi si a. (Hebrai 10:12, 13) Isua’n a hnungzuitute hnênah a nghah hun chhûng tâwpna leh vâna lal a nih ṭan hun an hriat thiamna tûrin chhinchhiahna a pe a. Ro a rêl ṭan hunah khawvêl dinhmunte chuan chhiat lam a pan thut ang tih a hrilh a ni. Indonate a awm ang a, ṭâmte a tlain, hrite a lêng ang. (Matthaia 24:3, 7; Luka 21:10, 11) Kum 1914-a Khawvêl Indopui I-na a thlen hnuah, mihringte chuan Bible-in “ni hnuhnûngahte,” tia a sawi hun khirh takte chu an hmachhawn ṭan tih a lo chiang ta thuai a ni.—2 Timothea 3:1-5.

A nih leh, engvângin nge kum 1914-a Isua’n lallukhum a khum hnuah khawvêl dinhmunte chuan ṭhat lam pan aia chhiat lam a pan zâwk? Chutih hun lai chuan, Isua’n leiah ni lovin, vânah ro a rêl ṭan vâng a ni. Tichuan, vânah indona a chhuak a, Mikaela tia koh, Lal thar Isua chuan Setana leh a ramhuaite chu leiah a paih thla ta a. (Thu Puan 12:7-9, 12) Leia khuahkhirha a awm vâng leh, hun tlêm tê chauh a nei tawh tih a inhriat avângin Setana chu a thinrim hle a. Dik tak chuan, Pathianin he lei ata Setana a tihboral hun tûr chu a rei tawh lo vang. (Matthaia 6:10) Tûnah chuan, hun harsa tak “ni hnuhnûngahte” kan awm tawh tih nemnghet tûra sakawr chungchuang dang pathumte’n min ṭanpui dân i lo en ang u. Chiang taka hriat  theih sakawr chungchuang hmasa ber nêna inang lo takin, a hnunga rawn zui sakawr chungchuang pathumte chuan mi zawng zawngte tawh khawvêl dinhmunte chu an entîr a ni.

SAKAWR SEN CHUNGA CHUANGTU

“Tichuan sakawr dang, a sen mi, a lo chhuak leh a; tin, a chunga chuang hnênah chuan lei ata inremna lâksak theihna leh mi inthahtîr theihna an pe a; tin, a hnênah khandaih lianpui an pe bawk a.”—Thu Puan 6:4.

He sakawr chunga chuangtu hian indona a entîr a. Ram ṭhenkhat aṭang ni mai lovin, leilung pum pui ata remna a lâksak tih chhinchhiah ang che. Kum 1914-ah, mihring chanchina a hmasa ber atân khawvêl indopui a chhuak a. A hnu lawkah, chu aia nasa zâwk khawvêl indopui pahnihnain a zui a ni. Kum 1914 aṭangin indonate leh râlthuam hmanga inbeihnate avânga thi chu mi maktaduai 100 aia tam niin mi ṭhenkhat chuan an chhût a ni. Chu bâkah, mi dang tam takte chuan ramtuileilovin an awm phah bawk.

Tûn laiah indona eng ang khawpin nge a hluar? Thilthleng chanchina a vawikhatna atân, mihringin leia mihring nunna zawng zawng a la bo thei niin a lang. United Nations ang chi remna siamtu pâwlte pawhin, sakawr sen chunga chuang chu an dang thei lo.

SAKAWR DUM CHUNGA CHUANGTU

“Tichuan ka han en a, tin, ngai teh, sakawr dum ka hmu a; a chunga chuang chuanin bûkna a keng a. Tin, Thilnung palite lai aṭang chuan aw ang reng hian, ‘Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,’ a tih ka hria.”—Thu Puan 6:5, 6.

He sakawr chunga chuang hian ṭâm a entîr a. Ei tûr a vânzia chu buhpui tehkhâwng khat (0.7 kg) man chu duli a ni a, chu chu kum zabi khatnaah chuan ni khat hlawh lai a ni! (Matthaia 20:2) Duli vêkin, buh aia ṭha lo zâwka ngaih barli tehkhâwng thum (2.1 kg) a lei theih a. Chu chuan chhûngkaw hung tak chu engtin tak châwm thei ang maw? Chutah, mite chu chutih hun laia an mamawh bul ber olive hriak leh uainin a entîr an nî tin mamawh châkkhaite thlenga inren tûra vaukhân an ni.

