A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

Inrem Lohna Chu Hmangaihnain Chingfel Rawh U

Inrem Lohna Chu Hmangaihnain Chingfel Rawh U

“Inngeih rawh u.”—MARKA 9:50.

HLA: 39, 35

1, 2. Genesis-ah hian mihringte buaina eng nge târ lan ni a, engvângin nge chu chu kan ngaihven ang?

BIBLE-A mi mal inkâra buaina chungchâng ziakte hi i ngaihtuah ngai em? Genesis bung hmasa lamah chuan, Kaina’n Abela a that tih kan hria a (Genesis 4:3-8); Lameka chuan amah vawtu tlangvâl chu a that a (Genesis 4:23); Abrahama ran pute leh Lota ran pute inkârah inhnialna a awm a (Genesis 13:5-7); Hagari chu Sari aia chungnung zâwka a inngaih avângin, Sari chu Abrahama chungah a lungni lo va (Genesis 16:3-6); Ismaela chuan mi tin a do va, amah pawh mi tinin an do a ni.—Genesis 16:12.

2 Engvângin nge chûng buainate chu Bible-a târ lan a nih? Chûng buaina nei mi ṭha famkim lote entîrna aṭanga kan inzir theih vâng a ni. Keini pawh kan ṭha famkim lo va, kan nunah chutiang buainate kan neih hun chuan, Bible-a entawn tûr ṭhate entawnin, mi ṭha lote thiltih dân chu kan pumpelh thei a. (Rom 15:4) Chu chuan mi dangte nêna inrem dân hre tûrin min ṭanpui thei a ni.

3. He thuziakah hian eng thute nge kan sawiho vang?

3 He thuziakah hian, inrem lohna, a nih loh leh thu inhmuh lohnate  kan chinfel a ngaih chhan leh kan chinfel theih dân kan zir ang a. Buainate chingfel tûr leh Jehova leh mi dangte nêna inlaichînna ṭha nei tûra min ṭanpui thei Bible thu bul ṭhenkhat kan zirho bawk ang.

PATHIAN CHHIAHHLAWHTE TAN INREM LOHNATE CHINFEL A NGAIH CHHAN

4. Eng rilru put hmang nge khawvêl pumah darh a, chu chuan eng nge a rah chhuah?

4 Setana chu inthliarna leh inrem lohna tam tak awmtîrtu bul ber a ni a. Engvângin nge chutianga kan sawi? Eden huanah khân, Setana chuan tupawhin Pathian tel lovin thil ṭha leh ṭha lo chungchângah thu tlûkna an insiam theiin, an insiam tûr a ni tih a sawi a. (Genesis 3:1-5) Mahse, tûn lai khawvêl kan han en hian, chutiang ngaih dân chuan buaina chauh a thlen tih kan hmu thei a ni. Mi tam tak chu thil ṭha leh ṭha lo chungchângah mahnia thu tlûkna siam tûra dikna nei niin an inhria a. Anni chu an chapovin, mahni hma sialna leh inelnain an khat a, an thu tlûkna siamin mi dangte tina mah se, pawi tihna an nei lo. Chutiang rilru put hmang chuan inngeih lohna a thlen a. Thinur kan hmanhmawh chuan, mi dangte nêna inrem lohna tam tak kan neiin, thil sual tam tak kan ti ang tih Bible chuan min hriattîr a ni.—Thufingte 29:22.

5. Engtin nge Isua’n mite chu inrem lohna chinfel dân a zirtîr?

5 Isua Tlâng Chunga Thusawiah, a zirtîrte chu anmahni tâna ṭha ber tûr a nih loh hunah pawh remna siam tûr leh thu inrem lohna awmtîr lo tûrin a zirtîr a. Entîr nân, anni chu ngilnei tûr te, remna siamtu ni tûr te, thinurna ang chite paih bo tûr te, inlungrual lohnate chingfel nghâl tûr te, leh an hmêlmate hmangaih tûrtein a hrilh a ni.—Matthaia 5:5, 9, 22, 25, 44.

6, 7. (a) Engvângin nge inrem lohnate chinfel nghâl chu a pawimawh? (b) Jehova mite chuan eng zawhnate nge an inzawh ṭheuh vang?

