A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  February 2017

Tûn Laia Pathian Mite Kaihruaitu Chu Tu Nge Ni?

Tûn Laia Pathian Mite Kaihruaitu Chu Tu Nge Ni?

‘In hotute chu hre reng ula.’—HEBRAI 13:7.

HLA: 43, 53

1, 2. Isua vâna a lâwn hnu khân, tirhkohte chuan eng nge an ngaihtuah mai theih?

ISUA tirhkohte chuan Olive Tlânga dingin, an pu leh an ṭhian Isua vâna hruai chhoh a nih a, chhûmin a hliah thlengin an en reng a. (Tirhkohte 1:9, 10) Kum hnih chhûng vêl chu Isua’n anni chu a zirtîr a, a fuih a, a kaihruai bawk a ni. Mahse, tûnah a awm tawh lo. Eng nge an tih tâk ang?

2 Vâna a kal hmain Isua’n a hnungzuite hnênah: “Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin a hrilh a. (Tirhkohte 1:8) Chu hna chu engtin nge an thawh theih ang? Pathian thlarau thianghlimin anni chu a ṭanpui ang tih Isua’n a tiam a ni. (Tirhkohte 1:5) Mahse, khawvêl pum huap thu hrilh rawngbâwlna chu tuin nge kaihruaiin, ruahman ang? Tirhkohte chuan hmân lai Israel mite kaihruai tûrin Pathianin mipaho a hmang tih an hria a. Chuvângin, tûnah Jehova’n hruaitu thar a thlang ang em tih an ngaihtuah mai thei.

3. (a) Isua vâna a lâwn hnu khân, tirhkoh rinawmte’n eng thu tlûkna pawimawh tak nge an siam? (b) He thuziakah hian eng zawhnate nge kan chhân ang?

 3 Isua vâna a lâwn hnu lawkah, a zirtîrte chuan Pathian Lehkha Thu an chhût ngun a, Pathian ṭanpuina dîlin an ṭawngṭai a, tirhkoh 12 zînga Juda Iskariota aiah Matthia chu an thlang ta a ni. (Tirhkohte 1:15-26) Engvângin nge chu mi thlanna chu an tân leh Jehova tân a pawimawh êm êm? Zirtîrte chuan tirhkoh 12 a awm a ngai tih an hria a. * (Foonote en rawh.) Isua’n tirhkoh 12 te chu thlangin, Pathian mite zînga chanvo pawimawh tak chelh tûrin a zirtîr a ni. Chu chanvo chu eng nge ni a, Jehova leh Isua’n anni chu engtin nge an buatsaih? Tûn laiah chutiang ruahmanna ang chu eng nge awm? Engtin nge kan zînga ‘hotute’ a bîk takin “bawi rinawm, fing tak” chu kan hriat reng theih ang?—Hebrai 13:7; Matthaia 24:45.

ISUA’N GOVERNING BODY A KAIHRUAI

4. Jerusalema tirhkohte leh upa dangte chuan eng chanvo nge an neih?

4 C.E. 33 Peticost nî khân tirhkohte chuan Kristian kohhran chu an kaihruai ṭan a. Bible chuan “Petera chu sawm leh pakhatte nên an ding za a,” mipui tam takte chu nun chhanhimna thutak an zirtîr tih a sawi. (Tirhkohte 2:14, 15) Chûng mipui zînga tam tak chu Kristian an rawn ni a. A hnuah, chûng Kristian tharte chu “tirhkohte zirtîrin, . . . ṭhahnemngai takin an awm reng,” a ni. (Tirhkohte 2:42) Tirhkohte chuan kohhran sum enkawlnaah mawhphurhna an nei a. (Tirhkohte 4:34, 35) Pathian mite chu an zirtîr a, an ṭawngṭaisak bâkah: “Ṭawngṭai leh thu rawngbâwlin kan awm leh tlat zêl ang,” tiin an sawi bawk. (Tirhkohte 6:4) Tichuan, thiltawn ngah Kristiante chu bial thara thu hril tûrin an tîr a ni. (Tirhkohte 8:14, 15) A hnuah, hriak thih upa dangte chuan kohhran kaihhruainaah tirhkohte chu an rawn zawm a. Governing body niin, anni chuan kohhran zawng zawng hnênah kaihhruaina an pe a ni.—Tirhkohte 15:2.

