A chhûng thu-ah lût rawh

A chhûnga thuawmte-ah lût rawh

Jehova Thuhretute

Select language Mizo

“In Zîngah Kan Tel Ve Dâwn”

“In Zîngah Kan Tel Ve Dâwn”

“In zîngah kan tel ve dâwn, LALPA chu in hnênah a awm tih kan hria a ni.”—ZAKARIA 8:23, C.L. Re-edited.

HLA: 32, 31

1, 2. (a) Kan hun laia thilthleng tûr eng nge Jehova’n a sawi? (b) He thuziakah hian eng zawhnate nge chhân a nih ang? (A thupui chunga milem en rawh.)

JEHOVA chuan kan hun lai hian, “hnam tin leh ṭawng tin zînga mi sâwm an lo kal ang a, Juda pakhat kawrfual vuan chungin ‘In zîngah kan tel ve dâwn, LALPA chu in hnênah a awm tih kan hria a ni,’ an ti ang,” tiin a sawi a. (Zakaria 8:23, C.L. Re-dited) “Juda pakhat” chuan Pathianin thlarau thianghlima hriak a thihte chu a entîr a. Anni chu “Pathian Israelte” tia koh an ni bawk. (Galatia 6:16) “Mi sâwm” chuan leia chatuan nun beiseina neite a entîr a. Anni chuan Jehova’n he hriak thihte mal a sâwm tih an hria a, an ruala Pathian biak chu chawimawinaah an ngai a ni.

2 Zâwlnei Zakaria ang bawkin, Isua chuan Pathian mite chu an inpumkhat ang tih a sawi a. Ani chuan vân lam beiseitute chu “pâwl tlêmte,” a ti a, lei lam beiseitute chu “berâm dang” tiin a ko a ni. Mahse, Isua chuan anni chu “pâwl khatin” an ni ang a, “vêngtu pakhat”—amah Isua—hnung chu an zui ang tih a sawi bawk. (Luka 12:32; Johana 10:16) Pâwl hnih a awm avangin, mi ṭhenkhat chuan heti hian an ngaihtuah mai thei: (1) Berâm dangte tân tûn laia hriak thih a la bângte hming an hriat vek a  ngai em? (2) Hriak thihte chu eng angin nge an inngaih ang? (3) Ka awmna kohhrana tuemawin Hriatrengna chhang leh uain kîl ṭan ta se, engtin nge ani chu ka cheibâwl ang? (4) Hriatrengna chhang leh uain kîltute an pung chho zêl tih ka hriat hian ka lo buai a ngai em? Hêng zawhnate hi he thuziak hian a chhâng ang.

TUN LAIA HRIAK THIHTE HMING KAN HRIAT VEK A NGAI EM?

3. Engvângin nge kan tân mi 1,44,000 zînga telte chu hriat chian theih a nih loh?

3 Berâm dangte tân tûn laia hriak thih a la bângte hming an hriat vek a ngai em? Ngai lo. Engvângin nge? Hêng mite hian an lâwmman chu an dawng ngei ang tih tuman an hriat chian theih loh vâng a ni. [1] (Endnote en rawh.) Pathianin anni chu vâna kal tûrin sâwm mah se, rinawm taka an awm reng chauhvin an lâwmman chu an dawng ang. Chu chu hriain, anmahni ‘tihder nân’ Setana chuan “zâwlnei derte” a hmang a. (Matthaia 24:24) Jehova’n rinawma a nemngheh hma loh chu hriak thih Kristiante chuan lâwmman an dawng ngei ang tih an hre chiang thei lo va. Jehova chuan he nemnghehna, a nih loh leh chhinchhiahna hnuhnûng ber hi an thih hma lawk, a nih loh leh “hrehawm nasa tak” a inṭan hma lawkah a pe ang.—Thu Puan 2:10; 7:3, 14.

