A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng  |  No. 3 2017

 A KAWM THU | VANTIRHKOHTE—AN AWM TAK TAK EM? HRIAT A PAWIMAWH CHHAN

Vântirhkohte’n An Ṭanpui Theih Dân Che

Vântirhkohte’n An Ṭanpui Theih Dân Che

Vântirhkoh rinawmte chuan mihringte chu an ngaihvenin, Jehova duhzâwng tihnaah phûr takin an tel a. Pathianin leilung a siam khân, vântîrhkohte chu “an zai khâwma, Pathian fate zawng zawng an au,” a ni. (Joba 38:4, 7) Hun kalta zawng zawngah khân, vântirhkohte chuan leilunga nakina thil lo thleng tûr chungchânga hrilh lâwkna thute chu “bih an duh ṭhîn a ni.”—1 Petera 1:11, 12.

Pathian duhzâwng thleng famkim tûrin vântirhkohte’n betu dikte an humhim châng a awm tih Bible-in min hrilh a. (Sâm 34:7) Entîr nân:

  • Jehova’n Sodom leh Gomorra khawpui sual tak a tihchhiat khân, vântîrhkohte chuan mi fel Lota leh a chhûngte chu khawpui ata tlân chhuak tûrin an ṭanpui a ni.—Genesis 19:1, 15-26.

  • Hmân lai Babulon-ah Hebrai tlangvâl pathumte chu rawhtuina meia tihhlum tûr an nih khân, Pathian chuan ‘a vântirhkoh a rawn tîr a, a chhiahhlawhte chu a chhan chhuak’ a ni.—Daniela 3:19-28.

  • Mi fel Daniela chuan sakeibaknei rilṭam lutuk awmna pûkah zân khat a awm hnu chuan, ‘Pathian chuan a vântirhkoh a rawn tîr a, sakeibaknei kâte a tihchîp’ avânga a dam khawchhuah thu a sawi a ni.—Daniela 6:16, 22.

Vântirhkohte chuan hmân lai aṭang tawhin mi rinawmte chu an ṭanpui

VANTIRHKOHTE’N KRISTIAN KOHHRAN HMASATE AN ṬANPUI

Pathian thuchah keng vântirhkohte chu Jehova thiltum a famkim theih nân Kristian kohhran hmasate thiltihnaah an inrawlh ṭhîn a ni. Entîr nân:

  • Vântirhkoh pakhatin tân in kawngka rawn hawngin chuta awm tirhkohte chu biak ina thu hril zawm zêl tûrin a hrilh a ni.—Tirhkohte 5:17-21.

  • Vântirhkoh pakhatin chanchin ṭha hriltu Philipa chu Jerusalem aṭanga Gaza khua kalna thlalêr kawnga va kal a, Pathian chibai bûk tûra Jerusalema kal Ethiopia mi chu thu va hrilh tûrin a hrilh a ni.—Tirhkohte 8:26-33.

  • Kristian ni tûra Juda mi ni lote tâna Pathian hun ruat a thlen chuan, vântirhkoh pakhat chu Rom sipai lal Kornelia hnênah a inlâr a, a inah tirhkoh Petera hruai tûrin a hrilh a ni.—Tirhkohte 10:3-5.

  • Tirhkoh Petera chu tân ina a awm laiin, vântirhkoh pakhat chu a hnêna inlârin tân in ata a chhuahtîr a ni.—Tirhkohte 12:1-11.

 VANTIRHKOHTE’N AN ṬANPUI THEIH DAN CHE

Pathianin tûn hmaa mak taka mite a lo ṭanpui ṭhin angin, tûn laiah pawh mite ṭanpui tûrin vântirhkohte a hmang tih finfiahna a awm lo. Mahse, kan hun chungchângah Isua chuan: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi a. (Matthaia 24:14) Krista zirtîrte chuan he hna hi vântirhkohte kaihhruaina hnuaiah an thawk mêk tih i hria em?

Leilung tluan chhuaka chanchin ṭha puannaah vântirhkote’n an ṭanpui

Khawvêl pum huapa mite’n Pathian Jehova chungchâng leh mihringte tâna a thiltumte zir tûrin vântirhkohte chuan ṭhahnemngai takin an ṭanpui tih Thu Puan buin min hrilh a. Tirhkoh Johana chuan: “Leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra chatuan Chanchin Ṭha nei vântirhkoh dang vanlaizâwla thlâwk ka hmu a; tin, ani chuan aw ring takin, ‘A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,’” tiin a sawi a ni. (Thu Puan 14:6, 7) Vântirhkohte’n khawvêl pum huap Lalram thu hrilh hna chu an ṭanpui a ni tih tûn lai thiltawn tam takte hian a târ lang a. Ni e, mi sual pakhat chu inchhîr a, Jehova lam a hawi leh chuan ‘Pathian vântirhkote chu an lâwm ṭhîn a ni.’—Luka 15:10.

Thu hrilh hna a tâwp hunah eng thil nge thleng ang? Chutih hunah chuan vântirhkoh “vâna sipaihote” chuan Lalte Lal, Isua Krista chu Har–Magedon, ‘Pathian Engkimtitheia ni ropuia indonaah’ an ṭanpui ang. (Thu Puan 16:14-16; 19:14-16) Lal Isua’n ‘Lalpa Isua chanchin ṭha âwih lo mite chunga phuba a lâk’ hunah vântirhkoh chak takte chuan chûng mite chu an tihlum vek dâwn a ni.—2 Thessalonika 1:7, 8.

Chuvângin, vântirhkohte chuan a mi mal takin an ngaihven che tih i ring thei a. Anni chuan Pathian rawngbâwl duhtute ṭhatna tûr an ngaihsak hle a, Jehova’n leia a chhiahhlawh rinawmte tichak tûr leh humhim tûrin anni chu a hmang fo a ni.—Hebrai 1:14.

Chuti a nih chuan, mi tinin duhthlanna pawimawh tak kan siam a ngai a. Tûna khawvêl pum huapa puan mêk chanchin ṭha chu kan ngaithlain kan zâwm ang em? Pathian vântirhkoh chak takte ṭanpuina hlâwkpui tûrin i awmna hmuna Jehova Thuhretute chuan ṭanpui che an châk hle a ni.