Kum 1914 aṭangin, he sakawr dum chunga chuangtu hi a tlân chhuak a ni tih finfiahna kan hmu em? Hmu e! Kum zabi 20 chhûngin mi maktaduai 70 vêl chu ṭâm avângin an thi a. Lehkhabu pakhat chuan “kum 2012-2014 chhûngin mi maktaduai 805—khawvêla mi pakuaa pakhat zêlin—ei tûr kham khawp an nei lo,” tiin a sawi. Lehkhabu dang chuan: “AIDS te, malaria te, leh TB te avânga thi belhkhâwm aiin ṭâm avânga thi an tam zâwk,” tiin a sawi bawk. Ṭâmte hnênah ei tûr pe tûra theih tâwp chhuah ni reng mah se, sakawr dum leh a chunga chuangtu chu a tlân chhun zawm zêl a ni.

SAKAWR DANG CHUNGA CHUANGTU

“Tichuan ka han en a, tin, ngai teh, sakawr dâng ka hmu a; a chunga chuang hming chu Thihnaa a ni; tin, Mitthi Khuaan a rawn zui a. Tin, khandaih te, ṭâm te, hri te, leia sakawlhtea tihlum tûrin chu mite hnênah chuan lei hmun lia ṭhena hmun khat chunga thuneihna an pe a ni.”—Thu Puan 6:8.

Sakawr chungchuang palina hian hri leh thil dang vânga thihna a entîr a. Kum 1914 hnu lawkah, Spanish hripui avângin mi maktaduai sâwm têl an thi a. Chu hri chu chutih hun laia nungdama awm mi 3 zînga 1, mi maktaduai 500 vêlin an vei a nih hmêl!

Mahse, Spanish hripui hi a inṭanna mai a ni. Mi thiamte chuan kum zabi 20-na chhûngin mi maktaduai za têlte chu zâwnghri avângin an thi niin an chhût a. Nasa taka zir bingna neih a ni chung pawhin, AIDS te, TB te, leh malaria-te hian mi maktaduai tam takte nunna chu tûn thlengin a la la reng a ni.

Indona emaw, ṭâm emaw, hri emaw vâng pawh ni se, a rah chhuah chu a thuhmun reng a, chu chu thihna a ni. Thihna chuan mite hnênah beiseina pe lovin, a thla a la zâr zêl a ni.

 HUN ṬHA CHU A HNAI!

Tûn lai hrehawmnate hi a tâwp thuai dâwn. Hei hi hre reng rawh: Kum 1914-ah khân, Isua chu ‘hneh chungin a chhuak’ a, Setana chu leiah a khuahkhirh a; mahse, a hneh zêl, a nih loh leh a hnehna chu a la famkim lo, tih hi. (Thu Puan 6:2; 12:9, 12) Nakin lawka lo thleng tûr Armageddon-ah chuan, Isua chuan Setana thununna leh amah thlâwptu mihring zawng zawngte chu a tiboral vek ang. (Thu Puna 20:1-3) Sakawr chungchuang pathumte chu a tihboral bâkah, an thil tihchhiat zawng zawngte chu a sût lêt dâwn a ni. Engtin nge a sût lêt ang? Bible thutiamte chu i lo ngaihtuah ang u.

Indona aiah remna chuan ro a rêl ang. Jehova chuan “indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn.” (Sâm 46:9) Remna ngainatute chu “remna chênin an hmuingîl ang.”—Sâm 37:11.

Ṭâm aiah ei tûr tam tak a awm ang. “Leiah, tlâng chungahte hian, buh tam tak a awm ang.”—Sâm 72:16.

Isua chuan sakawr chungchuang pathumte thil tihchhiat chu a sût lêt thuai ang

Hri leh thihna aiah, hrisêlna ṭha famkim a awm ang a, mi zawng zawng chu chatuanin an nung tawh ang. Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thu Puan 21:4.

Isua’n leia a awm lai khân, nakina a rorêlna hnuaia dinhmun ṭha tak lo awm tûr chu a entîr lâwk a. Remna a awmtîr a, sâng tam takte chu mak tak maiin a hrai a, dam lote a tidam a, mitthite hial pawh a kaitho a ni.—Matthaia 12:15; 14:19-21; 26:52; Johana 11:43, 44.

Jehova Thuhretute chuan chûng sakawr chungchuangte tlân tâwpna a thlen huna i inpeih theih dân Bible aṭanga khawhhmuh che chu an châk hle a ni. Zir belh tûra sâwmna chu i pawm ang em?

^ par. 7 Jehova chu Bible-a târ lan Pathian hming a ni.