A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  July 2016

Pathian Khawngaihna Lâwm Taka Dawngtute

Pathian Khawngaihna Lâwm Taka Dawngtute

“Kan chang ṭheuh, khawngaih chunga khawngaih leh chhâwnna nên.”—JOHANA 1:16.

HLA: 1, 13

1, 2. (a) Isua sawi grêp huan neitu tehkhin thu chu sawi rawh. (b) Engtin nge tehkhin thu chuan thilphalna leh khawngaihna mizia a târ lan?

TUK khat chu, hlawhfa ruai tûrin grêp huan neitupa chu dâwr hmunah a kal a. An hnênah an hlawh zât tûr a hrilh a, anni chuan an pawm ta a. Mahse, huan neitu chuan hnathawktu tam tak a mamawh avângin, chu mi nî chuan hlawhfa rawih belh tûrin dâwr hmunah chuan vawi tam tak a va kal a. Hlawhfa zawng zawngte hnênah a inâwm tâwk a pêk tûr thu a hrilh a ni. Tlai lamah, huan neitu chuan hnathawktu zawng zawng chu hlawh pe tûrin a ko khâwm a. Ni khat pumhlûm an thawk emaw, dârkâr khat chauh an thawk emaw pawh ni se, hlawh inang a pe vek a ni. Mahse, ni khat pumhlûm thawktuin a sawisêl chuan a neitu chuan a hnênah: ‘I hlawh zât tûr ka hrilh che khân i pawm a ni lâwm ni? Ka hnathawktute hnênah ka duh zât zât pe tûrin dikna ka nei lo vem ni? Ka thilphalna avângin nangin i itsîk em ni?’ tiin a hrilh a ni.—Matthaia 20:1-15.

2 Isua tehkhin thu chuan Jehova “khawngaihna” chungchângah thil pawimawh tak min zirtîr a. [1] (Endnote en rawh.) (2 Korinth 6:1 chhiar rawh.) Engtin nge? Mi ṭhenkhat chuan ni khat pumhlûma thawktuin mi dangte aiin hlawh tam zâwk tûrah an ngai mai thei a. Mahse, huan neitu chuan dârkâr rei lo tê chauh thawktu hnênah chuan khawngaihna a lantîr a ni. Mi thiam pakhat chuan,  Bible-a “khawngaihna” tih thu mal hman dân chungchângah: “Mi pakhat hnênah a hlawh chhuah loh leh a phû loh thil engemaw a thlâwna pêkna a kâwk a ni,” tiin a sawi.

PHAL TAKA JEHOVA THIL MIN PEK

3, 4. Engvângin nge Jehova chuan mihring zawng zawngte chungah khawngaihna a lantîr a, engtin nge a lantîr?

3 Bible chuan Pathian khawngaihna chu “athlâwna pêk” a ni tih min hrilh a. (Ephesi 3:7) Famkim taka Jehova thu kan âwih theih loh avângin, Pathian hnên aṭangin khawngaihna dawn kan phû lo. A nihna takah chuan, thi tlâk kan ni. Lal Solomona chuan: “Thil ṭha titu, thil sual ti hauh lo khawpa mi fel chu lei chungah hian an awm lo,” tiin a sawi. (Thuhriltu 7:20) A hnuah, tirhkoh Paula chuan: “Mi zawng zawngin thil an tisual tawh vek a, Pathian ropuina an chang zo ta lo,” tiin leh “sual man chu thihna a ni,” tiin a sawi a ni.—Rom 3:23; 6:23a.

4 Jehova chuan mihringte a hmangaih êm avângin, kan aia thi tûrin “a Fapa mal neih chhun” chu a rawn tîr a. Chu chu khawngaihna thiltih azawnga ropui ber a ni. (Johana 3:16) Paula chuan, Isua chu “thihna tuar avânga ropuina leh chawimawina khumtîra awmin ka hmu ta zâwk a ni. Pathian khawngaihna zârah thihna chu mi tin tân a temsakna tûrin,” tiin a sawi a. (Hebrai 2:9) Ni e, “Pathian thilthlâwnpêk erawh chu kan Lalpa Krista Isua zârah chuan chatuana nunna a ni.”—Rom 6:23b.

5, 6. (a) Sualin kan chunga ro a rêl hian eng nge a rah chhuah? (b) Khawngaihnain kan chunga ro a rêl hian eng nge a rah chhuah?

