A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

 A KAWM THU | SAKAWR CHUNGCHUANG PALI—AN CHUANNAIN A NGHAWN DAN CHE

Nang leh Sakawr Chungchuang Palite

Nang leh Sakawr Chungchuang Palite

An tlân a, khawpui ri ang maiin a ri dur dur a! Sakawr chak tak pali leh a chunga chuangte chu mitthlaa a chian êm avângin Bible aṭanga rawn tlân chhuak ang mai an ni! A hmasa ber chu sakawr vâr a ni a—a chunga chuang chu lal thar ropui tak a ni. A hnungah sakawr senin a zui a, a chuangtu chuan lei ata remna a la bo va. Zân thim anga dum sakawr pathumnain a rawn zui a, a chunga chuang chuan bûkna keng kângin ṭâm tlâk tûr chanchin ṭha lo tak a puang a. Sakawr palina chu dam lo ang maia dâng a ni a, natna leh hri hlauhawm tak tak thlentîrtu a ni a, a chunga chuangtu chu Thihna a ni. Chuan, a hnungah Mitthi Khua, mihringte thlân pângngai chuan a rawn zui ta nghâl a!—Thu Puan 6:1-8.

“Sakawr chungchuang palite chanchin ka chhiar hmasak ber ṭum chuan ka hlau hle a. Rorêlna Nî a lo thleng ang a, kei lah ka la inpeih si lo, dam khawchhuak dâwn lo ni hian ka inhria.”—Crystal-i

“Sakawr rawng chi hrang hrang chunga chuang mi palite hian ka rilru a la hle a. He inlârna awmzia ka hriatthiam tâkah chuan sakawr chungchuangte chutianga târ lan a nih chhan ka hre ta.”—Ed-a

Thu Puan bua sakawr chungchuang palite chungchânga Crystal-i ngaih dân hi i ṭâwmpui em? Nge ni a, Ed-a ngaih dân hi i ṭâwmpui zâwk? Tu ngaih dân pawh ṭâwmpui la, sakawr chungchuang palite tlân chhuahna hi Bible-a bu tâwpna ber, Thu Puan bua inlârna hriat hlawh berte zînga mi a ni. He inlârna hriatthiamna hi i hlâwkpui thei tih i hria em? Engtin nge i hlâwkpui theih? He hrilh lâwkna bua ziak thute hi i chhiar a, i zir a, i nunpui chuan hlimna dik tak i hmu ang tih Pathianin a tiam che a ni.—Thu Puan 1:1-3.

Sakawr chungchuang palite inlârna chu mi ṭhenkhatin hlau mah se, hlauh atâna ziah a ni lo. Dik takin, he inlârna hian mi maktaduai tam takte rinna tinghetin, nakin hun hlimawm tak a neihtîr a ni. I tân pawh chutiang chu a ni ve thei! Chuvângin, chhiar zawm zêl ang che.