6 Tûn laiah, kan ṭawngṭai a, thu kan hrilh a, kan inkhâwm hian Jehova kan bia a. Kan unaute nêna remna kan siam loh chuan, Jehova chuan amah kan biakna chu a pawm lo vang. (Marka 11:25) Jehova ṭhian ni tûr chuan, mi dangte’n thil an tihsual hunah kan ngaidam tûr a ni.—Luka 11:4; Ephesi 4:32 chhiar rawh.

7 Jehova chuan a chhiahhlawh zawng zawngte chu ngaihdam peih tûr leh mi dangte nêna inlaichînna muanawm tak nei tûrin a beisei a. Heti hian kan inzâwt thei a ni: ‘Ka unaute chu ka ngaidam nghâl ṭhîn em? An kianga awm chu nuam ka ti em?’ tiin. Ngaihdam peih lehzual ngai nia i inhriat chuan, hmasâwn tûrin Jehova ṭanpuina dîl ang che. Kan Pa vâna mi chuan, chutianga inngaitlâwm taka ṭawngṭainate chu a ngaithlain, a chhâng ang.—1 Johana 5:14, 15.

BAWHCHHIATNA I HAIDER THEI ANG EM?

8, 9. Lungnih lohna kan neih chuan eng nge kan tih ang?

8 Mi ṭha famkim lo kan nih avângin, mite chuan min tilungni lo thei thute sawiin, thilte an tih chu kan beisei thei a. (Thuhriltu 7:20; Matthaia 18:7) Engtin nge i chhân lêt ang? A hnuaia thiltawn aṭang hian thil pawimawh tak kan zir thei a ni: Intihhlimnaah unaunu pakhatin unaupa pahnihte chu chibai a lo bûk a. Mahse, unaunu chibai dân chuan unaupa pakhat zâwk chu a tilungni lo a ni. Unaupate an pahnih chauhva an awm laiin, lungni lotu chuan unaunu chu a sawisêl ṭan ta a. Mahse, pakhat zâwk chuan, a hnênah chu unaunu chuan hun harsa tak kârah pawh kum 40 chhûng rinawm taka Jehova rawng a bâwl tawh thu a hrilh a. Unaunuin tihlungnih loh a tum lo tih a hre chiang a ni. Engtin nge unaupa chuan a chhân lêt? “I sawi dik e,” tia chhângin thil thleng chu theihnghilh a tum ta a ni.

9 He thiltawn hian eng nge min zirtîr? Tuemawin min tihlungnih loh hunah chhân lêt dân tûr kan thlang thei tih hi a ni. Hmangaihna nei tak chuan ngaihdam a peih ṭhîn.  (Thufingte 10:12; 1 Petera 4:8 chhiar rawh.) ‘Bawhchhiatna kan haider’ chuan chu chu Jehova tân a ropui a ni. (Thufingte 19:11; Thuhriltu 7:9) Chuvângin, tuemaw thusawi, a nih loh leh thiltihin a tihlungnih loh che hunah, heti hian inzâwt rawh: ‘Chu bawhchhiatna chu ka haider thei ang em? Chu mi chungchâng ngaihtuah reng a ngai tak zet em?’ tiin.

10. (a) Engtin nge unaunu pakhat chuan atîrah sawisêlna chu a chhân lêt? (b) Eng Bible chângin nge he unaunu hi remna hloh lo tûra ṭanpui?

10 Mi dangte’n kan chungchâng a ṭha lo zâwnga an sawi hunah, an thusawite haider chu a harsa mai thei a. Pioneer unaunu Lucy tia kan koh mai tûr chunga thilthleng hi han ngaihtuah teh. Kohhrana mi ṭhenkhat chuan, a rawngbâwlna leh a hun hman dân chungchângah an sawisêl a. A rilru a nat êm avângin unaupa puitling tak ṭhenkhat hnênah thurâwn a la a ni. Eng nge a rah chhuah? Ani chuan, mi dangte ngaih dân ṭha lo tak ngaihtuah lutuk lo tûr leh Jehova chungchâng ngaihtuah nasa zâwk tûrin Bible hmangin an ṭanpui tih a sawi. Matthaia 6:1-4 thute a chhiar chuan a phûr hle a. (Chhiar rawh.) Chûng Bible chângte chuan Jehova tihlâwm chu thil pawimawh ber a ni tih a hriatnawntîr a ni. Chuvângin, a ṭha lo zâwnga thusawite chu haider a tum ta a. Tûnah chuan, mi dangte’n a rawngbâwlna chungchâng an sawisêl a nih pawhin Jehova tihlâwm tumin theih tâwp a chhuah tih a inhria a, a hlim hle a ni.