4. Tûn laiah leia hriak thih zawng zawngte hming hriat theih a nih loh chuan, engtin nge an zînga kan “tel ve” theih?

4 Tûn laiah leia hriak thih a la bângte hming chu hriat vek theih a nih si loh chuan, engtin nge berâm dangte chu an hnêna an “tel ve” theih ang? “Mi sâwm” chuan “Juda pakhat kawrfual vuan chungin ‘In zîngah kan tel ve dâwn, LALPA chu in hnênah a awm tih kan hria a ni, an ti ang,” tih Bible chuan a sawi a. He Bible châng hian Juda pakhat chungchâng a sawi a. Mahse, “in zîngah” leh “in hnênah” tih ṭawngkamte hian mi pakhat aia tam a kâwk a ni. Hei hian Juda mi chuan pakhat chauh ni lovin, hriak thih pâwlho a entîr a. Chu chu berâm dangte chuan hriain, an rualin Jehova rawng an bâwl a ni. An tân chuan an hming hriat vek leh a mi mala an zui vek a ngai lo. Min Hruaitu chu Isua a ni a, Bible chuan amah chauh kan zui tûr a ni tih min hrilh a ni.—Matthaia 23:10.

HRIAK THIHTE CHU ENG ANGIN NGE AN INNGAIH ANG?

5. Hriak thihte chuan eng vaukhânna nge ngun taka an ngaihtuah ang a, engvângin nge?

5 Hriak thihte chuan 1 Korinth 11:27-29-a kan hmuh vaukhânna hi ngun takin an ngaihtuah tûr a ni. (Chhiar rawh.) Engtin nge hriak thih chuan Hriatrengna chhang leh uain chu “tlâk lova” a kîl theih? Jehova nêna an inlaichînna ṭha leh a rinawmna vawng lo hriak thih pakhatin chhâng leh uain a kîl chuan Pathian a zah lo tihna a ni. (Hebrai 6:4-6; 10:26-29) He vaukhânna khauh tak hian, hriak thihte tân “Krista Isuaa Pathian chung lam koh chhan lâwmman hmu tûrin” an rinawm ngei a ngai tih a hriat nawntîr a ni.—Philippi 3:13-16.

6. Hriak thih Kristiante chu eng angin nge an inngaih ang?

6 Paula chuan hriak thihte hnênah: “A kohna che u phua awm tûrin, kei, Lalpaa mi tâng hian ka ngên a che u,” tiin a hrilh a. Engtin nge chu chu an tih ang? Ani chuan ‘inngaihtlâwmna leh thuhnuairawlhna zawng zawng nei a, hmangaihnaa indawh tawn chunga dawhtheihna neia remna phuarnaah chuan thlarau inpumkhatna chu vawng tûra beihna’ hmangin an ti thei tih a hrilhfiah a ni. (Ephesi 4:1-3) Jehova thlarau thianghlim chuan a chhiahhlawhte chu chapo lova, inngaitlâwm  tûrin a ṭanpui a. (Kolossa 3:12) Chuvângin, hriak thihte chu mi dangte aia ṭha zâwkah an inngai lo. Jehova chuan an hnênah a chhiahhlawh dangte aiin thlarau thianghlim a pe tam zâwk kher lo tih an hria a ni. Bible thutak chu mi dangte aiin hre thiam zâwk tûrah an inruat lo va. Mi dang tuemaw hnênah hriak thih an ni ve a, Hriatrengnaa chhang leh uain kîl ve tûrin an sâwm ngai lo bawk ang. Chu ai chuan, an inngaitlâwm a, vâna kal tûr chuan Jehova chauhvin a sâwm thei tih an hria a ni.

7, 8. Hriak thihte chuan eng nge an beisei loh va, engvângin nge?

