A chhûng thu-ah lût rawh

Secondary menu-ah lût rawh

A chhûnga thuawmte-ah lût rawh

Jehova Thuhretute

Mizo

Vênnainsâng—Zir Tûr Edition  |  February 2017

Tlanna—Pa Hnên Ata “Thilpêk Famkim” Chu

Tlanna—Pa Hnên Ata “Thilpêk Famkim” Chu

‘Thilpêk ṭha leh thilpêk famkim zawng zawng chu Pa hnên ata a ni.’—JAKOBA 1:17.

HLA: 2, 5

1. Tlanna chuan eng thil ṭhate nge min neihtîr theih?

ISUA Krista tlanna inthawina chuan malsâwmna tam tak a thlen a. Entîr nân, tlanna ruahmanna chuan felna ngaina tu Adama thlah zawng zawngte tân Pathian chhûngkuaa tel theihna kawng a hawnsak a. Malsâwmna dang leh chu hlim taka chatuana nun theihna a ni. Chu mai bâkah, tlanna chu vâna mite leh leia mite tâna pawimawh tak engemaw nên pawh a inkûngkaih bawk a ni.—Hebrai 1:8, 9.

2. (a) Isua’n a ṭawngṭainaah vân leh lei chungchânga eng thu pawimawh tak nge a telh? (A thupui chunga milem en rawh.) (b) He thuziakah hian eng nge kan sawiho vang?

2 A thih hma kum hnihah, Isua’n a zirtîrte chu: “Kan Pa vâna mi, i hming tihthianghlim ni rawh se. I Ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin a zirtîr a. (Matthaia 6:9, 10, New World Translation) Tlanna chu Jehova hming tihthianghlimna te, Pathian Ram rorêlna te, leh Pathian duhzâwng tihnate nên a inzawm dân i lo ngaihtuah ang u.

 “I HMING TIHTHIANGHLIM NI RAWH SE”

3. Jehova hming chuan eng nge a entîr? Engtin nge Setana’n Jehova hming chu a do?

3 A hmasa berin, Jehova hming tihthianghlim, a nih loh leh thil thianghlim anga cheibâwl ni tûrin Isua a ṭawngṭai a. Jehova hming chuan Amah chu eng ang mi nge a nih a entîr a. Ani chu lei leh vâna thilti thei ber leh Mi fel ber a ni a. Isua pawhin “Ka Pa thianghlim” tiin a ko va. (Johana 17:11) Jehova chu a thianghlim avângin a thil tih zawng zawng leh a dân siam zawng zawng pawh a thianghlim a ni. Mahse, Eden huanah Pathianin mihringte tân dân siam tûra dikna a neih chu Setana’n vervêk takin a rinhlelhtîr a. Jehova chungchâng dik lo takin a sawi bâkah Pathian hming, a nih loh leh hmingṭhatna chu a do a ni.—Genesis 3:1-5.

4. Engtin nge Isua’n Pathian hming chu thil thianghlim anga a ngaih?

4 Isua erawh chuan Jehova hming chu a ngaina tak zet a, chu mi tithianghlim tûrin a tih theih apiang a ti a ni. (Johana 17:25, 26) Engtin nge a tih? A nungchang leh a zirtîrna hmangin, Isua chuan Jehova tehnate chu a dikin min phût apiangte chu kan tâna ṭhatna tûr a ni tih hre tûrin mite a ṭanpui a ni. (Sâm 40:8-10 chhiar rawh.) Setana’n hrehawm leh natak tuara a thihtîr pawh khân Isua chu a rinawm tlat a. Mihring ṭha famkimin Jehova thu a âwih pumhlûm thei tih a târ lang a ni.

5. Engtin nge Jehova hming chu thil thianghlim anga kan ngaih theih?

5 Jehova hming kan ngaina tih engtin nge kan lantîr theih? Kan nun dânin kan lantîr thei a. Jehova chuan thianghlim tûrin min duh a. (1 Petera 1:15, 16 chhiar rawh.) A awmzia chu amah chauh kan biain thinlung zawng zawngin a thu kan âwih tihna a ni. Tihduhdahna kan tawrh hunah pawh Jehova min zirtîr anga nun kan tum tlat a. Jehova tehna mila kan nun chuan a hming kan chawimawi tihna a ni. (Matthaia 5:14-16) A dânte chu a ṭha a, Setana chu dâwtpa a ni tih kan lantîr a. Kan ṭhat famkim loh avângin thil kan tisual thei. Mahse, kan inchhîr a, Jehova hming tihliau thei thilte tih tawh loh kan tum tlat a ni.—Sâm 79:9.