Kum zabi khatnaa Kristiante chuan Jehova’n Isua hmangin governing body a kaihruai tih an hria

5, 6. (a) Thlarau thianghlim chuan governing body chu engtin nge a tihchak? (A thupui chunga milem en rawh.) (b) Engtin nge vântirhkohte chuan governing body chu an ṭanpui? (c) Engtin nge Pathian Thu chuan governing body a kaihhruai?

5 Kum zabi khatnaa Kristiante chuan Jehova’n Isua hmangin governing body a kaihruai tih an hria a. Chu chu engtin nge an chian theih? A hmasa berin, thlarau thianghlim chuan governing body chu a tichak a. (Johana 16:13) Hriak thih Kristian zawng zawngte chuan thlarau thianghlim an dawng vek a, chu chuan a bîk takin Jerusalema awm tirhkohte leh upate chu hotu nia an chanvo hlen chhuak thei tûrin a tichak a ni. Entîr nân, C.E. 49 khân thlarau thianghlim chuan governing body chu  serhtan chungchânga thu tlûkna siam tûrin a ṭanpui a. Kohhrante chuan chu kaihhruaina chu an zui a ni. Chuvângin, “rinnaah chuan an nghet ta a, ni tin an pung ta deuh deuh” a ni. (Tirhkohte 16:4, 5) Serhtan chungchânga kohhran hnêna lehkhathawn aṭangin, governing body chuan Pathian thlarau thianghlim an dawng tih leh hmangaihna leh rinna ang chi miziate an lantîr tih kan hre thei a ni.—Tirhkohte 15:11, 25-29; Galatia 5:22, 23.

6 A pahnihnaah, vântirhkohte chuan governing body chu an ṭanpui a. Entîr nân, vântirhkoh pakhat chuan Kornelia chu tirhkoh Petera zawng hmu tûrin a hrilh a ni. Petera’n Kornelia leh a chhûngte thu a hrilh hnuah, serhtan lohte pawhin thlarau thianghlim an dawng ta a. Chutiang chuan Kornelia chu serhtan loh Gentail Kristian rawn ni hmasa ber a ni ta a ni. Tirhkohte leh unau dangte’n chu thu an hriat chuan, Pathian duhzâwng chu pawmin, serhtan loh Gentailte chu Kristian kohhranah an lâwm lût a. (Tirhkohte 11:13-18) Governing body-in a kaihhruai thu hrilh rawngbâwlna chu vântirhkohte’n phûr takin an ṭanpui tih heta ṭang hian kan hre thei a ni. (Tirhkohte 5:19, 20) A pathumnaah, Pathian Thu chuan governing body chu a kaihruai a. Anni chuan Kristian rinna chungchânga thu tlûkna pawimawh tak siamnaah leh kohhran kaihhruainaah ṭanpuitu atân Pathian Lehkha Thu an hmang a ni.—Tirhkohte 1:20-22; 15:15-20.

7. Kristian hmasate chu Isua’n a kaihruai tih engvângin nge kan sawi theih?

7 Governing body chuan kohhranah thuneihna nei mah se, kohhrana mite chuan an Hruaitu chu Isua Krista a ni tih an hria a. Chu chu engtin nge kan hriat? Krista chuan “ṭhenkhatte chu tirhkoh atân” a ruat tiin tirhkoh Paula’n a sawi a. Ani chu kohhran “lû,” a nih loh leh Hruaitu a ni tih a sawi bawk. (Ephesi 4:11-13, 15) Tirhkoh tuemaw hming chawia inkoh aiin, “zirtîrte chu Pathian kaihhruainain Kristian tia koh an ni.” (Tirhkohte 11:26, NW) Bible ṭanchhana tirhkohte leh hruaitu upate zirtîrna zui a pawimawhzia Paula’n a hria a. Chuti chung pawhin Paula chuan: “Amaherawhchu mipa tawh phawt lû chu Krista a ni, . . . tih in hriat ka duh a ni,” tiin a sawi a. He thu-ah hian governing body zawng zawngte pawh an tel a ni. Ani chuan: “Krista lû chu Pathian a ni,” tiin a sawi belh a. (1 Korinth 11:2, 3) Jehova’n a Fapa, Isua Krista chu kohhran hruaituah a ruat tih a chiang hle.

“HEI HI MIHRING HNA A NI LO”

8, 9. Unau Russell-a chuan eng chanvo pawimawh tak nge a neih?