5 Engvângin nge kan sual a, kan thih? Bible chuan, “mi pakhat sual avânga thihnain . . . ro a rêl,” tih a sawi a. Adama thlahte kan nih avângin, kan ṭha famkim lovin, kan thi a ni. (Rom 5:12, 14, 17) Mahse, sual rorêlna hnuaia awm lo tûr leh a thununa awm lo tûrin duh kan la thlang thei tho a ni. Chu chu engtin nge a nih theih? Krista tlanna inthawina kan rin hian, Jehova khawngaihna chu kan hlâwkpui a. Bible chuan: “Sual a punna apiangah khawngaihna chu a pung lehzual ṭhin; sual chuan thihnain ro a rêl ang takin, khawngaihna chuan felnain chatuan nun channa khawp hialin kan Lalpa Isua Krista zâra ro a rêl theih nân,” tiin a sawi a ni.—Rom 5:20, 21.

6 Mi sualte kan la ni reng chung pawhin, sual rorêlna hnuaia kan awm kher a ngai lo. Chuvângin, thil sual engemaw kan tih hian, Jehova ngaihdamna kan dîl a. Paula chuan: “Sualnain in chungah thu a nei dâwn tawh si lo, dân rorêla awm in ni lo va, khawngaihna rorêla awm in ni zâwk si a,” tiin min hrilh a ni. (Rom 6:14) Chuti a nih chuan, engtin nge Pathian khawngaihna chu kan hlâwkpui theih? Paula chuan: “Pathian khawngaihna [chuan] . . . Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian ngaihsaka awm tûr a ni tih min zirtîr a,” tiin a sawi a ni.—Tita 2:11-13.

‘KAWNG TINRENGA LANG CHHUAK’ KHAWNGAIHNA

7, 8. Jehova khawngaihna chu ‘kawng tinrêngin a lang chhuak’ tih awmzia chu eng nge ni? (A thupui chunga milem en rawh.)

7 Tirhkoh Petera chuan: ‘Mi tinin thilpêk in hmuh ang zêlin Pathian khawngaihna, kawng tinrênga lang chhuak enkawltu ṭhate angin, chûng chuan rawng inbâwl tawn ṭheuh rawh u,’ tiin a ziak a. (1 Petera 4:10) Jehova khawngaihna chu ‘kawng tinrêngin a lang chhuak’ tih awmzia chu eng nge ni? Chu chu, nunah eng ang harsatna pawh tâwk mah ila, Jehova chuan tuar chhuak thei tûrin kan mamawh tak min pe ang tihna a ni. (1 Petera 1:6) Ani chuan fiahna tinte kan hmachhawn theih nân, kan mamawh tak chu min pe reng ang.

8 Tirhkoh Johana chuan: “A famkimna kan chang ṭheuh, khawngaih chunga khawngaih leh chhâwnna nên,” tiin a ziak a. (Johana 1:16)  Jehova chuan a khawngaihna chu kawng tam taka a lantîr avângin, malsâwmna tam tak kan dawng a ni. Chûng malsâwmnate zînga ṭhenkhat chu engte nge ni?

9. Engtin nge Jehova khawngaihna chu kan hlâwkpui a, chu mi avânga kan lâwmzia engtin nge kan lantîr theih?

9 Jehova chuan kan sualte a ngaidam. A khawngaihna zârah, Jehova chuan kan sualte a ngaidam a. Mahse, kan inchhîr a, thil sual kan tih châknate kan do zawm zêl chauhvin min ngaidam a ni. (1 Johana 1:8, 9 chhiar rawh.) Paula chuan a hun laia hriak thih Kristiante hnênah Jehova’n sualte a ngaihdam dân a hrilhfiah a ni: “[Pathian] chuan thim thuneihna laka min chhan chhuakin, a Fapa hmangaih taka ramah chuan min kaitîr ta a; amahah chuan kan tlanna kan hmu a ni—kan sualte ngaihdamna chu,” tiin. (Kolossa 1:13, 14) Pathian khawngaihna chunga kan lâwm êm avângin amah fak kan duh a. Chu bâkah, Jehova’n kan sualte min ngaihdam avângin, malsâwmna dang tam tak kan dawng thei bawk a ni.