7 Hriak thihte chuan vâna kal tûra sâwm nih chu chawimawina angin ngai mah se, mi dangte’n dang lam taka an cheibâwl bîk chu an beisei lo. (Ephesi 1:18, 19; Philippi 2:2, 3 chhiar rawh.) Jehova’n hriak a thih hian, chu chu mi dangte a hriattîr lo tih an hria a. Chuvângin, hriak thih chuan mi ṭhenkhatin hriak thih a ni tih an rin nghâl loh pawhin mak a ti lo. Bible-ah Pathian hnên ata chanvo danglam tak dawng nia insawitu chu ring nghâl lo tûrin min hrilh tih a hre bawk. (Thu Puan 2:2) Hriak thih chuan mi dangte ngaihsak lutuk a inbeisei loh avângin, mite nêna an vawikhat inhmuhnaah hriak thih a nih thu a sawi lo vang. A nihna takah chuan, tumah a hrilh lo pawh a ni thei ang. Vâna thil ropui tak a tih tûrte chu a uanpui hek lo vang.—1 Korinth 1:28, 29; 1 Korinth 4:6-8 chhiar rawh.

8 Hriak thih Kristiante chuan, pâwl khata inphuarkhâwm ang maiin hriak thih dangte chauh an kâwm lo vang. Anni chuan hriak thihte chungchâng an sawi theih nân, a nih loh leh a huhova Bible an zir theih nân hriak thih dangte zawn chhuah chu an tum lo. (Galatia 1:15-17) Chutianga an tih chuan kohhranah inpumkhatna a awm lo vang a. Pathian mite thlamuanna leh inpumkhatna neihtîrtu thlarau thianghlim kalhzâwnga thil ti an lo ni ang.—Rom 16:17, 18 chhiar rawh.

ENGTIN NGE ANNI CHU I CHEIBAWL ANG?

9. Hriatrengnaa chhang leh uain kîlte i cheibâwl dân chungchângah engvângin nge i fîmkhur a ngaih? (“ Hmangaihna Chu ‘A Che Mawi Lo Lo Va’” tih bâwm chu en rawh.)

9 Engtin nge hriak thih unaute chu i cheibâwl ang? Isua chuan a zirtîrte hnênah: “Nangni zawng zawng chu unau in ni si a,” tiin a hrilh a. “Tupawh inngaihlu apiang an tlâwm ang a, tupawh inngaitlâwm apiang chawimawiin an awm ang,” tiin a sawi zawm a ni. (Matthaia 23:8-12) Chuvângin, mi chu hriak thih Krista unau pawh ni se, lo ngaihsân lutuk chu a dik lo. Bible-in upate chungchâng a sawi hian, an rinna entawn tûrin min fuih a; mahse, mihring hi hruaituah kan ruat thei tih a sawi lo. (Hebrai 13:7) Bible chuan ṭhenkhatin ‘a leh hniha chawimawi an phu’ tih a sawi ngei mai. Mahse, anni chu hriak thih an nih vâng ni lovin, “rorêl ṭhate” leh “thu hril leh zirtîrnaa thawk rimte” an nih vâng a ni. (1 Timothea 5:17) Hriak thihte chu kan fak lutuk emaw, kan ngaihsak lutuk emaw a nih chuan awm nuam lo deuhvin kan siam ang a. A nih loh leh, a aia pawi zâwk chapona kan neihtîr thei a ni. (Rom 12:3) Kan zînga tumah hian, Krista unau hriak thihte zînga pakhat chutianga sual lian tak tihtîr chu kan duh lo vang!—Luka 17:2.