8 Kum 1870 aṭangin, Charles Taze Russell-a leh a ṭhian ṭhenkhatte chuan Bible mila Pathian biak leh mi dangte pawh chutianga ti ve tûra ṭanpui an tum a. Chutah chuan ṭawng hrang hrang hmang mite ṭanpui a tel a ni. Chuvângin Zion Watch Tower Tract Society chu kum 1884-ah dân anga din a ni a, Unau Russell-a chu president a ni. * (Footnote en rawh.) Bible chu ngun takin a zir a, Trinity leh thlarau thi thei lo tih ang chi church zirtîrnate chu Bible-ah a awm lo tih mite hnênah huaisen takin a hrilh a ni. Krista chu hmuh theih  lohvin a lo kal ang tih leh kum 1914-ah “Jentailte nî a kin” ang tih chu a hre thiam a. (Luka 21:24) Unau Russell-a chuan hêng thutakte mite zirtîr nân a hun leh tha leh sumte chu a hmang a ni. Jehova leh Isua chuan Unau Russell-a chu mihring chanchina hun pawimawh takah kaihruaitu atân an hmang tih a chiang hle.

9 Unau Russell-a chuan mite ngaihsân hlawh a duh lo va. Kum 1896-ah amah leh mawhphurhna nei mi dangte chuan englaimahin chawimawi hlawh an duh ngai lo tiin a ziak a ni. Anni chuan nihna engemaw bîk neih an duh lo va, eng pâwl mah hi an hming puttîr an duh hek lo. A hnuah: “Hei hi mihring hna a ni lo,” tiin a sawi a ni.

“Bawi rinawm, fing tak” chu hriak thih unaupa tlêm têa din Governing Body a ni

10. (a) Eng hunah khân nge Isua’n “bawi rinawm, fing tak” chu a ruat? (b) Governing Body chu Watch Tower Society lakah a danglam tih hriat a nih dân hrilhfiah rawh.

10 Unau Russell-a thih aṭanga kum thumna 1919-ah Isua chuan “bawi rinawm, fing tak” chu a ruat a. Eng atân nge? A hnungzuitute hnêna “a hun apianga an chaw chan tûr” pe tûrin a ni. (Matthaia 24:45) Chûng kumtîr lamah pawh, New York, Brooklyn headquaters-a awm hriak thih pâwl tlêm tête chuan Isua hnungzuite chu thlarau chaw an pe a. “Governing body” tih ṭawngkam chu kum 1940 hnuah kan thu leh hla chhuahah a rawn chuang ṭan a. Chutih lai chuan, governing body chuan Watch Tower Bible and Tract Society-a director-te nên inzawmna nghet tak a nei a. Mahse, Watch Tower Society chuan dân lam thilah chauh mawhphurhna laiin, Governing Body nên a inang lo tih kum 1971-ah hriat a ni. Chuta ṭang chuan, hriak thih unaupate chu Society kaihruaitute ni lovin, Governing Body pêngte an lo ni ta a ni. Tûn hnai mai khân, “berâm dang” zînga mawhphurhna nei unaupate chu Society kaihruaitute leh Pathian mite hman corporation dang danga hnathawktute an ni. Chutiang a nih avângin, Governing Body chuan Bible kaihhruaina leh zirtîrnate chu ṭha takin a pe thei a. (Johana 10:16; Tirhkohte 6:4) July 1, 2013, Vênnainsâng chuan “bawi rinawn, fing tak” chu hriak thih unaupa tlêm tê nêna din Governing Body a ni tiin a hrilhfiah a ni.

Kum 1950 chho bâwr vêla governing body

11. Engtin nge Governing Body chuan thu tlûknate a siam?

11 Governing Body-a telte chuan chawlhkâr tina inhmu khâwmin a huhovin thu tlûkna pawimawh tak takte an siam ṭhîn a. Chutianga inhmuhkhâwmna chuan inbiak pawhna ṭha nei tûr leh inpumkhat tlat tûrin a ṭanpui a ni. (Thufingte 20:18) Governing Body member-a a tuamah hi member dangte aiin an pawimawh bîk hran lo va, chuvângin an inkhâwmnaah kum tin hian kaihruaitu unaupate chu an inthlâk ziah a ni. (1 Petera 5:1) Governing Body comittee paruk-ah pawh chutiang tho chu a ni. Governing Body-a tel tute pawhin a  unaute chunga hotu niin a inngai lo. Governing Body-a telte chu a mimal chuan a chhûngte zînga mi an niin, bâwih rinawm hnên aṭanga lo kal thlarau chaw an dawng a, a kaihhruaina pawh an zui a ni.

Kum 1919-a bâwih rinawm fing ruat a nih aṭang khân, Pathian mite tân thlarau lam chaw an buatsaih (Paragraph 10, 11-na en rawh)

‘BAWIH RINAWM FING TAK CHU TU BER NGE NI ANG LE?’

