A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng  |  No. 1 2018

Bible leh I Nakin Hun

Bible leh I Nakin Hun

ZAN thim taka kawnga kal angin han inmitthla teh. Ni êng chu awm tawh lo mah se, mei êng tak i ken avângin kawng bo tûrah i inngai lo va. I bul hnai i han kah ên chuan i hma lâwka thil awmte chu fiak takin i hmu nghâl thei a. I hma lam i han kah leh a, i mei êng tak chuan i kalna tûr kawng chu thui tak a chhun êng thei a ni.

Kawng ṭhenkhatah, Bible hi chutiang êng ang chu a ni a. Thuziak hmasaa kan sawi tâk angin, Pathian Thu chuan kan hmaa thil awmte, hriat lâwk theih loh he khawvêla kan tawh nî tin buainate hmachhawn thei tûrin min ṭanpui thei a. Chu aia tam pawh min ṭanpui a ni. Nakin hun êng tak a awm thu a sawi bâkah hlimna leh lungâwina tluantling nei tûra min hruaitu kawng hmuh tûr leh zawh tûrin min ṭanpui bawk a ni. (Sâm 119:105) Chu chu engtin nge a nih theih?

Bible-in nakin hun beiseina ṭha tak min pêk theih dân kawng hnih i lo ngaihtuah ang u: 1 Bible-in nunah thiltum min neihtîr a, 2 min Siamtu nêna kumkhaw inṭhianna neih theih dân min zirtîr a ni.

1 NUNA THILTUM

Bible chuan kan buainate hmachhawn thei tûrin thurâwn ṭha tak takte min pe a; mahse, Bible hi mahni inzirna lehkhabu satliah mai a ni lo. Bible chuan mahni buaina ringawt ngaihven tûrin min fuih lova, chu aia thil pawimawh zâwk hre tûrin min zirtîr a ni. Chutianga kan tih chauhvin kan nun hian awmze dik tak a nei ang.

Entîr nân, he Bible thu bul: “Englo lâk aiin pêkin lukhâwng a nei zâwk,” tih hi han ngaihtuah teh. (Tirhkohte 20:35) Tisa lama ṭanpui ngai tuemaw i ṭanpui lai kha i ngaihtuah chhuak thei em? A nih loh leh, i ṭhian tuemawin a rilrua awmte a hrilh che chu i ngaihthlâksak pawh a ni mai thei. Mi dangte tizangkhai tûra i ṭanpui hian thil engemaw hlen chhuak angin i inngai lo maw?

A lêt leh engmah beisei lova mite kan ṭanpui hian hlimna nasa tak kan nei a. Ziaktu pakhat chuan: “I  pêk—lâwmman engmah beisei lova i pêk—aia tam hmu lêt leh lova awm chu thil ni thei lo tluk a ni,” tiin a ziak a. Mahse, a bîk takin, pêk lêt leh tûr nei lote hnêna thil kan pêk hian lâwmman kan dawng ngei a ni. Dik tak chuan, chutiang khawngaihna thiltihte chu amah pûktîr anga thlîrtu Siamtu nêna thawk tlâng kan ni. (Thufingte 19:17) Ani chuan mi retheite tâna kan thiltihte chu a ngaihlu hle a, nakin hun beisei tûr ropui tak, lei paradis-a chatuan nunna aia tam zâwk rûl leh tûrin min tiam a ni!—Sâm 37:29; Luka 14:12-14. *

Thil dang zawng aiin, Bible chuan Pathian dik Jehova kan biak avângin nunah thiltum dik tak kan nei thei tih min zirtîr a. A Thu chuan ani chu faknate, chawimawinate pe tûr leh a thu âwih tûrin min fuih a ni. (Thuhriltu 12:13; Thu Puan 4:11) Chutianga kan tih chuan, ngun taka ngaihtuah tûr thil pakhat kan hlen tihna a ni: min Siamtu chungah a ṭha zâwngin nghawng kan nei, tih hi. Dik takin, ani chuan: “Fing la, ka thinlung tilâwm rawh,” tiin min fuih a. (Thufingte 27:11) Han ngaihtuah teh—Bible-a târ lan thu bulte ṭanchhana thu tlûkna fing tak kan siam hian, hmangaihna ngah tak vâna kan Pa chu kan tilâwm a ni. Engvângin nge? Ani chuan min ngaihsak avângin a kaihhruainate zâwm a, hlâwkpui tûrin min duh a. (Isaia 48:17, 18) Ni e, Lei leh vâna Lalchungnungber chibai bûk leh a thinlung tilâwm thei zâwnga nun aia thiltum ṭha zâwk eng nge kan neih theih?

2 MIN SIAMTU NENA INṬHIANNA

Bible chuan min Siamtu nêna inṭhianna ṭha tak nei tûrin min zirtîr bawk a. “Pathian hnaih rawh u, tichuan anin a hnaih ang che u,” tiin a sawi a ni. (Jakoba 4:8) Siamtu engkimtithei nêna inṭhian chu a theih tak tak leh tak tak loh rinhlelh châng kan nei mai thei a. Mahse, Bible-in ‘Pathian kan zawn’ chuan “ani chuan min hlat lo ṭheuh” avângin ‘kan hmu thei’ ngei dâwn tih min tiam a ni. (Tirhkohte 17:27) Pathian nêna inṭhian tûra Bible fuihna chu kan nakin hun atâna ṭangkai tak a ni. Eng kawngin nge?

Ngaihtuah tûr: Eng ang pawhin tum mah ila, hmêlma hnuhnûng ber—thihna—pumpelh thei tumah kan awm lo. (1 Korinth 15:26) Mahse, Pathian chu chatuanin a nung a. Ani chu engtikah mah a thi ngai lova, a ṭhiante pawh chatuana nung tûrin a duh a ni. Jehova’n amah zâwngtute tâna a duh chu Bible-in ṭawngkam mawi tak leh tluangtlam takin heti hian a sawi a ni: “In thinlung chu kumkhuain nungin awm rawh se,” tiin.—Sâm 22:26.

Engtin nge Pathian nêna kumkhuaa inṭhianna chu i neih theih? A Thu, Bible-ah a chanchinte zîr zawm zêl la. (Johana 17:3; 2 Timothea 3:16) Pathian Lehkha Thute hre thiam tûrin a ṭanpuina dîl rawh. Finna nei tûra tih tak zeta ‘Pathian kan dîl’ chuan min pe ngei ang tih Bible-in min tiam a ni. * (Jakoba 1:5) A tâwpah, i thil zirte chu nunpui tum la, Pathian Thu chu “[I] ke atânte hian khâwnvâr” leh “[i] kawng atân êng,” nihtîr ang che—tûnah leh chatuan thlengin.—Sâm 119:105.

^ par. 8 Pathian thutiam Paradis-a chatuan nunna chungchâng hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih bung 3-na chu en rawh.

^ par. 13 Jehova Thuhretute chuan Bible i hriat thiam lehzual theih nân a thlâwnin Bible an zirpui thei che a ni. A zir dân hriat nân, khawngaihin Bible Zirnaah Eng Nge Thleng Ṭhîn? tih video hi en ang che. I en theih dân tûr chu jw.org/lus-ah kal la, a hnuaia Search hi hmetin, a thupui chhu lût rawh.

Pathian chu chatuanin a nung a, a ṭhiante pawh chatuana nung tûrin a duh