6. Engvângin nge Jehova chuan kan ṭha famkim lo chung pawha mi fel anga min ngaih theih?

6 Hriak thih kan ni emaw, “berâm dang” kan ni emaw pawh ni se, tlannaa rinna kan neih chuan Jehova’n kan sualte a ngaidam a ni. A hnêna inpumpêkte chu amah chibaibûktute niin a pawm a. Hriak thih Kristiante chu a fate angin mi felah a ruat a, “berâm dang” chu a ṭhiante angin mi felah a ruat thung. (Johana 10:16; Rom 5:1, 2; Jakoba 2:21-25) Chuvângin, tûnah ngei pawh, tlanna chuan kan Pa nêna inlaichînna ṭha min neihtîr theiin, a hming a tithianghlim thei a ni.

“I RAM LO THLENG RAWH SE”

7. Tlanna chuan eng malsâwmnate nge a thlen dâwn?

7 Lal ṭawngṭainaah Isua’n: “I Ram lo thleng rawh se,” tiin a sawi a. Engtin nge tlanna chu Pathian Ram nên a inkûngkaih? Pathian Ram, a nih loh leh sawrkârna chu Isua leh mihringte zîng ata tlan tawh mi 144,000-te nêna din a ni a. Tlanna avângin hêng mite hian vân nunna changa thawhleh theihna an nei a ni. (Thu Puan 5:9, 10; 14:1) Lalte leh puithiamte niin Isua nên kum sângkhat chhûng leiah ro an rêl ang. Chu mi hun chhûngin, Jehova chuan chu Lalram hmangin lei hi paradis-ah a chantîr ang a, mihringte hi ṭha famkim tûrin a ṭanpui ang.  Lei leh vâna Jehova chhiahhlawhte chu chhûngkaw khat an ni tawh ang. (Thu Puan 5:13; 20:6) Isua’n Setana leh a tihchhuah buaina zawng zawng chu a tiboral ang.—Genesis 3:15.

8. (a) Engtin nge Isua’n a zirtîrte chu Pathian Ram pawimawhzia hre thiam tûra a ṭanpui? (b) Engtin nge tûn laiah Lalram chu kan thlâwp theih?

8 Isua’n a zirtîrte chu Pathian Ram pawimawhzia hre thiam tûrin a ṭanpui a. Engtin nge? Baptisma a chan zawh veleh hmun tinah “Pathian Ram chanchin ṭha” a hrilh ṭanna hmangin a ni. (Luka 4:43) A zirtîrte chu ‘kâwlkil thleng pawha’ a thuhretute ni tûrin a hrilh bawk a. (Tirhkohte 1:6-8) Tûn laiah, Lalram thu hrilhna avângin mite chuan tlanna chungchâng zir theihna leh Pathian Ram khua leh tui nih theihna remchâng an nei a ni. Khawvêl pum huapa chanchin ṭha hrilhnaa hriak thihte kan ṭanpuina hmangin Lalram khua leh tui rinawm kan nihzia kan târ lang a ni.— Matthaia 24:14; 25:40.

‘I DUHZAWNG TIH NI RAWH SE’

9. Engvângin nge Jehova’n mihringte tâna a thiltum chu a hlen ang tih kan rin tlat theih?

9 Isua’n: ‘I duhzâwng tih ni rawh se’ tia a sawi hian eng a sawi tumna nge? Jehova’n thleng tûra a sawi chu a thleng ngei ang. (Isaia 55:11) Setana helna chuan Jehova chu a dang thei lo va. Leilung atâna Jehova duhzâwng chu eng nge ni? Adama leh Evi thlah ṭha famkimte chu leilung luahkhat tûrin a duh a. (Genesis 1:28) Adama leh Evi chu fate nei lovin thi ta se chuan leilung luahkhat tûra Pathian thiltum chu a hlawhchham ang. Chuvângin, Jehova chuan fate an neih a phalsak a ni. Tlanna chuan rinna nei zawng zawngte chu ṭha famkim nia chatuana nun theihna remchâng a pe a. Jehova chuan mite chu a hmangaih a, a tum angin nun hlimawm tak chên tûrin min duh a ni.