Engtin nge Hriatrengna chhang leh uain kîltu tuemaw chu i cheibâwl ang? (Paragraph 9-11-na en rawh)

10. Engtin nge hriak thih Kristiante chungah zahna i lantîr theih?

10 Engtin nge Jehova hriak thihte zahna kan lantîr theih? Hriak thih an nih dân kan zâwt lo vang a. Hei hi mi mal thil a ni a, hre tûrin dikna kan nei lo. (1 Thessalonika 4:11; 2 Thessalonika 3:11) An pasalte emaw, an nupuite emaw, a nih loh leh an nu leh pate emaw, a nih loh leh an pianpui unaute emaw  chu hriak thih an ni veah kan ngai tûr a ni lo bawk. Mi chuan a beiseina chu a chhûngkua aṭanga a rochun a ni si lo va. (1 Thessalonika 2:12) Mi dangte rilru tina thei zawhnate zawh chu kan pumpelh tûr a ni bawk. Entîr nân, hriak thih unaupa nupui chu a pasal tel lova leia chatuana nun a hman dân tûr kan zâwt lo vang. Khawvêl tharah Jehova chuan ‘thil nung zawng zawng châkna chu a tihrehsak,’ a nih loh leh a phuhrûksak ang tih kan chiang hle si a.—Sâm 145:16.

11. “Mi tlawn” kan pumpelh hian engtin nge mahni invênghim kan nih?

11 Hriak thihte chu mi dangte aia pawimawh zâwk anga kan cheibâwl loh hian mahni kan invêng tihna a ni bawk. Engtin nge? Bible chuan kohhranah hriak thih anga insawi “unau der” an awm thei tih min hrilh a. (Galatia 2:4, 5; 1 Johana 2:19) Chu bâkah, hriak thih ṭhenkhat chu an rinawm reng lo pawh a ni thei bawk. (Matthaia 25:10-12; 2 Petera 2:20, 21) “Mi tlawn” kan pumpelh chuan, hriak thihte an ni emaw, mi hmingthang takte an ni emaw, a nih loh leh hun rei tak chhûng Jehova rawng lo bâwl tawh an ni emaw pawh ni se, mihring hnung kan zui ngai lo vang. Tichuan, an lo rinawm loh va, kohhran an chhuahsan pawhin Jehova kan rinna chu kan hloh lo vang a, a rawngbâwlna chu kan bânsan lo vang.—Juda 16, C.L. Re-edited.

KILTU AN TAM AVANGIN KAN BUAI A NGAI EM?

12, 13. Engvângin nge Hriatrengnaa chhang leh uain kîltu a punna avângin kan buai loh vang?

12 Kum tam tak chhûng chu, Hriatrengnaa chhang leh uain kîltu an tlêm tawlh tawlh a. Mahse, tûn hnai aṭang khân, kum tin hian an pung chho zêl a ni. Chu mi chungchângah kan buai a ngai em? Ngai lo. A chhan i lo en ang u.

13 “Lalpa chuan ama tate chu a hria.” (2 Timothea 2:19) Hriatrengnaa chhang leh uain kîltu zât chhiartu unaute chuan Jehova angin hriak thih dik takte chu an hre thei lo va. Chuvângin, chûng zîngah chuan hriak thih nia inhria, ni si lote an tel a ni. Entîr nân, chhang leh uain kîltu ṭhenkhat chuan a hnuah an kîl leh tawh lo va. Mi dangte chuan rilru lam leh ngaihtuahna lama buaina an neih avângin Krista nêna vâna rorêl tûr niin an inhria a. Chuvângin, leia hriak thih la awm zât dik tak chu kan hre lo a ni.

14. Bible-in hrehawm nasa tak a inṭan huna leia hriak thih awm zât tûr chungchângah eng nge a sawi?

14 Hriak thihte vâna hruai tûra Isua a lo kal hunah, anni chu khawvêl hmun tinah an la awm ang. Bible chuan, Isua’n “a vântirhkohte chu, tawtawrâwt ri nasa tak nên a tîr chhuak ang. Anni chuan a thlante chu kâwl kil li ata—vân tâwp aṭanga a tâwp lehlam thlengin—an lâwr khawm ang,” tih a sawi a. (Matthaia 24:31) Bible chuan ni hnuhnûng chhûng hian, leiah hriak thih tlêm tê chauh an la bâng ang tih a târ lang bawk. (Thu Puan 12:17) Mahse, hrehawm nasa tak a inṭan hunah eng zât nge la bâng dâwn tih erawh a sawi lo a ni.

