‘Unaute i hmangaihna hi awm zêl rawh se.’—HEBRAI 13:1.

HLA: 3, 20

1, 2. Engvângin nge Paula chuan Hebrai Kristiante hnênah lehkha thawn a ziah?

VANTLANG kum chhiar 61-ah, Israel rama kohhran zawng zawng chu thlamuang takin an awm a. Tirhkoh Paula chu Rom khuaah tâng mah se, a chhuah thuai a inbeisei a ni. A zinpui Timothea chu tân in aṭangin a hma lawkah a chhuak tawh a, Judai rama unaute tlawh dun theih an inbeisei a ni. (Hebrai 13:23) Mahse, a hnu kum nga lekah, Judai rama Kristiante, leh a bîk takin Jerusalema awmte chuan hma an lâk vat a ngai ang. Engvângin nge? A hmain, Isua’n a hnungzuite hnênah, sipaihovin Jerusalem an hual an hmuh veleh an tlân chhuahsan a ngaih thu a lo hrilh vâng a ni.—Luka 21:20-24.

2 Isua’n a hnungzuite hnêna chu vaukhânna a pêkna chu kum 28 lai a liam tawh a. Chumi hun chhûng zawng chuan, Israel rama Kristiante chu dodâlna leh fiahna nasa tak an tuar chung pawhin an rinawm reng a ni. (Hebrai 10:32-34) Mahse, Paula chuan nakina thil lo thleng tûrte tâna anmahni buatsaih chu a duh a. An rinna chu nasa taka fiah a ni dâwn a ni. (Matthaia 24:20, 21; Hebrai 12:4) Isua thusawite âwih a, tlân chhuak tûr chuan tûn hma zawng aia chhelna leh rinna an neih a ngai ngei ang. (Hebrai 10:36-39 chhiar rawh.) Chuvângin, Jehova chuan Paula chu chûng unau duh takte hnêna  lehkha ziak tûrin a thâwk khum a. Chu lehkha thawn, tûna Hebrai lehkhabu tia kan koh tâk hi thil lo thleng tûr atâna anmahni tihchak nâna ziak a ni.

3. Engvângin nge Hebrai lehkhabu chu kan ngaihven ang?

3 Tûn laiah Pathian mite kan nih angin, Hebrai lehkhabu hi kan ngaihven tûr a ni. Engvângin nge? Kan dinhmun chu Judai rama Kristiante dinhmun nên a inan vâng a ni. “Hun khirh takte” kârah kan awm a, mi tam tak chuan fiahna nasa tak, a nih loh leh tihduhdahna nasa tak chu rinawm takin an tuar chhuak a ni. (2 Timothea 3:1, 12) Mahse, kan zînga a tam zâwkte chu dinhmun muanawm takah awmin, hmaichhana tihduhdahna an tâwk lo va. Chuvângin, Paula hun laia Kristiante angin, kan harhvâng reng tûr a ni. Engvângin nge? Rei lo têah kan rinna chu nasa taka fiah a ni dâwn si a!—Luka 21:34-36 chhiar rawh.

4. Kum 2016 kum châng chu eng nge ni a, engvângin nge chu chu inâwm tak a nih?

4 Engin nge nakina fiahna nasa tak lo thleng tûr atâna inbuatsaih tûrin min ṭanpui ang? Hebrai lehkhabuah Paula chuan kan rinna tichaktu tûr thu tam tak a sawi a. Hriattîrtu pawimawh tak pakhat chu Hebrai 13:1-ah kan hmu a ni. Chu chuan: ‘Unaute i hmangaihna hi awm zêl rawh se,’ tiin min fuih a. Chu mi châng chu kum 2016 kum châng atâna thlan a ni.

Kum 2016 kum châng: ‘Unaute i hmangaihna hi awm zêl rawh se.’ Hebrai 13:1

UNAUTE HMANGAIHNA CHU ENG NGE NI?

5. Unaute hmangaihna chu eng nge ni?

5 Unaute hmangaihna chu eng nge ni? Atîra Grik thu mal Paula hman awmzia tak chu “unaute ngainatna” a ni a. Unaute hmangaihna chu chhûngkaw zînga mite inkâr emaw, ṭhian ṭhate inkâr emawa awm inngainatna nghet leh duhawm tak a ni. (Johana 11:36) Unau anga inchhâl mai kan ni lo. Unau tak tak kan ni. (Matthaia 23:8) Paula chuan: “Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” a ti a. (Rom 12:10) Hêng thute hian unaute kan hmangaihna a ngheh dân a târ lang a ni. Kristian thu bulte ṭanchhan hmangaihna nêna ṭang kawp, he unaute hmangaihna hian Pathian mite chu inṭhian ṭha tak ni tûr leh inpumkhat tûrin a ṭanpui a ni.