10. Engtin nge thi tawhte’n tlanna chu an hlâwkpui theih?

10 Jehova hriatna hun remchâng nei lova thi ta mi tlûklehdingâwnte chungchâng chu eng nge ni ve? Jehova chuan mite chu nung tûrin a duh a. Chuvângin, thi tawhte pawh a ti nung leh ang. Tlanna chuan thi tawhte chu nun leh theihna a pe a. Tichuan, Jehova chungchâng zir theihna leh chatuana nun theihna an nei ang. (Tirhkohte 24:15) Jehova chu nuna Hnâr a ni a. Jehova’n thi tawhte a tih nun leh hunah ani chu an Pa a ni ang. (Sâm 36:9) Lal ṭawngṭainaah Isua’n Jehova chu “Kan Pa vâna mi” tiin a sawi a. (Matthaia 6:9) Jehova’n Isua chu mitthite kaihthawhnaah chanvo pawimawh tak a pe a ni. Isua chuan: “Kei hi thawhlehna leh nunna chu ka ni,” tiin a sawi a ni.—Johana 6:40, 44; 11:25.

11. “Mipui tam tak” tâna Pathian duhzâwng chu eng nge ni?

11 Isua chuan: “Tupawh Pathian duhzâwng ti apiang chu, chu mite ngei chu ka unaute, ka farnute, ka nute an ni asin,” tiin a sawi a. (Marka 3:35) Pathianin hnam tina mite, chi tina mite leh ṭawng tina mite chu amah be tûrin a duh a. Anni chu: “Mipui tam tak tuma chhiar sên loh” tia sawi an ni. Tlanna chungah rinna an lantîr a, Pathian thuawih an duh a. Anni chuan: “Kan Pathian lalṭhutphaha ṭhua hnênah leh, Berâm No hnênah chhandamna,” tiin Pathian an fak a ni.—Thu Puan 7:9, 10.

12. Isua ṭawngṭaina aṭangin mihringte tâna Jehova thiltum eng nge kan hriat theih?

12 Lal ṭawngṭaina aṭangin Jehova chungchâng leh mihringte tâna a thiltum tam tak kan hre thei a. Pakhatnaah, Jehova hming  tithianghlim tûr leh amah chawimawi tûrin kan tih theih apiang kan ti tûr a ni. (Isaia 8:13) Isua tlanna inthâwina chuan chhandamna min neihtîr theih bâkah, Pathian hming a chawimawi bawk a. Dik tak chuan, Isua hming awmzia chu “Jehova Chu Chandamna A Ni” tihna a ni. A pahnihnaah, tlanna avânga hlâwkna zawng zawng chu thuawih mihringte’n an hmuh theih nân Jehova’n a Lalram a hmang ang. A pathumnaah, Jehova duhzâwng thleng famkim lo tûrin engmahin a dang thei lo tih kan ring tlat a ni.—Sâm 135:6; Isaia 46:9, 10.

TLANNA AVANGA I LAWMZIA JEHOVA CHUNGAH LANTIR RAWH

13. Engvângin nge baptisma kan chan?

13 Tlanna chunga kan lâwmzia lantîr theih dân pawimawh tak chu Jehova hnêna inpumpêka baptisma kan channa hi a ni a. Chutianga kan tih chuan, tlanna chu kan ring a, “LALPA ta kan ni” tih kan târ lang a ni. (Rom 14:8) Baptisma kan chan hian Jehova hnênah ‘chhia leh ṭha hriatna thiang’ min pe tûrin kan ngên a. (1 Petera 3:21) Jehova min chhânna chu tlanna avânga hlâwkna kan hmuhna hi a ni. A thutiam zawng zawng a hlen ang tih pawh kan chiang a ni.—Rom 8:32.