15, 16. Jehova thlan 1,44,000-te chungchângah eng nge kan hriatthiam ngai?

 15 Jehova chuan hriak thihte a thlan hun tûr chungchângah thu tlûkna a siam. (Rom 8:28-30) Jehova chuan Isua thawhleh hnuah hriak thihte chu a thlang ṭan a. Kum zabi khatnaa Kristian dik zawng zawngte chu hriak thih an ni vek niin a lang. Chu mi hnu kum za tam tak chhûng chuan, Kristian nia in chhâl tam takte chu Krista hnungzuitu dik tak an ni lo. Chuti chung pawhin, chûng hun chhûngin Jehova chuan Kristian dik tlêm tê chu hriak a thih a. Anni chu Isua sawi buh lem zînga buh tak ang an ni. (Matthaia 13:24-30) Ni hnuhnûng chhûng hian, Jehova chuan mi 1,44,000 zînga tel tûrte chu a la thlang zawm zêl a ni. [2] (Endnote en rawh.) Pathian chuan tâwpna a thlen hma lawka an zînga tel tûr mi ṭhenkhat thlan a rêlthlûk chuan, thil dik a ti a ni tih kan ringhlel hauh lo vang. (Isaia 45:9; Daniela 4:35; Rom 9:11, 16 chhiar rawh.) [3] (Endnote en rawh.) Tlai lama hna thawk ṭantute a cheibâwl dân chungchânga an pu sawisêltu hna thawktute ang ni lo tûrin kan fîmkhur tûr a ni.—Matthaia 20:8-15 chhiar rawh.

16 Vân lam nun beiseina nei zawng zawngte chu “bawi rinawm, fing tak,” zînga mi an ni vek lo. (Matthaia 24:45-47) Kum zabi khatnaa a tih ang bawkin, Jehova leh Isua chuan tûn laiah mi tam takte châwm tûrin emaw, zirtîr tûrin emawin mi tlêm tê an hmang a. Kum zabi khatnaa hriak thih Kristian tlêm tê chauh chu Kristian Grik Pathian Lehkha Thu ziak tûra hman an ni a. Tûn laiah pawh, Pathian mite hnêna “a hun apianga an chaw” pe tûrin hriak thih Kristian tlêm tê chauh chuan mawhphurhna an nei a ni.

17. He thuziak aṭangin eng nge kan zir?

17 He thuziak aṭang hian eng nge kan zir? Jehova chuan a mi tam zâwkte chu leia chatuan nunna pe tûr leh Isua nêna rorêl tûrte chu vâna nung tûrin thu tlûkna a siam a. Jehova chuan a chhiahhlawh zawng zawng “Juda pakhat” leh “mi sâwm” chu lâwmman a pe ve ve a, dân thuhmun zâwm tûr leh rinawm reng tûrin a beisei tlat a ni. Anni chu an inngaitlâwm reng tûr a ni a. Rawng an bâwl tlângin, an inpumkhat tûr a ni. Chu bâkah, kohhranah remna awm reng tûrin an thawk ṭheuh tûr a ni bawk. Tâwpna kan hnaih rual hian, Jehova rawngbâwl zêlin pâwl khat angin Krista hnung chu i zui zêl ang u. (ws16.01-E)

^ [1] (paragraph 3-na) Sâm 87:5, 6 sawi angin, nakinah Pathianin vâna Isua nêna rorêltute zawng zawng hming chu a târ lan a rinawm a ni.—Rom 8:19.

^ [2] (paragraph 15-na) Tirhkohte 2:33 chuan Isua chu hriak thihtu angin târ lang mah se, a sâwmtu tak chu Pathian Jehova a ni.

^ [3] (paragraph 15-na) Hriat belh nân, Vênnainsâng, May 1, 2007, (English) phêk 30-31-na en rawh.