6. Engtin nge Kristian dikte chuan unaute hmangaihna awmzia chu an hriatthiam?

6 ‘Unaute hmangaihna’ tih ṭawngkam chu Kristian thu leh hla chhuahah chauh hmuh tûr a awm a. Hmân lai Juda mite tân chuan “unau” tih ṭawngkam hi chhûngkhat lainate leh a châng chuan chhûngkaw zînga mi ni lo tuemaw sawi nâna hman a ni ṭhîn a. Mahse, Juda mi ni lo tuemaw sawi nâna hman a ni ngai lo. Amaherawhchu, Kristian dikte kan nih angin, khawi rama mi pawh ni se, Kristian dik tawh phawt chu kan “unaute” an ni. (Rom 10:12) Jehova chuan unau anga inhmangaih tawn tûrin min zirtîr a. (1 Thessalonika 4:9) Mahse, engvângin nge unaute hmangaihna lantîr zawm zêl chu a pawimawh?

ENGVANGIN NGE UNAUTE HMANGAIHNA LANTIR ZAWM ZEL CHU A PAWIMAWH?

7. (a) Unaute hmangaihna kan lantîr a pawimawh chhan ber chu eng nge ni? (b) Kan inhmangaih tawnna tihngheh a pawimawh chhan dang sawi rawh.

7 Unaute hmangaihna lantîr a pawimawh chhan ber chu Pathian Jehova’n chutianga ti tûra min hrilh vâng a ni a. Unaute kan hmangaih duh loh chuan Jehova kan hmangaih tak tak thei lo vang. (1 Johana 4:7, 20, 21) A chhan dang leh chu hun harsa kan tawh huna kan inmamawh tawn lehzual vâng a ni. Paula’n Hebrai Kristiante hnêna lehkha a thawn khân, mi ṭhenkhat chuan an in leh lote an kalsan thuai a ngai ang tih a hria a. Isua’n chu mi hun harsat dân tûr chu a sawi a ni. (Marka 13:14-18; Luka 21:21-23) Chumi hun a lo thlen hma chuan,  chûng Kristiante chuan an inhmangaih tawnna an tihngheh a la ngai ang.—Rom 12:9.

8. Hrehawm nasa tak inṭan hma tûn hunah hian eng nge kan tih ngai?

8 Mihring chanchina hrehawmna nasa ber chu a lo thleng ṭêp tawh a. (Marka 13:19; Thu Puan 7:1-3) “Hawh u, ka mite u, in pindan chhûngahte lût ula, in kawngte chu inkhâr khum rawh u: lungnih lohna hi a kian hmâ loh chu mitkhapkâr lek biru rawh u,” tih vaukhânna kan zawm a ngai ngei ang. (Isaia 26:20) Chûng ‘pindan chhûng’ chu kan awmna kohhran sawina a ni thei a. Chu chu kan unaute nêna Jehova kan biakna hmun a ni. Mahse, kan inkhâwmho ṭhin mai aia tam kan tih a ngai a. Paula chuan Hebrai Kristiante chu hmangaihna lantîr tawn tûra infuih tawn tûr leh thil ṭha intihsak tawn tûrin a hriatnawntîr a ni. (Hebrai 10:24, 25) Nakin huna kan tawh tûr fiahna engpawh tuar chhuak tûra min ṭanpui dâwn avângin, tûnah unaute kan hmangaihna chu kan tihngheh a ngai a ni.

9. (a) Tûn laiah unaute hmangaihna lantîr theihna hun remchâng eng nge kan neih? (b) Jehova mite’n unaute hmangaihna an lantîr dân entîrna pe rawh.

9 Hrehawm nasa tak inṭan hma, tûn lai hunah hian unaute hmangaihna lantîr theihna hun remchâng tam tak kan nei a. Kan unau tam takte chuan, lîrnghîng te, tuilian te, hurricane thlipui te, tsunami te, a nih loh leh leilung chhiatna dangte chu an tuar a. Kan unau ṭhenkhat chuan tihduhdahna an tuar bawk. (Matthaia 24:6-9) He khawvêl bawlhhlawh taka kan awm avângin, nî tin mai hian sum leh pai lamah harsatna kan tâwk a. (Thu Puan 6:5, 6) Mahse, kan unaute’n harsatna an tawh nasat poh leh, anmahni kan hmangaihna lantîr theihna hun remchâng kan nei lehzual a. He khawvêl mite hian hmangaihna lantîr lo mah se, unaute hmangaihna kan lantîr zawm zêl a ngai a ni. (Matthaia 24:12) [1]—Endnote en rawh.

ENGTIN NGE UNAUTE KAN HMANGAIHNA CHU KAN AWMTIR ZEL THEIH?