BAWHCHHIATNA I HAIDER THEIH LOH HUNAH

11, 12. (a) Kristian pakhatin a unauvin a chunga “lungnih lohna a nei” tih a hriat chuan eng nge a tih ang? (b) Abrahama’n inhnialna a chinfel dân aṭangin eng nge kan zir theih? (A thupui chunga milem en rawh.)

11 “Kan zain thil tam tak kan tisual fo ṭhîn.” (Jakoba 3:2) I thiltih emaw, i thusawi emaw avângin unaupa pakhat a lungni lo tih hre ta la. Eng nge i tih ang? Isua chuan: “Maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thilpêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tiin a sawi a. (Matthaia 5:23, 24) Chuvângin, i unau chu be rawh. I biak huna i tum ber chu amah nêna remna siam a ni tûr a ni. I thil tihsual chu pawm la, amah mawhpuh tum suh. Kan unaute nêna inrem hi thil pawimawh ber a ni.

12 Bible chuan Pathian chhiahhlawhte’n thu inhmuh lohna an neih huna remna an neih theih dân a târ lang a. Entîr nân, Abrahama leh a tupa Lota chuan ran tam tak an nei ve ve a, an ran zawng zawng tlatna tûr hmun indaih tâwk a awm loh avângin an ran pute chu an inhnial ta a. Abrahama chuan remna siam a duh avângin, Lota chu ram ṭha ber a thlantîr a ni. (Genesis 13:1, 2, 5-9) Kan tân entawn tûr ṭha a va ni êm! Abrahama chuan a thilphalna chu a chhiat reng phah em? Phah lo ve. Chu mi hnu lawkah, Jehova chuan a thil chân aia tama malsâwm a tiam a ni. (Genesis 13:14-17) Eng nge kan zir? Thu inhmuh lohnate chu thil ṭhenkhat chân inhuama hmangaihna nêna kan chinfel hian, Jehova chuan malsâwmna min vûr ang, tih hi. [1]—Endnote en rawh.

13. Engtin nge overseer pakhat chuan ṭawngkam ṭha lo tak chu a chhân lêt a, a entawn tûr siam aṭangin eng nge kan zir theih?

13 Tûn laia entawn tûr siam hi ngaihtuah rawh. Inkhâwmpui department-a overseer thar pakhat chuan unaupa pakhat chu department-a a thawh theih dâwn leh dâwn loh phone-in a zâwt a. Unaupa chuan, overseer hmasa zâwk chunga a la thinur reng avângin ṭawngkam ngilnei lo taka thu a sawi hnuah phone chu a dah ta hmak a. Overseer thar chuan lungnih loh nân a hmang lo va; mahse, chu thilthleng chu a ngaihthah thei lo. Dârkâr khat hnuah, unaupa chu a phone leh a, inhmu tûrin a sâwm ta a. Chawlhkâr lehah chuan Kingdom Hall-ah an inhmu a,  Jehova hnêna an ṭawngṭai zawh chuan dârkâr khat vêl an inkâwm a. Unaupa chuan overseer hmasa zâwk awm laia thilthlengte chu a hrilhfiah ta a ni. Overseer thar chuan ngilnei takin a ngaithla a, Bible châng ṭhenkhat a sawipui a. Chuta ṭangin, unaupate chuan remna siamin, inkhâwmpuiah an thawk dûn ta a. Overseer chuan ngilnei tak leh zaidam taka a biak avângin unaupa chu a lâwm hle a ni.

UPATE I TELTIR TUR A NI EM?

14, 15. (a) Eng hunah nge Matthaia 18:15-17-a kaihhruaina thu chu kan nunpui theih? (b) Isua’n eng rahbi pathum nge a sawi a, chu mi kan nunpui huna kan thiltum tûr chu eng nge ni?