10. Pathian khawngaihna avângin eng nge kan neih theih?

10 Pathian nêna inlaichînna muanawm tak kan nei thei. Ṭha famkim lo kan nih avângin, kan pian tirh aṭangin Pathian hmêlmate kan ni a. Mahse, Paula chuan: ‘Hmêlma kan nih lai maha a Fapa thihna avânga Pathian nêna lo inrem tawh kan ni,’ tiin a sawi. (Rom 5:10) Tlanna avângin, Pathian nên inremin kan lo awm thei ta a, chutiang chuan amah nên inrem taka awmin, a ṭhian kan ni thei ta a ni. Paula chuan, chu thu leh Jehova khawngaihna a inkûngkaih dân chungchângah hriak thih a unaute chu: “Rinna avânga thiam changa awmin, kan Lalpa Isua Krista avângin Pathian nên inremin i awm ang u; amah avâng vêk chuan he khawngaihna kan din nghehnaah hian rinnain kan lût ta,” tiin a hrilhfiah a ni. (Rom 5:1, 2) Jehova nêna inṭhianna muanawm tak kan nei chu kan va lâwm tak êm!

Chanchin ṭha hriat theihna chanvo hlu (Paragraph 11-na en rawh)

11. Engtin nge hriak thihte chuan ‘berâm dangte’ chu felnaa an hruai?

11 Pathian hmaah mi fel kan ni thei. Zâwlnei Daniela chuan tâwpna hun chhûngin, “a fingate,” a nih loh leh hriak thihte chuan “mi tam tak felnaa” an hruai tûr thu a ziak a. (Daniela 12:3 chhiar rawh.) Engtin nge hriak thihte chuan an hruai? Anni chuan chanchin ṭha an hril a, “berâm dang” maktaduai têlte chu Jehova dânte an zirtîr a ni. (Johana 10:16) Anni chu Pathian hmaa mi fel ni tûrin an ṭanpui a, chu chu Jehova khawngaihna avâng chauhva tih theih a ni. Paula chuan: “Krista Isuaa tlanna awm avâng chuan, [Pathian] khawngaihnain athlâwna thiam chantîrin an awm,” a nih loh leh fela ruat an ni, tiin a hrilhfiah a ni.—Rom 3:23, 24.

Ṭawngṭai theihna (Paragraph 12-na en rawh)

12. Engtin nge ṭawngṭaina chu Pathian khawngaihna nêna a inkûngkaih?

12 Ṭawngṭaiin Pathian kan hnaih thei. A khawngaihna avângin, Jehova hnênah kan ṭawngṭai thei a. Paula chuan Jehova ṭhutna chu “khawngaihna lalṭhutphah,” tiin a ko va, chu chu ‘huai taka’ pan tûrin min sâwm a ni. (Hebrai 4:16) Isua hmingin eng hunah pawh Jehova hnênah kan ṭawngṭai thei a. Chu chu chawimawina ropui a va ni êm! Paula chuan: “Chu Krista Isua kan rin avâng chuan amah vêkah chuan nêlna leh ngam taka luh theihna kan nei,” tiin a sawi a ni.—Ephesi 3:12.

A hun taka ṭanpuina (Paragraph 13-na en rawh)

13. Engtin nge khawngaihna chuan ‘puih kan ngaih huna min ṭanpui’?

13 A hun takah ṭanpuina kan hmu thei. Paula chuan, kan mamawh hun apianga “zahngaihna kan hmuh theihna tûr leh puih kan ngaih huna ṭanpuina khawngaihna kan hmuh theihna” tûra Jehova hnêna ṭawngṭai tûrin min fuih a. (Hebrai 4:16) Kan nunah fiahna emaw, harsatna emaw kan hmachhawn apiang hian Jehova ṭanpuina kan dîl thei a ni. Min chhân  ngai kher lo mah se, kan ṭawngṭainate chu min chhâng a. Kan unaute hmangin min ṭanpui ṭhîn a ni. Jehova chuan kan ṭawngṭainate a chhân avângin: “Huai takin, ‘Lalpa chu mi ṭanpuitu a ni, ka hlau lo vang; mihringin engnge mi tih theih ang?’ kan ti thîn a ni.”—Hebrai 13:6.

14. Engtin nge Jehova khawngaihna chu kan thinlungin a hlâwkpui?

14 Thinlung thlamuanna kan dawng thei. Rilru hahna kan neih apianga Jehova’n min thlamuan ṭhîn chu malsâwmna ropui tak a ni a. (Sâm 51:17) Thessalonika khuaa Kristiante’n tihduhdahna an tawrh khân, Paula chuan: “Kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan, in thinlungte chu tithlamuangin, . . . tinghet rawh se,” tiin a ziak a ni. (2 Thessalonika 2:16, 17) Jehova’n min khawngaih avângin min hmangaihin min ngaihsak tih hriat chu a va thlamuanthlâk tak êm!