10. Tûnah eng nge kan bih chian ang?

10 Harsatna kan nei chung pawhin, engtin nge unaute hmangaihna kan lantîr zawm zêl theih? Engtin nge kan unaute chungah hetiang hmangaihna hi kan nei tih kan lantîr theih? Tirhkoh Paula chuan: ‘Unaute i hmangaihna hi awm zêl rawh se,’ tia a sawi hnu chuan, Kristiante’n kawng tam taka an lantîr theih dân a târ lang a. Tûnah, chûng zînga paruk chu i lo bih chiang ang u.

11, 12. Khualchhâwn thiamna lantîr tih chu eng tihna nge ni? (A thupui chunga milem en rawh.)

11 “Mikhualte chungah hmangaih chhuah theihnghilh suh u.” (Hebrai 13:2 chhiar rawh.) “Mikhualte chunga hmangaih chhuah” a nih loh leh khualchhâwn thiamna tih awmzia chu eng nge ni? Paula hman thu mal awmzia tak chu “hmêl hriat lohte chunga ngilneihna lantîr,” tihna a ni a. Chu ṭawngkam chuan Abrahama leh Lota min hriat chhuahtîr pawh a ni thei e. Hêng mi pahnihte hian an hriat loh mikhualte chungah ngilneihna an lantîr a. A tâwpah chuan Abrahama leh Lota chuan chûng mikhualte chu vântirhkohte an ni tih an hre ta a ni. (Genesis 18:2-5; 19:1-3) Hêng entîrna hian, Hebrai Kristiante chu mikhualte chunga unaute hmangaihna lantîr tûrin a fuih a ni.

12 Engtin nge mi dangte chungah khualchhâwn thiamna kan lantîr theih? Kan unaute chu inah chaw ei tûrin emaw, intihchak tawnna engemaw nei tûrin emaw kan sâwm thei a. Kan bial kantu leh a nupui chu nêl vak lo pawh ni ila, kan kohhran an rawn tlawh hunah chaw ei tûrin kan sâwm thei a ni. (3 Johana 5-8) Ei tûr buatsaih ṭeuh leh pawisa sên ṭeuh a ngai lo. Kan tum chu kan thil neihte hmanga an rilru lâk ni lovin, unaute tihchak hi a ni a. Kawng engemaw taka min rûl leh theite chauh kan sâwm tûr a ni lo. (Luka 10:42; 14:12-14) A  pawimawh ber chu khualchhâwn thiamna lantîr thei lo khawpa buai lutuk loh hi a ni.

13, 14. Engtin nge “phuara awmte chu” kan hriat reng theih?

13 “Phuara awmte chu . . . hre reng ula.” (Hebrai 13:3 chhiar rawh.) Paula’n he thu a ziah hian, rinna avânga lung in tâng unaute chungchâng a sawina a ni a. Kohhran chu ‘kawl bunte chunga lainatna’ an lantîr avângin a fak a ni. (Hebrai 10:34) Unau ṭhenkhat chuan Paula chu kum li a tân chhûngin an ṭanpui a; mahse, mi dangte chu hmun hla taka awm an ni. Engtin nge Paula chu an ṭanpui theih ang? A tân theih tâwp chhuahin an ṭawngṭaisak thei a ni.—Philippi 1:12-14; Hebrai 13:18, 19.

14 Tûn laiah, Thuhretu tam tak chu an rinna avângin lung inahte an tâng a. An bul hnaia awm unaute chuan an mamawh ang ṭanpuina an pe thei a ni. Mahse, a tam zâwk chu, an tânna hmun aṭanga hla takah kan awm a. Anni chu engtin nge kan ṭanpui theih a, kan theihnghilh loh theih? Unaute hmangaihna chuan an tâna theih tâwp chhuaha ṭawngṭai tûrin min chêttîr ang. Entîr nân, Eritrea rama kum 20 chuang tâng tawh unau Paulos Eyassu-a te, Isaac Mogoc-a te, leh Negede Teklemariam-a te pawh tiamin, lung ina tâng kan unaute leh naupangte tân kan ṭawngṭaisak thei a ni.

15. Engtin nge kan inneihna chu kan chawimawi theih?

15 “Mi zawng zawng zîngah inneih hi chawimawiin awm rawh se.” (Hebrai 13:4 chhiar rawh.) Nungchang thianghlimna hmangin unaute hmangaihna kan lantîr thei bawk. (1 Timothea 5:1, 2) Entîr nân, unaupa emaw, unaunu emaw nên mipat hmeichhiatna kan hman chuan amah leh a chhûngte chu kan tina ngei ang. Kan unaute chunga rinna kan neih chu tihchhiat a ni bawk ang. (1 Thessalonika 4:3-8) Pasalin saruak lem leh thuziakte a en ṭhîn tih a hriat chhuah huna a nupui awm dân tûr chu han ngaihtuah teh. A pasal chuan ani chu a hmangaihin, an inneihna chu a zah niin a ngai ang em?—Matthaia 5:28.