14 Kristian pahnih inkâra buaina a tam zâwk chu mi dangte hriat lohva chinfel theih a ni a, chinfel tûr a ni bawk. Mahse, chutianga tih theih loh châng pawh a awm thei. Matthaia 18:15-17 sawi angin, dinhmun ṭhenkhatah chuan mi dangte ṭanpuina a ngai thei a. (Chhiar rawh.) Isua’n heta “thil tisual” tia a sawi hian Kristiante inkâra inhmuh thiam lohna tê thamte a sawina a ni lo. Engtin nge kan hriat? Isua chuan, thil tisualtuin a unaupa emaw, thuhretute emaw, a nih loh leh, mawhphurhna nei unaupate emaw nêna sawihona an neih hnu pawha a inchhîr duh loh chuan, ani chu ‘Jentail leh chhiahkhawntu anga’ cheibâwl tûr a nih thu a sawi a. Tûn laiah, chu mi awmzia chu hnawhchhuah tûr a ni tihna a ni. Chu ‘thil tihsualah’ chuan inbumna leh insawichhiatna ang chite hi a tel thei a; mahse, uirêna te, mawngkawhurna te, kalpênna te, a nih loh leh milem biakna ang chi sualnate chu a tel lo. Hetiang chi sualnate hi upate chinfel tûr a ni.

I unaupa nêna remna siam tûr chuan vawikhat aia tam i biak a ngai thei (Paragraph 15-na en rawh)

15 Isua’n chu kaihhruaina min pêk chhan ber chu, hmangaihna avânga unau tuemaw kan ṭanpui theih dân min kawhhmuh nân a ni. (Matthaia 18:12-14) Chu kaihhruaina chu engtin nge kan zawm theih? (1) Kan unaute nên chuan mi dangte tel lova remna siam kan tum tûr a ni.  Ani chu vawi engemaw zât kan biak pawh a ngai thei a. Chutianga kan tih hnuah pawh, kan la inrem loh cheu chuan eng nge kan tih ang? (2) Kan unau chu dinhmun hretu tuemaw, a nih loh leh thil dik lo a thleng ngei tih hre thei tûr tuemaw nên kan be tûr a ni. Buainate chinfel a nih chuan, “i unau chu i hneh a ni tawh ang.” Mahse, i unau chu vawi tam tak i biak hnua in inrem theih loh hunah chauh (3) buaina chu upate hnênah hrilh ang che.

16. Engin nge Isua kaihhruaina zawm chu ṭangkai tak leh hmangaihna neihna a ni tih târ lang?

16 Dinhmun tam takah chuan, Matthaia 18:15-17-a kan hmuh rahbi pathumte hi hman kim kher a ngai lo va. Chu chu a thlamuanthlâk hle. Engvângin nge a thlamuanthlâk kan tih? Dinhmun tam takah chuan, thil tisualtu chu inhre chhuakin, buaina chu a chingfel a, chutiang chuan hnawhchhuah a ngaih kher loh vâng a ni a. Tichuan, lungni lotu chuan remna nei tûrin a unaupa chu a ngaidam tûr a ni. Chuvângin, upate hnênah kan buainate thlen nghâl a ngai lo tih Isua fuihna aṭangin a lang chiang hle. Thil dik lo engemaw tak a thleng tih a chian a, rahbi hmasa pahnihna kan zui hnuah chauh buaina chungchâng chu upate kan hriattîr tûr a ni.

17. Mite nêna ‘remna kan zawn’ hian eng malsâwmna nge kan dawn ang?

17 Mi ṭha famkim lo kan nih chhûng chuan, mi dangte tihlungnih loh châng kan nei fo dâwn a. Zirtîr Jakoba chuan: “A thusawia tisual ngai lo mi chu, mi puitling a ni a, a taksa pum pawh vêng thei mi a ni,” tiin a sawi. (Jakoba 3:2) Thu inhmuh lohnate chingfel tûr chuan, ‘remna zawng a, a ûma ûm’ tûrin theih tâwp kan chhuah a ngai a. (Sâm 34:14) Mi dangte nêna remna kan siam zêl chuan, kan unaute nên inṭhianna ṭha kan nei ang a, chu chuan min inpumkhattîr ang. (Sâm 133:1-3) Thil pawimawh ber chu, “remna Pathian,” Jehova nêna inṭhianna ṭha tak kan nei tûr hi a ni. (Rom 15:33) Inrem lohnate hmangaihna nêna kan chinfel chuan, chûng malsâwmna zawng zawngte chu kan dawng ang. (ws16.05-E)

^ [1] (paragraph 12-na) Inrem taka buaina chingfelna dangte chu Jakoba’n Esauva (Genesis 27:41-45; 33:1-11); Josefa’n a unaute (Genesis 45:1-15); leh Gideona’n Ephraim mite (Rorêltute 8:1-3) remna an siampuinaah a lang a. Chutiang Bible entîrnate chu i ngaihtuah thei a ni.