He thuziak inzawm hmasa lama kan târ lan tâk Gail-i chuan a pasal, Robert-a a chânna a reh theih a rin loh thu a sawi kha i la hre mai thei a. Mahse, Pathian tiam khawvêl thara hmuh leh a beisei tlat a ni. “Ka Bible châng duh ber chu, Thu Puan 21:3, 4 hi a ni,” tiin a sawi. Chu Bible châng chuan: “Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” a ti a ni.

Gail-i chuan: “He thutiam hian a sawikim hle. An hmangaih takte an hmu leh dâwn a ni tih beiseina hre si lova sûntute chu ka khawngaih hle,” tiin a sawi. A rinna mila thil tiin, Gail-i chuan hunbi kimin chanchin ṭha a hril a, Pathian thutiam ‘thihna awm leh tawh loh’ hun lo thleng tûr chu a vêngte a hrilh a ni.

‘Thihna awm tawh lohna chu âwih a va har ve!’ pawh i ti mai thei. Mahse, Joba entîrna hi han ngaihtuah teh. Ani chu thih ngamin a nâ a. (Joba 2:7) Joba chuan thih a châk chung pawhin, leia nung tûra amah kaitho leh tûrin Pathianin thiltihtheihna a nei tih a ring tlat a. Heti hian a sawi a ni: “Seolah chuan mi thukru teh la . . . Mi ko vang a, keiin ka chhâng ang che; i kut hnathawh i ngaina a ni,” tiin. (Joba 14:13, 15) Joba chuan a Pathianin a ngaiin, nunna a pe leh ang tih a ring tlat a ni.

Nakin lawkah, Pathian chuan he lei hi paradis-a chantîr hunah Joba leh mi dang tam takte tân chutiang thil chu a tihsak ang. (Luka 23:42, 43) Bible chuan Tirhkohte 24:15-ah: “Thawhlehna a awm ang,” tiin a nemnghet a. Isua chuan: “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang,” tiin min tiam a ni. (Johana 5:28, 29) Joba chuan, chu thutiam thlen famkimna chu a hmu ang. Ani chuan “tleirâwl thar leh” beiseina leh “vânglai chakna” neih leh beiseina a nei a. (Joba 33:24, 25) Lei chunga nung leh tûra Pathian thilpêk duhawm tak lâwm taka pawmtu zawng zawngte chungah pawh chutiang chu a thleng vek dâwn a ni.

I hmangaih tak tuemaw i sûn tawh a nih chuan, kan sawiho tâk thute khân, i lusûnna chu a tireh vek lo mai thei a. Mahse, Bible-a kan hmuh Pathian thutiamte chhût ngunna hmangin, hma lam pan zêl tûra i mamawh beiseina dik tak leh chakna chu i nei thei a ni.—1 Thessalonika 4:13.

Lusûnna hmachhawn theih dân chungchâng hriat belh i duh ang em? A nih loh leh, chu mi nêna inkûngkaih zawhna, “Engvângin nge Pathianin sual leh hrehawm tawrhna awm a phal?” tih ang chite i nei em? Bible-in chhânna thlamuanthlâk tak leh sâwt tak a pêk dân hre tûrin, kan website, jw.org hi tlawh ang che. ▪ (wp16.03-E)