16. Engtin nge lungâwina chuan unaute hmangaihna lantîr tûra min ṭanpui?

16 ‘I thil neih chhun chungahte chuan lungawi rawh.’ (Hebrai 13:5 chhiar rawh.) Jehova rinchhanna chuan kan thil neih chunga  lungâwina nei tûrin min ṭanpui a. Engtin nge chu chuan unaute hmangaihna lantîr tûrin min ṭanpui? Lungâwina kan neih chuan, kan Kristian unaute chu pawisa emaw, thil dang emawte aiin an pawimawh zâwk tih kan hre reng ang. (1 Timothea 6:6-8) Kan unaute chungah kan phunnawi lo vang a, kan dinhmunah lah lungâwi lohna kan nei lo vang. Mi dangte kan thîkin, kan duhâm hek lo vang. Chu aiin, lungâwina kan neih chuan kan thilphal zâwk ang.—1 Timothea 6:17-19.

17. Engtin nge ‘huai taka awmna’ chuan unaute hmangaihna lantîr tûra min ṭanpui?

17 ‘Huai takin awm rawh.’ (Hebrai 13:6 chhiar rawh.) Jehova rinchhanna chuan fiahna khirh takte tuar chhuak tûrin huaisenna min pe a. He huaisenna hian rilru put hmang ṭha nei tûrin min ṭanpui a ni. Rilru put hmang ṭha kan neih hian, kan unaute tichak leh thlamuanin, unaute hmangaihna chu kan lantîr thei a. (1 Thessalonika 5:14, 15) Chhan chhuahna a hnai tawh tih hriain, hrehawm nasa tak hun chhûngah pawh kan huaisen thei a ni.—Luka 21:25-28.

18. Engtin nge kan upate chungah unaute hmangaihna kan tihngheh theih?

18 ‘In hotute chu hre reng rawh u.’ (Hebrai 13:7, 17 chhiar rawh.) Kan kohhrana upate chuan kan tâna thawkrimin an hunte an hmang a. An thiltih zawng zawngte kan ngaihtuah hian, anmahni kan hmangaihna leh kan ngaihhlutna a pung a ni. Kan thiltih engemaw tak avânga an lâwmna hloh va, an lungngaih chu kan duh lo. Chu ai chuan, inhuam taka thuâwih chu kan duh a ni. Hetiang kawng hian, ‘an hnathawh avângin kan hmangaihin, kan ngaihlu’ a ni.—1 Thessalonika 5:12-13.

Kan tâna upate hnathawh chu i hlut em? (Paragraph 18-na en rawh)

LANTIR LEHZUAL RAWH

19, 20. Engtin nge unaute hmangaihna kan lantîr lehzual theih?

19 Jehova mite chuan unaute hmangaihna an neih avângin hriat an hlawh a. Paula hun laiah pawh chutianga hriat an ni. Mahse, Paula chuan uanute hmangaihna nasa lehzuala lantîr tûrin a unaute chu a fuih a. “Nasa lehzuala ti zêl tûrin ka ngên a che u,” a ti a. (1 Thessalonika 4:9, 10) Unaute hmangaihna kawngah hmasâwnna tûr a awm zêl dâwn tih a chiang hle!

20 Chuvângin, kumina kan Kingdom Hall-a kum châng kan hmuh hian, hêng zawhnate hi i ngaihtuah ang u: Khualchhâwn thiamna ka lantîr lehzual thei ang em? Engtin nge lung in tâng kan unaute chu ka ṭanpui theih? Pathian ruahman inneihna hi ka chawimawi em? Lungâwina dik tak nei tûrin engin nge min ṭanpui ang? Engtin nge Jehova chu ka rinchhan lehzual theih? Engtin nge hotute thu ka âwih lehzual theih? tiin. Hêng kawng chi ruka hma sâwn tûra ṭan kan lâk chuan, kum châng chu banga târ mawi mai ni lovin, Paula thu; ‘Unaute i hmangaihna hi awm zêl rawh se,’ tih zâwm tûra min hriattîrtu a lo ni ang.—Hebrai 13:1. (ws16.01-E)

^ [1] (paragraph 9-na) Jehova Thuhretute’n chhiatna an tawh hunah inhmangaih tawnna an lantîr dân entîrna hmu tûrin July 15, 2002, Vênnainsâng (English), phêk 8-9-na, leh Jehovah’s Witnesses—Proclaimers of God’s Kingdom (English), bung 19-na en rawh.