12. Eng zawhnate nge nakinah kan chhân ang?

12 Governing Body chu thlarauva thâwk khum an ni lo va, ṭha famkim pawh an ni bîk lo. Chuvângin, Bible an hrilhfiah hunah leh pâwl an kaihruai hunah thil an tisual thei a ni. Entîr nân, Watch Tower Publications Index-ah chuan “Thurin Hrilhfiahna,” a chuang a, chu miah chuan kum 1870 aṭanga Bible hriatthiamna siamremnate a tel a ni. Isua chuan a bâwih rinawmin thlarau lam chaw ṭha famkim a pe ang tiin a sawi lo va. Chutichu, Isua zawhna: ‘Bâwih rinawm fing tak chu tu ber nge ni ang le?’ tih hi engtin nge kan chhân ang? (Matthaia 24:45) Governing Body chu bâwih rinawm a ni tih finfiahna eng nge awm? Tirhkohte  hun laia governing body ṭanpuitu thil pathumte chu i lo ngaihtuah ang u.

13. Engtin nge thlarau thianghlim chuan Governing Body chu a ṭanpui?

13 Thlarau thianghlim chuan Governing Body a ṭanpui. Thlarau thianghlim chuan Governing Body chu tûn hmaa hriatthiam loh Bible thutakte hre thiam tûrin a ṭanpui a. Entîr nân, a hmaa kan sawi tâk thurin hrilhfiahna chungchâng kha han ngaihtuah teh. Mihring tumah hian ‘Pathian thu rilte’ chu mahniin an hre thiamin, an hrilhfiah thei lo! (1 Korinth 2:10 chhiar rawh.) Governing Body chuan: “Mihring finna zirtîr thua sawi lovin, thlarau zirtîr thua sawi zâwkin . . . chûng thil min pêk thute pawh chu kan sawi ṭhîn,” tia ziaktu tirhkoh Paula angin an inngai a ni. (1 Korinth 2:13) Kum za tam tak chhûng zirtîrna dik lo leh kaihhruaina mumal lo a awm hnuah, engvângin nge Bible hriatthiamna chu kum 1919 aṭangin a pun lehzual? A chhan ni thei awmchhun chu Pathianin a thlarau thianghlima a ṭanpui vâng a ni!

14. Thu Puan 14:6, 7-a sawi angin, engtin nge tûn laiah vântirhkohte chuan Governing Body leh Pathian mite chu an ṭanpui?

14 Vântirhkohte’n Governing Body an ṭanpui. Governing Body chuan khawvêl pumhuap thu hrilh rawngbâwlnaah thuchhuahtu mi maktaduai riat chuangte kaihruai tûrin mawhphurhna lian tak an nei a. Engvângin nge chu hna chu a hlawhtlin êm êm? A chhan pakhat chu vântirhkohte ṭanpuina vâng a ni. (Thu Puan 14:6, 7 chhiar rawh.) Dinhmun tam takah chuan, Pathian hnêna ṭawngṭaia ṭanpuina dîl mite hnêna va kal tûrin thuchhuahtute vântirhkohte’n an kaihruai a ni! * (Footnote en rawh.) Thu hrilh leh zirtîr hna chu dodâlna nasa tak a awm chung pawhin a ṭhang chho zêl a ni. Hei hi vântirhkohte ṭanpuina vâng chauhvin a hlawhtling thei a ni.

15. Engtin nge Governing Body chu Kristianna rama hruaitute laka a danglam? Entîrna pe rawh.

15 Pathian Thu chuan Governing Body a kaihruai. (Johana 17:17 chhiar rawh.) Kum 1973-a thilthleng hi han ngaihtuah teh. June 1 Vênnainsâng (English) chhuakah chuan “vaihlo ngawlveite tân baptisma chan” a theih leh theih loh zawhna a chuang a. A chhânna chu Bible thu bultea innghat niin, a theih loh tih a ni! Vênnainsângah chuan zial zûk bânsan duh lotute chu hnawhchhuah an nih theih chhan Bible châng tam tak leh hrilhfiahna a chuang a. (1 Korinth 5:7; 2 Korinth 7:1) He tehna nghet tak hi mihring hnên aṭanga lo kal a ni lo va, “ama ziak Thua a chungchâng insawitu, Pathian” hnên aṭanga lo kal tiin a sawi a ni. An member ṭhenkhat tân a harsa lutuk dâwn tih an hriat hun pawha Pathian Thu rinchhan tlat duhtu pâwl dang an awm lo. United States-a tûn hnaia chhuak sakhaw lama lehkhabu pakhat chuan: “Kristian hruaitute’n an zirtîrnate chu an member-te leh mi tam zâwkte duhzâwng thurin leh ngaih dân nêna inmil tûrin an siam ṭha ṭhîn,” tih a sawi a. Governing Body chu mi tam zâwkte duh dân anga kaihruai a ni ve lo. Chu aiin, anni chu—Jehova chu tûn laia a mite kaihruaitu dik tak a ni tih târ langtu—Pathian Thuin a kaihruai a ni.