Tlanna avânga kan lâwmzia engtin nge kan lantîr theih? (Paragraph 13, 14-na en rawh)

14. Engvângin nge Jehova chuan mi dangte hmangaih tûra thu min pêk?

14 Jehova thiltih engkim hi hmangaihna vânga ti a ni a. Amah betute pawhin an entawn a, an inhmangaih tawn chu a duh a ni. (1 Johana 4:8-11) Mite kan hmangaih chuan “[Kan] Pa vâna mi fate” nih kan duhzia chiang takin kan lantîr a ni. (Matthaia 5:43-48) Thupêk ropui ber pahnih zînga a hmasa zâwk chu Jehova hmangaih a ni a, a dawt chu mi dangte hmangaih a ni. (Matthaia 22:37-40) Mite kan hmangaihna lantîr theih dân kawng khat chu Pathian Ram chanchin ṭha hrilh a ni a. Mi dangte, a bîk takin kan unaute hmangaih tûra Jehova thupêk kan zawm chuan amah kan hmangaihna chu “a famkim” ang.—1 Johana 4:12, 20.

TLANNA CHUAN JEHOVA MALSAWMNA MIN DAWNTIR

15. (a) Tûnah, Jehova hnên aṭangin eng malsâwmnate nge kan dawn? (b) Nakin hunah eng malsâwmnate nge kan dawn leh dâwn?

15 Tlannaa rinna kan neih avângin kan sualte chu “thai bo” a ni tih Jehova’n min  tiam a. Kan sualte chu a ngaidam pumhlûm thei a ni. (Tirhkohte 3:19-21 chhiar rawh.) A hmaa kan sawi tawh angin, tlanna avângin mi ṭhenkhatte chuan vâna Jehova fate nih theihna an nei a. Chûng mite chu hriak thihte an ni. (Rom 8:15-17) ‘Berâm dangte’ chu leia a chhûngkuate ni tûrin a sâwm a. An ṭhat famkim hnuah fiahna hnuhnûng ber a awm ang. Jehova chunga an rinawm chuan anni pawh a fate an ni ang. (Rom 8:20, 21; Thu Puan 20:7-9) Jehova chuan a fate chu englai pawhin a hmangaih reng a ni. Tlanna chuan chatuanin malsâwmna a thlentîr ang. (Hebrai 9:12) Jehova chuan he thilpêk hlu tak hi min pe tawh a, chu chu tumahin min lâksak thei lo a ni.

16. Engtin nge tlanna chuan chhuah zalên ni tûra min ṭanpui?

16 Kan sualte kan sim chuan, Jehova chhûngkuaa tel lo tûrin Diabola’n min dang thei lo vang. Isua chu “chatuan atân vawi khat chauh” a thi a ni. Tlanna chu chatuan atân pêk hlen a ni a. (Hebrai 9:24-26, New World Translation) Adam chuan thihna min thlen a; mahse, Isua inthâwina chuan chatuan nun min pe a ni. Tlanna chuan Setana khawvêl lakah leh thihna hlauhna lakah min chhuah zalên a ni.—Hebrai 2:14, 15.

17. Jehova hmangaihna chu i tân eng awmzia nge a neih?

17 Pathian thutiamte chu a thleng famkim vek ang. Jehova siam leilung dânte a danglam ngai lo ang bawkin, Jehova pawh a danglam ngai lo va. Min tibeidawng ngai lo vang. (Malakia 3:6) Jehova chuan nunna thilpêk mai aia tam a hmangaihna min pe a ni. “Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni.” (1 Johana 4:16) A thutiamte chu a thleng dik zêl a. Nakin lawkah, leilung hi paradis mawi takah a chang tawh ang. Mi nungdam zawng zawngte chuan Jehova an entawn ang a, an inhmangaih tawn bawk ang. Tichuan lei leh vâna a chhiahhlawh zawng zawngte chuan: “Amen: Malsâwmna te, ropuina te, finna te, lâwmthu sawina te, chawimawina te, thiltihtheihna te, chakna te chatuanin kan Pathian hnênah awm rawh se,” tiin an sawi ang.—Thu Puan 7:12.