15. Pathian khawngaihna zârah eng beiseina nge kan neih?

15 Chatuana nun beiseina kan nei. Sual fate kan nih avângin, Jehova ṭanpuina tel lo chuan beiseina engmah kan nei lo. (Sâm 49:7, 8 chhiar rawh.) Mahse, Jehova chuan beiseina ropui tak min pe a. Chu chu eng nge ni? Isua chuan: “Hei hi ka Pa duhzâwng a ni, tupawh Fa hmu a, ring apiangin chatuana nunna nei sela,” tiin a sawi a. (Johana 6:40) Chuvângin, Jehova khawngaihna avânga chatuana nun beiseina nei kan ni. Paula chuan: “Mi zawng zawng hnênah chhandamna rawn thlenin Pathian khawngaihna a lo lang ta si a,” tiin a sawi.—Tita 2:11.

PATHIAN KHAWNGAIHNA CHU SUAL TIH NAN HMANG SUH

16. Engtin nge Kristian hmasa ṭhenkhat chuan Pathian khawngaihna chu an hman dik loh?

16 Jehova khawngaihna avângin malsâwmna tam tak kan dawng a. Mahse, a khawngaihna chu thil sual tih nân kan hmang tûr a ni lo. Kristian hmasate zîngah pawh, ‘Pathian khawngaihna chu hurnaa chantîr’ tum mi ṭhenkhat an awm a. (Juda 4) Chûng Kristian rinawm lote chuan thil sual an tih hian Jehova’n a  ngaidam reng tûrah an ngai a ni thei ang. An unaute pawh an thil sual tih ang tihtîr ve an tum hial a ni. Tûn laiah pawh, chutiang titu chuan, ‘khawngaihna thlarau a tivui’ a ni.—Hebrai 10:29.

17. Eng zilhna khauh tak nge Petera’n a pêk?

17 Setana chuan tûn laia Kristian ṭhenkhat chu thil an tisual theiin, an thiltih sual chu Jehova’n a ngaidam nghâl zêl thei dâwn nia ngai tûrin a bum a. Jehova chuan thil sual ti inlamlêtte ngaihdam a inhuam tih chu a dik ngei mai; mahse, thil sual tih châkna kan neihte do tûrin min beisei a ni. Ani chuan Petera chu: “Chutichuan duh takte u, nangnin chûng thu chu in lo hriat lâwk avângin fîmkhur rawh u, chutilochuan mi sualte dik lohnaa hruai bova awmin in sualte dik lohnaa hruai bova awmin in nghet ṭha lai in tlu dah ang e. Amaherawhchu kan Lalpa leh Chhandamtu Isua Krista khawngaihna leh hriatnaah chuan lo ṭhang lian rawh u,” tia ziak tûrin a thâwkkhum a ni.—2 Petera 3:17, 18.

KHAWNGAIHNAIN MAWHPHURHNATE MIN NEIHTIR

18. Jehova khawngaihna zârah eng mawhphurhnate nge kan neih?

18 Jehova khawngaihna avângin kan lâwm hle a. Chuvângin, thilpêk kan dawnte chu Jehova chawimawi nân leh mi dangte ṭanpui nân kan hmang tûr a ni. Chu chu an hnêna kan bat a ni a. Chûng thilpêkte chu engtin nge kan hman theih? Paula chuan: “Khawngaihna min pêk angzia zêlin thilthlâwnpêk hrang hrang kan nei ṭheuh va, . . . rawng bâwl tûr a nih chuan rawng i bâwl tlat ang u; zirtîrtu pawhin zirtîr tlat rawh se; zilhtu pawhin zilh tlat rawh se; . . . mi khawngaihtuin lâwm takin khawngaih rawh se,” tiin a sawi a ni. (Rom 12:6-8) Jehova khawngaihna zârah, rawngbâwlnaah theih tâwp chhuah tûrin, mi dangte hnêna Bible zirtîr tûrin, kan unaute fuih tûrin, leh min tilungni lotute ngaidam tûrin mawhphurhna kan nei a ni.

19. A dawta thuziakah chuan kan neih eng mawhphurhna nge kan bih chian ang?

19 Jehova khawngaihna dawngtute kan nih angin, hmun tina ‘Pathian khawngaihna chanchin ṭha hriattîr tûra’ theih tâwp chhuah tûr kan ni a. (Tirhkohte 20:24) Chu mawhphurhna chu a dawta thuziakah kan bih chiang ang. (ws16.07-E)

^ [1] (paragraph 2-na) New World Translation siam ṭhata “Thu Har Hrilhfiahnaa” awm “khawngaihna” tih thu mal chu en ang che.