 ‘IN HOTUTE CHU HRE RENG ULA’

16. Governing Body kan hriat reng theih dân kawng khat chu eng nge ni?

16 Hebrai 13:7 chhiar rawh. Bible chuan ‘in hotute chu hre reng ula,’ tiin a sawi a. Kan tih theih dân kawng khat chu Governing Body tâna ṭawngṭaisak hi a ni. (Ephesi 6:18) Mawhphurhna tam tak an nei a, chutah chuan thlarau lam chaw châwm te, khawvêl pum huap thu hrilh rawngbâwlna kaihhruai te, leh inawpna pâwl tâna thawhlâwm enkawlte a tel a. Chuvângin, kan ṭawngṭaisak chu an ngai tak zet a ni!

17, 18. (a) Engtin nge Governing Body kaihhruaina chu kan zui? (b) Engtin nge kan thu hrilhna chuan Governing Body leh Isua a ṭanpui?

17 Governing Body chu a zirtîrna leh kaihhruainate kan zuina hmangin kan hre reng thei bawk a. Governing Body chuan kan thu leh hla chhuah te, inkhâwm te, inkhâwmpui te, leh regional inkhâwmpuite hmangin kaihhruaina min pe a. Bial kantute an ruat a, anni’n kohhran upate an ruat ve leh a ni. Bial kantute leh upate chuan Governing Body hnên aṭanga an dawn kaihhruainate chu fîmkhur taka zuiin anmahni an hre reng tih an lantîr a. Keini pawh, tûn laia Isua mi hmante thu kan âwihna hmangin kan Hotu, amah ka zahzia kan lantîr bawk a ni.—Hebrai 13:17.

18 Governing Body kan hriat reng theih dân kawng dang leh chu thu hrilh rawngbâwlnaa theih tâwp chhuaha tel a ni a. Hebrai 13:7 chuan Kristiante chu an hotute rinna entawn tûrin a fuih a ni. Governing Body chuan thu hrilhna leh chanchin ṭha theh darhnaa ṭhahnemngai taka telin an rinna chak tak chu an lantîr a. Chu hna pawimawh tak thawhnaah chûng unaute chu kan ṭanpui ve em? Kan ṭanpui a nih chuan, Isua’n: “Hêng ka unau tê berte zînga mi pakhat chunga in tih chu ka chunga ti in ni,” tia min hrilh hunah kan hlim ngei ang.—Matthaia 25:34-40.

19. Engvângin nge kan Hotu, Isua chu zui i tum tlat?

19 Vâna Isua a kîr leh hnuah pawh a hnungzuite chu a thlahthlam lo va. (Matthaia 28:20) Leia a awm lai khân, hotu ni thei tûrin thlarau thianghlim, vântirhkoh leh Pathian Thute’n an ṭanpui tih a hria a. Chutiang bawkin tûn laia a bâwih rinawm chu a ṭanpui a ni. Governing Body chuan “Berâm No” Isua chu ‘a kalna apiangah’ an zui reng a. (Thu Puan 14:4) Chuvângin, Governing Body kaihhruaina kan zui chuan kan Hotu, Isua kan zui tihna a ni. Rei lo têah, chatuan nunnaah min hruai lût tawh ang. (Thu Puan 7:14-17) Chu thutiam ang chu mihring hruaitu tumahin an pe thei lo!

^ par. 3 Jehova chuan nakin huna “lungphûm sâwm leh pahnih” nei Jerusalem Thar din nân tirhkoh 12 a duh niin a lang. (Thu Puan 21:14) Chuvângin, a hnua tirhkoh rinawm thite thlâktu tûr an awm a ngai lo.

^ par. 8 Kum 1955 aṭangin chu corporation chu Watch Tower Bible and Tract Society of Pennsylvania tia hriat a ni.

^ par. 14 Pathian Ram chungchâng “Bearing Thorough Witness” phêk 58-59-na en rawh.